Jeremías 6:1-30
6 E̱ji̱i̱n Benjamín, guʼyáʼ náa mu̱ni̱ káwúmíjnála dí rígá mitsínguánʼ náa Jerusalén.
Gúndiyíí chi̱ji̱ʼ náa Tecoa.
¡Guskamáá aguʼ xóo tsinaʼ náa Bet-Hakerem!
Numuu rí náa norte na̱ʼkha̱ mbá gamiéjunʼ, dí maʼni gámbóo.
2 Wáxióo Sion nindxu̱u̱ mbáa a̱ʼgu̱ mitsiʼyáa ga̱jma̱a̱ wabaaʼ.
3 Maguwáʼ baxtúu gajmiún xujkiún.
Mugíʼ guʼwá xtíin ndrígu̱ún náa mbájndi xtáa ikhaa,ga̱jma̱a̱ mámbáa gáñewu̱u̱n mugiu̱u̱ xó má eyoo ikhaa.
4 “¡Gu̱ni̱ ratamijnála mu muʼgua* gúxmijná gajmiála ikhaa!
¡Guʼgualú! ¡Wakhaʼ gúxmijná gajmiúlú!”.
“¡Gínáánʼlú ikháánʼ, numuu rí na̱jkha̱ rakhíʼ má,Numuu rí ndájkua̱ naʼni itháán mba̱ʼu̱!”.
5 “¡Guʼgualú! Mbruʼun guxmijná gajmiúlúga̱jma̱a̱ gu̱ʼni̱ gámbáa torre rí wájun gújkhúʼ”.
6 Numuu dí rígi̱ rí naʼthí Jeobá bi̱ naʼtáñajúúnʼ ángeles:
“Gurujtu ixi̱ ga̱jma̱a̱ gurngujxi̱ mu maʼni mitsídánʼ mu muxmijná gajmiála Jerusalén.
Nindxu̱u̱ xuajin rí ndayóoʼ mixtanda̱ʼa̱a̱ cuenta,náa ikhaa i̱ndó tsingíná rígá.
7 Xóo mbá puzu rí nagájnuu iyaʼ wéʼtsí,xúʼko̱ má xuajin rígi̱ nagájnuu dí ra̱májánʼ.
Náa ikhaa i̱ndó najuiʼthá dí nuradímíjná ga̱jma̱a̱ dí nuni̱ gámbáa,náa inuʼ rígá má xúʼko̱ nandii ga̱jma̱a̱ gamiéjunʼ.
8 Atanimba̱a̱ʼ rí najuiʼtháanʼ Jerusalén, o matsíngúunʼ náa ikháán ga̱jma̱a̱ mawi̱yu̱ʼ gátani̱,ma̱ni̱ rí nimbáa xáxtáa náa ikháán, ma̱nindxa̱a̱ʼ mbá ku̱ba̱ʼ náa ndáwi̱i̱n xa̱bu̱”.
9 Rígi̱ dí naʼthí Jeobá bi̱ naʼtáñajúúnʼ ángeles:
“Mugimbóo xúgíʼ dí gáguanáa náa Israel xó má nduya̱a̱ʼ iwáá uva dí tima náa ixu̱u̱.
Atangáán atayáaʼ uva náa ixu̱u̱ xó má eʼni xa̱bu̱ bi̱ nagujxi̱i̱ uva”.
10 “Tsáá gáʼyóoʼ ma̱thu̱u̱n rá. Tsáá gáʼyóoʼ maʼdxun rá.
Tsáá gáʼdxawun rá.
¡Atayáá! Cháʼwúún kúgoo ga̱jma̱a̱ tséʼngu̱u̱n gúgíʼ edxu̱ún mudxawíín.
¡Atayáá! Ajngóo Jeobá nawiñu̱nʼ kuyáága̱jma̱a̱ na̱nguá enigu̱u̱nʼ.
11 Rí nakásngañu̱u̱ʼ Jeobá nakha ti̱yu̱u̱ʼ náa ikhúún,ga̱jma̱a̱ néʼngo̱ʼ eʼni”.
“Atasngatrámáʼ náa edxu̱ún e̱ji̱n bi̱ jngruigu̱u̱n náa kamba̱a̱,Ma̱ngaa náa edxu̱ún jiámá ga̱jma̱a̱ wa̱ʼxa̱ʼ* bi̱ nigimbíin.
