Jeremías 38:1-28
38 Sefatías a̱ʼdióo Matán, Guedalías a̱ʼdióo Pasjur, Jucal a̱ʼdióo Selemías ga̱jma̱a̱ Pasjur a̱ʼdióo Malkiya nidxawíín ajngáa rígi̱ dí Jeremías nixtáa raʼthún xúgíinʼ xa̱bu̱ xuajin:
2 “Rígi̱ rí naʼthí Jeobá: ‹Bi̱ gáguanúu náa xuajin rígi̱ makhañúu ga̱jma̱a̱ espada, ewiʼ ga̱jma̱a̱ nandii. Mú bi̱ gágájnuu maxnáximinaʼ náa inún bi̱ caldeos xákháñúu, maʼni kríyaminaʼ ga̱jma̱a̱ ikhaa maxtáa›.
3 Rígi̱ rí naʼthí Jeobá: ‹Xuajin rígi̱ majuixnájxi̱ má tsiaki̱i̱ náa ñawúúnʼ soldado ndrígóo rey bi̱ xtáa náa Babilonia ga̱jma̱a̱ ikhaa magruigú›”.
4 Príncipes nitháán rey: “Mbá péñu,* atani̱ rí muxiyáa xa̱bu̱ bugi̱, numuu rí ga̱jma̱a̱ dí naʼthí naʼni dí majmáan a̱jkiu̱ún* soldado bi̱ xóó naguanún náa xuajin rígi̱ ga̱jma̱a̱ xúgíinʼ xa̱bu̱ xuajin. Numuu rí xa̱bu̱ bugi̱ tsíyoo marigá dí tsímáá náa xuajin rígi̱, nandoo marigá gamiéjunʼ”.
5 Rey Sedequías niʼthí: “Gu̱ya̱a̱, naxnajxíi̱ náa ñawánla ikháanʼ, gu̱ya̱a̱ dí gúni̱i̱ numuu dí rey ndaa rí ma̱ndoo maʼni mu marikala”.
6 Ikha jngóo nirtuwiin Jeremías ga̱jma̱a̱ nidama̱ʼa̱a̱n náa iñáʼ ndrígóo Malkiya, bi̱ nindxu̱u̱ a̱ʼdióo rey, náa Rexo̱o̱ náa gíi̱nʼ bi̱ Nuñewa̱a̱n,* nixriguíi ga̱jma̱a̱ ñuñuu náa iñáʼ rúʼko̱, i̱ndó gaʼcha̱ʼ rígá na̱nguá ka̱jnu̱ʼ iyaʼ ga̱jma̱a̱ Jeremías nigíʼdu̱u̱ niʼdii náa gaʼcha̱ʼ.
7 Ébed-Mélec bi̱ nindxu̱u̱ etíope, bi̱ nindxu̱u̱ eunuco* bi̱ xtáa náa goʼwóo rey niʼdxawuun rí nixu̱ma̱a̱ʼ Jeremías náa iñáʼ rúʼko̱. Rey gíʼ náa Xkrugoo Benjamín,*
8 Ikha jngóo Ébed-Mélec nigájnuu náa goʼwóo rey ga̱jma̱a̱ niʼthúu̱n:
9 “¡Tátá rey, raʼkhí kayuuʼ rí xóo nini̱i̱ Jeremías xa̱bu̱ bugi̱! Nidama̱ʼa̱a̱n náa iñáʼ, ikhaa makhañúu ikhí ga̱jma̱a̱ ewiʼ, numuu rí nándáa ganitsu náa xuajin rígi̱”.
10 Ikhú rey niʼtáñajuunʼ Ébed-Mélec bi̱ nindxu̱u̱ etíope: “Ayuʼ gajmiáanʼ mbá 30 xa̱bekha ga̱jma̱a̱ atríya̱a̱ʼ profeta* Jeremías náa iñáʼ rúʼko̱ nákha xóó tsékháñuu”.
11 Ikha jngóo Ébed-Mélec ni̱jkha̱ gajmíi̱n xa̱bekha bugi̱ náa goʼwóo rey náa cuarto dí gíʼ agoo náa kajti rí gíʼdoo numuu, ikhí nirawíi xtíin dí wayuu ga̱jma̱a̱ rí niguuʼ, ikhú nixurigú náa iñáʼ dí kua̱ʼa̱a̱n Jeremías.
12 Ébed-Mélec bi̱ nindxu̱u̱ etíope niʼthúu̱n Jeremías: “Mbá péñu atandra̱ʼa̱ xuíʼtóo xtíin náa agoo chíjiáanʼ ga̱jma̱a̱ ñuñuu”. Jeremías xúʼko̱ niʼni,
13 ikhiin nigún raxu̱da̱a̱nʼ ga̱jma̱a̱ ñuñuu niri̱ya̱a̱ʼ náa iñáʼ. Jeremías niguanúu náa Rexo̱o̱ náa gíi̱nʼ bi̱ Nuñewa̱a̱n.
14 Rey Sedequías nikuʼma rí maguwáʼ kuya̱a̱ profeta Jeremías náa ajtsú riejun rí gíʼ náa goʼwóo Jeobá ga̱jma̱a̱ rey niʼthúu̱n Jeremías: “Gúʼdoo mbá rí marajxa̱a̱ʼ. Mú xátarkaʼwaaʼ nimbá”.
15 Ikhú Jeremías niʼthúu̱n Sedequías: “Á mu natha̱a̱nʼ mbáa mataxíñúu. Á mu naxna̱a̱ʼ mbá consejo, xáʼndaaʼ má gátadxawunʼ”.
