Jeremías 8:1-22
8 “Mbiʼi rúʼko̱ eʼthí Jeobá, murawíi i̱tsu̱ún reyes bi̱ nijuaʼdi̱ín náa Judá, i̱tsu̱ún príncipes, i̱tsu̱ún ndxajkun, i̱tsu̱ún profetas* ga̱jma̱a̱ i̱tsu̱ún xa̱bu̱ bi̱ nikúwá náa Jerusalén.
2 Musnguti̱ga̱ náa a̱jkha̱ʼ, náa gu̱nʼ ga̱jma̱a̱ náa xúgíʼ dí rígá mekhuíí, bi̱ ikhiin nindúún kuñún, nini̱ ñajúúnʼ, nigún kidxu̱únʼ ga̱jma̱a̱ ndiñíinʼ, bi̱ ikhiin nismbati̱gu̱u̱n náa inún. Xáxtagijxi̱i̱ ni má xájuiʼdu̱u̱, maʼga̱nú mani̱ndxu̱u̱ xóo yuskha náa ku̱ba̱ʼ”.
3 “Bi̱ gáguanún náa mbá guʼwíin xa̱bu̱ bi̱ ra̱míjíinʼ bugi̱ náa xúgíʼ xuajin rí ikhúún nixidiríʼiin, muraʼwi̱i̱ itháán rí makhañún ki xóo rí makuwá”, eʼthí Jeobá bi̱ naʼtáñajúúnʼ ángeles.
4 “Mbaʼyóoʼ marathu̱u̱n: ‹Rígi̱ rí naʼthí Jeobá:
“Lá ikhiin majnguti̱gi̱i̱n ga̱jma̱a̱ ni xátangi̱ín maguajxu̱ún mbu̱júu̱ xáʼ.
Á mu mbáa natanga̱a̱ kidííʼ, lá ni xátanga̱a̱ i̱mba̱a̱ ma̱ngaa ráʼ.
5 Náá numuu rí xa̱bu̱ xuajin Jerusalén, tséguajun jmbu má xúʼko̱ rá.
Nurajtumijná má xúʼko̱ náa rí minduwaʼ,ga̱jma̱a̱ tsíñún gátangi̱i̱n.
6 Niʼgíʼ edxu̱ʼ ga̱jma̱a̱ nidxawuun, mú rí nuthi na̱nguá nindxu̱u̱ májánʼ.
Nimbáa tsétanga̱a̱ a̱jkiu̱u̱n náa dí ra̱májánʼ naʼni ni má tsérajximíjna̱ ‹ndiéjunʼ nini̱ rá.›
Mámbáa má na̱jkha̱ náa rí nagún bi̱ mbaʼin, xóo mbáa wáyú bi̱ nagatíyáaʼ ragáyúu na̱jkha̱ náa nuxmijná.
7 Asndu cigüeña bi̱ na̱jkha̱ mekhuíí ndaʼyoo náa mbiʼi rí maʼga,gúgu̱, ma̱ngaa ñu̱ʼu̱ bi̱ mbiʼyuu vencejo ga̱jma̱a̱ tordo* nduyáá náa mbiʼi rí magutangi̱i̱n.
Mú xa̱bu̱ xuajñunʼ na̱nguá eyáá náá mbiʼi rí ikhúún, Jeobá, mandi̱ʼi̱i̱n cuenta”›.
8 ‹Xú kaʼnii gándoo gútala ikháanʼ “nindxu̱xu̱ xa̱bu̱ bi̱ najmañuu ga̱jma̱a̱ kuaʼdááxu̱ xtángoo ndrígóo Jeobá rá.”
Rí phú gajkhun, xnaʼ* rí najmún bi̱ nuniraʼmáʼ i̱ndó najmaa mú magumaraʼmáʼ rí minduwaʼ.
9 Bi̱ najmañún niguma majti̱i̱nʼ.
Nimíñúún wéñuuʼ ga̱jma̱a̱ maxtugui̱i̱n.
¡Gu̱ya̱a̱! Ikhiin nini̱ gaʼduunʼ ajngóo Jeobá,ndiéjunʼ ku̱ma̱ guáʼdáá xá.
10 Ikha jngóo guʼñún maxniu̱u̱n eʼwíinʼ xa̱bu̱ga̱jma̱a̱ mbañúúnʼ makánún eʼwíinʼ,numuu rí bi̱ majkhiinʼ asndu bi̱ itháan wanii, xúgíinʼ nuni̱ dí ra̱májánʼ mu mbuyáʼ rí muguaʼdáá,asndu profeta ga̱jma̱a̱ ndxajkun, xúgíinʼ nuni̱ nduwaʼ.
