Jeremías 33:1-26
33 Jeremías nigruigú ajngóo Jeobá dí raga̱jma̱ nuthu índo̱ xtáa guʼwá e̱jua̱nʼ náa Rexo̱o̱ náa gíi̱nʼ bi̱ Nuñewa̱a̱n:*
2 “Rígi̱ rí naʼthí Jeobá, bi̱ niʼni ku̱ba̱ʼ, Jeobá, bi̱ niʼni mújúunʼ ga̱jma̱a̱ bi̱ nigíʼ jxa̱ʼ, ikhaa mbiʼyuu Jeobá:
3 ‹Matatsa̱ʼo̱ʼ ga̱jma̱a̱ ikhúún mariʼñaaʼ, ma̱tha̱a̱nʼ rí mitsaanʼ* dí ikháán tsétatsinuuʼ›”.
4 “Rígi̱ rí naʼthí Jeobá, Dios ndrígóo Israel, ga̱jma̱a̱ numuu guʼwá dí rígá náa xuajin rígi̱ ga̱jma̱a̱ guʼwún reyes bi̱ kúwá náa Judá dí niguma gámbáa ga̱jma̱a̱ numuu rí niguwáʼ kudúún dí niruguama̱ʼa̱a̱n ga̱jma̱a̱ xuajin ma̱ngaa numuu rí nijmún espada,
5 ga̱jma̱a̱ numún bi̱ naguwáʼ guxmijná gajmiún xa̱bu̱ caldeos, ma̱ni̱ rí bi̱ gakañún bi̱ ikhúún gágudíin ga̱jma̱a̱ numuu rí nakásngañu̱ʼ majtíin náa guʼwá, ikhiin bi̱ nini̱ dí raʼkhí dí niʼni dí ikhúún markaʼwu inuʼ náa xuajin rígi̱:
6 ‹Ma̱ni̱ thanún ga̱jma̱a̱ ma̱ni̱ rí maʼni̱i̱ a̱jkiu̱ún, ma̱ni̱ mandíin ga̱jma̱a̱ maxnu̱u̱n rí tsímáá ma̱ngaa ma̱ni̱ rí xámíñún makuwá.
7 Matanga̱án kagui̱i̱n xa̱bu̱ Judá bi̱ ni̱jkha̱ kiʼdiin ga̱jma̱a̱ xa̱bu̱ Israel, ma̱ni̱ rí makuwíin xó má nákha ginii.
8 Ma̱ni̱ kaʼwi̱ín náa xúgíʼ rí nikiéʼkhúún ga̱jma̱a̱ aʼkhá rí nixudami̱jna̱ náa ikhúún ga̱jma̱a̱ ma̱ni̱ mba̱a̱ a̱jkiu̱nʼ ka̱yo̱o̱ xúgíʼ rí nikiéʼkhúún ga̱jma̱a̱ xúgíʼ aʼkhá rí nixudami̱jna̱ náa ikhúún.
9 Xuajin rígi̱ maʼni rí maʼdxuu a̱jkiu̱nʼ índo̱ gádxawuun mbiʼyuu, maʼni rí xúgíʼ xuajin dí rígá náa tsu̱du̱u̱ ku̱ba̱ʼ maʼdxaun xúgíʼ rí májánʼ gáni̱ ga̱jma̱a̱ numuu xuajñunʼ, muni̱ mbu̱u̱n ga̱jma̱a̱ mbuyamajkhuʼ. Xa̱bu̱ xuajin mamiñún ga̱jma̱a̱ maguíʼiin ga̱jma̱a̱ numuu xúgíʼ rí májánʼ ma̱ngaa rí tsímáá dí ma̱ʼkhá ka̱yo̱ʼ náa xuajin rígi̱›”.
10 “Rígi̱ rí naʼthí Jeobá: ‹Náa mbaaʼ rígi̱, rí ikháanʼ mutala ndáwa̱a̱ tsáa xtáa, nánguá kúwá xa̱bu̱ ni má xujkhúʼ, xúʼko̱, náa xuajin dí rígá náa Judá ga̱jma̱a̱ kamba̱a̱ dí rígá náa Jerusalén niguanáa, nánguá kúwá xa̱bu̱ ni má xujkhúʼ, matanga̱a̱ mawán,
11 aʼwá dí tsímáá ga̱jma̱a̱ aʼwá dí gagi, aʼwóo bi̱ nanigúnʼ ga̱jma̱a̱ bi̱ nanújúnʼ, aʼwún bi̱ nuthi: “¡Guxna̱a̱ núma̱aʼ Jeobá bi̱ naʼtáñajúúnʼ ángeles, numuu dí Jeobá májáanʼ a̱jkiu̱u̱n ga̱jma̱a̱ dí nandoo kaʼyulú* ndajyúuʼ asndu kámuu!”›.
‹Ikhiin magún kudúún tsigijñaʼ dí muxnáa núma̱aʼ náa goʼwóo Jeobá, numuu rí ikhúún matanga̱án kagui̱i̱n bi̱ ni̱jkha̱ kiʼdiin, xó má nákha ginii, eʼthí Jeobá”.
