Jeremías 7:1-34
7 Jeremías nigruigú ajngáa rígi̱ náa Jeobá:
2 “Ariejún náa xkrugoo goʼwóo Jeobá ga̱jma̱a̱ aratá ajngáa rígi̱ ikhí: ‹Gu̱dxawíín ajngóo Jeobá, xúgiáanʼ ikháanʼla bi̱ kuwáanʼ náa Judá, bi̱ nata̱ʼa̱la̱ náa xkrugua rígi̱ musmbatíga̱la náa inuu Jeobá.
3 Rígi̱ dí naʼthí Jeobá bi̱ naʼtáñajúúnʼ ángeles, Dios ndrígóo Israel: “Guri̱ʼkhu̱u̱ xóo nindxa̱la ga̱jma̱a̱ dí nu̱ni̱, mu xúʼko̱ maniʼñála xóó makuwáanʼ náa mbaaʼ rígi̱.
4 Xáku̱ma̱la ku̱ya̱a̱ ajngáa minduwaʼ ni má xútala: ‹¡Rígi̱ nindxu̱u̱* guʼwá náa nduyamajkuíí Jeobá, guʼwá náa nduyamajkuíí Jeobá, guʼwá náa nduyamajkuíí Jeobá!›.
5 Numuu dí á mu nuriʼkhu̱u̱ xóo nindxa̱la ga̱jma̱a̱ xóo nu̱ni̱, á mu gajkhun nunimbaníí xó má kaʼyoo numuu mbáa xa̱bu̱ ga̱jma̱a̱ ndxájuu,
6 á mu tséni̱ gíníila xa̱bu̱ bi̱ naguwaáʼ ga̱jma̱a̱ ejín wáʼa mangiin gu̱ʼú xuáʼa, á mu tséradíinla xa̱bu̱ bi̱ nda̱a̱ aʼkhúún náa mbaaʼ rígi̱, ga̱jma̱a̱ á mu tséjkua̱ kidxúúnʼ eʼwíinʼ dioses bi̱ muni̱ rí ma̱ʼkha̱nú gaʼkhu inala,
7 ikhúún maniʼñála dí makuwáanʼ náa mbaaʼ rígi̱, náa ku̱ba̱ʼ rí nixnu̱u̱n makuwá asndu kámuu wajin xiʼñála”›”.
8 “Mú ikháanʼla naku̱ma̱la kuya̱a̱ ajngáa rí minduwaʼ... Rúʼko̱ nda̱a̱ dí gámbáyala.
9 Lá ma̱ndoo mu̱ni̱ kuʼwáʼ, muradíin xa̱bu̱, muxuʼdámíjná aʼkhá gajmiála i̱mba̱a̱,* mu̱ni̱ nduwaʼ índo̱ gúxna̱ ajngála, muxnajxí tsigijñaʼ náa inuu Baal ga̱jma̱a̱ muʼgua kidxúúnʼ eʼwíinʼ dioses bi̱ tséniʼnúunʼla ráʼ.
10 Ga̱jma̱a̱ nda̱wa̱á muxnaxímíjnála náa inuʼ náa guʼwá rígi̱ dí nayéjkha̱ mbiʼyuʼ ga̱jma̱a̱ mu̱tala ‹Maguma káwáánʼlú› tséʼniuu á mu nu̱ʼni̱ má xúʼko̱ xúgíʼ enii dí xkawiʼ rígi̱.
11 Lá ikháanʼ ndu̱ya̱a̱ dí guʼwá rígi̱ dí nayéjkha̱ mbiʼyuʼ niʼni̱i̱ tsíñún kuʼwáʼ ráʼ. Ikhúún mínuuʼ má ndi̱yo̱o̱”, eʼthí Jeobá.
12 “‹Gaʼguala xúgi̱ náa Siló, náa mbaaʼ rí ikhúún niraʼwi̱i̱ marigá mbiʼyuʼ nákha ginii, ga̱jma̱a̱ gu̱ya̱a̱ ndiéjunʼ ni̱ni̱ ga̱jma̱a̱ numuu dí xuajñunʼ Israel niʼni xúgíʼ dí ra̱májánʼ.
13 Mú ikháanʼla ni̱ni̱ má xúʼko̱ xúgíʼ rígi̱, eʼthí Jeobá, maski ajndu nángi eʼni e̱tala,* mú na̱nguá nini̱mba̱la kuyo̱ʼ. Ikhúún nindxa̱ʼwa̱la, mú ikháanʼla na̱nguá niriʼñuʼ.
