Jeremías 31:1-40
31 “Mbiʼi rúʼko̱, eʼthí Jeobá, ikhúún mani̱ndxu̱ʼ Dios ndrígu̱ún náa xúgíʼ xuajin majkhaʼ ndrígóo Israel ga̱jma̱a̱ ikhiin mani̱ndxu̱ún xuajñunʼ”.
2 Rígi̱ rí naʼthí Jeobá:
“Xa̱bu̱ bi̱ tákháñún ga̱jma̱a̱ espada nikumu̱ún rí niʼni̱i̱ a̱jkiu̱ún náa ku̱ba̱ʼ mijxooʼ,índo̱ Israel xtáa ra̱jkha̱ náa mbaaʼ rí mbayáa jxu̱u̱ʼ”.
3 Jeobá nisngájmaminaʼ asndu mitsínguánʼ náa ikhúún ga̱jma̱a̱ niʼthí:
“Nindoʼ ka̱ya̱a̱ʼ ga̱jma̱a̱ mbá ngajua rí ndajyúuʼ asndu kámuu.
Ikha jngóo ni̱ʼkhá ka̱ña̱a̱n náa ikhúún ga̱jma̱a̱ mbá ngajua rí tsétumuu.*
4 Makujxi̱ín ma̱ni̱ rí mani̱ndxa̱a̱ʼ mbá xuajin mbu̱júu̱.
Israel, dxáʼgú bi̱ xóó tsébóoʼ ga̱jma̱a̱ xa̱bu̱ matanga̱án mida mbujuáaʼ panderetas ndrígáaʼ,magajnáaʼ gáratsia ga̱jma̱a̱ gagi.
5 Matanga̱án matadu ixu̱u̱ uva náa kúbá dí rígá náa Samaria,ga̱jma̱a̱ bi̱ gúdu mu̱phu̱ xndúu rí gájma̱a̱.
6 Numuu rí maʼga̱nú mbiʼi dí bi̱ nuyejngoo náa kúbá dí rígá náa Efraín mundxa̱ʼwa̱:
‹¡Gu̱ʼgua̱, gutsimulú náa Sion, náa xtáa Jeobá Dios ndrígúlú!›”.
7 Numuu dí rígi̱ rí naʼthí Jeobá:
“Gu̱ni̱ ajmúú ga̱jma̱a̱ gagi náa Jacob.
Gaʼdxala numuu rí ikháanʼ guaʼdáá itháan numala ki xóo i̱ʼwáʼ xuajin.
Gu̱tala, gu̱ni̱ ajmúú ga̱jma̱a̱ gu̱tha̱:
‹Tátá Jeobá, atani̱ káwíin xa̱bia̱a̱ʼ Israel bi̱ xóó niguanún›.
8 Maʼkháaʼ kaguáanʼla mbu̱júu̱ asndu náa ku̱ba̱ʼ dí rígá náa norte,magímbáanʼla asndu náa naguámbári̱go̱o̱ ku̱ba̱ʼ.
Náa majñala makuwá bi̱ tsíkruigu̱u̱n ga̱jma̱a̱ bi̱ guʼxuʼ,gu̱ʼu̱ bi̱ kudewíin e̱ji̱n ga̱jma̱a̱ bi̱ inu má muguaʼdíin e̱jñu̱ún, xúgíinʼ mbóó jnduʼ.
Ra̱ʼkhá tháán mbaʼáanʼ matangáanʼla gi̱i̱.
9 Maguwa̱a̱ʼla rumbi̱ya̱ʼ.
Ikhúún maʼgá kaguáanʼla á mu nutakáñúʼ. Rí magáwíinʼ a̱jkiu̱nʼ ka̱ya̱la.
Maʼgá kaguáanʼla náa rígá iyaʼ dí xkujyuuʼ,náa kamba̱a̱ rí mbáníí náa xájngrádáanʼla.
Numuu rí ikhúún nindxu̱ʼ Anu̱u̱* Israel ga̱jma̱a̱ Efraín nindxu̱u̱ a̱ʼdá giʼniuʼ”.
10 Xuajin, gudxawíín ajngóo Jeobá,ga̱jma̱a̱ gu̱thala náa isla* dí rígá mitsínguánʼ:
“Bi̱ nixídiríʼiin xa̱bu̱ Israel ikhaa má gágímbíin.
Ikhaa mañewu̱u̱n xóo mbáa baxtúu bi̱ nañewu̱u̱n mugiu̱u̱.
