Jeremías 36:1-32
36 Náa a̱jkhu̱ tsiguʼ dí xtáa má raʼtáñajunʼ Jehoiaquim a̱ʼdióo Josías, rey ndrígóo Judá, Jeremías nigruigú ajngóo Jeobá rígi̱:
2 “Ayá mbá rollo ga̱jma̱a̱ ikhí atanirámáʼ xúgíʼ ajngáa dí ni̱tha̱a̱nʼ ga̱jma̱a̱ numuu Israel, Judá ga̱jma̱a̱ numuu xúgíʼ xuajin asndu nákhá timbá mbiʼi rí ni̱tha̱a̱nʼ, nákhá mbiʼi rí nixtáa Josías asndu mbiʼi xúgi̱.
3 Índo̱ gudxawíín bi̱ kúwá náa goʼwóo Judá xúgíʼ gamiéjunʼ dí nindxa̱ʼwa̱mínáʼ makuʼmá, mbáa muniña̱a̱ʼ kambu̱ún dí raʼkhí ga̱jma̱a̱ ikhúún ma̱ni̱ mba̱a̱ a̱jkiu̱nʼ ka̱yo̱o̱ aʼkhá ndrígu̱ún ga̱jma̱a̱ rí nikiéʼkúún”.
4 Ikhú Jeremías nindxaʼóo Baruc a̱ʼdióo Nerías ga̱jma̱a̱ niʼthúu̱n xúgíʼ ajngóo Jeobá dí niʼthí, Baruc nigíʼdu̱u̱ niʼnirámáʼ náa rollo.
5 Nda̱wa̱á Jeremías niʼtáñajuunʼ Baruc: “Ikhúún xándoo mato̱ʼo̱ʼ náa goʼwóo Jeobá,
6 ikha jngóo ikháán mbaʼyóoʼ mata̱ʼa̱a̱ʼ ikhí ga̱jma̱a̱ matraxnuu ajngóo Jeobá dí ikhúún ni̱tha̱a̱nʼ ga̱jma̱a̱ mbá aʼwá gakhi̱i̱. Matraxnuu mudxawíín xa̱bu̱ xuajin náa goʼwóo Jeobá náa mbá mbiʼi rí nurkueyimijná,* mu xúʼko̱ mudxawíín xúgíinʼ xa̱bu̱ Judá bi̱ maguwáʼ náa xuajñún.
7 Mbáa rí mutajkáan maʼga̱nú náa Jeobá ga̱jma̱a̱ xúʼko̱ mámbáa maniñuuʼ kambo̱o̱ dí raʼkhí, numuu dí Jeobá niʼthí má dí ra̱ʼkhá tháán kasngáñu̱u̱ʼ eʼni xuajin rígi̱”.
8 Ikha jngóo Baruc a̱ʼdióo Nerías niʼni xúgíʼ xó má niʼtáñajuunʼ profeta* Jeremías, náa goʼwóo Jeobá niguxnuu ga̱jma̱a̱ aʼwá gakhi̱i̱ ajngóo Jeobá dí kiʼniraʼmáʼ náa rollo.
9 Índo̱ niʼni witsu tsiguʼ dí xtáa raʼtáñajunʼ Jehoiaquim a̱ʼdióo Josías, rey ndrígóo Judá, náa mijna gu̱wa̱ʼ igu̱nʼ, xúgíinʼ xa̱bu̱ Jerusalén ga̱jma̱a̱ xúgíinʼ xa̱bu̱ bi̱ niguwáʼ náa xuajin dí rígá náa Judá, nijuiʼtáñájúúnʼ dí murkueyimijná náa inuu Jeobá.
10 Ikhú Baruc niguxnuu ga̱jma̱a̱ aʼwá gakhi̱i̱ náa goʼwóo Jeobá dí Jeremías niʼthúu̱n maʼnirámáʼ náa rollo. Niguxnuu mu mudxawíín xúgíinʼ xa̱bu̱ xuajin náa cuarto* ndrígóo Guemarías a̱ʼdióo Safán bi̱ naʼtáriya̱a̱ʼ, náa rexo̱o̱ goʼwóo Dios, mijngii náa gíʼ riejuun xkrugua nuxi̱ʼ ndrígóo goʼwóo Jeobá.