14 Xó má niniu̱u̱ Siló, xúʼko̱ má gániúu guʼwá rígi̱ dí nayéjkha̱ mbiʼyuʼ, dí ikháanʼla nakumalaʼ kuya̱a̱, xúʼko̱ má mbaaʼ rígi̱ dí ni̱xna̱la ikháanʼ ga̱jma̱a̱ wajin xiʼñála.
15 Xúgiáanʼ ikháanʼ maxkawáanʼla náa inuʼ, xó má nixkawíin xúgíinʼ a̱ngia̱la, xúgíinʼ e̱ji̱i̱n Efraín›.
16 Ikháán xáratajkáan ga̱jma̱a̱ numuu xuajin rígi̱. Xáratajkáan ni má xáratakáñúʼ ga̱jma̱a̱ numún ikhiin, numuu rí xádxawaanʼ.
17 Lá tsétayáá dí kúwá runi̱ náa xuajin Judá ga̱jma̱a̱ náa kamba̱a̱ ndrígóo Jerusalén xáʼ.
18 E̱ji̱n nurajxi̱i̱ ixi̱, xabuanii nugíʼ aguʼ ga̱jma̱a̱ guʼñu̱ún nuxmindú harina mu muxnajxi̱ pan xóo tsigijñaʼ náa inuu Reina bi̱ xtáa Mekhuíí,* ga̱jma̱a̱ nusngatra̱ma̱ʼ vino xóo tsigijñaʼ dí nagadirámuuʼ náa inún eʼwíinʼ dioses mu muni̱ dí makásnga̱ñu̱ʼ.
19 ‹Lá ikhúún eni̱ gawúnʼ xáʼ. Eʼthí Jeobá. Nu̱ni̱ gawúmíjná má ikhiin, ga̱jma̱a̱ nagájnuu gamajkhún›.
20 Tátá Jeobá bi̱ itháán mba̱a̱, naʼthí: ‹¡Gu̱ya̱a̱! Dí nakásngañu̱ʼ magadirámuuʼ náa ku̱ba̱ʼ rígi̱, náa majñu̱únʼ xa̱bu̱, náa xujkhúʼ, náa ixi̱ dí rígá xanáá ga̱jma̱a̱ dí najma̱a̱ náa ku̱ba̱ʼ, dí nakásngañu̱ʼ nikamuu ga̱jma̱a̱ xájuíyuuʼ›.
21 Rígi̱ dí naʼthí Jeobá bi̱ naʼtáñajúúnʼ ángeles, Dios ndrígóo Israel: ‹Ma̱ndoo mugríguíí itháan tsigijñaʼ dí nakarámáʼ náa i̱ʼwáʼ tsigijñaʼ dí nuxnajxí, ga̱jma̱a̱ gu̱phu̱ má ikháanʼla xuwiʼ rígi̱.
22 Numuu rí mbiʼi dí nigúwíin wajin xiʼñála náa ku̱ba̱ʼ ndrígóo Egipto, na̱nguá ni̱thu̱u̱n ni má tátañájúúnʼ ga̱jma̱a̱ numuu tsigijñaʼ dí nakarámáʼ ni má i̱ʼwáʼ tsigijñaʼ.
23 I̱ndó dí nitañájúúnʼ nindxu̱u̱ rígi̱: “Gu̱nimba̱la aʼwóʼ, ga̱jma̱a̱ ikhúún mani̱ndxu̱ʼ Dios ndrígala ga̱jma̱a̱ ikháanʼ mani̱ndxa̱la xuajñunʼ. Gíʼmaa dí majngruigala má xúʼko̱ náa kambo̱ʼ dí ikhúún nitañájuanla, mu xúʼko̱ magajnúu májánʼ xúgíʼ dí gúnila”›.
24 Mú ikhiin na̱nguá nixnatiʼñamijná mudxawíín,* nini̱ xó má eñún ikhiin ga̱jma̱a̱ niniña̱a̱nʼ dí a̱jkiu̱ún maʼni gújkhúʼ, ni̱jkha̱ kagui̱i̱n muni̱ dí ra̱májánʼ. Nini̱ itháan dí ra̱májánʼ ki xóo muni̱ dí májánʼ,
25 asndu nákha mbiʼi dí nigájnún wajin xiʼñála náa Egipto asndu mbiʼi xúgi̱. Ikha jngóo nikuʼmíin náa ikháanʼla xúgíinʼ xa̱bi̱ʼ bi̱ nindxu̱ún profetas,* mámbá gájtsi ga̱jma̱a̱ nángi eʼni nikuʼmíin.*
26 Mú nini̱ gaʼduunʼ, táʼndún gúdxawunʼ ga̱jma̱a̱ túnimbu̱u̱n,* nini̱ gújkhúʼ a̱jkiu̱ún.* ¡Nini̱ dí itháan xkawiʼ ki xóo wajin xiʼñúúnʼ!
