Jeremías 46:1-28
46 Profeta* Jeremías nigruigú ajngóo Jeobá rígi̱ ga̱jma̱a̱ numuu xúgíʼ xuajin.
2 Ga̱jma̱a̱ numuu Egipto, ma̱ngaa ga̱jma̱a̱ numún soldado ndrígóo faraón Nekó, rey ndrígóo Egipto, bi̱ xtáa náa mijngii mañu Éufrates, bi̱ táʼngo̱o̱ gáʼni ga̱jma̱a̱ rey Nabucodonosor* bi̱ xtáa náa Babilonia náa Carquemis, índo̱ niʼni má a̱jkhu̱ tsiguʼ dí xtáa raʼtáñajunʼ Jehoiaquim a̱ʼdióo Josías, rey ndrígóo Judá:
3 “Gu̱ni̱ ratháá escudo rí mba̱ʼu̱ ga̱jma̱a̱ rí majkhaʼ,*gagajnálá gúxmijná.
4 Ikháanʼla bi̱ nudruwíin wáyú, gu̱ni̱ratiin ga̱jma̱a̱ gu̱druwíinʼla.
Guguajún náa kaʼyala, gugríguala casco.
Gutáala kudú* ga̱jma̱a̱ guʼgíʼ ajua̱nʼ dí nañewu̱u̱n tsuxta̱la.
5 ‹Náá numuu rí nda̱ñu̱u̱n dí ikhiin namíñúún wéñuuʼ xá.
Kúwá ragúun, xa̱biu̱ún bi̱ mixkujinʼ na̱nguá niʼngu̱u̱n náa nixmijná.
Ningujuíin ragáñúún ga̱jma̱a̱ gamíi, xa̱bu̱ bi̱ mixkujinʼ nánguá nitangiín niyejxi̱ kidííʼ.
Asndu náá rígá gamíi›, eʼthí Jeobá.
6 ‹Bi̱ nagáñún nacha̱ na̱nguá eʼngu̱u̱n gágáñún, ga̱jma̱a̱ xa̱bu̱ bi̱ mixkujinʼ na̱nguá eʼngu̱u̱n gúni̱ kawúmíjná.
Xígií náa norte, náa rawuunʼ mañu Éufrates,nijngrádiinʼ ga̱jma̱a̱ nijnguti̱gi̱i̱n›.
7 Tsáá nindxu̱u̱ bugi̱ bi̱ natsimuu xóo mañu Nilo,xóo jxu̱u̱ʼ mañu dí najmangu̱u̱ʼ rá.
8 Egipto natsimuu xó má mañu Nilo,xóo jxu̱u̱ʼ iyaʼ dí najmangu̱u̱ʼ,ga̱jma̱a̱ naʼthí: ‹Matsimuʼ ga̱jma̱a̱ marugoo ku̱ba̱ʼ.
Ma̱ni̱ gámbáa xuajin ga̱jma̱a̱ xa̱bu̱ bi̱ kúwá ikhí›.
9 ¡Wáyú, atsimala!
¡Carro, gagayála xóo skágunʼ!
Xa̱bu̱ xkujiinʼ gaʼguala,xa̱bu̱ Cus ga̱jma̱a̱ Put, bi̱ najmún escudo,ga̱jma̱a̱ xa̱bu̱ ludim, bi̱ nuxumáán* xkamídá.
10 Mbiʼi rúʼko̱ kaʼyoo Tátá bi̱ itháán mba̱a̱, Jeobá bi̱ naʼtáñajúúnʼ ángeles, mbiʼi rúʼko̱ mandi̱ʼi̱i̱n cuenta xa̱bu̱ sia̱nʼ ndrígóo. Espada maʼni gámbíin, makuiʼtsu ga̱jma̱a̱ maga̱a̱n eʼdiún ikhiin, Tátá bi̱ itháán mba̱a̱, Jeobá bi̱ naʼtáñajúúnʼ ángeles, niʼni mújúunʼ mbá tsigijñaʼ náa ku̱ba̱ʼ dí rígá xígií náa norte, mijngii náa mañu Éufrates.