16 Ikha jngóo Sedequías nguʼwáá nixná ajngóo náa Jeremías: “Na̱xna̱ ajngóʼ ga̱jma̱a̱ numuu mbiʼyuu Jeobá bi̱ naʼni rí makuwáanʼlu, ikhúún xáxíñaan ni má xáxnajxíin náa ñawúúnʼ xa̱bu̱ bugi̱ bi̱ nandún muxiñáan”.
17 Ikhú Jeremías niʼthúu̱n Sedequías: “Rígi̱ rí naʼthí Jeobá Dios bi̱ naʼtáñajúúnʼ ángeles, Dios ndrígóo Israel: ‹Á mu nagájnaaʼ naraxnájximinaʼ náa inún príncipes ndrígóo rey bi̱ xtáa náa Babilonia, ikháán maraxtaa má xúʼko̱ ga̱jma̱a̱ xuajin rígi̱ xútsikha̱a̱, ikháán mangiin bi̱ kúwá náa guʼwáaʼ xákháñún.
18 Á mu tségájnaaʼ gáraxnajxíminaʼ náa inún príncipes ndrígóo rey bi̱ xtáa Babilonia, ikhú xuajin rígi̱ majuixnájxi̱ náa ñawúúnʼ xa̱bu̱ caldeos, ikhiin mutsikha̱a̱ ga̱jma̱a̱ ikháán xákríñáanʼ náa ñawúúnʼ›”.
19 Ikhú rey Sedequías niʼthúu̱n Jeremías: “Namiñúnʼ ka̱ñu̱u̱n xa̱bu̱ judíos bi̱ nagún kidxu̱únʼ xa̱bu̱ caldeos. Numuu rí á mu muxnajxu̱u̱n náa ñawúunʼ ikhiin, muni̱ gínún”.
20 Mú Jeremías niʼthúu̱n: “Xájuixnájxi̱i̱n náa ñawúúnʼ ikhiin. Mbá péñu atanimbaaʼ aʼwóo Jeobá ga̱jma̱a̱ atani̱ rí xtáá ratha̱nʼ, magajnúu májánʼ dí gátani̱ ga̱jma̱a̱ maraxtaa má xúʼko̱.
21 Á mu tsíyaaʼ gáraxnájxíminaʼ, Jeobá nisngájmuʼ dí rígi̱ gárígá:
22 ¡Atayáá!, murawíin xúgíinʼ gu̱ʼu̱ bi̱ naguanún náa goʼwóo rey ndrígóo Judá ga̱jma̱a̱ magún kudiin náa príncipes ndrígóo rey bi̱ xtáa náa Babilonia ga̱jma̱a̱ ikhiin magún ruthi:
‹Xa̱bekha bi̱ nikuma̱a̱ʼ xtañún* nini̱ nduwáánʼ ga̱jma̱a̱ nisngajmaaʼ rí guáʼdáá itháan tsiaki̱i̱ ki xóo ikháán,nini̱ dí rajkuáaʼ maʼdu náa gaʼcha̱ʼ.
Rí xúgi̱ nagutángíin nagúun›.
23 Xúgíinʼ gu̱ʼya̱a̱ʼ ga̱jma̱a̱ e̱jña̱a̱ʼ majuixnájxi̱i̱n náa xa̱bu̱ caldeos. Ikháán xákriñáanʼ náa ñawúúnʼ ikhiin, rey bi̱ xtáa náa Babilonia magutuwíín ga̱jma̱a̱ numaaʼ mutsikha̱a̱ xuajin rígi̱”.
24 Nda̱wa̱á Sedequías niʼthúu̱n Jeremías: “Xáratha̱a̱n nimbáa rígi̱, mu xúʼko̱ xákáñáaʼ.
25 Á mu príncipes nidxawíín dí niʼtámíjná ga̱jma̱a̱ naguwáʼ gúthaanʼ ‹Mbá péñu aratunxu̱ ndiéjunʼ dí niʼtháanʼ rey, xátarkaʼwaaʼ nimbá mu xúʼko̱ xúxíña̱a̱nxu̱. Ndiéjunʼ dí niʼtháanʼ rey rá.›
26 Ikhú matriʼñún ‹Xtáá randoʼwo̱o̱ rey rí xákungu̱u̱nʼ maʼgáaʼ náa goʼwóo Jehonatán mu xákháñúʼ ikhí›”.
27 Mbiʼi nda̱wa̱á, xúgíinʼ príncipes niguwáʼ gúyáá Jeremías ga̱jma̱a̱ nirajxi̱i̱. Ikhaa niʼthún xúgíiʼ dí rey niʼtáñajuunʼ maʼthí. Ikha jngóo ikhiin nánguá nirajxi̱i̱ itháan, numuu rí nimbáa na̱nguá má niʼdxuun rí niʼtámíjná ga̱jma̱a̱.
28 Jeremías nixtáa náa Rexo̱o̱ náa gíi̱nʼ bi̱ Nuñewa̱a̱n asndu mbiʼi rí nindrigú Jerusalén, ikhaa nixtáa ikhí índo̱ nindrigú Jerusalén.
Mbaʼa nota
^ O “atani̱ mbá rí májánʼ”.
^ Náa ajngáa hebreo naʼthí, “nakawábaaʼ ñawúúnʼ”.
^ O “Patio de la Guardia”.
^ O “Puerta de Benjamín”
^ O “gaʼyee, bi̱ naʼthí dí marigá”.
^ Náa ajngáa hebreo naʼthí, “xa̱bu̱ bi̱ nuni̱ dí maraxtaa tsímáá”.
