Jeremías 39:1-18
39 Índo̱ naʼni mijna gu̱wa̱ʼ tsiguʼ dí xtáa raʼtáñajunʼ rey Sedequías náa Judá, dí maʼni gu̱wa̱ʼ igu̱nʼ, rey Nabucodonosor* bi̱ xtáa náa Babilonia ni̱ʼkha̱ gajmíi̱n xúgíinʼ soldados ndrígóo náa Jerusalén ga̱jma̱a̱ niruguama̱ʼa̱n.
2 Índo̱ niʼni 11 tsiguʼ dí xtáa raʼtáñajunʼ Sedequías, náa mijna gu̱wa̱ʼ mbiʼi rí a̱jkhu̱ igu̱nʼ, nixkudiraʼa xtájtsí ndrígóo xuajin.
3 Xúgíinʼ príncipes ndrígóo rey bi̱ xtáa náa Babilonia nitu̱ʼu̱u̱n ga̱jma̱a̱ nitri̱gi̱i̱n náa Xkrugua dí gíʼ Tu̱mba̱a̱.* Nindxu̱u̱ samgar Nergal-Sarézer, rabsarís Nebo-Sarsekim, ma̱ngaa rabmag* Nergal-Sarézer ga̱jma̱a̱ eʼwíinʼ príncipes ndrígóo rey bi̱ xtáa náa Babilonia.
4 Índo̱ Sedequías rey ndrígóo Judá gajmíi̱n xúgíinʼ soldados ndiyáá rígi̱, ikhú nigájnún ragáñúún náa xuajin. Mbruʼun nigájnún xígií náa jardín* ndrígóo rey, náa xkrugua dí gíʼma náa nájma̱ xtájtsí náa kamba̱a̱ rí na̱jkha̱ Arabá.
5 Mú soldados caldeos nigún ruxkáá ga̱jma̱a̱ niʼngu̱u̱n nixkamari̱ga̱a̱ Sedequías náa xkua̱ mijxooʼ ndrígóo Jericó. Nirtuwiin ga̱jma̱a̱ nigún kuya̱a̱ náa inuu Nabucodonosor* rey ndrígóo Babilonia náa Riblá, náa ku̱ba̱ʼ ndrígóo Hamat, ikhí niʼthúu̱n rí magíʼnuu.
6 Náa Riblá, rey ndrígóo Babilonia niʼtáñajunʼ dí muradíin e̱ji̱i̱n Sedequías náa inuu. Rey ndrígóo Babilonia ma̱ngaa niʼtáñajunʼ dí muradíin xúgíinʼ bi̱ guáʼdáá numún náa Judá.
7 Nda̱wa̱á niʼni rí magugóo iduu Sedequías ma̱ngaa niroʼóo ga̱jma̱a̱ cadena dí cobre mu maʼga kayáa Babilonia.
8 Ikhú bi̱ caldeos nitsikha̱a̱ goʼwóo rey ga̱jma̱a̱ guʼwá dí rígá náa xuajin ma̱ngaa nixpigu̱u̱ xtájtsí ndrígóo Jerusalén.
9 Nebuzaradán, bi̱ kayá edxu̱u̱ náa bi̱ nuñewa̱a̱n rey, ni̱jkha̱ kagui̱i̱n náa Babilonia xa̱bu̱ bi̱ xóó naguanún náa xuajin, xúʼko̱ má xa̱bu̱ bi̱ ninújnga̱án náa ñawúunʼ rey ndrígóo Babilonia ga̱jma̱a̱ xúgíinʼ bi̱ niguanún.
