Josué 1:1-18
1 Nda̱wa̱á dí nikháñuu Moisés, xa̱bi̱i̱ Jeobá. Ikhú Jeobá niʼthúu̱n Josué* a̱ʼdióo Nun bi̱ nimbáyúu Moisés:
2 “Xa̱bi̱ʼ Moisés nikháñuu má, ikha jngóo atanirataminaʼ, akidán náa mañu Jordán gajmiáanʼ xúgíinʼ xa̱bu̱ xuajin. Ata̱ʼa̱a̱ʼ gajmiáanʼ náa ku̱ba̱ʼ rí maxnu̱u̱n ikhiin, xúgíinʼ xa̱bu̱ Israel.
3 Ma̱xnala maʼni mbayala asndu náá má gáʼguala, xó má ni̱thu̱u̱n ma̱ni̱ Moisés.
4 Mbayala magi̱ʼdu̱u̱ náa ku̱ba̱ʼ mijxooʼ* asndu náa Líbano. Ga̱jma̱a̱ asndu náa mañu mba̱a̱ Éufrates, náa mbá xúgíʼ mbañúúnʼ hititas asndu náa lamáa Mba̱a̱,* xígií náa narámaaʼ a̱jkha̱ʼ.*
5 Nimbáa xáʼngo̱o̱ matani̱ ga̱jma̱a̱ʼ náa xúgíʼ mbiʼi dí gáraxtaa. Maxtáá ga̱jma̱á nindxa̱a̱ʼ xó má nixtáá ga̱jmu̱ʼ Moisés. Nditháan xániʼñáaʼ mbáwíín, mambáyaaʼ má.
6 Gakhi̱i̱ a̱jkia̱a̱nʼ gátani̱ ga̱jma̱a̱ xámíñáaʼ, numuu rí ikháán nindxa̱a̱ʼ bi̱ mi̱dxu̱ʼ xtiin xa̱bu̱ xuajin mundrigúu ku̱ba̱ʼ rí ni̱thu̱u̱n wajin xiʼñúúnʼ dí maxnu̱u̱n.
7 I̱ndó ndayóoʼ rí matani̱ gakhi̱i̱ a̱jkia̱a̱nʼ ga̱jma̱a̱ xámíñáaʼ, atatsimba̱a̱ʼ tsu̱ma̱á* xúgíʼ Xtángoo dí xa̱bi̱ʼ Moisés niʼtháanʼ matani̱. Xágájnatiya̱a̱ʼ náa ñawún májáanʼ ni má náa ñawún xti̱ya̱a̱ʼ, mu xúʼko̱ ma̱ta̱ya̱a̱ ndiéjunʼ gátani̱ asndu náá má gídxúʼ.
8 Nditháan xátatsiʼñánʼ raratá ajngáa rí na̱ʼkha̱ náa Xtángoo rígi̱. Gíʼmaa maraxnuu ga̱jma̱a̱ matatsaʼwamínáʼ dí naʼthí ikhí* mbiʼíí mbruʼun, mu xúʼko̱ matatsimba̱a̱ʼ tsu̱ma̱á xúgíʼ dí naʼthí ikhí, mu xúʼko̱ maraxtaa májánʼ ga̱jma̱a̱ ma̱ta̱ya̱a̱ dí matani̱.
9 Lá raʼkháa ikhúún etha̱a̱nʼ rí gakhi̱i̱ a̱jkia̱a̱nʼ gátani̱ ga̱jma̱a̱ xámíñáaʼ ráʼ. Xámíñáaʼ, numuu dí ikhúún, Jeobá Dios ndrígáaʼ xtáá ga̱jma̱á nindxa̱a̱ʼ asndu náá má gídxúʼ”.
10 Ikhú Josué niʼthúún rígi̱ xa̱bu̱ bi̱ kuya̱ edxu̱u̱ náa xuajin:
11 “Gaʼguala náa kúwíin xa̱bu̱ xuajin ga̱jma̱a̱ guthu̱u̱nla rígi̱: ‹Guniratháá dí mu̱da gúʼgua,* numuu rí tígo̱o̱ mbá ajtsú mbiʼi makidáanʼlú náa mañu Jordán, mu matu̱ʼu̱lú náa ku̱ba̱ʼ rí Jeobá Dios ndrígala maxnála›”.
12 Josué niʼthúún rubenitas, gaditas ga̱jma̱a̱ mbá taphi̱i̱n bi̱ naguwáʼ* náa Manasés.
13 “Garmáʼáan a̱jkia̱la dí Moisés xa̱bi̱i̱ Jeobá niʼtáñajuanla: ‹Jeobá Dios ndrígala naʼni rí makuwáanʼla tsímáá ga̱jma̱a̱ nixnála ku̱ba̱ʼ rígi̱.
14 Guʼyala, e̱jña̱la ga̱jma̱a̱ xujkiála maguanún má makuwá náa ridoo* mañu Jordán rígi̱, ku̱ba̱ʼ dí Moisés nixnála. Mú xúgiáanʼla ikháanʼ bi̱ najmáanʼla nuxmijná gaʼguala xawii muxmijná ga̱jma̱a̱ gaʼguala gináanʼ. Ikháanʼla gíʼmaa dí mumbáñún
15 asndu índo̱ Jeobá gáʼni rí makuwá tsímáá a̱ngia̱la, xó má niʼni rí makuwáanʼla ikháanʼ, ikhiin mangiin mundrigúu ku̱ba̱ʼ rí Jeobá Dios ndrígala naxnála. Ikhú ikháanʼla gatangaánʼ gákuwáanʼ náa ku̱ba̱ʼ rí Moisés xa̱bi̱i̱ Jeobá nixnála, dí naguanúu xígií náa ridoo mañu Jordán, náa nagájnuu a̱jkha̱ʼ›”.*
16 Ikhiin niriʼñáán Josué: “Munixu̱ʼ mbá xúgíʼ dí niratáñajunxu̱, ga̱jma̱a̱ muʼguáxu asndu náá má gátaxuʼmáaʼxu ikháán.
17 Xó má ninimbuxu̱ ku̱ya̱a̱ Moisés, xúʼko̱ má gúnimbuxu̱ kuya̱a̱ʼ mangáán. Jeobá Dios ndrígáaʼ gáxtáa ga̱jma̱á nindxa̱a̱ʼ xó má nixtáa ga̱jma̱a̱ Moisés.
18 Asndu tsáá xa̱bíi̱ bi̱ xáʼdxawun ga̱jma̱a̱ xáʼnimbo̱o̱ dí naratáñajunʼ, gíʼmaa dí makhañúu. Gakhi̱i̱ a̱jkia̱a̱nʼ gátani̱ ga̱jma̱a̱ xámíñáaʼ”.
Mbaʼa nota
^ O “Jehosúa”, rí nandoo gáʼthúu̱n ‹Jeobá bi̱ naʼni káwíin xa̱bu̱›.
^ O “desierto”.
^ O “mar Grande”. Xóo muʼthá, mar Mediterráneo.
^ O “oeste”.
^ O “majaá”.
^ O “wáwáa gáraxnuu”.
^ O “gonembánííla dí muda muʼguala”.
^ O “tribu”.
^ Xóo muʼthá, náa nagájnuu a̱jkha̱ʼ.
^ O “este”.
