Jeremías 40:1-16
40 Jeremías nigruigú ajngóo Jeobá nda̱wa̱á dí Nebuzaradán bi̱ kayá edxu̱u̱ náa bi̱ nuñewa̱a̱n rey niniñuuʼ maʼga̱a̱ índo̱ xtáa náa Ramá, kaxtoʼóo ni̱jkha̱ kayáa asndu ikhí, ikhaa ma̱ngaa xtáa náa majñu̱únʼ xa̱bu̱ Jerusalén ga̱jma̱a̱ xa̱bu̱ Judá bi̱ na̱jkha̱ kiʼdiin náa Babilonia.
2 Ikhú bi̱ kayá edxu̱u̱ náa bi̱ nuñewa̱a̱n rey niríyaaʼ wájííʼ Jeremías ga̱jma̱a̱ niʼthúu̱n: “Jeobá Dios ndrígáaʼ niʼtáriyaʼ dí marigá gamiéjunʼ rígi̱,
3 Jeobá ni̱ʼkha̱ kayóo gamiéjunʼ rígi̱ xóo má ikhaa niʼthí, numuu rí ikháanʼ nixuʼdámíjná aʼkhá náa inuu Jeobá ga̱jma̱a̱ túnimbala aʼwóo. Ikhaa rúʼko̱ numuu jngóo nigíʼnala rígi̱.
4 Dí xúgi̱ narajkuíi dí kaxtoʼóo ga̱jma̱a̱ ñawáanʼ. Á mu míjiánʼ tayáá dí mi̱dxa̱ʼ ga̱jma̱á nindxu̱ʼ náa Babilonia, ayi̱, ikhúún má gáñewa̱a̱nʼ. Á mu tsíyaaʼ, xádxáʼ má. ¡Atayáá! Kañiiʼ ku̱ba̱ʼ kri̱ga̱ náa ma̱ndoo mi̱dxu̱ʼ. Ayuʼ asndu náá má gáʼndaaʼ”.
5 Asndu xóó má tséjkha̱a̱ Jeremías índo̱ Nebuzaradán niʼthúu̱n: “Atanga̱án midxu̱u̱ʼ náa xtáa Guedalías, a̱ʼdióo Ahicam, a̱ʼdióo Safán, bi̱ rey ndrígóo Babilonia nigíiʼ mbayá edxu̱u̱ náa xuajin Judá, aguanáaʼ ga̱jma̱a̱ ikhaa náa majñu̱únʼ xa̱bu̱ xuajin o ayuʼ asndu náá má gáʼndaaʼ ikháánʼ”.
Ikhú bi̱ kayá edxu̱u̱ náa bi̱ nuñewa̱a̱n rey nixnúu ganitsu ma̱ngaa mbá regalo ga̱jma̱a̱ niniñuuʼ maʼga̱a̱.
6 Ikhú Jeremías ni̱jkha̱a̱ náa xtáa Guedalías a̱ʼdióo Ahicam náa Mizpá, niguanúu ga̱jma̱a̱ ikhaa náa majñu̱únʼ xa̱bu̱ bi̱ xóó naguanún náa xuajin.
7 Nda̱wa̱á, xúgíinʼ bi̱ kuya̱ edxu̱u̱ náa soldados gajmiún xa̱biu̱ún bi̱ kúwá xanáá nidxawíín dí rey ndrígóo Babilonia nigíiʼ Guedalías a̱ʼdióo Ahicam mbayá edxu̱u̱ náa xuajin ma̱ngaa rí maʼtáñajúúnʼ xa̱bekha, gu̱ʼu̱ ga̱jma̱a̱ e̱ji̱n, xa̱bu̱ ngíníi bi̱ niguanún náa xuajin, bi̱ na̱nguá ni̱jkha̱ kiʼdiin náa Babilonia.
