Josué 10:1-43
10 Índo̱ rey Adoni-Zédec bi̱ xtáa náa Jerusalén niʼdxawuun dí Josué niʼni gámbáa Hai ga̱jma̱a̱ xúgíʼ dí rígá ikhí, ma̱ngaa nixíyáa rey xó má niʼni ga̱jma̱a̱ Jericó ma̱ngaa dí xa̱bu̱ Gabaón nimbánúún rí makuwá tsímáá gajmiún xa̱bu̱ Israel ga̱jma̱a̱ rí ikhiin niniñu̱u̱nʼ makuwá gajmiún,
2 ra̱ʼkhá tháán nixmiéjuunʼ numuu dí Gabaón nindxu̱u̱ mbóoʼ xuajin mba̱a̱, mbá xuajin mba̱a̱ xó má xuajin dí rígá náa naʼtáñajunʼ mbáa rey. Itháán mba̱a̱ ki xóo Hai ga̱jma̱a̱ xúgíinʼ xa̱bekha bi̱ kúwá ikhí najmañún nuxmijná.
3 Ikha jngóo Adoni-Zédec, rey ndrígóo Jerusalén, nikuʼma ajngáa rígi̱ inuu Hoham rey ndrígóo Hebrón, Piram rey ndrígóo Jarmut, Jafía rey ndrígóo Lakís, ga̱jma̱a̱ Debir rey ndrígóo Eglón:
4 “Aguwaʼ gúmbáyúʼla ga̱jma̱a̱ gu̱ʼni̱ gámbáa Gabaón numuu rí nimbánúún makuwá tsímáá gajmiún Josué ga̱jma̱a̱ israelitas”.
5 Ikhú mbá witsiin reyes amorreos, rey bi̱ xtáa náa Jerusalén, náa Hebrón, náa Jarmut, náa Lakís ga̱jma̱a̱ náa Eglón, nigimbúmíjná gajmiún soldado ndrígu̱ún. Nigún ga̱jma̱a̱ nigi̱ʼi̱i̱n náa mbájndi rawuunʼ xuajin mu muxmijná gajmiún Gabaón.
6 Ikhú xa̱bu̱ Gabaón nixuʼma ajngáa rígi̱ inuu Josué nákha xtáa náa Guilgal: “Xátatsiʼñún* xa̱bia̱a̱ʼ bigi̱. ¡Ayi̱ nacha̱! ¡Atani̱ káwáanʼxu̱ ga̱jma̱a̱ atambáyuxu̱! Numuu dí reyes amorreos bi̱ kúwi̱i̱n náa kúbá nigimbúmíjná mu muxmijná gajmiúxu”.
7 Ikha jngóo Josué nigájnuu náa Guilgal gajmíi̱n xúgíinʼ xa̱bekha bi̱ najmañún nuxmijná ga̱jma̱a̱ soldado bi̱ guáʼdáá tsiaki̱i̱.
8 Ikhú Jeobá niʼthúu̱n Josué: “Xámíñáaʼ xtañún, numuu dí nixnájxíin náa ñawáanʼ. Nimbáa dí ikhiin xáʼngo̱o̱ matani̱ ga̱jma̱a̱ʼ”.
9 Nigájnún náa Guilgal kañiiʼ mbruʼun nigún, ikhú Josué nda̱a̱ tsu̱ma̱ niʼni gámbíin.
10 Jeobá niʼni jnga̱wi̱i̱n amorreos náa inún israelitas, ikhiin niradíin mbaʼin náa Gabaón ga̱jma̱a̱ nigún ruxkúún asndu náa kamba̱a̱ rí natsimuu náa Bet-Horón, nigún ruradíin náa Azecá asndu náa Maquedá.
