Jeremías 42:1-22
42 Ikhú xúgíinʼ bi̱ kuya̱ edxu̱u̱ náa soldado, Johanán a̱ʼdióo Caréah, Jezanías a̱ʼdióo Hosaya ga̱jma̱a̱ xúgíinʼ xa̱bu̱, bi̱ majkhiinʼ asndu bi̱ itháan wanii, nigún náa
2 profeta* Jeremías ga̱jma̱a̱ nitháán: “Mbá péñu,* atadxawíín rí nutakáñaanʼxu̱. Aratakáñíí Jeobá Dios ndrígáaʼ ga̱jma̱a̱ numuxuʼ ma̱ngaa ga̱jma̱a̱ numún xa̱bu̱ bi̱ xóó naguanún, xó má nandoo natayáá, nákha ginii mbaʼáanʼxu̱, mú rí xúgi̱ káaʼ mbá nguéjma̱ eguanúxu̱.
3 Jeobá Dios ndrígáaʼ gáʼtuxu̱ xú káʼnii kamba̱a̱ gúʼguáxu̱ ga̱jma̱a̱ ndiéjunʼ gúnixu̱”.
4 Profeta Jeremías niriʼñúún: “Májánʼ má. Matakáñuu Jeobá Dios ndrígala xó má ikháanʼla nindo̱ʼo̱ʼ, ga̱jma̱a̱ ma̱tala mámbá ajngáa rí Jeobá gáriʼñuʼ. Xárkaʼwumuʼúnʼ nimbá ajngáa”.
5 Ikhiin niriʼñáán Jeremías: “Jeobá gánindxu̱u̱ mbáa testigo gajkuwiin ga̱jma̱a̱ jmbii náa ikháanʼxu̱ á mu tsénimbanííxu dí Jeobá Dios ndrígáaʼ gáʼtuxu̱ náa ikháán.
6 Tséʼniuu á mu májánʼ o ra̱májánʼ, ikháanʼ mu̱nimbuxu aʼwóo Jeobá Dios ndrígúxu̱, náa ikháanʼxu̱ nuxuʼmáánʼ mi̱dxu̱ʼ. Mu xúʼko̱ makuwáanʼxu májánʼ má ikháanʼ á mu nu̱nimbuxuʼ aʼwóo Jeobá Dios ndrígúxu̱”.
7 Jeremías nigruigú ajngóo Jeobá gu̱wa̱ʼ mbiʼi nda̱wa̱á.
8 Ikha jngóo niʼthúu̱n ma̱ʼkha̱ Johanán a̱ʼdióo Caréah ga̱jma̱a̱ xúgíinʼ bi̱ kuya̱ edxu̱u̱ náa soldados bi̱ xtáa gajmíi̱n, ma̱ngaa xúgíinʼ xa̱bu̱, bi̱ majkhiinʼ asndu bi̱ itháan wanii.
9 Niʼthún: “Rígi̱ dí naʼthí Jeobá, Dios ndrígóo Israel, bi̱ ikháanʼla nixuʼmún matakáñuu mu ma̱ndo̱ʼo̱o̱ ga̱jma̱a̱ numala:
10 ‹Á mu ikháanʼla naguanála náa xuajin rígi̱, ikhúún ma̱ni̱ dí maguaʼdáá raʼkháa dí ma̱ni̱ gámbáanʼla, ma̱ni̱ dí makuwáanʼla raʼkháa dí marubuwáanʼla, ga̱jma̱a̱ magáwíinʼ a̱jkiu̱nʼ gáʼni gamiéjunʼ rí nikuʼmá inala.
11 Xámíñálá kuya̱a̱ rey bi̱ xtáa náa Babilonia, bi̱ namíñala eʼni›.
‹Xámíñálá gáʼni ikhaa, eʼthí Jeobá, numuu rí ikhúún xtáá ga̱jma̱á nindxa̱la mu ma̱ni̱ káwáanʼla náa ñawúunʼ.
