Jeremías 43:1-13
43 Índo̱ Jeremías niguámbóo niʼthún xa̱bu̱ xúgíʼ ajngóo Jeobá, Dios ndrígu̱ún ikhiin, kuduun niʼthúún ajngóo Jeobá, Dios ndrígu̱ún ikhiin, dí nikuʼmaa maʼthí,
2 Azarías a̱ʼdióo Hosaya, Johanán a̱ʼdióo Caréah ga̱jma̱a̱ xúgíinʼ eʼwíinʼ xa̱bu̱ bi̱ nuni̱ mbaʼumíjna̱, nitháán Jeremías: “¡Dí xtaa raratá nindxu̱u̱ minduwaʼ! Jeobá Dios ndrígúxu̱ tákuʼmán marata̱ rígi̱ ‹Xáʼgua̱ gákuwáanʼla náa Egipto›.
3 Numuu dí Baruc a̱ʼdióo Nerías niʼni dí makiʼnán xtayuxu mu majuixnájxáanʼxu náa ñawúúnʼ xa̱bu̱ caldeos, mu muradiáanʼxu o magún kudáanʼxu náa Babilonia”.
4 Ikha jngóo Johanán a̱ʼdióo Caréah, xúgíinʼ bi̱ kuya̱ edxu̱u̱ náa soldado ga̱jma̱a̱ xúgíinʼ xa̱bu̱ túnimbu̱u̱n aʼwóo Jeobá, táguanún náa ku̱ba̱ʼ ndrígóo Judá.
5 Rí phú nini̱, Johanán a̱ʼdióo Caréah ga̱jma̱a̱ xúgíinʼ bi̱ kuya̱ edxu̱u̱ náa soldado nigúun kudiin xa̱bu̱ bi̱ xóó naguanún náa Judá bi̱ niguwáa̱nʼ gákúwá náa ku̱ba̱ʼ ndrígóo Judá asndu náa xúgíʼ xuajin dí nijuadríʼiin mu makuwá ikhí mbu̱júu̱.
6 Nigún kudiin xa̱bekha, gu̱ʼu̱, e̱ji̱n, waʼxiinʼ rey ga̱jma̱a̱ xúgíinʼ xa̱bu̱ bi̱ Nebuzaradán, bi̱ kayá edxu̱u̱ náa bi̱ nuñewa̱a̱n rey niniñúúnʼ mañewu̱u̱n Guedalías, a̱ʼdióo Ahicam, a̱ʼdióo Safán, xó má profeta* Jeremías ga̱jma̱a̱ Baruc a̱ʼdióo Nerías.
7 Túnimbu̱u̱n aʼwóo Jeobá, nigún náa ku̱ba̱ʼ ndrígóo Egipto asndu niguánú náa Tahpanhés.
8 Ikhú Jeremías nigruigú ajngóo Jeobá rígi̱ náa Tahpanhés:
9 “Atrajtun tikhuu itsí mba̱ʼu̱ ga̱jma̱a̱ atarkaʼwu náa agoo tabique dí rígá náa riejuun goʼwóo faraón náa Tahpanhés, ga̱jma̱a̱ atani̱ rí mbuyáá xa̱bu̱ judíos.
10 Nda̱wa̱á arathún: ‹Rígi̱ dí naʼthí Jeobá bi̱ naʼtáñajúúnʼ ángeles, Dios ndrígóo Israel: “Makuʼmá dí mundxa̱ʼwa̱a̱ Nabucodonosor,* rey bi̱ xtáa náa Babilonia bi̱ nindxu̱u̱ xa̱bi̱ʼ, maʼgíʼ xíliu̱u̱* náa tsu̱du̱u̱ itsí dí ni̱rugóo, ga̱jma̱a̱ ikhaa magíʼ ikhí guʼwá xtíin ndrígóo rí nindxu̱u̱ kiejuunʼ.
11 Ikhaa ma̱ʼkha̱ ga̱jma̱a̱ maʼni gawúúnʼ xa̱bu̱ bi̱ kúwá náa Egipto. Bi̱ kaʼyoo makhañúu ga̱jma̱a̱ nandii mbiʼ, makhañúu ga̱jma̱a̱ nandii mbiʼ. Bi̱ kaʼyoo magún kuya̱a̱, magún kuya̱a̱. Bi̱ kaʼyoo makhañúu ga̱jma̱a̱ espada, makhañúu ga̱jma̱a̱ espada.
12 Magídooʼ agiuuʼ náa guʼwá rí nduyamajkhún dioses ndrígóo Egipto, ikhaa matsikháa ga̱jma̱a̱ maʼga̱a̱ kagui̱i̱n. Xó má mbáa baxtúu narúguaminaʼ ga̱jma̱a̱ mbá xtíin, ikhaa marúguaminaʼ ga̱jma̱a̱ ku̱ba̱ʼ ndrígóo Egipto, tsímáá gágájnáa ikhí.
13 Majkúmi̱gu̱u̱ postes dí rígá náa Bet-Semes náa ku̱ba̱ʼ ndrígóo Egipto, ma̱ngaa matsikáa guʼwá náa nduyamajkhún dioses ndrígóo Egipto”›”.
Mbaʼa nota
^ O “gaʼyee, bi̱ naʼthí dí marigá”.
^ Náa ajngáa hebreo naʼthí, “Nabucodorosor”. Rígi̱ nindxu̱u̱ i̱mba̱ xóo nuniraʼmáʼ.
^ O “trono ndrígóo”.