11 Índo̱ kúwá ruguájthaa ragáñún náa Bet-Horón eni̱ xa̱bu̱ Israel, Jeobá niʼni majngutígú asndu mekhuíí eʼtsí mba̱ʼu̱ asndu náa Azecá ga̱jma̱a̱ ikhiin nikháñún. Itháán má mbaʼin xa̱bu̱ nikháñún ga̱jma̱a̱ eʼtsí ki xóo bi̱ nikháñún ga̱jma̱a̱ espada.
12 Mbiʼi rúʼko̱ dí Jeobá niʼni gámbíin amorreos náa inún israelitas, índo̱ Josué niʼthúu̱n Jeobá náa inún xa̱bu̱ Israel:
“¡Atatsiñááʼ rí a̱jkha̱ʼ magiʼi wíí náa jmbuu Gabaón,ga̱jma̱a̱ gu̱nʼ náa jmbuu mata* Ayalón!”.
13 Ikha jngóo a̱jkha̱ʼ nigi̱ʼi̱ wíí ga̱jma̱a̱ gu̱nʼ taʼbayimínaʼ asndu índo̱ israelitas niguámbu̱u̱n niʼni gámbíin xa̱bu̱ sia̱nʼ. Lá tséʼthi náa libro dí mbiʼyuu Jasar ráʼ. Dí a̱jkha̱ʼ nigi̱ʼi̱ wíí náa ta̱pha̱ mekhu ga̱jma̱a̱ nditháan táʼga marámáaʼ xóo mbá mbiʼi wáa.
14 Nditháan tárígá, ni má tátanga̱a̱ marigá nda̱wa̱á xóo mbiʼi rúʼko̱ dí Jeobá niʼdxawuun aʼwóo mbáa xa̱bu̱, numuu rí Jeobá xtáa raxmínaʼ ga̱jma̱a̱ numuu Israel.
15 Nda̱wa̱á dí rúʼko̱, Josué nitanga̱a̱ gajmíi̱n xúgíinʼ xa̱bu̱ Israel náa Guilgal náa nikúwá.
16 Ikhú má mbiʼi rúʼko̱ witsiin reyes amorreos nigáñún ga̱jma̱a̱ nirkaʼumijná náa tsíñu dí rígá náa Maquedá.
17 Ikhú nitháán Josué: “Nixkamiin mbá witsiin reyes bi̱ nirkaʼumijná náa tsíñu dí rígá náa Maquedá”.
18 Ga̱jma̱a̱ Josué niʼthúún: “Gurmbíjxi̱ itsí mba̱ʼu̱ náa riejuun tsíñu ga̱jma̱a̱ gundrigi̱i̱n xa̱bu̱ muyama.
19 Mú ikháanʼla xáguanala gi̱i̱. Gaʼgua ruxkúún xa̱bu̱ sia̱nʼ ga̱jma̱a̱ guradíin xóo kúwá ragáñúún. Xúniʼñáánʼ rí mataʼáán náa xuajñún, numuu rí Jeobá Dios ndrígala nixnáxi̱i̱n náa ñawánla”.
20 Nda̱wa̱á dí Josué gajmíi̱n israelitas niguámbu̱u̱n nini̱ gámbíin mbá xúgíinʼ, i̱ndó táʼngu̱u̱n gúradíin tikhuin bi̱ nigáñún ga̱jma̱a̱ nitu̱ʼu̱u̱n náa xuajin dí kúgumaʼá,
21 xúgíinʼ xa̱bu̱ xuajin nitangiín májánʼ, ga̱jma̱a̱ nda̱a̱ dí niguáʼníí náa Maquedá náa xtáa Josué. Nimbáa xa̱bu̱ nánguá niʼngo̱o̱ a̱jkiu̱u̱n gáʼthí dí raʼkhí ga̱jma̱a̱ numún israelitas.
22 Ikhú Josué niʼthúu̱n: “Gurmbáʼtaa tsíñu gurawíínʼla mbá witsiin reyes gáguwáʼ kudiin gi̱i̱”.
23 Ikhú nirawíin mbá witsiin reyes náa tsíñu: Rey ndrígóo Jerusalén, Hebrón, Jarmut, Lakís ga̱jma̱a̱ rey ndrígóo Eglón, nigún kudiin náa Josué.
