Jeremías 52:1-34
52 Sedequías gíʼdoo 21 tsiguuʼ índo̱ ni̱jkha̱nú ninindxu̱u̱ rey, ga̱jma̱a̱ niʼtáñajunʼ mbá 11 tsiguʼ náa Jerusalén. Ru̱dúu̱ nigumbiʼyuu Hamutal wáxióo Jeremías bi̱ na̱ʼkha̱ náa Libná.
2 Ikhaa niʼni dí ra̱májánʼ náa iduu Jeobá, xó má niʼni Jehoiaquim.
3 Nirígá rígi̱ náa Jerusalén ga̱jma̱a̱ náa Judá numuu rí Jeobá nikásngañu̱u̱ʼ, nánguá nindoo gáʼñúún, ga̱jma̱a̱ Sedequías nikujximínáʼ náa rey bi̱ xtáa náa Babilonia.
4 Índo̱ naʼni má mijna gu̱wa̱ʼ tsiguʼ dí xtáa raʼtáñajunʼ Sedequías, dí maʼni gu̱wa̱ʼ igu̱nʼ ga̱jma̱a̱ gu̱wa̱ʼ mbiʼi dí xtáa raʼtáñajunʼ Nabucodonosor* rey ndrígóo Babilonia, ni̱ʼkha̱ gajmíi̱n mbá xúgíinʼ soldado ndrígóo mu muxmijná gajmiún xa̱bu̱ Jerusalén. Nigi̱ʼi̱i̱n mu muxmijná gajmiún ga̱jma̱a̱ niʼni mbá xtájtsí mu maruguamáʼáan.
5 Niruguama̱ʼa̱a̱n má xúʼko̱ xuajin asndu índo̱ niʼni 11 tsiguʼ dí xtáa raʼtáñajunʼ rey Sedequías.
6 Índo̱ niʼni a̱jkhu̱ igu̱nʼ ga̱jma̱a̱ mijna gu̱wa̱ʼ mbiʼi, ra̱ʼkhá tháán gakhi̱i̱ niʼni ewiʼ náa xuajin, nándáa dí mu̱phu̱ xa̱bu̱.
7 Nda̱wa̱á, nijngudiri̱ya̱ʼ xtájtsí dí rígá náa xuajin, mbruʼun mbá xúgíinʼ soldado nigájnún náa xkrugua dí rígá náa ma̱jñu̱u̱ʼ mbá nájma̱ xtájtsí náa mijngii rígá jardín* ndrígóo rey, índo̱ caldeos kúwá ruruguama̱ʼa̱a̱n xuajin. Ga̱jma̱a̱ nigún náa kamba̱a̱ dí na̱jkha̱ náa Arabá.
8 Mú soldado caldeos nigún ruxkáá rey Sedequías, niʼngu̱u̱n nixkamaa náa ku̱ba̱ʼ mijxooʼ dí rígá náa Jericó. Mbá xúgíinʼ soldádiu̱u̱ nigadríʼiin.
9 Ikhú nirugua̱a̱ rey, nitsimún kuya̱a̱ náa Riblá náa ku̱ba̱ʼ ndrígóo Hamat ga̱jma̱a̱ nigún kuya̱a̱ náa inuu rey ndrígóo Babilonia náa nijuiʼtháán dí magíʼnuu.
10 Ndiʼyoo xígi̱ Sedequías xóo rey ndrígóo Babilonia nigudíin e̱ji̱i̱n, ma̱ngaa nigudíin mbá xúgíinʼ príncipes bi̱ kúwá náa Judá náa Riblá.
11 Nda̱wa̱á, rey ndrígóo Babilonia niʼni dí magugóo iduu Sedequías, niroʼóo ga̱jma̱a̱ cadena dí cobre, nda̱wa̱á ni̱jkha̱ kayáa náa Babilonia, ikhí nixtáa náa guʼwá e̱jua̱nʼ asndu mbiʼi rí nikháñuu.
12 Índo̱ naʼni má 19 tsiguʼ, mbá witsu igu̱nʼ ga̱jma̱a̱ gu̱wa̱ʼ mbiʼi dí naʼtáñajunʼ Nabucodonosor* rey ndrígóo Babilonia, mbiʼi rúʼko̱ ni̱jkha̱nú Nebuzaradán náa Jerusalén, bi̱ kayá edxu̱u̱ náa bi̱ nuñewa̱a̱n rey, ikhaa nindxu̱u̱ bi̱ nambáyuu rey ndrígóo Babilonia.
