Jonás 2:1-10
2 Ikhú Jonás niʼtákáñúu Jeobá Dios ndrígióo asndu náa awúun e̱gi̱ʼ,
2 niʼthúu̱n:
“Asndu ngíná a̱jkiu̱nʼ nindxa̱ʼwo̱o̱ Jeobá índo̱ nixtáá ramínúuʼ ga̱jma̱a̱ ikhaa niriʼñuʼ.
Asndu náa awúu̱n Iñá wajinʼ* nindxa̱ʼwa̱ rí mixtambáyúʼ.
Ikháán nitadxawunʼ.
3 Índo̱ nitadamu̱ʼu̱u̱n asndu náa a̱jkiu̱u̱n lamáa,*jxu̱u̱ʼ nixmágu̱ʼu̱u̱n.
Iyáʼ rí ikháán nitani̱ mambajxu̱u̱ nikujmbamu̱ʼu̱u̱n itháan.
4 Ikhú nitha̱: ‹¡Ní ndáwu̱u̱n mijngiiʼ náa inaaʼ!
Xkáʼnii lá gatanga̱án mba̱yo̱o̱ mbu̱júu̱ guʼwáaʼ kaʼwu rá.›
5 Iyaʼ nimbújxu̱u̱n ga̱jma̱a̱ nigíʼ maxíñu̱u̱n,asndu náa itháan mi̱jnu̱ʼ lamáa niguanúʼ.
Iná dí rígá náa awúu̱n iyaʼ nimbroʼoo edxu̱ʼ.
6 Nirmúʼúún asndu nikawoʼ náa nagi̱ʼdu̱u̱ kúbá.
Nigíʼ marúguáa xkrugoo ku̱ba̱ʼ mu maruguarúʼúún asndu kámuu.
Jeobá Dios ndrígióʼ, ikháán nitríñu̱u̱ʼ náa iñá wajinʼ.
7 Índo̱ na̱jkha̱ rámbáa jxuʼ, nirmáʼáan a̱jkiu̱nʼ ka̱ya̱a̱ʼ Jeobá.
Dí nitakáñáanʼ nitadxawunʼ, asndu náa guʼwáaʼ dí mikaʼwu.
8 Bi̱ nduyamajkhún xándú bi̱ nda̱a̱ rí ejmi̱i̱n, nambumún kuyáá bi̱ nasngajmúún ngajua rí tsétumuu.*
9 Mú ikhúún, ga̱jma̱a̱ xúgíʼ a̱jkiu̱nʼ maxnááʼ núma̱aʼ, maxnajxí tsigijñaʼ náa ikháán,
manimbánuu dí nikuʼdáminaʼ ma̱ni̱.
Jeobá, ikháán nindxa̱a̱ʼ bi̱ natani̱ kríñu̱u̱ʼ”.
10 Nda̱wa̱á, Jeobá niʼtáñajuunʼ e̱gi̱ʼ dí majxiri̱ya̱a̱ʼ Jonás náa ku̱ba̱ʼ mijxooʼ.
