Jeremías 34:1-22
34 Índo̱ rey Nabucodonosor* bi̱ xtáa náa Babilonia, xúgíinʼ soldado ndrígióo, xúgíinʼ xa̱bu̱ ñajunʼ bi̱ naʼtáñajúúnʼ ga̱jma̱a̱ xúgíinʼ xa̱bu̱ xuajin nuxmijná gajmiún Jerusalén ma̱ngaa xúgíʼ xuajin dí rígá mbájndi ikhí, Jeremías nigruigú ajngóo Jeobá rígi̱:
2 “Rígi̱ rí naʼthí Jeobá, Dios ndrígóo Israel: ‹Ayuʼ aratámíjná ga̱jma̱a̱ʼ rey Sedequías bi̱ xtáa náa Judá. Aratháán: “Rígi̱ rí naʼthí Jeobá: ‹Ma̱ni̱ rí xuajin rígi̱ majuixnájxi̱ náa ñawúunʼ rey bi̱ xtáa náa Babilonia, ga̱jma̱a̱ ikhaa matsikáa.
3 Ikháán xákríñáanʼ náa ñawúunʼ, numuu rí murugua̱a̱n má tsiaki̱i̱ ga̱jma̱a̱ majuixnájxi̱i̱n náa ikhaa. Ma̱ta̱ya̱a̱ xígi̱ rey bi̱ xtáa náa Babilonia maratamíjná ga̱jma̱a̱ʼ mbájmbu ikhaa, ma̱ngaa mi̱dxu̱ʼ náa Babilonia›.
4 Ikháán rey Sedequías bi̱ xtaa náa Judá, atadxawíín ajngóo Jeobá: ‹Rígi̱ rí naʼthí Jeobá ga̱jma̱a̱ numaaʼ: “Xákháñáanʼ ga̱jma̱a̱ espada.
5 Tsímáá gákáñáanʼ, índo̱ gajuiʼdi̱ín mugíʼ mbá aguʼ mba̱a̱ xó má niniu̱u̱n wajin xiʼñáaʼ, reyes bi̱ nikúwá nákha xóó ndáwa̱a̱n ikháán, makuwá ngíná muthi ga̱jma̱a̱ numaaʼ ‹¡Gínánlá ikháán rey ndrígúxu̱!›. Ga̱jma̱a̱ ‹ikhúún nindxu̱ʼ bi̱ niʼthí ajngáa rígi̱›, eʼthí Jeobá”›”›”.
6 Ikhú profeta* Jeremías ni̱jkha̱ náa Jerusalén mu maʼthúu̱n xúgíʼ ajngáa rígi̱ rey Sedequías bi̱ xtáa náa Judá.
7 Índo̱ soldado ndrígióo rey bi̱ xtáa náa Babilonia nixmijná gajmiún Jerusalén ga̱jma̱a̱ xúgíʼ xuajin dí rígá mijngii ikhí náa Judá rí xóó naguanúu, Lakís ga̱jma̱a̱ Azecá, numuu rí i̱ndó xuajin rúʼko̱ nindxu̱u̱ rí kúgumaʼá májánʼ ga̱jma̱a̱ xtájtsí náa mbayuuʼ Judá.
8 Jeremías nigruigú ajngóo Jeobá nda̱wa̱á dí rey Sedequías nimbánuminaʼ gajmíi̱n xúgíinʼ xa̱bu̱ Jerusalén rí muniñu̱u̱nʼ magúun xa̱bu̱ bi̱ nindxu̱ún ñumbáá,
9 xúgíinʼ mbaʼyóoʼ muniñu̱u̱nʼ magúun ñumbáá bi̱ nindxu̱ún hebreos, xó má xa̱bekha xúʼko̱ má gu̱ʼu̱, ga̱jma̱a̱ nimbáa nánguá xóo magiʼdaa xóo ñumbáá i̱mba̱ judío.
10 Xúgíinʼ príncipes ma̱ngaa xúgíinʼ xa̱bu̱ ninimbu̱u̱n, nixná ajngún rí munimbáníí awan rígi̱ dí muniñu̱u̱nʼ magúun bi̱ nindxu̱ún ñumbáá ga̱jma̱a̱ dí ní xáguáʼdiin xóo ñumbáá. Ninimbu̱u̱n niniñu̱u̱nʼ magúun.
11 Mú itháan nda̱wa̱á nitangi̱i̱n kudiin ñumbáá bi̱ niniñu̱u̱nʼ magúun ga̱jma̱a̱ nitsudiin rí mani̱ndxu̱ún ñumbáá mbu̱júu̱.
