Jeremías 41:1-18
41 Índo̱ niʼni juwan igu̱nʼ, Ismael a̱ʼdióo Netanías, a̱ʼdióo Elisamá, bi̱ na̱ʼkha̱ náa goʼwóo rey,* ga̱jma̱a̱ nindxu̱u̱ mbáa xa̱bu̱ bi̱ gíʼdoo itháan numuu náa rey, ni̱ʼkha̱ gáʼyoo Guedalías a̱ʼdióo Ahicam náa Mizpá. Gajmíi̱n mbá gu̱wi̱i̱nʼ xa̱bekha índo̱ tri̱gi̱i̱n ruphiʼtsu mbóó náa Mizpá,
2 Ismael a̱ʼdióo Netanías gajmíi̱n mbá gu̱wi̱i̱nʼ xa̱bekha bi̱ ni̱jkha̱ gajmíi̱n niguájxu ga̱jma̱a̱ nixiyáa Guedalías a̱ʼdióo Ahicam, a̱ʼdióo Safán ga̱jma̱a̱ espada. Xúʼko̱ nixíyáa bi̱ rey ndrígóo Babilonia nigíiʼ mu mayéʼga edxu̱u̱ náa xuajin.
3 Ismael ma̱ngaa nigudíin mbá xúgíinʼ judíos bi̱ xtáa gajmíi̱n Guedalías náa Mizpá, xúʼko̱ má soldado caldeos bi̱ kúwá ikhí.
4 Imbo̱o̱ néjtsuu dí nikháñúu Guedalías, nákha nimbáa xóó tséʼdxawun,
5 niguwáʼ mbá 80 xa̱bekha náa Siquem, náa Siló ga̱jma̱a̱ náa Samaria. Nida̱ stawúúnʼ, nithu xtíñún ga̱jma̱a̱ nirujtumijná, ma̱ngaa náa ñawúúnʼ kuda olíbano ga̱jma̱a̱ tsigijñaʼ dí tsígáʼ mu mudégún náa goʼwóo Jeobá.
6 Ikhú Ismael a̱ʼdióo Netanías nigájnuu náa Mizpá ni̱jkha̱ gátsijnún, asndu nambi̱ya̱ʼ ejkha̱ kruígo̱o̱. Índo̱ ni̱jkha̱nú náa kúwá ikhiin, niʼthún: “Aguwaʼ gúya̱a̱ Guedalías a̱ʼdióo Ahicam”.
7 Mú índo̱ nitu̱ʼu̱u̱n náa xuajin, Ismael a̱ʼdióo Netanías gajmíi̱n xa̱bi̱i̱ niradíin ga̱jma̱a̱ nidami̱ʼi̱i̱n náa iñáʼ.
8 Mú mbá gu̱wi̱i̱nʼ xa̱bekha nitháán Ismael: “Xáradiáanʼxu, numuu rí náa xanáá guáʼdááxu ngu̱ʼwa̱ ganitsu, trigo, cebada, aceite ga̱jma̱a̱ jyááʼ”. Ikha jngóo na̱nguá nigudíin xó má nigudíin eʼwíinʼ.
9 Ismael nidami̱ʼi̱i̱n xa̱bu̱ bi̱ nigudíin náa iñáʼ mba̱a̱ dí niʼni rey Asá ga̱jma̱a̱ numuu rey Baasá bi̱ xtáa náa Israel. Náa iñáʼ rúʼko̱ Ismael a̱ʼdióo Netanías niʼni majtíin xa̱bu̱ bi̱ nigudíin.
10 Ismael ni̱jkha̱ kagui̱i̱n xa̱bu̱ bi̱ kúwá náa Mizpá, asndu waʼxiinʼ rey ga̱jma̱a̱ xúgíinʼ xa̱bu̱ bi̱ naguanún náa Mizpá, bi̱ Nebuzaradán, bi̱ kayá edxu̱u̱ náa bi̱ nuñewa̱a̱n rey, nigíiʼ Guedalías a̱ʼdióo Ahicam mu mañewu̱u̱n ikhiin. Ismael a̱ʼdióo Netanías ni̱jkha̱ kagui̱i̱n xa̱bu̱ bugi̱ ga̱jma̱a̱ ni̱jkha̱ mu manújngoo náa ku̱bu̱únʼ ammonitas.
11 Índo̱ Johanán a̱ʼdióo Caréah gajmíi̱n mbá xúgíinʼ bi̱ kuya̱ edxu̱u̱ náa soldado bi̱ xtáa gajmíi̱n, nidxawíín xúgíʼ dí ra̱májánʼ rí niʼni Ismael a̱ʼdióo Netanías,
12 ni̱jkha̱ gajmíi̱n xúgíinʼ xa̱bekha mu muxmijná gajmiún Ismael a̱ʼdióo Netanías, nixkamaa náa Gabaón náa rígá mba̱ji̱nʼ iyaʼ.*
13 Xúgíinʼ xa̱bu̱ bi̱ xtáa gajmíi̱n Ismael nidxúún wéñuuʼ índo̱ ndiyáá Johanán a̱ʼdióo Caréah xó má xúgíinʼ bi̱ kuya̱ edxu̱u̱ náa soldado bi̱ na̱jkha̱ gajmíi̱n.
14 Ikhú xúgíinʼ xa̱bu̱ bi̱ Ismael nigájnuu kagui̱i̱n náa Mizpá nitangiín gajmiún Johanán a̱ʼdióo Caréah.
15 Mú Ismael a̱ʼdióo Netanías gajmíi̱n mbá migiñiiʼ xa̱bi̱i̱ niʼngu̱u̱n nikáwíin náa ñawúunʼ Johanán ga̱jma̱a̱ nigún náa ku̱bu̱únʼ ammonitas.
16 Johanán a̱ʼdióo Caréah gajmíi̱n mbá xúgíinʼ bi̱ kuya̱ edxu̱u̱ náa soldado bi̱ xtáa gajmíi̱n nigúun kudiin xa̱bu̱ bi̱ niguanún náa Mizpá, bi̱ niʼngu̱u̱n nini̱ káwíin náa Ismael a̱ʼdióo Netanías nda̱wa̱á dí ikhaa nixíyáa Guedalías a̱ʼdióo Ahicam. Nigájníin kudiin náa Gabaón, xa̱bekha, soldados, gu̱ʼu̱, e̱ji̱n ga̱jma̱a̱ xa̱bu̱ bi̱ guáʼdáá numún náa guʼwá ñajunʼ.
17 Ikhú nigúun ga̱jma̱a̱ niguánú náa maguanún náa Kimham, mijngii Belén, nandún rí magún má xúʼko̱ mu maguánú náa Egipto,
18 numuu rí nimíñúún kuñúún bi̱ caldeos. Ga̱jma̱a̱ numuu rí Ismael a̱ʼdióo Netanías nixíyáa Guedalías a̱ʼdióo Ahicam, bi̱ rey ndrígóo Babilonia nigíiʼ mu mayéʼga edxu̱u̱ náa xuajin.
Mbaʼa nota
^ Náa ajngáa hebreo naʼthí, “mbá xúgíinʼ bi̱ kaʼñúún mutañajunʼ”.
^ O mbáa “náa tanque rí mba̱a̱”.
