Jeremías 44:1-30
44 Jeremías nigruigú ajngáa rígi̱ mu maʼthúún mbá xúgíinʼ judíos bi̱ kúwá náa ku̱ba̱ʼ ndrígóo Egipto, ma̱ngaa bi̱ kúwá náa Migdol, náa Tahpanhés, náa Nof ga̱jma̱a̱ náa ku̱ba̱ʼ ndrígóo Patrós:
2 “Rígi̱ dí naʼthí Jeobá bi̱ naʼtáñajúúnʼ ángeles, Dios ndrígóo Israel: ‹Ikháanʼla ndi̱ya̱a̱ xúgíʼ gamiéjunʼ dí nikuʼmá náa Jerusalén ga̱jma̱a̱ náa xúgíʼ xuajin dí rígá náa Judá, dí xúgi̱ niguma gámbáa, ga̱jma̱a̱ ní ndawi̱i̱n xa̱bu̱ ikhí.
3 Nirígá rígi̱ ga̱jma̱a̱ numuu xúgíʼ dí raʼkhí nini̱ índo̱ nixnajxi̱ tsigijñaʼ náa inún eʼwíinʼ dioses bi̱ nákha ginii na̱nguá eniʼnuunʼ, ni má ikháanʼ ni má wajin xiʼñála.
4 Ikhúún nakuʼmiin nángi eʼni* xa̱bi̱ʼ bi̱ nindxu̱ún profetas,* mu mu̱tala: “Mbá péñu,* xúni̱ xúgíʼ rí xkawiʼ dí ikhúún nawi̱yu̱ʼ eʼni”.
5 Mú ikhiin na̱nguá nixnatiʼñami̱jná mudxawíín* ga̱jma̱a̱ na̱nguá niniña̱a̱nʼ runi̱ dí xkawiʼ, nixnajxi̱ má xúʼko̱ tsigijñaʼ náa inún eʼwíinʼ dioses.
6 Rí nakiʼnún ga̱jma̱a̱ dí nakásngañu̱ʼ nigadirámuuʼ ga̱jma̱a̱ nikamuu náa xuajin dí rígá náa Judá ga̱jma̱a̱ náa kamba̱a̱ ndrígóo Jerusalén, niguanúu xóo ku̱ba̱ʼ mijxooʼ* ga̱jma̱a̱ niguámbáa, xúʼko̱ niguanúu asndu xúgi̱›.
7 Rígi̱ dí naʼthí Jeobá, Dios bi̱ naʼtáñajúúnʼ ángeles, Dios ndrígóo Israel: ‹Náá numuu dí kaníkháanʼ nu̱ni̱ marigá gamiéjunʼ mba̱a̱ rígi̱, nu̱ni̱ rí makhañún xúgíinʼ xa̱bekha, gu̱ʼu̱, e̱ji̱n ga̱jma̱a̱ e̱jín dxáñáʼ bi̱ kúwá náa Judá, ga̱jma̱a̱ nimbáa tséniʼñááʼ dí maguanúu rá.
8 Numuu rí ni̱ni̱ dí makásnga̱ñu̱ʼ, dí ni̱ni̱ ga̱jma̱a̱ ñawánla índo̱ nixnajxí tsigijñaʼ náa eʼwíinʼ dioses bi̱ kúwá náa ku̱ba̱ʼ ndrígóo Egipto náa nijkua̱ gákuwáanʼla. Ikháanʼ makhañála ga̱jma̱a̱ mani̱ndxa̱la mbá náa rí majuiʼtásrígú ga̱jma̱a̱ mbá rí majuiʼthá numáá náa xúgíʼ xuajin dí rígá náa tsu̱du̱u̱ ku̱ba̱ʼ.
9 Lá nimbumala rí xkawiʼ dí nini̱ wajin xiʼñála ga̱jma̱a̱ reyes bi̱ nikúwá náa Judá ma̱ngaa guʼñu̱ún ikhiin, xó má rí xkawiʼ ni̱nila ikháanʼ gajmiála gu̱ʼyala rí ni̱nila náa ku̱ba̱ʼ dí rígá náa Judá ga̱jma̱a̱ náa kamba̱a̱ dí rígá náa Jerusalén ráʼ.