10 Mú Nebuzaradán, bi̱ kayá edxu̱u̱ náa bi̱ nuñewa̱a̱n rey, niniñúúnʼ náa ku̱ba̱ʼ ndrígóo Judá tikhuun xa̱bu̱ bi̱ itháán ngíníi náa xuajin bi̱ nda̱a̱ nditháan rí guáʼdáá. Mbiʼi rúʼko̱ nixnún mbaaʼ náa kiʼdu uva ga̱jma̱a̱ ku̱ba̱ʼ mu muñejuíín.*
11 Nabucodonosor* rey ndrígóo Babilonia niʼthúu̱n Nebuzaradán bi̱ kayá edxu̱u̱ náa bi̱ nuñewa̱a̱n rey ndiéjunʼ gáʼni ga̱jma̱a̱ Jeremías:
12 “Ayuʼ gátaʼyáaʼ, atie̱wa̱a̱n, xátani̱ ngínáa ga̱jma̱a̱ araxnáá xúgíʼ dí gánda̱ʼa̱a̱ʼ”.
13 Ikha jngóo Nebuzaradán, bi̱ kayá edxu̱u̱ náa bi̱ nuñewa̱a̱n rey, xúʼko̱ má rabsarís Nebusazbán, ma̱ngaa rabmag Nergal-Sarézer ga̱jma̱a̱ xúgíinʼ bi̱ kuya̱ edxu̱u̱ náa rey ndrígóo Babilonia nitañajunʼ rí
14 magajnáa Jeremías náa Rexo̱o̱ náa gíi̱nʼ bi̱ Nuñewa̱a̱n* ga̱jma̱a̱ muxnajxi̱i̱ náa Guedalías, a̱ʼdióo Ahicam, a̱ʼdióo Safán, mu maʼga̱a̱ kayáa náa goʼwóo. Ikha jngóo Jeremías nixtáa náa majñu̱únʼ xa̱bu̱ xuajin.
15 Índo̱ Jeremías nixtáa náa Rexo̱o̱ náa gíi̱nʼ bi̱ Nuñewa̱a̱n, nigruigú ajngóo Jeobá rígi̱:
16 “Ayuʼ ga̱jma̱a̱ aratháán Ébed-Mélec bi̱ nindxu̱u̱ xa̱bu̱ etíope: ‹Rígi̱ dí naʼthí Jeobá bi̱ naʼtáñajúúnʼ ángeles, Dios ndrígóo Israel: “Manimbánuu ajngóʼ dí ni̱tha̱ ga̱jma̱a̱ numuu xuajin rígi̱, ajngáa ga̱jma̱a̱ numuu gamiéjunʼ raʼkháa dí májánʼ ga̱jma̱a̱ ikháán ma̱ta̱ya̱a̱ xóo gámbánúu mbiʼi rúʼko̱”›.
17 ‹Mú ikhúún ma̱ni̱ kríñáanʼ mbiʼi rúʼko̱, eʼthí Jeobá, xájuixnájxi̱i̱n náa ñawúúnʼ xa̱bu̱ bi̱ namíñáaʼ eni̱›.
18 ‹Numuu rí gajkhun dí ma̱ni̱ kríñáanʼ, xákáñáaʼ ga̱jma̱a̱ espada. Ikháán maguma kríñáanʼ numuu rí niku̱ma̱a̱ʼ xtayoʼ›, eʼthí Jeobá”.
Mbaʼa nota
^ Náa ajngáa hebreo naʼthí, “Nabucodorosor”. Rígi̱ nindxu̱u̱ i̱mba̱ xóo nuniraʼmáʼ.
^ O “Puerta del Medio”.
^ O “xa̱bu̱ xawan bi̱ kayá edxu̱u̱”.
^ O “ixi̱ ri̱ʼi̱”.
^ Náa ajngáa hebreo naʼthí, “Nabucodorosor”. Rígi̱ nindxu̱u̱ i̱mba̱ xóo nuniraʼmáʼ.
^ O mbáa “mutsudiin mu muñejunʼ”.
^ Náa ajngáa hebreo naʼthí, “Nabucodorosor”. Rígi̱ nindxu̱u̱ i̱mba̱ xóo nuniraʼmáʼ.
^ O “Patio de la Guardia”.
