Jeremías 37:1-21
37 Rey Sedequías a̱ʼdióo Josías nigíʼdu̱u̱ niʼtáñajunʼ xtiʼkhuu Conías* a̱ʼdióo Jehoiaquim, numuu dí rey Nabucodonosor* bi̱ xtáa náa Babilonia nigíiʼ mu mani̱ndxu̱u̱ rey náa ku̱ba̱ʼ ndrígóo Judá.
2 Ikhaa, ga̱jma̱a̱ xa̱bi̱i̱ ma̱ngaa xa̱bu̱ bi̱ kúwá náa tsu̱du̱u̱ ku̱ba̱ʼ, na̱nguá ninimbu̱ún ajngáa dí Jeobá nikuʼmaa maʼthí profeta* Jeremías.
3 Rey Sedequías nikuʼmaa Jehucal a̱ʼdióo Selemías ga̱jma̱a̱ Sofonías a̱ʼdióo Maaseya, bi̱ nindxu̱u̱ ndxajkun, mu maʼthúu̱n profeta Jeremías: “Mbá péñu,* aratákáñíí Jeobá Dios ndrígúxu̱ ga̱jma̱a̱ numuxu”.
4 Jeremías tsímáá jnguʼwúun náa xuajin numuu dí xóó tséxuda̱a̱ʼ guʼwá e̱jua̱nʼ.
5 Soldado ndrígóo faraón nigájnún náa Egipto, índo̱ xa̱bu̱ caldeos bi̱ kúwá ruguma̱ʼa̱n Jerusalén nidxawíín rígi̱, niniña̱a̱nʼ Jerusalén ga̱jma̱a̱ nigúun.
6 Ikhú profeta Jeremías nigruigú ajngóo Jeobá rígi̱:
7 “Rígi̱ rí naʼthí Jeobá, Dios ndrígóo Israel: ‹Rey ndrígóo Judá, bi̱ nikuʼmáanʼ murajxu̱ʼ gíʼmaa mutha̱a̱nla rígi̱: “Gu̱ya̱a̱, soldado ndrígóo faraón bi̱ naguwáʼ mumbayála mbaʼyóoʼ matangi̱ín náa Egipto, náa xuajñún.
8 Xa̱bu̱ caldeos matangi̱ín ga̱jma̱a̱ muxmíjná gajmiún xuajin rígi̱, mundri̱gú ga̱jma̱a̱ mutsikha̱a̱”.
9 Rígi̱ rí naʼthí Jeobá: “Xúninduwamijnála rí mu̱tha̱ ‹Gajkhun rí xa̱bu̱ caldeos magúun ga̱jma̱a̱ muniña̱a̱ʼ ruxmijná ga̱jma̱á nindxu̱lú›, numuu rí xágúun.
10 Tséʼniuu á mu ikháanʼla guni̱ gámbíin xúgíinʼ soldado caldeos bi̱ kúwáanʼ ruxmijná gajmiála ga̱jma̱a̱ i̱ndó maguanún xa̱bu̱ bi̱ nigawúúnʼ, ikhiin magajnún náa guʼwá xtíin ndrígu̱ún ga̱jma̱a̱ mutsikha̱a̱ xuajin rígi̱”›”.
11 Nda̱wa̱á dí soldado caldeos niniña̱a̱nʼ Jerusalén ga̱jma̱a̱ numún soldado ndrígóo faraón,
12 Jeremías nigájnuu náa Jerusalén ga̱jma̱a̱ ni̱jkha̱ náa ku̱ba̱ʼ ndrígóo Benjamín mu magruigúu mbá chíʼgíiʼ* rí kaʼyoo ikhí náa majñu̱únʼ xa̱bu̱ xuajñuu.
13 Mú índo̱ ni̱jkha̱nú náa Xkrugoo Benjamín,* bi̱ kayá edxu̱u̱ náa bi̱ nuñewa̱a̱n, bi̱ mbiʼyuu Iriya, a̱ʼdióo Selemías, a̱ʼdióo Hananías, nigujtuwiin profeta Jeremías ga̱jma̱a̱ niʼthúu̱n: “¡Ikháán nadxu̱ʼ kidxu̱únʼ caldeos!”.