12 Magáwíinʼ a̱jkiu̱nʼ ka̱yala, ga̱jma̱a̱ ikhaa magáwíinʼ a̱jkiu̱u̱n gúnila, maʼni dí matangáanʼla náa xuajñala.
13 Mú, á mu ikháanʼla nu̱ta̱ “¡Na̱nguá, xáwanúxu náa xuajin rígi̱!” ga̱jma̱a̱ tsénimbala aʼwóo Jeobá Dios ndrígala
14 ga̱jma̱a̱ nu̱ta̱ “Na̱nguá, ikháanʼxu̱ muʼguá náa ku̱ba̱ʼ ndrígóo Egipto, ikhí xúya̱a̱xu dí nuxmijná xa̱bu̱, ni má xúdxawíínʼxu aʼwóo chi̱ji̱ʼ, ni má xánújnguxu ewiʼ, ikhí gánindxu̱u̱ náa makuwáanʼxu”,
15 ikha jngóo, gu̱xna̱ tíʼñamijnála mudxawíín ajngóo Jeobá, ikháanʼla xa̱bu̱ bi̱ xóó naguanún náa Judá. Rígi̱ dí naʼthí Jeobá bi̱ naʼtáñajúúnʼ ángeles, Dios ndrígóo Israel: “Á mu ikháanʼla nuraʼwi̱i̱ ga̱jma̱a̱ xúgíʼ a̱jkia̱la muʼgua náa Egipto ga̱jma̱a̱ makuwáanʼla ikhí,
16 ikhú espada dí naʼnimíñala maxkamáanʼla ikhí náa ku̱ba̱ʼ ndrígóo Egipto, ga̱jma̱a̱ ewiʼ dí ikháanʼla naʼnimíñala maʼga raxkala náa Egipto, náa makhañála.
17 Xúgíinʼ xa̱bu̱ bi̱ gúraʼwi̱i̱ magún gákúwá náa Egipto, ikhí gákháñún ga̱jma̱a̱ espada, ewiʼ ga̱jma̱a̱ nandii. Nimbáa xákríya̱a̱ʼ náa gamiéjunʼ rí makuʼmá inún”›.
18 Numuu dí rígi̱ rí naʼthí Jeobá bi̱ naʼtáñajúúnʼ ángeles, Dios ndrígóo Israel: ‹Xó má ni̱xidirámuuʼ rí nakásngañu̱ʼ náa xa̱bu̱ Jerusalén, xúʼko̱ má gáxidirámuuʼ dí nakásngañu̱ʼ náa ikháanʼla á mu najkua náa Egipto, mani̱ndxa̱la mbá dí majuiʼtásrígú, mbá rí maʼnimíñún eʼwíinʼ, mbá rí xáʼndúún gúyáá ga̱jma̱a̱ mutanumáá eʼwíinʼ, ma̱ngaa nditháan xátangáanʼ mbu̱ya̱a̱ mbaaʼ rígi̱›.
19 Jeobá niʼthí rígi̱ ga̱jma̱a̱ numala, ikháanʼla bi̱ xóó naguanála náa Judá. Xáʼguala náa Egipto. Xámbumala rí ni̱tala xúgi̱ ga̱jma̱a̱ numuu rígi̱
20 rí xájmáanʼ gúraʼwíí májánʼ rí mu̱nila maʼni rí makhañála. Numuu rí ikháanʼla nixuʼmún náa Jeobá Dios ndrígala, nithu̱nʼ: ‹Aratakáñíí ga̱jma̱a̱ numuxuʼ Jeobá Dios ndrígúxu̱, ga̱jma̱a̱ aratúxu xúgíʼ dí Jeobá Dios ndrígúxu̱ gáʼtháanʼ, ikháanʼ mu̱nimbanííxu›.
21 Rí xúgi̱ ni̱tala má ikháanʼ, mú ikháanʼ xúnimbala ajngóo Jeobá Dios ndrígala, ni má xúni̱ nimbá rí ikhaa nikuʼmáanʼla mu̱ni̱.
22 Ikha jngóo, gu̱ya̱a̱la gajkhun rí makhañála ga̱jma̱a̱ espada, ewiʼ ga̱jma̱a̱ nandii náa mbaaʼ rí ikháanʼ nandala muʼgua gákuwáanʼ”.