10 Asndu dí mbiʼi xúgi̱ na̱nguá exruigúmíjná ni má tsésngajma rí namíñúún, ni má na̱nguá jngruigu̱u̱n xó má eʼthí náa xtángoo ndrígóʼ ga̱jma̱a̱ kiʼtáñajunʼ ndrígóʼ, dí nigruíga̱ náa ikhiin ga̱jma̱a̱ náa wajin xiʼñúúnʼ›.
11 Ikha jngóo, rígi̱ dí naʼthí Jeobá bi̱ naʼtáñajúúnʼ ángeles, Dios ndrígóo Israel: ‹Niraʼwi̱i̱ dí makuʼmá mbá gamiéjunʼ náa ikháanʼla ga̱jma̱a̱ ma̱ni̱ gámbáa xúgíʼ Judá.
12 Xa̱bu̱ bi̱ gáguanún náa Judá, bi̱ niraʼwi̱i̱ magún gákúwá náa ku̱ba̱ʼ ndrígóo Egipto, maguajthúun ga̱jma̱a̱ xúgíinʼ makhañún náa ku̱ba̱ʼ ndrígóo Egipto. Makhañún ga̱jma̱a̱ espada ma̱ngaa ewiʼ, bi̱ majkhiinʼ asndu bi̱ itháan wanii, makhañún ga̱jma̱a̱ espada ma̱ngaa ewiʼ. Maguánú mani̱ndxu̱ún mbá rí nijuiʼtátsrígú, mbá gamíi rí maʼnimíñún eʼwíinʼ ma̱ngaa rí majuiʼthá wéñúúnʼ.
13 Ma̱ni̱ ngíníi bi̱ kúwá náa ku̱ba̱ʼ ndrígóo Egipto, xó má ni̱ni̱ ngíníi bi̱ kúwá náa Jerusalén ga̱jma̱a̱ espada, ewiʼ ma̱ngaa nandii.
14 Xa̱bu̱ bi̱ gáguanún náa Judá bi̱ gágún gákúwá náa ku̱ba̱ʼ ndrígóo Egipto xákáwíinʼ mu makuwá, xándoo matangi̱ín náa ku̱ba̱ʼ Judá. Maʼndún matangi̱ín mu makuwá ikhí, mú xátangi̱ín, numuu rí káaʼ nguéjmi̱i̱n bi̱ makáwíin›”.
15 Xúgíinʼ xa̱bekha bi̱ ndiyáá rí guʼñu̱ún nikúwá ruxnajxi̱ tsigijñaʼ náa inún eʼwíinʼ dioses ga̱jma̱a̱ xúgíinʼ gu̱ʼu̱ bi̱ nikúwá ikhí, xa̱bekha gajmiún guʼñu̱ún ga̱jma̱a̱ mbá xúgíinʼ xa̱bu̱ bi̱ nikúwá náa ku̱ba̱ʼ ndrígóo Egipto, náa Patrós niriʼñáán Jeremías:
16 “Xúnimbuxuʼ ajngáa dí niratúxu ga̱jma̱a̱ numuu mbiʼyuu Jeobá.
17 Rí phú mu̱nixu̱, mu̱nimbánííxu mámbá ajngáa rí nagájnuu náa rawunxu: Muxnajxíxu̱ tsigijñaʼ náa Reina bi̱ xtáa Mekhuíí* ga̱jma̱a̱ mu̱xidirámááʼxu tsigijñaʼ dí nagadirámuuʼ, xó má ni̱ni̱ ikháanʼxu̱, wajin xiʼñúxu, reyes ndrígiuxu̱ ga̱jma̱a̱ príncipes ndrígiuxu̱ bi̱ nikúwá náa Judá ga̱jma̱a̱ náa kamba̱a̱ ndrígóo Jerusalén, índo̱ nigiʼmuxu ganitsu ga̱jma̱a̱ niguáʼdááxu xúgíʼ, índo̱ na̱nguá ndi̱ya̱a̱xu̱ nimbá gamiéjunʼ.