27 Ikháán marathu̱u̱n xúgíʼ ajngáa rígi̱, mú ikhiin xúdxawaanʼ, matatsa̱ʼwu̱u̱n mú ikhiin xúriʼñaaʼ.
28 Ma̱ngaa marathu̱u̱n: ‹Rígi̱ nindxu̱u̱ xuajin dí táʼnimbo̱o̱ aʼwóo Jeobá Dios ndrígóo, niʼni gaʼduunʼ magruigú dí nixprígúu. Ní ndawa̱a̱ nimbáa bi̱ wíji̱ jmbu, ni má nánguá ethi* ga̱jma̱a̱ numuu rí muguajún jmbu›.
29 Atrujtu xtátsia̱a̱n rí mbi̱jua̱ ga̱jma̱a̱ atada̱ʼ, atani̱ mbá ajmúú ngíná náa inuu bíjní dí tsaʼtsaʼ, numuu dí Jeobá nánguá eyoo gáʼñúún xa̱bu̱ bugi̱ bi̱ nini̱ rí makásngañu̱u̱ʼ, ikhaa maniñúúnʼ.
30 ‹Numuu dí xa̱bu̱ xuajin Judá nini̱ dí ra̱májánʼ náa iduʼ, eʼthí Jeobá. Nigún kudiin xándiu̱ún bi̱ xkawi̱i̱nʼ náa goʼwóʼ dí nayéjkha̱ mbiʼyuʼ mu muni̱ tsagáá.
31 Nini̱ mbaaʼ mitsídánʼ náa mbuyamajkuíí Tófet, dí rígá náa mata* A̱ʼdióo Hinón,* mu mutsikhi̱i̱n jiámiu̱ún ga̱jma̱a̱ wa̱ʼxiúnʼ náa aguʼ, mbá dí ikhúún na̱nguá nitañájúúnʼ muni̱, ni má asndu nditháan tándxa̱ʼwa̱mínáʼ›.*
32 ‹Ikha jngóo atayáá, na̱ʼkha̱ mbiʼi, eʼthí Jeobá, dí ni xúxna mbiʼíí Tófet ni má mata A̱ʼdióo Hinón, muxna mbiʼíí mata náa Niradíin. Mudi̱ín wajñúúnʼ náa Tófet asndu ni xáguanúu nimbá chíʼgíiʼ* ku̱ba̱ʼ.
33 Xuñúúnʼ xa̱bu̱ xuajin bugi̱ mu̱phu̱ xujkhú xnaʼ bi̱ jngruigu̱u̱n mekhuíí ga̱jma̱a̱ xúgíinʼ xujkhúʼ bi̱ jngruigu̱u̱n náa tsu̱du̱u̱ ku̱ba̱ʼ, asndu nimbáa ndawa̱a̱ tsáa maʼni míñúún.
34 Ma̱ni̱ rí xuajin Judá ga̱jma̱a̱ kamba̱a̱ dí rígá náa Jerusalén ni xáwáán aʼwá dí kúwá gagi, ni má aʼwóo bi̱ nanigúnʼ ga̱jma̱a̱ bi̱ nanújúnʼ, numuu dí xuajin rígi̱ maguma gámbáa mbá kayuuʼ›”.
Mbaʼa nota
^ Náa ajngáa hebreo naʼthí, “ikhiin nindxu̱ún”, xóo muʼthá xúgíʼ guʼwá dí rígá ikhí.
^ Náa ajngáa hebreo naʼthí, “nákhá miʼcha̱ nitha̱la”.
^ Xúʼko̱ mbiʼyuu mbáa diosa bi̱ nduyamajkuíí israelitas bi̱ niniña̱a̱ʼ runi̱ ñajuunʼ Dios, mbáa nindxu̱u̱ mbáa diosa bi̱ nakumu̱ún rí naʼni dí gu̱ʼu̱ mudewíin e̱ji̱n.
^ Náa ajngáa hebreo naʼthí, “na̱nguá nixruigú cháʼwún”.
^ O “gaʼyee, bi̱ nuthi dí marigá”.
^ Náa ajngáa hebreo naʼthí, “nákhá miʼcha̱ nikuʼmíin”.
^ Náa ajngáa hebreo naʼthí, “na̱nguá nixruigú cháʼwún”.
^ Náa ajngáa hebreo naʼthí, “gújkhúʼ itsu̱ rexu̱ún”.
^ Náa ajngáa hebreo naʼthí, “ga̱jma̱a̱ nithu rawúúnʼ”.
^ O “bóo”.
^ Náa ajngáa hebreo naʼthí, “táʼkha̱ a̱jkiu̱nʼ ma̱ni̱”.
^ O “lajuíin”.