Xúgíinʼ maxtugui̱i̱n, xó má xa̱biya̱ ga̱jma̱a̱ a̱ʼgiu̱u̱,xabuanuu ga̱jma̱a̱ bi̱ itháán xiʼñáaʼ.*
12 Guʼwún makánún eʼwíinʼ,xúʼko̱ má mbañúúnʼ ga̱jma̱a̱ guʼñún.
Numuu rí makruíya̱ʼ ñawúnʼ náa xa̱bu̱ xuajin mu ma̱ni̱ ngíníi”, eʼthí Jeobá.
13 “Numuu rí bi̱ majkhiinʼ asndu bi̱ itháán wanii, xúgíinʼ nuni̱ dí ra̱májánʼ mu mbuyáʼ rí muguaʼdáá,asndu profeta ga̱jma̱a̱ ndxajkun, xúgíinʼ nuni̱ nduwaʼ.
14 Ga̱jma̱a̱ nunimi̱jna̱ rí muni̱ thanáá náa nigawúunʼ*xuajñunʼ ga̱jma̱a̱ nuthi,‹¡Rígá dí tsímáá! ¡Rígá dí tsímáá!›,mú rí phú gajkhun nda̱a̱ dí tsímáá.
15 Lá natiñu̱u̱nʼ ikhiin ga̱jma̱a̱ xúgíʼ rí xkawiʼ dí nini̱ xáʼ.
¡Nditháan tsétiñu̱u̱nʼ!
¡Ga̱jma̱a̱ asndu na̱nguá eyáá ndiéjunʼ nindxu̱u̱ ma̱jti̱ʼ!
Ikha jngóo majngutíguíin xó má bi̱ nijngutíguíin.
Índo̱ gándi̱ʼi̱i̱n cuenta majngrádiinʼ”, eʼthí Jeobá.
16 Rígi̱ rí naʼthí Jeobá:
“Gaguajún náa nawiʼtáa kamba̱a̱ ga̱jma̱a̱ gu̱ya̱a̱.
Gura̱jxi̱ ga̱jma̱a̱ numuu kamba̱a̱ rí wayuu,gura̱jxi̱ ndiéjunʼ nindxu̱u̱ kamba̱a̱ rí itháán májánʼ, gaʼguala ikhí,ikhí muxkamaa náa mbuya̱a̱xala”.
Mú ikhiin nuthi: “Xúʼguáxu̱ ikhí”.
17 “Nigruígíin bi̱ nuyejngoo, bi̱ nithi:
‹¡Guxnatiʼñamijná mudxawíín aʼwóo chi̱ji̱ʼ!›”.
Mú ikhiin niriʼña: “Xúdxawíínxu̱”.
18 “Ikha jngóo, ¡Gudxawíín xuajin!
Gudxawíínla ikháanʼ xa̱bu̱ mbaʼin,dí maguáʼníí ikhiin.
19 ¡Atadxawíín ku̱ba̱ʼ!
Ma̱ʼkhá ka̱yo̱ʼ mbá gamiéjunʼ náa xuajin rígi̱xóo mbá rí mudrigúu ga̱jma̱a̱ numuu awan xkawiʼ rí niriya̱ʼ,numuu rí na̱nguá nidxawíín ajngóʼga̱jma̱a̱ nini̱ gaʼduunʼ xtángoo ndrígóʼ”.
20 “Káʼnii lá eʼniuʼ ikhúún á mu nadxaʼ xtaa olíbano asndu náa Saba*ga̱jma̱a̱ diin dí ndataun asndu náa xuajin rí itháan mitsínguánʼ rá.
Tsigijñaʼ ndrígala dí nakarámáʼ na̱nguá extrigú,ga̱jma̱a̱ na̱nguá enigu̱ʼ dí nuxnajxíla”.