12 “Rígi̱ rí naʼthí Jeobá bi̱ naʼtáñajúúnʼ ángeles: ‹Náa mbaaʼ rígi̱, náa ndáwa̱a̱ tsáa xtáa, ni má xa̱bu̱ ni má xujkhúʼ ga̱jma̱a̱ náa xúgíʼ xuajin matanga̱a̱ marigá ra̱jxa̱, mu xúʼko̱ baxtúu magún kudiin mugiu̱ún mu mbu̱ya̱a̱ jxu̱ún›.
13 ‹Xuajin dí rígá náa kúbá ga̱jma̱a̱ xuajin dí rígá náa kúbá mijmbaaʼ ga̱jma̱a̱ xuajin dí rígá náa sur, náa ku̱ba̱ʼ ndrígóo Benjamín, náa mbájndi Jerusalén ga̱jma̱a̱ náa xuajin dí rígá náa Judá, baxtúu mbujuáaʼ muraxnii mugiu̱ún bi̱ manujgún náa agoo ñawúúnʼ›, eʼthí Jeobá”.
14 “‹Atayáá, na̱ʼkha̱ mbiʼi, eʼthí Jeobá, manimbánuu rí májánʼ dí nikuʼdáminaʼ ma̱ni̱ náa goʼwóo Israel ga̱jma̱a̱ náa goʼwóo Judá.
15 Mbiʼi rúʼko̱ ma̱ni̱ rí náa David makráʼáan mbá rudiuuʼ rí maʼni dí jmbu, maʼni xó má kaʼyoo ga̱jma̱a̱ maʼni rí jmbu náa tsu̱du̱u̱ ku̱ba̱ʼ.
16 Mbiʼi rúʼko̱ maguma kríyaaʼ Judá, Jerusalén ní xámíñuu maxtáa. Xígi̱ kaʼnii gágu̱ mbiʼyuu: Náa Jeobá na̱ʼkha̱ rí májánʼ›”.*
17 “Numuu dí rígi̱ rí naʼthí Jeobá: ‹Maxtáa má xúʼko̱ mbáa bi̱ na̱ʼkha̱ náa David bi̱ magi̱ʼi̱ náa xílí* rí nutañajunʼ náa goʼwóo Israel,
18 náa ndxajkun levitas maxtáa má xúʼko̱ mbáa xa̱bu̱ náa inuʼ mu maxnájxi̱ tsigijñaʼ dí mikarámáʼ, tsigijñaʼ rí tsígáʼ ga̱jma̱a̱ i̱ʼwáʼ tsigijñaʼ›”.
19 Jeremías nigruigú mbujuáaʼ ajngóo Jeobá:
20 “Rígi̱ rí naʼthí Jeobá: ‹Á mu ikháanʼla naʼnga̱la nuxpígaʼ rí nimbánúʼ ga̱jmu̱ʼ mbiʼi ga̱jma̱a̱ dí nimbánúʼ ga̱jmu̱ʼ mbruʼun ga̱jma̱a̱ naʼnga̱la nu̱ni̱ rí mbiʼi ga̱jma̱a̱ mbruʼun xáʼga̱nú náa tiempo rí kaʼyoo,
21 i̱ndó xúʼko̱ xambánuu rí nimbánúʼ ga̱jmu̱ʼ xa̱bi̱ʼ David, ikhaa xágiʼdaa mbáa a̱ʼdióo bi̱ maʼtáñajunʼ xóo rey náa xíliu̱u̱, ikhaa má kayuuʼ gárígá náa nimbánúʼ gajmíʼ ndxajkun levitas, bi̱ nindxu̱ún xa̱bi̱ʼ.
22 Xó má gajkhun rí xáʼngo̱o̱ gágixnuu xúgíʼ dí rígá mekhuíí ni má jui̱ʼi̱ dí rígá náa lamáa* xáʼngo̱o̱ gaxtiewan, phú gajkhun nindxu̱u̱ dí ikhúún ma̱ni̱ rí maʼni mbaʼin e̱ji̱i̱n xa̱bi̱ʼ David ga̱jma̱a̱ levitas bi̱ kúwá runi̱ ñajunʼ›”.
23 Jeremías nigruigú mbujuáaʼ ajngóo Jeobá:
24 “Lá na̱nguá nitayáá rí kúwíin ruthi xa̱bu̱ ráʼ. Nuthi: ‹Jeobá xándoo gáʼñúún bi̱ a̱jma̱ guʼwíin xa̱bu̱ bi̱ niraʼwíin›. Tséyamajkuíí xuajñunʼ ga̱jma̱a̱ nánguá eyáá rí nindxu̱u̱ mbá xuajin mba̱a̱.
25 Rígi̱ rí naʼthí Jeobá: ‹Xó ma gajkhun rí nimbánuʼ ga̱jmu̱ʼ mbiʼi ga̱jma̱a̱ mbruʼun, nigruiga̱ xtángoo náa mekhu ga̱jma̱a̱ náa ku̱ba̱ʼ,
26 ikhúún nimbá miʼtsú xáni̱ gaʼduunʼ ka̱ñu̱u̱n bi̱ naguwáʼ náa Jacob ni má náa xa̱bi̱ʼ David, maraʼwíin má xúʼko̱ náa ikhiin bi̱ mutañajúúnʼ e̱ji̱i̱n Abrahán, Isaac ga̱jma̱a̱ Jacob. Numuu rí matanga̱án kagui̱i̱n bi̱ ni̱jkha̱ kiʼdiin ga̱jma̱a̱ magáwíinʼ a̱jkiu̱nʼ ka̱ñu̱u̱n›”.