11 Índo̱ Micaya, a̱ʼdióo Guemarías, a̱ʼdióo Safán, niʼdxawun xúgíʼ ajngóo Jeobá dí kiʼnirámáʼ náa rollo,
12 nigajtaa náa goʼwóo rey, náa cuarto ndrígóo secretario. Xúgíinʼ príncipes tri̱gi̱i̱n ikhí, secretario Elisamá, Delayá a̱ʼdióo Semaya, Elnatán a̱ʼdióo Acbor, Guemarías a̱ʼdióo Safán, Sedequías a̱ʼdióo Hananías, ga̱jma̱a̱ eʼwíinʼ príncipes.
13 Micaya niʼthúún xúgíʼ ajngáa rí niʼdxuun índo̱ Baruc niguxnuu rollo náa inún xúgíinʼ xa̱bu̱ xuajin.
14 Ikhú xúgíinʼ príncipes nixuʼmaa Jehudí, a̱ʼdióo Netanías, a̱ʼdióo Selemías, a̱ʼdióo Cusí, mu maʼthúu̱n Baruc: “Ayi̱ ga̱jma̱a̱ ayi̱ jcháaʼ rollo dí niraxnuu mudxawíín xa̱bu̱ xuajin”. Baruc a̱ʼdióo Nerías ndiyá rollo ga̱jma̱a̱ ni̱jkha̱ náa kúwá ikhiin.
15 Ikhiin nitháán “Mbá péñu,* araʼwún ga̱jma̱a̱ atraxnuu mudxawíínxu̱”. Ikhú Baruc niguxnuu.
16 Índo̱ nidxawíín xúgíʼ ajngáa rígi̱, ndiyamijná kaníkiin ga̱jma̱a̱ nimíñúún, ikhú nitháán Baruc: “Tsiaki̱i̱ ndayóoʼ mutha̱a̱nxu̱ rey xúgíʼ ajngáa rígi̱”.
17 Nirajxi̱i̱ Baruc: “Mbá péñu, aratúxu̱ʼ xu kaʼnii nitanirámáʼ xúgíʼ ajngáa rígi̱. Lá Jeremías niʼtháanʼ dí nitanirámáʼ ráʼ.”
18 Baruc niriʼñúún: “Ikhaa niʼthúnʼ xúgíʼ ajngáa rígi̱ ga̱jma̱a̱ ikhúún ninirámáʼ ga̱jma̱a̱ yaʼtsínʼ* náa rollo rígi̱”.
19 Príncipes nitháán Baruc: “Ayuʼ ikháán ga̱jma̱a̱ Jeremías, gurkaʼwumijnála, nimbáa xáʼyóoʼ mbaʼyoo náa kuwáanʼla”.
20 Ikhú nigún gúyáá rey, náa rexa̱a̱. Niyejxi̱i̱ rollo náa cuarto ndrígóo secretario Elisamá ga̱jma̱a̱ nitháán rey xúgíʼ rí nidxawíín.
21 Rey nikuʼmaa Jehudí mu maʼga gáyá rollo. Jehudí ni̱jkha̱ gáyá rollo náa cuarto ndrígóo secretario Elisamá, nigíʼdu̱u̱ niguxnuu mu maʼdxaun rey ga̱jma̱a̱ xúgíinʼ príncipes bi̱ xtáa gajmíi̱n.
22 Nindxu̱u̱ mijna gu̱wa̱ʼ igu̱nʼ,* índo̱ rey xtáa náa goʼwóo rí nanújngoo índo̱ naʼni migúwán, gíʼ mijngii náa gíʼ aguʼ.
23 Mámbá rí Jehudí naguámbóo naguxnuu ajtsú o a̱jkhu̱ níʼkhóo, rey narujturígú ga̱jma̱a̱ chíliúu secretario ga̱jma̱a̱ nagruiʼyáʼ náa aguʼ, xúʼko̱ niʼni asndu nirajkuáa xúgíʼ rollo náa aguʼ mi̱kha.