21 Ikha jngóo Jeobá naʼthí rígi̱:
“Maʼgíʼ mbá dí majngrádáaʼ xuajin rígi̱,ga̱jma̱a̱ maʼni dí majngu̱tigi̱i̱n,xabuanii mbóó gajmiún e̱jñu̱ún,ma̱ngaa xa̱bu̱ bi̱ mijngii kúwá,xúgíinʼ makhañún”.
22 Rígi̱ dí naʼthí Jeobá:
“¡Atayáá! Na̱ʼkha̱ mbá xuajin náa ku̱ba̱ʼ dí rígá náa norte,ga̱jma̱a̱ mbá xuajin mba̱a̱ mba̱jui̱i̱ náa itháán mitsínguánʼ ku̱ba̱ʼ.
23 Murajthuun xkamídá ga̱jma̱a̱ kudú rí chíʼmbaʼ.*
Nindxu̱ún xkawi̱i̱nʼ ga̱jma̱a̱ xágáwíinʼ a̱jkiu̱ún.
Aʼwúún nawáán xóo lamáa,*ga̱jma̱a̱ kudruwíin wáyú.
Nundri̱gi̱i̱n xawii muxmijná ga̱jma̱á nindxa̱a̱ʼ wáxióo Sion”.
24 Nidxawíínxu̱ ga̱jma̱a̱ numuu rígi̱.
Ñawúnxu nánguá gíʼdoo tsiaki̱i̱,ga̱jmá ni̱ʼkha̱nú náa ikháanʼxu̱,nindxu̱u̱ xóo mbá gaʼkhu dí naxnúu a̱ʼgu̱ bi̱ naʼnii a̱ʼdióo.
25 Xádxúʼ xanááxájngruiga̱a̱ʼ náa kamba̱a̱,numuu rí xa̱bu̱ sia̱nʼ kayá espada,asndu náá rígá gamíi.
26 Wáxióo xuajñunʼ,atagíʼ xtíin mi̱du̱* ga̱jma̱a̱ atarmbijximinaʼ náa idiʼ.
Araxtaa ngíná ga̱jma̱a̱ atambiya̱ʼ ga̱jma̱a̱ numuu xóo mbáa a̱ʼdiáaʼ bi̱ mbáwíí,numuu rí nda̱a̱ tsu̱ma̱ gáʼkha̱ bi̱ maʼni gámbáa.
27 “Ni̱ni̱ dí ikháán* ma̱nindxa̱a̱ʼ mbáa bi̱ naʼni kaʼwi̱i̱ oro ga̱jma̱a̱ plata náa xuajñunʼ,mbáa bi̱ ndaʼyoo xúgíʼ kayuuʼ,gíʼmaa ma̱ta̱ya̱a̱ xóo eʼni ga̱jma̱a̱ matangujmaa májánʼ.
28 Xúgíinʼ ikhiin gújkhúʼ a̱jkiu̱ún...ga̱jma̱a̱ jngruigu̱u̱n runi̱ xtujtaa.
Nindxu̱ún xóo cobre ga̱jma̱a̱ hierro,xúgíinʼ ikhiin nuni̱ dí ra̱májánʼ.
29 Rí naxpíñúunʼ aguʼ, nikha̱a̱.
Rí nagájnáa náa aguʼ nindxu̱u̱ plomo.
Nañajunʼ xúʼkhi̱ín bi̱ naʼni kaʼwi̱i̱ oro ga̱jma̱a̱ plata,na̱nguá eguma wájíinʼ bi̱ ra̱míjíinʼ.
30 Gajkhun rí xa̱bu̱ muxna mbiʼíí plata rí niguanáa,numuu rí Jeobá tándoo gágruiguíin”.
Mbaʼa nota
^ Náa ajngáa hebreo naʼthí, “gu̱ni̱ kaʼwumijnáaʼla”.
^ O “i̱jín go̱ʼo̱”.
^ Náa ajngáa hebreo naʼthí, “bi̱ nikúwíin mba̱yu̱u̱ʼ mbiʼi”.
^ Náa ajngáa hebreo naʼthí, “nijmigaaʼ”.
^ O “Seba”.
^ O “jabalina”.
^ O “mar”.
^ Xóo muʼthá, Jeremías.