14 “¡Na̱nguá, ragájkhun rúʼko̱!, niʼthí Jeremías. Ikhúún na̱nguá ejkhá kidxu̱únʼ caldeos”. Mú Iriya na̱nguá niʼnimbo̱o̱. Nigujtuwiin Jeremías ga̱jma̱a̱ ni̱jkha̱ kayáa náa inún príncipes.
15 Príncipes nikiʼníin wéñuuʼ kuyáá Jeremías, nixnáá ga̱jma̱a̱ nixuda̱a̱ʼ náa guʼwá e̱jua̱nʼ,* náa goʼwóo secretario Jehonatán, numuu rí ikhí nini̱ rí mani̱ndxu̱u̱ guʼwá e̱jua̱nʼ.
16 Nixuma̱a̱ʼ Jeremías náa iñáʼ* dí nindxu̱u̱ guʼwá e̱jua̱nʼ, ikhí nixtáa mba̱yu̱u̱ʼ mbiʼi.
17 Ikhú rey Sedequías nikuʼma rí maguwáʼ kuya̱a̱ náa goʼwóo, ga̱jma̱a̱ nguʼwáá nirajxu̱u̱. Niʼthúu̱n: “Lá nitandrígú ajngóo Jeobá ráʼ.” Jeremías niriʼña: “¡Xúʼko̱!”. Ga̱jma̱a̱ niʼthí xóó: “¡Ikháán majuixnájxi̱i̱n náa ñawúunʼ rey bi̱ xtáa náa Babilonia!”.
18 Jeremías ma̱ngaa niʼthúu̱n rey Sedequías: “Ndiéjunʼ aʼkhá nikuʼdáminaʼ náa ikháán, náa xa̱bia̱a̱ʼ ma̱ngaa náa xuajin rígi̱ mu muxuʼdúún’ guʼwá ejua̱a̱nʼ rá.
19 Náá kúwi̱i̱n xúgi̱ profeta ndrígala bi̱ nitariyaʼ ‹Rey bi̱ xtáa náa Babilonia xáʼkha̱ gaʼni gínáánʼlú ni má xáʼkha̱ náa xuajin rígi̱ rá.›
20 Rí xúgi̱, mbá péñu atadxawunʼ tátá rey. Natakáñaaʼ dí maraxnu̱ʼ rí gánda̱ʼa̱a̱ʼ. Xátaxuʼmún maʼgáaʼ xígií náa goʼwóo secretario Jehonatán, numuu rí ikhí makhañúʼ”.
21 Ikha jngóo rey Sedequías niʼtáñajunʼ dí magún kuya̱a̱ Jeremías náa guʼwá e̱jua̱nʼ náa Rexo̱o̱ dí gíi̱nʼ bi̱ Nuñewa̱a̱n,* ga̱jma̱a̱ xúgíʼ mbiʼi nuxnáá mbá pan dijndi dí rígá náa kamba̱a̱ náa kúwíin bi̱ nuni̱ pan, asndu índo̱ niguámbá pan náa xuajin, Jeremías niguánúu náa Rexo̱o̱ dí gíi̱nʼ bi̱ Nuñewa̱a̱n.
Mbaʼa nota
^ Ma̱ngaa mbiʼyuu Joaquín ga̱jma̱a̱ Jeconías.
^ Náa ajngáa hebreo naʼthí, “Nabucodorosor”. Rígi̱ nindxu̱u̱ i̱mba̱ xóo nuniraʼmáʼ.
^ O “gaʼyee, bi̱ naʼthí dí marigá”.
^ O “atani̱ mbá rí májánʼ”.
^ O “lajuíin”.
^ O “Puerta de Benjamín”
^ Náa ajngáa hebreo naʼthí, “guʼwá náa rígá cadena”.
^ Náa ajngáa hebreo naʼthí, “goʼwóo iñáʼ”.
^ O “Patio de la Guardia”.
