Jeremías 35:1-19
-
Xkri̱da májánʼ rí nuniña̱a̱nʼ recabitas numuu rí nunimbu̱u̱n (1-19)
35 Mbiʼi rí nixtáa Jehoiaquim a̱ʼdióo Josías rey ndrígóo Judá, Jeremías nigruigú ajngóo Jeobá rígi̱:
2 “Ayuʼ gátañu̱u̱n bi̱ nindxu̱ún recabitas, aratámíjná gajmiáanʼ ikhiin ga̱jma̱a̱ ayuʼ xtiin náa goʼwóo Jeobá, náa mbá rí nuphiʼtsu, ikhú araxnún vino”.
3 Ikha jngóo ni̱jkhá ka̱ya̱a̱ Jaazanías, a̱ʼdióo Jeremías, a̱ʼdióo Habazinías ga̱jma̱a̱ a̱ngui̱i̱n, ma̱ngaa xúgíinʼ e̱ji̱i̱n ga̱jma̱a̱ xúgíinʼ bi̱ nindxu̱ún recabitas,
4 náa goʼwóo Jeobá. Ni̱jkhá kagui̱i̱n náa nuphiʼtsu e̱ji̱i̱n Hanán a̱ʼdióo Igdalías, mbáa xa̱bi̱i̱ Dios bi̱ gajkhun, náa níjniúu rí nuphiʼtsu príncipes dí grígu rijma̱a̱ náa nakuiʼtsu Maaseya a̱ʼdióo Salum, bi̱ nañewu̱u̱n xkrugua.
5 Ikhú nigruámáʼ vaso ga̱jma̱a̱ copa dí kajnííʼ vino náa inún bi̱ nindxu̱ún recabitas ga̱jma̱a̱ ni̱thu̱u̱n: “Guwanla vino”.
6 Mú ikhiin nithi: “Xúwáanxu̱ vino, numuu dí Jehonadab* a̱ʼdióo Recab, bi̱ nindxu̱u̱ wajin xiʼñúxu, nixnúxu̱ kiʼtáñajunʼ rígi̱: ‹Nditháan xúwáanʼla vino, ní má ikháanʼ ní má e̱jña̱la.
7 Xúnila guʼwá, xúdu tsígáʼ, ni má xúdu ixi̱ ni má xúʼyáʼ uva. Rí phú gíʼmaa mu̱ni̱, gakuwáanʼla má xúʼko̱ náa guʼwá xtíin, mu xúʼko̱ ma̱ndoo makuwáanʼ mba̱yu̱u̱ʼ mbiʼi náa tsu̱du̱u̱ ku̱ba̱ʼ náa kuwáanʼ xóo xa̱bu̱ bi̱ naguwaáʼ›.
8 Ikha jngóo ikháanʼxu̱ nunimbuxu ajngóo Jehonadab, a̱ʼdióo wajin xiʼñúxu Recab, xúgíʼ rí niʼtáñajunxu mu̱ni̱, tséwáanxu vino, ni má ikháanʼxu̱ ni má guʼyuxu ni má jiámiúxu ni má waʼxiuxu̱.
9 Na̱nguá e̱nixu̱ guʼwá mu makuwáanʼxu̱ ikhí, na̱nguá kuaʼdááxu̱ mbaaʼ náa kiʼdu uva, ní má mbayuxu o tsígáʼ.
10 Kuwáanʼxu̱ má xúʼko̱ náa guʼwá xtíin ga̱jma̱a̱ nunimbuxu xúgíʼ rí niʼtáñajunxu wajin xiʼñúxu Jehonadab.*
11 Mú índo̱ rey Nabucodonosor* bi̱ xtáa náa Babilonia nitsimuu gagruigú xuajin, ni̱taxu: ‹Guʼgualú, ga̱tu̱ʼu̱lú náa Jerusalén mu muʼni kríyami̱jna̱ náa soldado caldeos ga̱jma̱a̱ sirios›. Rí xúgi̱ kuwáanʼxu̱ náa Jerusalén”.
12 Jeremías nigruigú ajngóo Jeobá rígi̱:
13 “Rígi̱ rí naʼthí Jeobá bi̱ naʼtáñajúúnʼ ángeles, Dios ndrígóo Israel: ‹Ayuʼ ga̱jma̱a̱ arathún xa̱bu̱ Judá ga̱jma̱a̱ xa̱bu̱ xuajin Jerusalén: “Lá na̱nguá nijuiʼtála ikháanʼ nángi eʼni rí muni̱mbala ajngóʼ ráʼ. Eʼthí Jeobá.