8 Ikha jngóo nigún gúyáá Guedalías náa Mizpá. Ni̱jkha̱ Ismael a̱ʼdióo Netanías, Johanán ga̱jma̱a̱ Jonatán, e̱ji̱i̱n Caréah, Seraya a̱ʼdióo Tanhúmet, e̱ji̱i̱n Efái bi̱ nindxu̱u̱ netofatita ma̱ngaa Jezanías a̱ʼdióo maacatita, nigún gajmiún xa̱biu̱ún.
9 Guedalías, a̱ʼdióo Ahicam, a̱ʼdióo Safán, nixná ajngóo náa inún ikhiin ma̱ngaa náa xa̱biu̱ún. Niʼthúún: “Xámiñalaʼ dí muni̱ ñajúúnʼ xa̱bu̱ caldeos. Gu̱ni̱ ñajuunʼ rey ndrígóo Babilonia náa xuajin rígi̱ ga̱jma̱a̱ makuwáanʼla májánʼ.
10 Ikhúún, maguanúʼ náa Mizpá mu ma̱ta̱ ga̱jma̱á numala* índo̱ gáguwáʼ bi̱ caldeos. Ikháanʼla mbaʼyóoʼ mugímbola xndú taun, vino ga̱jma̱a̱ aceite, mu̱ni̱ majnííʼ náa rayaʼ ga̱jma̱a̱ makuwáanʼla náa xuajin dí ikháanʼ nirajtuun”.
11 Xúgíinʼ judíos bi̱ kúwá náa Moab, Ammón, Edom ga̱jma̱a̱ náa i̱ʼwáʼ xuajin, nidxawíín dí rey bi̱ xtáa náa Babilonia niniñúúnʼ mbá nguéjmi̱i̱n xa̱bu̱ náa Judá ma̱ngaa rí nigíiʼ Guedalías, a̱ʼdióo Ahicam, a̱ʼdióo Safán mayéʼga edxu̱u̱ náa ikhiin.
12 Ikha jngóo xúgíinʼ judíos nigíʼdi̱i̱ nitangi̱i̱n náa ku̱ba̱ʼ rí nijuidriʼiin, niguwáa̱nʼ náa Judá, náa xtáa Guedalías náa Mizpá. Nirajxi̱i̱ mbaʼa wéñuuʼ xndú taun ga̱jma̱a̱ mba̱ji̱nʼ wéñuuʼ vino.
13 Johanán a̱ʼdióo Caréah ga̱jma̱a̱ xúgíinʼ bi̱ ku̱ya̱ edxu̱u̱ náa soldados bi̱ kúwá xanáá niguwáʼ gúyáá Guedalías náa Mizpá.
14 Ikhiin nitháán: “Lá tsétayáá rí Baalís, rey ndrígu̱ún ammonitas, nikuʼmaa Ismael a̱ʼdióo Netanías mu maxiñáan ráʼ.” Mú Guedalías a̱ʼdióo Ahicam táʼnimbo̱o̱ kaʼñún.
15 Ikhú Johanán a̱ʼdióo Caréah nguʼwáá niʼthúu̱n Guedalías náa Mizpá: “Nandoʼ maʼgá gáxíyáa Ismael a̱ʼdióo Netanías, nimbáa má ndawa̱a̱ tsáa gáʼyoo. Náá numuu rí muniʼñááʼ rí ikhaa maxíñáan xá. Náá numuu rí muniʼñááʼ dí xúgíinʼ xa̱bu̱ Judá bi̱ niguwáánʼ ga̱jma̱á nindxa̱a̱ʼ majuidriʼiin mbu̱júu̱ rá. Ndíjkha rí muniʼñááʼ dí mandátigi̱i̱n mbá kayuuʼ xa̱bu̱ Judá bi̱ xóó naguanún rá.”
16 Mú Guedalías a̱ʼdióo Ahicam niʼthúu̱n Johanán a̱ʼdióo Caréah: “Xátani̱ rúʼko̱, numuu dí ragájkhun nindxu̱u̱ dí naratá ga̱jma̱a̱ numuu Ismael”.
Mbaʼa nota
^ Náa ajngáa hebreo naʼthí, “mu maguájun”.