24 Índo̱ niguwáʼ kudiin reyes bugi̱, Josué nigimbíin mbá xúgíinʼ xa̱bekha Israel ga̱jma̱a̱ niʼthúún bi̱ nutañajúúnʼ xa̱bu̱ bi̱ najmañún nuxmijná bi̱ ni̱jkha̱ gajmíi̱n: “Guxu̱ʼmámíjná. Gujnguprámáʼ náa rexu̱ún reyes bigi̱”. Ikhú nixuʼmamijná ga̱jma̱a̱ nijnguprama̱ʼ náa rexu̱ún.
25 Ikhú Josué niʼthúún: “Xámiñalaʼ ni má xáguáʼáanʼla. Gakhi̱i̱ a̱jkia̱la gúni̱ ga̱jma̱a̱ xámíñalaʼ, numuu dí xígi̱ gáʼniúún Jeobá xa̱bu̱ sia̱nʼ bi̱ gáʼndún muxmijná gajmiún”.
26 Ikhú Josué niʼni gawúúnʼ ga̱jma̱a̱ nigudíin, nda̱wa̱á nijngríguíin náa mbá witsu ixi̱, xúʼko̱ ningríguíin asndu wakhííʼ.
27 Índo̱ na̱jkha̱ rarámáaʼ a̱jkha̱ʼ, Josué nixiéjún rí mundriguíin náa ixi̱ ga̱jma̱a̱ rí magúun kudiin náa tsíñu dí nirkaʼumijná. Nda̱wa̱á niruguáa tsíñu ga̱jma̱a̱ itsí mba̱ʼu̱, xúʼko̱ káʼnii asndu rí mbiʼi xúgi̱.
28 Mbiʼi rúʼko̱ Josué niʼni gámbáa Maquedá, nigudíin ga̱jma̱a̱ espada mbá xúgíinʼ. Nixíyáa rey ga̱jma̱a̱ xúgíinʼ xa̱bu̱ bi̱ kúwá ikhí, nimbáa tániñuuʼ makríya̱a̱ʼ. Xó má niʼniuu rey ndrígóo Jericó xúʼko̱ má niʼniuu rey ndrígóo Maquedá ma̱ngaa.
29 Rí xúgi̱ Josué nigájnuu náa Maquedá mu maʼga Libná gajmíi̱n xúgíinʼ ga̱jma̱a̱ nini̱ gámbáa Libná.
30 Jeobá ma̱ngaa nixnájxi̱ náa ñawúúnʼ xa̱bu̱ Israel xuajin rúʼko̱ ga̱jma̱a̱ rey ndrígóo, nini̱ gámbáa xuajin ga̱jma̱a̱ xúgíinʼ xa̱bu̱ niradíin ga̱jma̱a̱ espada, túniña̱a̱ʼ rí nimbáa makríya̱a̱ʼ. Xó má nini̱i̱ rey ndrígóo Jericó xúʼko̱ má nini̱i̱ rey náa xuajin rúʼko̱ ma̱ngaa.
31 Mbá nacha̱ Josué nigájnuu náa Libná ni̱jkha̱ Lakís gajmíi̱n xúgíinʼ xa̱bu̱ Israel. Niruguama̱ʼa̱a̱n xuajin ga̱jma̱a̱ nini̱ gámbáa.
32 Jeobá niniñuuʼ xuajin Lakís náa ñawúúnʼ xa̱bu̱ Israel ga̱jma̱a̱ nitu̱ʼu̱u̱n índo̱ niʼni a̱jma̱ e̱jkha̱ʼ. Nini̱ gámbíin mbá xúgíinʼ xa̱bu̱ bi̱ kúwá ikhí ga̱jma̱a̱ espada, xó má nini̱ gajmiún Libná.