14 Jehonadab a̱ʼdióo Recab niʼtáñajúúnʼ rí xúwáan vino e̱ji̱i̱n, ikhiin ninimbu̱u̱n ajngóo, na̱nguá e̱ʼwa̱a̱n vino asndu mbiʼi xúgi̱, xúʼko̱ ninimbu̱u̱n rí niʼtáñajúúnʼ wajin xiʼñúúnʼ. Mú ikhúún nángi eʼni ni̱tala* ikháanʼ, mú ikháanʼ túnimbala kuyo̱ʼ.
15 Nángi eʼni nikuʼmiin* xúgíinʼ xa̱bi̱ʼ bi̱ nindxu̱ún profetas* mu mutala: ‹¡Mbá péñu* mámbáa dí ikháanʼla gániñuuʼ kambo̱o̱ dí ra̱májánʼ ga̱jma̱a̱ gaʼni rí nindxu̱u̱ májánʼ! Xáʼgua̱ kidxu̱únʼ eʼwíinʼ dioses, ni má xúni̱ ñajúúnʼ. Mu xúʼko̱ makuwáanʼ náa ku̱ba̱ʼ rí ni̱xna̱la ikháanʼ ga̱jma̱a̱ wajin xiʼñála›. Mú ikháanʼ túnimbala ni má na̱nguá nidxawunʼla.*
16 Bi̱ naguwáʼ náa Jehonadab a̱ʼdióo Recab nunimbu̱u̱n kiʼtáñajunʼ rí nixnúún wajin xiʼñúúnʼ, mú xuajin rígi̱ tséʼdxawunʼ ikhúún”›”.
17 “Rígi̱ rí naʼthí Jeobá, Dios bi̱ naʼtáñajúúnʼ ángeles: Dios ndrígóo Israel: ‹Makuʼmá náa Judá ga̱jma̱a̱ náa xúgíinʼ xa̱bu̱ xuajin Jerusalén gamiéjunʼ dí ni̱thu̱u̱n, mú ikhiin na̱nguá ninimbu̱u̱n, nindxa̱ʼwu̱u̱n mú ikhiin na̱nguá niriʼña›”.
18 Jeremías niʼthún bi̱ naguwáʼ náa goʼwóo Recab: “Rígi̱ rí naʼthí Jeobá bi̱ naʼtáñajúúnʼ ángeles, Dios ndrígóo Israel: ‹Numuu rí ikháanʼla nini̱mba̱la kiʼtáñajunʼ ndrígóo Jehonadab bi̱ nindxu̱u̱ wajin xiʼñála ga̱jma̱a̱ nini̱mba̱la má xúʼko̱ kiʼtáñajunʼ ndrígóo, ninimbaníí kuduun rí niʼtáñajuanla,
19 rígi̱ rí naʼthí Jeobá bi̱ naʼtáñajúúnʼ ángeles, Dios ndrígóo Israel: “Maxtáa má xúʼko̱ mbáa bi̱ na̱ʼkha̱ náa Jehonadab* a̱ʼdióo Recab mu maʼni ñajunʼ”›”.
Mbaʼa nota
^ Náa ajngáa hebreo naʼthí, “Jonadab”. Mbiʼyuu rí chiʼmbaʼ Jehonadab.
^ Náa ajngáa hebreo naʼthí, “Jonadab”. Mbiʼyuu rí chiʼmbaʼ Jehonadab.
^ Náa ajngáa hebreo naʼthí, “Nabucodorosor”. Rígi̱ nindxu̱u̱ i̱mba̱ xóo nuniraʼmáʼ.
^ Náa ajngáa hebreo naʼthí, “nákhá miʼcha̱ nitha̱la”.
^ Náa ajngáa hebreo naʼthí, “nákhá miʼcha̱ nikuʼmíin”.
^ O “gaʼyee, bi̱ nuthi dí marigá”.
^ O “guni̱ mbá rí májánʼ”.
^ Náa ajngáa hebreo naʼthí, “na̱nguá nixruigú cháʼwanla”.
^ Náa ajngáa hebreo naʼthí, “Jonadab”. Mbiʼyuu rí chiʼmbaʼ Jehonadab.