11 Numuu rí Jeobá maʼtsiríya̱a̱ʼ Jacobga̱jma̱a̱ maʼni kríyaaʼ náa ñawúúnʼ bi̱ itháan xkujiinʼ xóo ikhaa.
12 Maguwáánʼ ga̱jma̱a̱ asndu gagi gúndxa̱ʼwa̱ náa bíjní mitsídánʼ dí rígá náa Sion,maʼdxala numuu rí májánʼ a̱jkiu̱u̱n Jeobá,ga̱jma̱a̱ numuu trigo, vino nuxi̱ʼ, aceitema̱ngaa e̱jñu̱ún mugiala ga̱jma̱a̱ xediala.
Ikhiin mani̱ndxu̱ún xóo mbá jardín rí nixtagíyááʼ májánʼ,ga̱jma̱a̱ nimbá miʼtsú ni xákaguabáanʼla”.
13 “Mbiʼi rúʼko̱ dxáʼgú bi̱ xóó tsébóoʼ ga̱jma̱a̱ xa̱bu̱ maʼtsia ga̱jma̱a̱ gagi,xúʼko̱ má jiámá ga̱jma̱a̱ wa̱ʼxa̱ʼ* mangiin xabuanii.
Ma̱ni̱ rí makuwá gagi ni xákúwá ngíná.
Mani̱i̱ a̱jkiu̱ún ga̱jma̱a̱ ga̱ʼkhu̱ ndrígu̱ún.
14 Ma̱ni̱ rí ndxajkun maguaʼdáá wéñuuʼ ganitsu*ga̱jma̱a̱ xa̱bu̱ xuajñunʼ makuwá májánʼ numuu rí májáanʼ a̱jkiu̱nʼ”, eʼthí Jeobá.
15 “Rígi̱ rí naʼthí Jeobá:
‹Náa Ramá nawáán mbá aʼwá, rí mbáa nambi̱ya̱ʼ ga̱jma̱a̱ nagáwiinʼ a̱jkiu̱u̱n,Raquel bi̱ nambi̱ya̱ʼ ga̱jma̱a̱ numún e̱ji̱i̱n.
Na̱nguá eniñaminaʼ muni̱i̱ a̱jkiu̱u̱nnumuu rí ikhiin ní ndawi̱i̱n›”.
16 Rígi̱ rí naʼthí Jeobá:
“Atatsíñááʼ ratambi̱ya̱ʼ ga̱jma̱a̱ ataxúdíi iyooʼ idaaʼ,numuu rí mba̱a̱ rí gátandrígúu ga̱jma̱a̱ numuu rí nitani̱, eʼthí Jeobá.
‹Ikhiin magajníínla náa ku̱bu̱únʼ xa̱bu̱ sia̱nʼ›.
17 Rígá mbá rí ikháán xtaʼti̱i̱n nda̱wa̱á, eʼthí Jeobá.
‹E̱jña̱a̱ʼ matangi̱ín náa mbañúúnʼ›”.
18 Nidxawuun rí Efraín nambi̱ya̱ʼ ngínúu:
‹Ikháán nitaxprígúʼ ga̱jma̱a̱ ikhúún niʼgíiʼ a̱jkiu̱nʼ nijuiʼsngóʼ,xóo mbáa a̱ʼdá xédí bi̱ xóó tséguma mánsíi.
Ayu̱u̱ʼ jchúún, ikhúún nandoʼ maʼgáaʼ,numuu rí ikháán nindxa̱a̱ʼ Jeobá Dios ndrígóʼ.
19 Nda̱wa̱á dí nitangu̱ún, nigáwíinʼ a̱jkiu̱nʼ,nda̱wa̱á rí nijkhánú nikro̱ʼo̱ʼ, ni̱xnu̱u̱ xtiyuʼ numuu rí xtáá ngíná.
Niti̱yu̱ʼ ga̱jma̱a̱ niguma majtiu̱u̱nʼnati̱yu̱ʼ má xúʼko̱ ga̱jma̱a̱ numuu rí ni̱ni̱ nákha dxámá nindxu̱ʼ›”.
20 “Lá raʼkháa Efraín nindxu̱u̱ mbáa a̱ʼdióʼ bi̱ mitsiʼyáa, mbáa a̱ʼdióʼ bi̱ nandoʼ ka̱yo̱o̱ ráʼ.
Tséʼniuu má iwáá na̱tha̱ dí raʼkhí ga̱jma̱a̱ numuu ikhaa, mú narmáʼáan a̱jkiu̱nʼ ka̱yo̱o̱.
Ikha jngóo a̱jkiu̱nʼ* nambi̱ya̱ʼ ga̱jma̱a̱ numuu ikhaa.
Magáwíinʼ a̱jkiu̱nʼ má xúʼko̱ ka̱yo̱o̱”, eʼthí Jeobá.
