Jeremías 5:1-31
5 Aʼgua náa xúgíʼ xuajin Jerusalén.
Mbájndi gúyejxi̱ ga̱jma̱a̱ gu̱ya̱a̱.
Guʼyáaʼ náa xúgíʼ xuáá,á mu xtáa mbáa bi̱ nandoo maʼni rí jmbu,bi̱ nandoo mawi̱ji̱ jmbu,ga̱jma̱a̱ ikhú, ikhúún ma̱ni̱ mba̱a̱ a̱jkiu̱nʼ ka̱yo̱o̱ xuajin.
2 Tséʼniuu á mu ikhiin gúthi “¡Na̱xna̱ ajngóʼ ga̱jma̱a̱ numuu mbiʼyuu Jeobá!”,mú ikhiin muthi má xúʼko̱ rí nduwaʼ.
3 Tátá Jeobá, lá raʼkháa idaaʼ nayejxu̱u̱ náa rí jmbu ráʼ.
Nitaxpájtiin, mú ikhiin na̱nguá nigawúúnʼ.*
Nitani̱ gámbíin, mú ikhiin nini̱ gaʼduunʼ rí mudrigú dí nitaxprígún.
Nini̱ gújkhúʼ a̱jkiu̱ún itháan xóo mbá itsí,ga̱jma̱a̱ nini̱ gaʼduunʼ dí matangi̱ín.
4 Ikhú nitamínáʼ: “Mbáa gajkhun dí raguáʼdáá numún.
Nunimíjna̱ xóo skágunʼ, numuu dí tséniʼnuuʼ kambo̱o̱ Jeobá,ga̱jma̱a̱ xtángoo ndrígóo Dios ndrígu̱ún.
5 Maʼgá gátamíjná gajmíʼ xa̱bu̱ bi̱ guáʼdáá numún,numuu rí ikhiin mbáa ndiyáá xóo nindxu̱u̱ kambo̱o̱ Jeobá,ga̱jma̱a̱ xtángoo ndrígóo Dios ndrígu̱ún.
Mú xúgíinʼ nixmi̱ga̱ʼ yugoma̱ngaa nixkuʼtu rí xtoʼóo ga̱jma̱a̱ ñawúúnʼ”.
6 Ikha jngóo mbáa león bi̱ xtáa náa xaxi̱ nagudíin,mbáa lobo* bi̱ xtáa náa xkua̱ mijxooʼ* naʼni gámbíin,mbáa indiiʼ mixtíi* na̱gi̱ʼtu̱u̱n náa mijngii xuajin.
Xúgíinʼ bi̱ nanújngúún ikhí na̱ʼkhu̱jkuiin.
Numuu dí nixudami̱jna̱ wéñuuʼ aʼkhá,ga̱jma̱a̱ mbaʼa aʼphu̱ táguájun jmbu.
7 Xú káʼnii gáni̱ mba̱a̱ a̱jkiu̱nʼ ga̱jma̱a̱ numuu rígi̱ rá.
Ejña̱a̱nʼ nimbumún kuyo̱ʼga̱jma̱a̱ nuxna ajngún náa dios bi̱ ragájkhun.
Ikhúún nixnu̱u̱n xúgíʼ mu xáʼñúúnʼ nimbá,mú ikhiin túniña̱a̱ʼ runi̱ aʼkhá gajmiún i̱mba̱a̱*ga̱jma̱a̱ mbaʼin nigún náa goʼwóo mbáa a̱ʼgu̱ bi̱ nagujuamínáʼ.
8 Nindxu̱ún xóo wáyú bi̱ nagua̱ʼa̱ wéñuuʼ muxka,mámbáa nandxa̱ʼwá náa a̱ʼgiu̱u̱ imba̱a̱ xa̱bu̱.
9 “Lá xáʼyóoʼ mandi̱ʼi̱i̱n cuenta ga̱jma̱a̱ xúgíʼ rígi̱ xáʼ.” Eʼthí Jeobá.
“Lá xándoo gáni̱ ngínáa mbá xuajin xóo rígi̱ ráʼ.”
10 “Aʼguala náa kiʼdu uva ndrígóo Jerusalén ga̱jma̱a̱ gu̱ni̱ gámbáa,mú xúni̱ gámbáa mbá kayuuʼ.
Gundrígú rudiuuʼ dí xtáa rakráʼáan,numuu dí na̱nguá nindxu̱u̱ ndrígóo Jeobá.