18 Asndu índo̱ niniʼñáánʼxu̱ ru̱xnajxí tsigijñaʼ náa inuu Reina bi̱ xtáa Mekhuíí ga̱jma̱a̱ niniʼñáánʼxu̱ ru̱xidirámááʼ tsigijñaʼ dí nagadirámuuʼ, ikhú ndiyúxu xúgíʼ ga̱jma̱a̱ xa̱biuxu̱ nikháñún ga̱jma̱a̱ espada ma̱ngaa ewiʼ”.
19 Gu̱ʼu̱ nithi xóó: “Índo̱ ikháanʼxu̱ nuxnajxí tsigijñaʼ náa inuu Reina bi̱ xtáa Mekhuíí ga̱jma̱a̱ nu̱xidirámááʼxu tsigijñaʼ dí nagadirámuuʼ náa ikhaa, ma̱ngaa nu̱nixu pan dí muxnajxíxu̱ xóo xtiʼkhuu ikhaa ga̱jma̱a̱ nu̱xidirámááʼxu tsigijñaʼ dí nagadirámuuʼ náa ikhaa, lá na̱nguá ni̱thu̱u̱n a̱jmbiuxu mu mu̱nixu̱ rígi̱ ráʼ.”
20 Ikhú Jeremías niʼthún xúgíinʼ xa̱bu̱, xa̱bekha gajmiún guʼñu̱ún, ma̱ngaa xúgíinʼ xa̱bu̱ bi̱ xtáa raʼthún:
21 “Tsigijñaʼ dí ikháanʼla nixnajxí, xó má wajin xiʼñála, reyes, príncipes ga̱jma̱a̱ xa̱bu̱ bi̱ kúwá náa tsu̱du̱u̱ ku̱ba̱ʼ náa xuajin ndrígóo Judá ga̱jma̱a̱ náa kamba̱a̱ ndrígóo Jerusalén... ¡Jeobá nirmáʼáan a̱jkiu̱u̱n kaʼñún ga̱jma̱a̱ na̱nguá nimbumuu kaʼñún!
22 Mú, Jeobá nánguá niʼngo̱o̱ itháan a̱jkiu̱u̱n ga̱jma̱a̱ numuu dí raʼkhí ma̱ngaa dí xkawiʼ rí ni̱nila, ku̱ba̱ʼ ndrígala niguma gámbáa ga̱jma̱a̱ nindxu̱u̱ mbá gamíi náa eʼwíinʼ, nindxu̱u̱ mbá rí nijuiʼtásrígú, ní ndawi̱i̱n xa̱bu̱ xó má mbiʼi xúgi̱.
23 Ikháanʼla nixnajxí tsigijñaʼ ga̱jma̱a̱ nixuʼdámíjná aʼkhá náa Jeobá índo̱ túnimbala aʼwóo Jeobá ga̱jma̱a̱ túnimbala xtángoo ndrígóo, kiʼtáñajunʼ ga̱jma̱a̱ ikha ndrígóo, ikha jngóo ni̱ʼkha̱ gamiéjunʼ rígi̱ náa ikháanʼla, xó má ndu̱ya̱a̱la xúgi̱”.
24 Jeremías niʼthún má xúʼko̱ xa̱bu̱ xuajin ga̱jma̱a̱ xúgíinʼ gu̱ʼu̱: “Xúgiáanʼla ikháanʼ xa̱bu̱ Judá bi̱ kuwáanʼla náa ku̱ba̱ʼ ndrígóo Egipto, gu̱dxawíín ajngóo Jeobá.
25 Rígi̱ dí naʼthí Jeobá bi̱ naʼtáñajúúnʼ ángeles, Dios ndrígóo Israel: ‹Rí ikháanʼla ni̱tala gajmiála gu̱ʼyala nijkhua̱nú ni̱nila, numuu rí ni̱tala: “Gajkhun rí munimbánííxu dí ni̱xna̱ ajngúxu̱ʼ dí muxnajxí tsigijñaʼ náa Reina bi̱ xtáa Mekhuíí ga̱jma̱a̱ muxidirámááʼ tsigijñaʼ dí nagadirámuuʼ”. Ikháanʼla bi̱ nindxa̱la gu̱ʼu̱, munimbáníí ajngála rí nixuʼdamíjna̱ mu̱ni̱›.