21 “Atandri̱ga̱ tsinaʼ náa kamba̱a̱ga̱jma̱a̱ atarngujxi̱ itsí.
Atayáá xú kaʼnii nindxu̱u̱ kamba̱a̱ ga̱jma̱a̱ náa kaʼyáaʼ mi̱dxu̱ʼ.
Aya̱a̱ʼ Israel, dxáʼgú bi̱ xóó tsébóoʼ ga̱jma̱a̱ xa̱bu̱. Atanga̱án náa xuajñaanʼ.
22 Wáxióʼ bi̱ tséwi̱ji̱ jmbu asndu nguáná gátatsiʼñááʼ ratani̱ a̱jma̱ a̱jkia̱a̱nʼ rá.
Numuu rí Jeobá niʼni mbá rí nuxi̱ʼ náa tsu̱du̱u̱ ku̱ba̱ʼ:
Mbáa a̱ʼgu̱ magua̱ʼa̱ wéñuuʼ mbayáaʼ mbáa xa̱biya̱”.
23 Rígi̱ rí naʼthí Jeobá bi̱ naʼtáñajúúnʼ ángeles, Dios ndrígóo Israel: “Ikhiin matangi̱i̱n muthi ajngáa rígi̱ náa ku̱ba̱ʼ ndrígóo Judá ga̱jma̱a̱ náa xuajin dí rígá ikhí índo̱ gáʼkha̱a̱ kagui̱i̱n bi̱ ni̱jkha̱ kiʼdiin: ‹Jeobá gáʼni tsajkurámáanʼ ikháán bi̱ xtaʼdiin xa̱bu̱ bi̱ nuni̱ rí jmbu, kúbá rí kaʼwu›.
24 Ikhí makuwá mbóó nduʼ mbá xúgíinʼ, Judá ga̱jma̱a̱ xuajin dí rígá ikhí, bi̱ nudu ga̱jma̱a̱ bi̱ nuñewu̱u̱n mugu̱.
25 Ma̱ni̱ rí mbayáa tsiaki̱i̱ bi̱ néʼngo̱o̱, maxnu̱u̱ rí ndayóo bi̱ wabaaʼ”.
26 Índo̱ ndi̱jui̱i̱ʼ nigíʼdu̱u̱ ni̱yejxi̱ mbájndi, ikhú ndi̱yo̱o̱ rí tsímáá nigú.
27 “Atayáá na̱ʼkha̱ mbiʼi, eʼthí Jeobá, ma̱ni̱ rí náa goʼwóo Israel ga̱jma̱a̱ náa goʼwóo Judá maʼni mbaʼin e̱jñu̱ún* xa̱bu̱ ga̱jma̱a̱ e̱jñu̱ún xujkhúʼ”.
28 “Xó má nixtáá xawii náa ikhiin mu marubu, maxpígúu, ma̱ni̱ ga̱jxi̱i̱, ma̱ni̱ gámbáa ga̱jma̱a̱ ma̱ni̱ dí ra̱májánʼ, xúʼko̱ má gáxtáá xawii náa ikhiin mu mani̱i̱ ga̱jma̱a̱ ma̱du, eʼthí Jeobá.
29 Mbiʼi rúʼko̱ xúthi: ‹Xabuanii ni̱ʼphu̱ uva rí miga̱ʼ, mú e̱ji̱n ndiyáá dí ra̱miʼtsi›.*
30 Gajkhun rí mámbáa makhañúu ga̱jma̱a̱ numuu rí nikiéʼkhúún á mu mbáa na̱ʼkhu̱ uva rí miga̱ʼ ikhaa mbaʼyoo dí ramiʼtsí”.
31 “Atayáá na̱ʼkha̱ mbiʼi, eʼthí Jeobá, mambanúʼ nuxi̱ʼ gajmíʼ bi̱ kúwá náa goʼwóo Israel ga̱jma̱a̱ bi̱ kúwá náa goʼwóo Judá.
32 Xánindxu̱u̱ xóo rí nimbánuʼ gajmíʼ wajin xiʼñúúnʼ mbiʼi rí niguajtúun ñawúúnʼ mu magúwíin náa ku̱ba̱ʼ ndrígóo Egipto. ‹Ikhiin na̱nguá ninimbu̱u̱n náa rí nimbánuʼ gajmíʼ, maski ajndu ikhúún nindxu̱ʼ bi̱ majphú ajmbiu̱ún›, eʼthí Jeobá”.