11 Numuu dí náa goʼwóo Israel ga̱jma̱a̱ náa goʼwóo Judánini̱ nduwúúnʼ mbá kayuuʼ”, eʼthí Jeobá.
12 “Túnimbu̱u̱n kuyáá Jeobá ga̱jma̱a̱ jngruigu̱u̱n ruthi:
‹Ikhaa nda̱a̱ rí gáʼni nditháan.*
Ni má xáʼkha̱ nimbá gamiéjunʼ náa inulú,ni má xúʼyáá guerra ni má ewiʼ›.
13 Míniiʼ má profetas* nuthi ajngáa dí ragíʼdoo numuu,ga̱jma̱a̱ ajngá rawuunʼ Dios na̱nguá rígá náa ikhiin.
¡Xúʼko̱ má kayuuʼ gúgíʼníín mangiin!”.
14 Ikha jngóo rígi̱ dí naʼthí Jeobá, Dios bi̱ naʼtáñajúúnʼ ángeles:
“Xó má ethi xa̱bu̱ bugi̱,dí xúgi̱ ma̱ni̱ dí ajngóʼ mani̱ndxu̱u̱ xóo aguʼ náa rawaanʼ,ga̱jma̱a̱ xuajñunʼ mani̱ndxu̱u̱ xóo ixi̱ rí mi̱kha,ga̱jma̱a̱ aguʼ rígi̱ matsikíin”.
15 “Asndu mitsínguánʼ gáʼkhá ka̱yo̱ʼ mbá xuajin, mu muxmijná ga̱jma̱á nindxa̱la goʼwóo Israel”, eʼthí Jeobá.
“Nindxu̱u̱ mbá xuajin dí wajyúuʼ má rígá.
Mbá xuajin wayuu,náa nuthi ajngáa dí ikháán tsétatsinuuʼ,ga̱jma̱a̱ índo̱ nuthi, tsékrua̱ʼa̱a̱ʼ mbá kayuuʼ.
16 Niradíin mbaʼin xa̱bu̱ ga̱jma̱a̱ flecha rí kuda,xúgíinʼ ikhiin nindxu̱ún bi̱ guáʼdáá tsiaki̱i̱.
17 Muni̱ gámbáa rí nijma̱a̱ nitadu ga̱jma̱a̱ ganitsu* ndrígáaʼ.
Muphu̱u̱n jiámiáanʼ ga̱jma̱a̱ waʼxiaaʼ.
Muphu̱u̱n mugia̱a̱ʼ ga̱jma̱a̱ xedia̱a̱ʼ.
Mambúun náa nitadu uva ga̱jma̱a̱ náa nitadu higo ndrígáaʼ.
Xuajin dí ikháán naku̱ma̱a̱ʼ xtayáá dí kúgumaʼá, muni̱ gámbáa ga̱jma̱a̱ espada”.
18 “Mbiʼi rúʼko̱, eʼthí Jeobá, xáni̱ gámbáanʼla mbá kayuuʼ.
19 Índo̱ ikhiin gúrajxi̱ ‹Náá numuu dí xígi̱ e̱ʼniuxu̱ Jeobá Dios ndrígúxu̱ rá.› Ikháán marathu̱u̱n ‹Xó má ikháanʼla nimbumala kuyo̱ʼ mu mu̱ni̱ ñajúúnʼ dioses bi̱ ragájkhun náa ku̱ba̱ʼ ndrígala, xúʼko̱ má ikháanʼla mu̱ni̱ ñajúúnʼ xa̱bu̱ bi̱ tséniʼnúunʼ náa ku̱ba̱ʼ dí raʼkháa ndrígala›”.
20 Guthu̱u̱nla rígi̱ bi̱ kúwá náa goʼwóo Jacobga̱jma̱a̱ guta̱la náa Judá. Xígi̱ gútha̱:
21 “Gudxawíínla rígi̱, xuajin bi̱ tséndxa̱ʼóo edxu̱u̱ ga̱jma̱a̱ skágui̱i̱nʼ,*gíʼdoo iduu mú na̱nguá yejxi̱,gíʼdoo cháʼwuun mú na̱nguá eʼdxuun.
22 ‹Lá tsémiñún kuyo̱ʼ xáʼ.› Eʼthí Jeobá.
‹Lá xáʼyóoʼ maguíʼiin náa inuʼ xáʼ.