13 Nitsikháa goʼwóo Jeobá, goʼwóo* rey ga̱jma̱a̱ mbá xúgíʼ guʼwá dí rígá náa Jerusalén, ma̱ngaa mbá xúgíʼ guʼwá mba̱ʼu̱.
14 Mbá xúgíinʼ soldado caldeos bi̱ ni̱jkha̱ gajmíi̱n bi̱ kayá edxu̱u̱ náa bi̱ nuñewa̱a̱n rey nini̱ gámbáa xtájtsí dí kúgumaʼá ga̱jma̱a̱ xuajin Jerusalén.
15 Nebuzaradán bi̱ kayá edxu̱u̱ náa bi̱ nuñewa̱a̱n rey, ni̱jkha̱ kagui̱i̱n mbá nguéjmi̱i̱n xa̱bu̱ ngíníi, ma̱ngaa bi̱ xóó naguanún náa xuajin, xúʼko̱ má xa̱bu̱ bi̱ ninújnga̱án náa ñawúunʼ rey ndrígóo Babilonia ga̱jma̱a̱ xa̱bu̱ bi̱ nuni̱ xúgíʼ enii ñajunʼ mitsaanʼ* bi̱ xóó naguanún.
16 Mú Nebuzaradán, bi̱ kayá edxu̱u̱ náa bi̱ nuñewa̱a̱n rey, niniñúúnʼ ikhí tikhuun xa̱bu̱ bi̱ itháán ngíníi, mu muñewa̱a̱n náa kiʼdu ixi̱ uva ga̱jma̱a̱ mu muñejunʼ gakhi̱i̱.
17 Caldeos nirujku̱u̱ rajkhúu goʼwóo Jeobá dí niguma ga̱jma̱a̱ cobre, xó má carritos ma̱ngaa Lamáa* dí niguma ga̱jma̱a̱ cobre dí rígá náa goʼwóo Jeobá, nigúun kudúún xúgíʼ cobre náa Babilonia.
18 Ma̱ngaa nigúun kudúún cubeta, pala, dí najuíyu̱u̱ʼ ga̱jma̱a̱ aguʼ, copa, ga̱jma̱a̱ mbá xúgíʼ dí niguma ga̱jma̱a̱ cobre dí najmaa náa guʼwá rí nduyamajkuíí Dios.
19 Bi̱ kayá edxu̱u̱ náa bi̱ nuñewa̱a̱n rey ni̱jkha̱ kagu̱u̱ xúgíʼ dí najmaa, náa nagi̱wa̱nʼ chámbuʼ, xua̱a̱, cubeta, candelabro, copa ga̱jma̱a̱ xua̱a̱ dí niguma ga̱jma̱a̱ mbawíí oro ma̱ngaa plata.
20 Mú mbá nájma̱ rajkhúu guʼwá, Lamáa ga̱jma̱a̱ mbá 12 xedi̱ bi̱ ki̱ʼni̱i̱ ga̱jma̱a̱ cobre bi̱ wájun náa agoo Lamáa ga̱jma̱a̱ carritos dí rey Salomón niʼni mu majmaa náa goʼwóo Jeobá, cobre dí niguma ga̱jma̱a̱ xúgíʼ rígi̱ ra̱ʼkhá tháán mba̱a̱ dí xáʼngo̱o̱ mixtagiawan.
21 Mámbá rajkhúu guʼwá naʼni mbá migiñuʼ metro* rí mbaʼ, ga̱jma̱a̱ ndayóoʼ mbá ñuñuu dí naʼni witsu metro* mu maxtiéwan ga̱jma̱a̱ dí mba̱a̱. Itháan dí juwan centímetro* rí mi̱du̱ ga̱jma̱a̱ mijchú dí awúu̱n.
22 Ga̱jma̱a̱ dí trámáʼ náa edxu̱u̱ niguma ga̱jma̱a̱ cobre naʼni itháan rí a̱jma̱ metro.* Amuuʼ dí kúgoo ga̱jma̱a̱, ma̱ngaa granadas dí tima náa mbájndi dí trámáʼ náa edxu̱u̱ dí wájun, xúgíʼ niguma ga̱jma̱a̱ cobre. Mbríguu má nindxu̱u̱ mbá nájma̱ rajkhúu guʼwá, xúʼko̱ má granadas.
23 Katima mbá 96 granadas náa mámbá níjniúu, 100 granadas dí mbá xúgíʼ dí katima náa mbájndi amaʼ.
24 Bi̱ kayá edxu̱u̱ náa bi̱ nuñewa̱a̱n rey, ma̱ngaa ni̱jkha̱ kayáa Seraya ndxajkun bi̱ kayá edxu̱u̱, ga̱jma̱a̱ Sofonías raga̱jmi̱i̱n ndxajkun, ma̱ngaa mbá nájtsíin bi̱ naguájun náa xkrugua.