33 “Rí mambanúʼ gajmíʼ bi̱ kúwá náa goʼwóo Israel nda̱wa̱á rí mbiʼi rúʼko̱, eʼthí Jeobá, ikhaa nindxu̱u̱ rígi̱. Xtángoo ndrígóʼ magíwánʼ náa a̱jkiu̱ún ga̱jma̱a̱ maniraʼmáʼ náa ku̱ma̱ ndrígu̱ún. Ikhúún mani̱ndxu̱ʼ Dios ndrígu̱ún ga̱jma̱a̱ ikhiin mani̱ndxu̱ún xuajñunʼ”.
34 “Nimbáa ni xáʼsngóo xa̱bu̱ numbaaʼ ga̱jma̱a̱ ni má a̱ngui̱i̱n xáʼthúún ‹¡Guniʼníiʼ Jeobá!› numuu rí xúgíinʼ muniʼniúnʼ bi̱ majkhiinʼ asndu bi̱ itháan wanii, eʼthí Jeobá, ga̱jma̱a̱ ikhúún ma̱ni̱ mba̱a̱ a̱jkiu̱nʼ náa rí nikiéʼkhúún ma̱ngaa ni xármáʼáan a̱jkiu̱nʼ itháan eʼni aʼkhá ndrígu̱ún”.
35 Rígi̱ rí naʼthí Jeobá,bi̱ naxnáa a̱jkha̱ʼ mu mambiʼi,nigíʼ xtángoo ndrígóo gu̱nʼ ga̱jma̱a̱ a̱ʼgua̱a̱n mu mambiʼiin dí mbruʼun,naʼni dí maʼbajxu̱u̱ iyaʼ lamáa* ga̱jma̱a̱ mandxa̱ʼwá iyaʼ rí naʼbajxu̱u̱,bi̱ mbiʼyuu Jeobá bi̱ naʼtáñajúúnʼ ángeles:
36 “‹I̱ndó á mu kiʼtáñajunʼ rígi̱ tsémbánuu, eʼthí Jeobá,i̱ndó ikhú e̱ji̱i̱n Israel muniña̱a̱ʼ ranindxu̱ún mbá xuajin náa inuʼ ikhúún asndu kámuu›”.
37 Rígi̱ rí naʼthí Jeobá: “‹I̱ndó á mu mekhu dí rígá rijma̱a̱ ma̱ndoo maxtiéwan ga̱jma̱a̱ náa gíʼ ku̱ba̱ʼ ma̱ndoo mbiʼyáá, i̱ndó ikhú xágruíguíin xúgíinʼ e̱ji̱i̱n Israel ga̱jma̱a̱ numuu xúgíʼ rí nini̱›, eʼthí Jeobá”.
38 “Atayáá na̱ʼkha̱ mbiʼi, eʼthí Jeobá, rí xuajin rígi̱ maguma májáanʼ mu maʼni ndrígóo Jeobá asndu náa guʼwá mitsídánʼ* ndrígóo Hananel asndu náa Xkrugua dí rígá náa Esquina.*
39 Ñuñuu rí naxtagiéwan ga̱jma̱a̱ maʼga asndu náa bíjní ndrígóo Gareb, ma̱ngaa magutua̱ʼa̱n asndu náa Goá.
40 Ga̱jma̱a̱ xúgíʼ mata* náa kajtíin bi̱ nikháñún ga̱jma̱a̱ náa rígá idiʼ,* náa xúgíʼ juímuu kúwá asndu náa mata ndrígóo Cedrón, asndu náa esquina ndrígóo Xkrugún Wáyú* asndu náa nagájnuu a̱jkha̱ʼ* mani̱ndxu̱u̱ mbá rí mikaʼwu náa Jeobá. Xuajin rígi̱ ni xátanga̱a̱ maxtuburiyaʼ ga̱jma̱a̱ ni xáguma gámbáa”.
Mbaʼa nota
^ O “Tátée”.
^ O “ku̱ba̱ʼ rí tuáʼán náa tapo̱o̱ iyaʼ”.
^ O “i̱jín go̱ʼo̱”.
^ Náa ajngáa hebreo naʼthí, “xtangoo”.
^ Náa ajngáa hebreo naʼthí, “chámbóʼ”.
^ Náa ajngáa hebreo naʼthí, “tsígáʼ”.
^ Náa ajngáa hebreo naʼthí, “nánguá xíníʼ iñúúnʼ”.
^ O “mar”.
^ O “Torre”.
^ O “Puerta de la Esquina”.
^ O “bóo”.
^ Xóo muʼthá, idiʼ rí kanda̱wo̱o̱ʼ sébú ndrígóo tsigijñaʼ.
^ O “Puerta de los Caballos”.
^ O “este”.