12 Ikhaa jngóo Jeremías nigruigú ajngóo Jeobá ajngáa dí na̱ʼkha̱ náa Jeobá:
13 “Rígi̱ rí naʼthí Jeobá, Dios ndrígóo Israel: ‹Mbiʼi rí nigúwíin wajin xiʼñála náa ku̱ba̱ʼ ndrígóo Egipto, náa ninindxu̱ún ñumbáá, ikhú nimbánuʼ gajmíʼ ikhiin, ni̱thu̱u̱n:
14 “Índo̱ gáʼni juwan tsiguʼ xúgiáanʼ ikháanʼla mbaʼyóoʼ muniʼñúúnʼ magúun a̱ngia̱la bi̱ nindxu̱ún hebreos bi̱ nitsi̱i̱n ga̱jma̱a̱ nimbayálaʼ náa mbá majun tsiguʼ, mbaʼyóoʼ muniʼñúúnʼ magúunla”. Mú wajin xiʼñála na̱nguá ninimbu̱u̱n ni má túdxawunʼ.*
15 Xíkhoo* ma ikháanʼla niriʼku̱u̱la rí eni̱ ga̱jma̱a̱ ni̱nila rí májánʼ náa iduʼ rí niniʼñúúnʼ magúunla xa̱bu̱ numbaaʼ gajmiála bi̱ nindxu̱ún ñumbáá, nimbánala mu̱ni̱ rígi̱ náa guʼwá rí nayéjkha̱ mbiʼyuʼ.
16 Mú nda̱wa̱á nitanga̱a̱ a̱jkia̱la rí niraʼwi̱i̱ muni̱ ga̱jma̱a̱ nini̱ tsagáá mbiʼyuʼ nini̱ rí matangi̱i̱n ñumbáá bi̱ niniʼñúúnʼ magúun xó má ikhiin nindúún ga̱jma̱a̱ nitsudiin rí mani̱ndxu̱ún ñumbáá mbu̱júu̱›.
17 Ikhaa jngóo, rígi̱ rí naʼthí Jeobá: ‹Ikháanʼ na̱nguá ni̱nimbala kuyo̱ʼ na̱nguá niniʼñúúnʼ magúun a̱ngia̱la ni má xa̱bu̱ numbaaʼ gajmiála ikha jngóo rí xúgi̱ maniʼñála eʼthí Jeobá, maniʼñála rí makhañála ga̱jma̱a̱ espada, nandii ga̱jma̱a̱ ewiʼ ma̱ngaa ma̱ni̱ rí mani̱ndxa̱la mbá gamíi náa xúgíinʼ xa̱bu̱ ñajunʼ bi̱ kúwá náa tsu̱du̱u̱ ku̱ba̱ʼ.
18 Rígi̱ rí mugíʼníín xa̱bu̱ bi̱ tunimbáníí rí nimbánuʼ gajmíʼ, índo̱ tunimbáníí ajngún dí nimbánúún náa ikhúún, índo̱ ikhiin nixuiʼta̱a̱ a̱ʼdá xédí náa a̱jma̱ xuíʼtóo mu manújngún ikhí,
19 bi̱ nindxu̱ún príncipes náa Judá, príncipes bi̱ kúwá náa Jerusalén, xa̱bu̱ ñajunʼ bi̱ kúwá náa guʼwá ñajunʼ, ndxajkun ga̱jma̱a̱ xúgíinʼ xa̱bu̱ bi̱ kúwá náa xuajin bi̱ ninújngúún náa a̱jma̱ xuíʼtóo a̱ʼdá xédí:
20 Ma̱ni̱ rí majuixnájxi̱i̱n náa ñawúúnʼ xa̱bu̱ sia̱nʼ gajmiún ga̱jma̱a̱ bi̱ nandún muradíin, xúñún mu̱phu̱ xujkhú xnaʼ bi̱ jngruigu̱u̱n mekhuíí ga̱jma̱a̱ xujkhúʼ bi̱ kúwá náa tsu̱du̱u̱ ku̱ba̱ʼ.
21 Ma̱ni̱ dí Sedequías rey ndrígóo Judá gajmíi̱n príncipes ndrígóo majuixnájxi̱i̱n náa ñawúúnʼ xa̱bu̱ sia̱nʼ bi̱ nandún muradíin bi̱ nindxu̱ún soldados ndrígóo rey bi̱ xtáa náa Babilonia, bi̱ kúwá ragúun›.
22 ‹Matañájunʼ dí maguwáánʼ náa xuajin rígi̱, eʼthí Jeobá, ikhiin muxmijná gajmiún ga̱jma̱a̱ mudrigú xuajin ma̱ngaa mutsikha̱a̱, ma̱ni̱ dí xuajin dí rígá náa Judá maguanáa, ní xákúwá xa̱bu̱›”.
Mbaʼa nota
^ Náa ajngáa hebreo naʼthí, “Nabucodorosor”. Rígi̱ nindxu̱u̱ i̱mba̱ xóo nuniraʼmáʼ.
^ O “gaʼyee, bi̱ naʼthí dí marigá”.
^ Náa ajngáa hebreo naʼthí, “na̱nguá nixruigú cháʼwún”.
^ Náa ajngáa hebreo naʼthí, “xúgi̱”.