26 Ikha jngóo xúgiáanʼ ikháanʼla xa̱bu̱ Judá bi̱ kuwáanʼla náa Egipto, gu̱dxawíín ajngóo Jeobá: ‹“Najmuʼ mbiʼyuʼ rí mba̱a̱ mu ma̱xna̱ ajngóʼ, eʼthí Jeobá, dí nimbáa xa̱bu̱ Judá bi̱ xtáa náa Egipto xátanga̱a̱ majmuu mbiʼyuʼ mu maxná ajngóo, ní xáʼthí ‹¡Na̱xna̱ ajngóʼ ga̱jma̱a̱ numuu mbiʼyuu Tátá Jeobá bi̱ itháán mba̱a̱!›.
27 Xtáá xawii náa ikhiin mu makuʼmá gamiéjunʼ, raʼkháa dí májánʼ, xúgíinʼ xa̱bu̱ Judá bi̱ kúwá náa ku̱ba̱ʼ ndrígóo Egipto makhañún ga̱jma̱a̱ espada ma̱ngaa ewiʼ, asndu nímbáa xáxtáa.
28 Káaʼ nguéjmi̱i̱n gákáwíin náa espada ga̱jma̱a̱ magajnáá náa ku̱ba̱ʼ ndrígóo Egipto mu magúun náa ku̱ba̱ʼ ndrígóo Judá. ¡Xúgíinʼ bi̱ niguanún náa Judá bi̱ niguwáʼ gákúwá náa ku̱ba̱ʼ ndrígóo Egipto mbuyáá xú kaʼnii ajngáa nimbánuu: Á mu ajngóʼ ikhúún o ajngún ikhiin!”›”.
29 “‹Rígi̱ mani̱ndxu̱u̱ tsinaʼ náa ikháanʼla, eʼthí Jeobá, dí ma̱ni̱ rí mumíni̱i̱ʼla náa mbaaʼ rígi̱, mu xúʼko̱ mbu̱ya̱a̱ dí gamiéjunʼ rí nikuʼdáminaʼ ma̱ʼkhá ka̱yo̱ʼ náa ikháanʼla mambanúu tsiaki̱i̱.
30 Rígi̱ dí naʼthí Jeobá: “Maxnajxíi faraón Hofrá, rey ndrígóo Egipto náa ñawúúnʼ xa̱bu̱ sia̱nʼ ndrígio̱o̱ bi̱ nandún muxiyáa, xó má nixnajxíi Sedequías rey ndrígóo Judá náa ñawúunʼ Nabucodonosor* rey bi̱ xtáa náa Babilonia, bi̱ nindxu̱u̱ xa̱bu̱ sia̱nʼ ndrígóo ga̱jma̱a̱ bi̱ nindoo maxíyáa”›”.
Mbaʼa nota
^ Náa ajngáa hebreo naʼthí, “nákhá miʼcha̱ nakuʼmíin”.
^ O “gaʼyee, bi̱ nuthi dí marigá”.
^ O “atani̱ mbá rí májánʼ”.
^ Náa ajngáa hebreo naʼthí, “na̱nguá nixruigú cháʼwún”.
^ O “desierto”.
^ Xúʼko̱ mbiʼyuu mbáa diosa bi̱ ndiyamajkuíí israelitas, bi̱ niniña̱a̱nʼ runi̱ ñajuunʼ Dios, mbáa nindxu̱u̱ mbáa diosa bi̱ nakumu̱ún dí naʼni rí gu̱ʼu̱ mudewíin e̱ji̱n.
^ Náa ajngáa hebreo naʼthí, “Nabucodorosor”. Rígi̱ nindxu̱u̱ i̱mba̱ xóo nuniraʼmáʼ.