Ikhúún nindxu̱ʼ bi̱ nigíʼ jui̱ʼi̱ náa rawuunʼ lamáa* mu ikhí gátumuu,nindxu̱u̱ mbá kiʼtáñajunʼ dí marigá kámuu.
Dí xánújngoo itháan, maski má naʼbajxu̱u̱ lamáa xáʼngo̱o̱ gáʼni ga̱jma̱a̱,tséʼniuu má nandxa̱ʼwá, mú xáʼngo̱o̱ gánújngoo itháan ñúʼún.
23 Mú a̱jkiu̱u̱n xuajin rígi̱ ra̱ʼkhá tháán gújkhúʼ ga̱jma̱a̱ tsénimbo̱o̱,nigájnuriñu̱u̱nʼ náa kambo̱ʼ ga̱jma̱a̱ nigún náa kambu̱ún ikhiin.
24 Tsétháán a̱jkiu̱ún:
“Dí xúgi̱, gamiñulú kuʼyáá Jeobá Dios ndrígulú,bi̱ naʼni dí maxnúu ruʼwa náa mbiʼi rí kaʼyoo,ruʼwa guapoo ga̱jma̱a̱ ruʼwa dí naxnúu nda̱wa̱á,ikhaa bi̱ naʼthúlú rí gajkhun murajxi̱i̱ dí nijma̱a̱ náa niʼdu náa xmáná rí kaʼyoo”.
25 Ga̱jma̱a̱ rí nikiéʼkala niʼni rí xáʼkha̱ xúgíʼ rígi̱,ga̱jma̱a̱ numuu aʼkhála niʼni dí xárígá rí májánʼ.
26 Náa majñuuʼ xuajñunʼ kúwá xa̱bu̱ ra̱míjíinʼ.
Nubángu̱ʼu̱u̱n xóo xa̱bu̱ bi̱ nuradíin ñu̱ʼu̱, índo̱ naguánduti̱ga̱ʼ.*
Nugíʼ mbá tsáʼkhá mbiiʼ.
Xa̱bu̱ nindxu̱ún bi̱ nurugui̱i̱n.
27 Xóo mbá jaula rí kajtíin i̱ndó ñu̱ʼu̱,xúʼko̱ nindxu̱u̱ guʼwún, gajtíí rí nduwaʼ.
Ikha jngóo niguánú niguáʼdáá ga̱jma̱a̱ niguáʼdáá tsiaki̱i̱.
28 Niʼni mbaʼwi̱i̱n ga̱jma̱a̱ asndu niʼkho̱o̱ xtún,nagadirígúu dí ra̱májánʼ náa ikhiin.
Tsémbañu̱ún e̱jín wáʼa*i̱ndó naxmiéjúúnʼ rí makuwá májánʼ,ga̱jma̱a̱ tsénimbáníí numún bi̱ mingíníi›”.
29 “Lá xáʼyóoʼ mandi̱ʼi̱i̱n cuenta ga̱jma̱a̱ xúgíʼ rígi̱ xáʼ.” Eʼthí Jeobá.
“Lá xándoo gáni̱ ngínáa mbá xuajin xóo rígi̱ ráʼ.
30 Nirígá mbá rí gamíi ga̱jma̱a̱ rí xkawiʼ kayuuʼ náa xuajin:
31 Bi̱ nindxu̱ún profetas nuthi rí nduwaʼga̱jma̱a̱ ndxajkun najmún ñajunʼ ndrígu̱ún mu muni̱ ngíníi eʼwíinʼ,mina̱a̱ʼ má xuajñunʼ nanigu̱u̱ʼ rúʼko̱,mú ndiéjunʼ gúni̱ ikháanʼla índo̱ gártumuu mbiʼi rá”.
Mbaʼa nota
^ Náa ajngáa hebreo naʼthí, “na̱nguá nikáguabiinʼ”.
^ Xujkhúʼ bugi̱ ni̱ndxu̱u̱ xóo iña̱ʼ mú itháan mba̱a̱.
^ O “desierto”.
^ O “leopardo”.
^ O mbáa “ikhaa ndawa̱a̱”.
^ O “gaʼyee, bi̱ nuthi dí marigá”.
^ Náa ajngáa hebreo naʼthí, “pan”.
^ Náa ajngáa hebreo naʼthí, “xuajin skágui̱i̱nʼ ga̱jma̱a̱ nda̱a̱ a̱jkiu̱u̱n”.
^ O “mar”.
^ O “nixngutigamíjna̱”.
^ O “bi̱ ndawa̱a̱ anu̱ún”.