11 Atsimaaʼ náa Galaad, atayáʼ bálsamo,*ikháán wáxióo Egipto, bi̱ xóó tsébóoʼ ga̱jma̱a̱ xa̱bu̱.
Nda̱a̱ má ndíjkha̱á etayáʼ dí maguma thanaaʼ,numuu rí ikháán xáʼni̱i̱ a̱jkia̱a̱nʼ.
12 Xúgíʼ xuajin niʼdxawun dí nigájnuu gamajkuaaʼ,rí nitatsaʼwá niwán ri̱go̱o̱ náa tsu̱du̱u̱ ku̱ba̱ʼ.
Numuu rí mbáa xa̱bu̱ xkujiiʼ nijngrádaaʼ ga̱jma̱a̱ imba̱a̱,mbá nájmi̱i̱n nijnguti̱gi̱i̱n”.
13 Ajngáa rígi̱ dí Jeobá niʼthúu̱n profeta Jeremías dí xú kaʼnii gáʼkha̱ rey Nabucodonosor* bi̱ xtáa náa Babilonia mu magruigú ku̱ba̱ʼ ndrígóo Egipto:
14 “Guta̱la náa Egipto, xúʼko̱ má náa Migdol.
Guta̱la náa Nof ga̱jma̱a̱ náa Tahpanhés.
Guta̱la: ‹Gu̱ni̱ratamijná, gudrigáanʼ náa kaʼyala,numuu rí mbá espada maʼni gámbóo xúgíʼ dí rígá mbájndi.
15 Náá numuu dí niguma gámbíin xa̱bia̱a̱ʼ bi̱ mixkujinʼ rá.
Na̱nguá niʼngu̱u̱n gúguájun,numuu dí Jeobá niʼni gámbíin.
16 Mbaʼin bi̱ najngrádíinʼ ga̱jma̱a̱ najnguti̱gi̱i̱n.
Nutamijná kaníkiin:
“¡Guʼgua̱áʼ! Gutanga̱ánʼ náa xuajñulú ga̱jma̱a̱ náa ku̱bulú,numuu rí ni̱ʼkha̱nú espada rí tségáwíinʼ a̱jkiu̱u̱n”›.
17 Ikhí nithi:
‹Faraón, rey ndrígóo Egipto, i̱ndó naʼthíí, nda̱a̱ rí eʼni.
Numuu rí niniñuuʼ manújngoo mbiʼi rí kaʼyoo›.
18 ‹Xó má ikhúún gajkhun xtáá, eʼthí Rey, bi̱ mbiʼyuu Jeobá bi̱ naʼtáñajúúnʼ ángeles,ikhaa* ma̱ʼkha̱ xóo Tabor náa majñu̱u̱ʼ kúbága̱jma̱a̱ xóo Carmelo náa mijngii lamáa.*
19 Arajxi̱i̱ dí xtaʼdáá, numuu rí maʼga kiʼñáán,ikháán wáxá bi̱ xtaa náa Egipto.
Numuu rí Nof maguajta̱a̱ mbá gamíi náa eʼwíinʼ,mugida̱a̱ʼ agiuuʼ* ga̱jma̱a̱ muni̱ rí maguanáa, nimbáa xa̱bu̱ ni xáxtáa ikhí.
20 Egipto nindxu̱u̱ xóo mbáa a̱ʼdá xédí bi̱ mitsiʼyáa.
Mú asndu náa norte naguwáʼ ñu̱ju̱n mu muphi̱i̱.
21 Asndu soldado bi̱ nijuatíʼñún bi̱ kúwá ikhí nindxu̱ún xóo e̱jín xédí bi̱ mbaʼwi̱i̱n,mú ikhiin mangiin nitangiín ga̱jma̱a̱ mbóó jnduʼ nigáñún.
Na̱nguá niʼngu̱u̱n gáguájun jxa̱ʼ,numuu rí ni̱ʼkha̱nú náa ikhiin gamiéjunʼ,mbiʼi rí mixtanda̱ʼa̱a̱ cuenta›.