25 Ga̱jma̱a̱ ni̱jkha̱ kayáa mbáa bi̱ naʼtáñajúúnʼ bi̱ nuñewa̱a̱n rey, bi̱ naʼtáñajúúnʼ soldado, ga̱jma̱a̱ mbá juwiin bi̱ nuxnáá consejo rey, bi̱ kúwá náa xuajin, xó má ma̱ngaa secretáriu̱u̱ bi̱ naʼtáñajúúnʼ soldado, ga̱jma̱a̱ mbá 60 xa̱bu̱ ngíníi bi̱ xóó naguanún náa xuajin.
26 Nebuzaradán bi̱ kayá edxu̱u̱ náa bi̱ nuñewa̱a̱n rey, ni̱jkha̱ kagui̱i̱n náa inuu rey ndrígóo Babilonia náa Riblá.
27 Rey ndrígóo Babilonia nigudíin náa Riblá, náa ku̱ba̱ʼ Hamat. Xúʼko̱ kaʼnii niʼni rí nirawíin xa̱bu̱ Judá náa ku̱bu̱únʼ.
28 Xígi̱ mbaʼin xa̱bu̱ ni̱jkha̱ kagui̱i̱n Nabucodonosor* índo̱ niʼni juwan tsiguʼ rí xtáa raʼtáñajuunʼ, ni̱jkha̱ kagui̱i̱n 3,023 judíos.
29 Índo̱ niʼni 18 tsiguʼ dí xtáa raʼtáñajunʼ Nabucodonosor* ni̱jkha̱ kiʼdiin 832 xa̱bu̱ bi̱ nigájnún náa Jerusalén.
30 Índo̱ niʼni 23 tsiguʼ dí xtáa raʼtáñajunʼ Nabucodonosor,* Nebuzaradán, bi̱ kayá edxu̱u̱ náa bi̱ nuñewa̱a̱n rey, ni̱jkha̱ kagui̱i̱n judíos, mbá 745 xa̱bu̱.
Mbá xúgíinʼ bi̱ ni̱jkha̱ kiʼdiin ninindxu̱ún mbá 4,600 xa̱bu̱.
31 Índo̱ naʼni má 37 tsiguʼ dí ni̱jkha̱ kiʼyáa Joaquín rey ndrígóo Judá, índo̱ naʼni 12 igu̱nʼ ga̱jma̱a̱ 25 mbiʼi, tsiguʼ dí nigi̱ʼi̱ maʼtáñajunʼ Evil-Merodac rey ndrígóo Babilonia, niríya̱a̱ʼ* Joaquín rey ndrígóo Judá náa guʼwá ejua̱nʼ.
32 Niʼniuu dí májánʼ, ga̱jma̱a̱ niʼni itháan mba̱a̱ ikhaa ki xóo mbá xúgíinʼ reyes bi̱ xtáa gajmíi̱n náa Babilonia.
33 Joaquín niríya̱a̱ʼ xtíin dí nigíʼ índo̱ nixtáa náa guʼwá ejua̱nʼ, ga̱jma̱a̱ náa mbá xúgíʼ mbiʼi dí xóó nixtáa, nikuiʼtsu náa mésóo rey.
34 Nigrui̱gú má xúʼko̱ ganitsu ndrígóo rey bi̱ xtáa náa Babilonia, tsejtsíí mbiʼi, xúʼko̱ mbá xúgíʼ mbiʼi dí xóó nixtáa, asndu mbiʼi rí nikháñúu.
Mbaʼa nota
^ Náa ajngáa hebreo naʼthí, “Nabucodorosor”. Rígi̱ nindxu̱u̱ i̱mba̱ xóo nuniraʼmáʼ.
^ O “ixi̱ ri̱ʼi̱”.
^ Náa ajngáa hebreo naʼthí, “Nabucodorosor”. Rígi̱ nindxu̱u̱ i̱mba̱ xóo nuniraʼmáʼ.
^ O “náa naʼtáñajunʼ”.
^ O “nagui̱i̱”.
^ O “Mar”.
^ Náa ajngáa hebreo naʼthí, “12 gúʼxúʼ”.
^ Náa ajngáa hebreo naʼthí, “a̱jkhu̱ a̱ʼdióo ñawáanʼ”.
^ Náa ajngáa hebreo naʼthí, “witsu gúʼxúʼ”.
^ Náa ajngáa hebreo naʼthí, “Nabucodorosor”. Rígi̱ nindxu̱u̱ i̱mba̱ xóo nuniraʼmáʼ.
^ Náa ajngáa hebreo naʼthí, “Nabucodorosor”. Rígi̱ nindxu̱u̱ i̱mba̱ xóo nuniraʼmáʼ.
^ Náa ajngáa hebreo naʼthí, “Nabucodorosor”. Rígi̱ nindxu̱u̱ i̱mba̱ xóo nuniraʼmáʼ.
^ Náa ajngáa hebreo naʼthí, “nikujxi̱i̱ edxu̱u̱”.