33 Ikhú Horam rey ndrígóo Guézer, nitsimuu gámbáyúu Lakís. Mú Josué nixíyáa ga̱jma̱a̱ niʼni gámbáa xuajñuu tániñuuʼ rí nimbáa makríyáaʼ.
34 Ikhú Josué nigájnuu náa xuajin Lakís mu maʼga náa Eglón gajmíi̱n xúgíinʼ xa̱bu̱ Israel. Niruguama̱ʼa̱a̱n xuajin ga̱jma̱a̱ nixmijná gajmiún.
35 Mbiʼi má rúʼko̱ nitu̱ʼu̱u̱n ga̱jma̱a̱ niradíin mbá xúgíinʼ ga̱jma̱a̱ espada. Mbiʼi rúʼko̱ niradíin mbá xúgíinʼ xa̱bu̱ bi̱ kúwá ikhí xó má nini̱ náa Lakís.
36 Ikhú Josué nigájnuu náa Eglón nitsimuu Hebrón gajmíi̱n xúgíinʼ xa̱bu̱ Israel ga̱jma̱a̱ nini̱ gámbíin xúgíinʼ xa̱bu̱ xuajin.
37 Nitu̱ʼu̱u̱n ga̱jma̱a̱ nini̱ gámbíin ga̱jma̱a̱ espada mbá xúgíinʼ xa̱bu̱ bi̱ kúwá ikhí, ga̱jma̱a̱ rey ma̱ngaa nini̱ gámbíin mbá xúgíinʼ xa̱bu̱ bi̱ kúwá náa xuajin rí rígá mijngii, túniña̱a̱ʼ rí nimbáa makríyáaʼ. Xó má niʼni ga̱jma̱a̱ Eglón, xúʼko̱ má niʼni gámbáa xuajin ga̱jma̱a̱ mbá xúgíinʼ xa̱bu̱ bi̱ kúwá.
38 Nda̱wa̱á kayuuʼ Josué nitanga̱a̱ gajmíi̱n xúgíinʼ xa̱bu̱ Israel náa Debir ga̱jma̱a̱ nini̱ gámbáa xuajin rúʼko̱.
39 Nini̱ gámbáa xuajin ga̱jma̱a̱ rey ndrígóo ga̱jma̱a̱ espada, niradíin mbá xúgíinʼ xa̱bu̱ bi̱ kúwá ikhí, túniña̱a̱ʼ rí nimbáa makríyáaʼ. Xó má nini̱ gajmiún xuajin Hebrón ga̱jma̱a̱ rey ndrígóo ma̱ngaa Libná ga̱jma̱a̱ rey ndrígóo, xúʼko̱ má nini̱i̱ xuajin Debir ga̱jma̱a̱ rey ndrígóo.
40 Josué niʼni gámbáa xúgíʼ xuajin dí rígá náa kúbá, náa Négueb, náa Sefelá ga̱jma̱a̱ xúgíʼ xuajin dí rígá náa juímuu ga̱jma̱a̱ nigudíin mbá xúgíinʼ reyes bi̱ kúwá ikhí, tániñuuʼ rí nimbáa makríyáaʼ. Niʼni gámbóo xúgíʼ rí ndaʼya xó má dí Jeobá Dios ndrígóo Israel nindo̱ʼo̱o̱ maʼni.
41 Josué niʼni gámbáa xúgíʼ xuajin nigíʼdúu náa Cadés-Barnea asndu náa Gaza ga̱jma̱a̱ xúgíʼ xuajin dí rígá náa Gosén asndu náa Gabaón.
42 Josué niguguiin xúgíinʼ reyes bugi̱ ga̱jma̱a̱ nigruigú mbañún, káaʼ mbá miʼtsú má niʼni numuu dí Jeobá Dios ndrígóo Israel xtáa raxmina̱ʼ ga̱jma̱a̱ numuu xuajin Israel.
43 Nda̱wa̱á Josué nitanga̱a̱ gajmíi̱n xúgíinʼ xa̱bu̱ Israel náa Guilgal náa nigi̱ʼi̱i̱n.