22 ‹Rí nawáán rí naʼni ikhaa nindxu̱u̱ xóo a̱bu̱nʼ bi̱ naxmájtaminaʼ,numuu rí magún ruxkáá ga̱jma̱a̱ xúgíʼ tsiaki̱i̱ ndrígu̱ún, ga̱jma̱a̱ hacha,xóo xa̱bu̱ bi̱ nudi̱i̱ ixi̱.
23 Murujtu ixi̱ náa xanúun, eʼthí Jeobá, tséʼniuu á mu nakujmaa dí rakáʼnii mata̱ʼa̱a̱ʼ.
Numuu rí nindxu̱ún itháan mbaʼin ki xóo tsíʼbu,* asndu rakáʼnii maraxnii.
24 Wáxióo Egipto magajnúu gamajkuu.
Majuixnájxi̱i̱ náa ñawúunʼ xuajin dí rígá náa norte›.
25 Jeobá bi̱ naʼtáñajúúnʼ ángeles, Dios ndrígóo Israel, naʼthí: ‹Ma̱ni̱ rí mamínuuʼ Amón dios ndrígóo No,* faraón, Egipto, xúʼko̱ má dioses bi̱ kúwá ikhí mangiin reyes ndrígiu̱ún, xúʼko̱, faraón ga̱jma̱a̱ xúgíinʼ bi̱ nakumu̱ún kuyáá›.
26 ‹Ga̱jma̱a̱ maxnajxíin náa ñawúunʼ bi̱ nandoo magudíin, náa rey Nabucodonosor* bi̱ xtáa náa Babilonia ga̱jma̱a̱ náa xa̱bi̱i̱. Mú nda̱wa̱á matanga̱a̱ makuwá xa̱bu̱ xó má nákha ginii›, eʼthí Jeobá.
27 ‹Ikháán Jacob bi̱ nindxa̱a̱ʼ xa̱bi̱ʼ, xámíñáaʼni má xáguáʼáánʼ Israel.
Numuu rí ma̱ni̱ kríña̱a̱nʼ náa mbá ku̱ba̱ʼ rí mitsínguánʼ,ga̱jma̱a̱ bi̱ naguwáʼ náa ikháán náa ku̱ba̱ʼ rí ni̱jkha̱ kiʼdiin.
Jacob matanga̱a̱ ni xáguma ngínáa maxtáa tsímáá,asndu nimbáa ndawa̱a̱ tsáa maʼni míñuu.
28 Ikha jngóo xámíñáaʼ xa̱bi̱ʼ Jacob, eʼthí Jeobá, numuu rí ikhúún xtáá ga̱jma̱á nindxa̱a̱ʼ.
Ma̱ni̱ gámbáa xúgíʼ xuajin náa nixídiráʼáan,mú ikháán xánimbátíga̱a̱n.
Ma̱ni̱ matamíniiʼ má tsiaki̱i̱,maxpríguáaʼ asndu náa mbri̱ga̱a̱ rí kaʼyoo›”.
Mbaʼa nota
^ O “gaʼyee, bi̱ naʼthí dí marigá”.
^ Náa ajngáa hebreo naʼthí, “Nabucodorosor”. Rígi̱ nindxu̱u̱ i̱mba̱ xóo nuniraʼmáʼ.
^ Nindxu̱u̱ escudo majkhaʼ dí najmún bi̱ kuda xkamídá.
^ O “lanza”.
^ Náa ajngáa hebreo naʼthí, “nuxujmbi̱i̱”.
^ Náa ajngáa hebreo naʼthí, “Nabucodorosor”. Rígi̱ nindxu̱u̱ i̱mba̱ xóo nuniraʼmáʼ.
^ Xóo muʼthá, bi̱ magruigú Egipto.
^ O “mar”.
^ O “maguaná jchíi”.
^ Xóo muʼthá, Tebas.
^ Náa ajngáa hebreo naʼthí, “Nabucodorosor”. Rígi̱ nindxu̱u̱ i̱mba̱ xóo nuniraʼmáʼ.