24 Ni má rey ni má xa̱bi̱i̱ bi̱ nidxawíín xúgíʼ ajngáa rígi̱ na̱nguá nimíñúún ni má túxkuʼtu xtíñún.
25 Maski ajndu má Elnatán, Delayá ga̱jma̱a̱ Guemarías nitakáñíí rey dí xátsikhá rollo, mú ikhaa táʼnimbo̱o̱ kaʼñún.
26 Mú raʼkháa i̱ndó rúʼko̱ niʼni, rey niʼtáñajuunʼ Jerahmeel, a̱ʼdióo rey, ma̱ngaa Seraya a̱ʼdióo Azriel ga̱jma̱a̱ Selemías a̱ʼdióo Abdeel dí murtuwiin secretario Baruc ga̱jma̱a̱ profeta Jeremías, mú Jeobá nirkaʼwiin.
27 Nda̱wa̱á dí rey nitsikháa rollo náa kiʼnirámáʼ ajngáa dí Jeremías niʼthúu̱n Baruc maʼnirámáʼ, Jeremías mbu̱júu̱ nigruigú ajngóo Jeobá:
28 “Ayá i̱mba̱ rollo atanirámáʼ ikhí, ikháá má rí kiʼnirámáʼ náa timbá rollo dí Jehoiaquim rey ndrígóo Judá nitsikhá.
29 Marata rígi̱ ga̱jma̱a̱ numuu Jehoiaquim rey ndrígóo Judá: ‹Rígi̱ dí naʼthí Jeobá: “Ikháán nitatsikhá rollo rígi̱ ga̱jma̱a̱ niratá: ‹Náá numuu nitanirámáʼ dí rey bi̱ xtáa náa Babilonia gajkhun ma̱ʼkha̱ ga̱jma̱a̱ maʼni gámbóo xuajin rígi̱, maʼni rí maguanáa ni xákúwá xa̱bu̱ ni ma xujkhúʼ rá.›
30 Ikha jngóo rígi̱ dí naʼthí Jeobá ga̱jma̱a̱ numuu Jehoiaquim rey ndrígóo Judá: ‹Xágiʼdaa nimbáa bi̱ magi̱ʼi̱ maʼtáñajunʼ náa xíliu̱u̱ David, índo̱ gákháñuu, xuyuuʼ majmbátigo̱o̱ náa iduu a̱jkha̱ʼ rí mbiʼi ga̱jma̱a̱ náa migúwán dí mbruʼun.
31 Manda̱ʼa̱a̱ cuenta ikhaa, xúʼko̱ má e̱ji̱i̱n, ma̱ngaa xa̱bi̱i̱. Náa ikhiin xúʼko̱ má xa̱bu̱ Jerusalén ga̱jma̱a̱ xa̱bu̱ Judá makuʼmá gamiéjunʼ rí nitha̱ makuʼmá numuu rí táʼndún gúdxawunʼ›”›”.
32 Ikhú Jeremías ndiyá i̱mba̱ rollo ga̱jma̱a̱ nixnúu secretario Baruc a̱ʼdióo Nerías, ikhaa niʼnirámáʼ ikhí xúgíʼ dí Jeremías ni̱jkha̱ raʼthúu̱n maʼnirámáʼ, xúgíʼ ajngáa rí kiʼnirámáʼ náa rollo dí Jehoiaquim rey ndrígóo Judá nigíwánʼ náa aguʼ mi̱kha. Ga̱jma̱a̱ niʼniraʼmáʼ itháán ajngáa xóo rígi̱.
Mbaʼa nota
^ O “mduyamiʼchíí”.
^ O “gaʼyee, bi̱ naʼthí dí marigá”.
^ O “náa nupiʼtsu”.
^ O “atani̱ mbá rí májánʼ”.
^ O “ñaʼñúú, yaxní”.
^ Rígi̱ nindxu̱u̱ tumba̱a̱ gu̱nʼ noviembre asndu tumba̱a̱ gu̱nʼ diciembre. Atayáá apén. B15.