11 Ga̱jma̱a̱ nunimi̱jna̱ rí muni̱ thanáá náa nigawúunʼ wáxióo xuajñunʼ ga̱jma̱a̱ nuthi“¡Rígá dí tsímáá! ¡Rígá dí tsímáá!”,mú rí phú gajkhun nda̱a̱ dí tsímáá.
12 Lá natiñu̱u̱nʼ ikhiin ga̱jma̱a̱ xúgíʼ rí xkawiʼ dí nini̱ xáʼ.
¡Nditháan tsétiñu̱u̱nʼ!
¡Ga̱jma̱a̱ asndu na̱nguá eyáá ndiéjunʼ nindxu̱u̱ ma̱jti̱ʼ!
Ikha jngóo majngutíguíin xó má bi̱ nijngutíguíin.
Índo̱ gándi̱ʼi̱i̱n cuenta majngrádiinʼ›, eʼthí Jeobá.
13 ‹Índo̱ gágimbi̱ín ma̱ni̱ mbátígi̱i̱n›, eʼthí Jeobá.
‹Ni xáguanúu uva náa ixu̱u̱ ní má higo náa ixu̱u̱, ga̱jma̱a̱ inúu mujndooʼ.
Muni̱ mbáti̱ga̱ rí ikhúún nixnu̱u̱n›”.
14 “Náá numuu rí gi̱i̱ trigáanʼlú rá.
Gugímbumíjnálú ga̱jma̱a̱ ga̱tu̱ʼu̱lú náa xuajin rí kúgumaʼá ga̱jma̱a̱ xtájtsí mu makhañúlúʼ ikhí.
Numuu rí Jeobá Dios ndrígulú maʼni gámbáanʼluga̱jma̱a̱ naxjnulu iyaʼ rí gíʼdoo thana mbiiʼ muʼwa̱a̱n,numuu rí nixuʼdámíjná aʼkhá náa inuu Jeobá.
15 Niguaʼti̱i̱nlú rí tsímáá, mú na̱nguá ni̱ʼkha̱ rí májánʼ,mbá mbiʼi rí maʼni̱i̱ a̱jkiu̱lú, ¡mu i̱ndó gamíi rígá!
16 Asndu náa Dan nawáán rí nundijchun wáyu̱u̱.
Índo̱ nundxa̱ʼwa̱ wáyu̱u̱,xúgíʼ ku̱ba̱ʼ naʼba̱a̱n.
Ikhiin natu̱ʼu̱u̱n mu muni̱ gámbáa ku̱ba̱ʼ ga̱jma̱a̱ xúgíʼ dí rígá ikhí,náa xuajin ga̱jma̱a̱ xa̱bu̱”.
17 “Gu̱ya̱a̱, xtáá rakuʼnguíinʼ a̱bu̱nʼ náa ikháanʼla,a̱bu̱nʼ mbiinʼ bi̱ xándoo mu̱tha̱ ñájúúnʼla,*gajkhun rí muphala”, eʼthí Jeobá.
18 Gajmá ndrígóʼ na̱nguá xóo maguma thanáá,a̱jkiu̱nʼ nandoo káñuu.
19 Asndu náa mbá xuajin mitsínguánʼ nandxaʼwá mbáa rí mixtambáyííwáxióo xuajñunʼ:
“Lá ndawa̱a̱ Jeobá náa Sion ráʼ.
Lá ndawa̱a̱ ikhí rey ndrígóo xáʼ.”
“Náá numuu rí nini̱ makásngañu̱nʼ ga̱jma̱a̱ numún xándú bi̱ niniwíin,dioses bi̱ ragájkhun bi̱ xkawi̱i̱nʼ rá.”
20 “Nijngoo má rí nirajxi̱i̱ rí nijuiʼdu niguámbá ma ruʼphu,¡mú ikháánʼlú na̱nguá niguma káwáánʼ!”.
21 Nagáwíinʼ a̱jkiu̱nʼ rí nigawúunʼ wáxióo xuajñunʼ,xtáá ngíná wéñuuʼ.
Gamíi nijkaroʼoo náa ikhúún.
22 Lá nda̱a̱ nimbá bálsamo* náa Galaad ráʼ.
Lá ndawa̱a̱ nimbáa médico ikhí ráʼ.
Náá numuu rí xóó tséʼni̱i̱ a̱jkiu̱u̱n wáxióo xuajñunʼ rá.
Mbaʼa nota
^ O “gaʼyee, bi̱ nuthi dí marigá”.
^ O mbáa “grulla”.
^ Rígi̱ nandoo gáʼthúu̱n rí nuni̱ magia o brujo mu abu̱nʼ muni̱ xóo nandún ikhiin.
