Josué 13:1-33
13 Rí xúgi̱, Josué nikhi̱i̱ má ga̱jma̱a̱ inu makhañúu. Ikha jngóo Jeobá niʼthúu̱n: “Nikhi̱i̱n má ga̱jma̱a̱ inu makhañáaʼ, mú rígá xóó ku̱ba̱ʼ dí matandrígúu.
2 Rígi̱ nindxu̱u̱ ku̱ba̱ʼ dí xóó naguanúu náa xúgíʼ mbañúúnʼ filisteos ga̱jma̱a̱ náa xúgíʼ mbañúúnʼ guesuritas
3 (asndu náa nawiʼtoo mañu Nilo* rí naguanúu xígií náa nagájnuu a̱jkha̱ʼ,* náa Egipto asndu náa ndawaa Ecrón, xígií náa norte, náa mbañúúnʼ cananeos) ma̱ngaa mbañúúnʼ mbá witsiin xa̱bu̱ ñajunʼ filisteos: Xóo gazeos, asdoditas, asquelonitas, guititas ga̱jma̱a̱ ecronitas, ma̱ngaa náa mbañúúnʼ xa̱bu̱ avim,
4 náa sur náa xúgíʼ mbañúúnʼ cananeos, Meará, náa kaʼñún xa̱bu̱ sidonios asndu náa Afec, asndu náa ndawaa gajmiún xa̱bu̱ amorreos,
5 mbañúúnʼ xa̱bu̱ guebalitas, ga̱jma̱a̱ náa xúgíʼ Líbano, rí naguanúu xígií náa nagájnuu a̱jkha̱ʼ. Asndu náa Baal-Gad, rí naguanúu xígií náa agoo kúbá Hermón, asndu náa Lebó-Hamat.*
6 Xúgíinʼ xa̱bu̱ bi̱ kúwá náa kúbá, rí nagi̱ʼdu̱u̱ náa Líbano asndu náa Misrefot-Maim, ga̱jma̱a̱ xúgíinʼ xa̱bu̱ sidonios, ikhúún maxkawíin náa inún israelitas, ikháán i̱ndó ndayóoʼ matruiʼta̱a̱* mbaaʼ rí makánún israelitas, xó má ikhúún nitañájuaanʼ,
7 rí xúgi̱ gíʼmaa matrui̱ʼta̱a̱ mbaaʼ rí makánún bi̱ mbá mijna gu̱wa̱ʼ xuajin majkhaʼ,* ga̱jma̱a̱ mbá ta̱pha̱ xuajin chíʼgíiʼ* ndrígóo Manasés”.
8 Xúʼko̱ má i̱mbá ta̱pha̱ xuajin majkhaʼ ndrígu̱ún rubenitas, gaditas, nindrigúu ku̱ba̱ʼ rí Moisés nixnúún xígií náa nagájnuu a̱jkha̱ʼ, náa mañu Jordán, xó má Moisés xa̱bi̱i̱ Jeobá nixnúún,
9 nagi̱ʼdu̱u̱ náa Aroer, rí naguanúu náa rawuunʼ mata* ku̱ba̱ʼ Arnón, ga̱jma̱a̱ náa xuajin rí gíwánʼ náa ta̱pho̱o̱ mata ma̱ngaa náa xúgíʼ kaʼmúuʼ Medebá asndu náa Dibón,
10 náa mbá xúgíʼ xuajin rí niʼtáñajuunʼ Sehón rey ndrígu̱ún amorreos, niʼtáñajunʼ náa Hesbón, asndu náa ndawaa gajmiún ammonitas,
11 ma̱ngaa náa Galaad ga̱jma̱a̱ náa mbañúúnʼ xa̱bu̱ guesuritas, ma̱ngaa náa maacatitas, náa xúgíʼ kúbá Hermón ga̱jma̱a̱ náa Basán asndu náa Salecá,
12 náa xúgíʼ xuajin rí niʼtáñajunʼ rey Og, bi̱ nixtáa náa Basán, bi̱ niʼtáñajunʼ náa Astarot ga̱jma̱a̱ náa Edréi. (Ikhaa ninindxu̱u̱ iwáá refaím). Moisés niʼni gámbíin ga̱jma̱a̱ nixkawíin ikhí.
13 Mú israelitas na̱nguá nixkawíin guesuritas ni má maacatitas, numuu rí xa̱bu̱ Guesur ga̱jma̱a̱ Maacat kúwá náa majñu̱únʼ israelitas asndu rí mbiʼi xúgi̱.
14 I̱ndó xuajin chíʼgíiʼ ndrígóo Leví rí Moisés na̱nguá nixnáa mbaaʼ, numuu rí ikhiin mundrigúu tsigijñaʼ rí muxnajxi̱ xa̱bu̱ rí mikarámáʼ náa inuu Jeobá Dios ndrígóo Israel xó má ikhaa nikudaminaʼ.
15 Ikhú Moisés nixnúu ku̱ba̱ʼ xuajin chíʼgíiʼ ndrígóo Rubén, xó má nguáthiin kúwá,
16 mbañúúnʼ nagi̱ʼdu̱u̱ asndu náa Aroer dí gíʼ náa rawuunʼ mata Arnón, ga̱jma̱a̱ náa xuajin rí gíwánʼ náa ta̱pho̱o̱ mata ga̱jma̱a̱ náa xúgíʼ kaʼmúuʼ Medebá,
17 Hesbón ga̱jma̱a̱ xúgíʼ xuajin dí trámáʼ náa mbá kaʼmúuʼ Dibón, Bamot-Baal, Bet-Baal-Meón,
18 Jáhaz, Quedemot, Mefaat,
19 Quiryataim, Sibmá, Zéret-Sáhar, náa kúbá rí nagi̱ʼdu̱u̱ náa mata,
20 Bet-Peor, náa juímuu Pisgá, Bet-Jesimot,
21 xúgíʼ xuajin rí trámáʼ náa kaʼmúuʼ, ga̱jma̱a̱ náa xúgíʼ xuajin rí niʼtáñajunʼ Sehón, rey ndrígu̱ún amorreos, bi̱ niʼtáñajunʼ náa Hesbón. Moisés nixíya̱a̱ ikhaa ga̱jma̱a̱ bi̱ nutañajúúnʼ madianitas, xóo Eví, Réquem, Zur, Hur ga̱jma̱a̱ Reba, bi̱ numbayíí Sehón bi̱ kúwíin náa ku̱ba̱ʼ rúʼko̱.
22 Baalam a̱ʼdióo Beor bi̱ ndaʼyoo dí marigá nda̱wa̱á, ikhaa ma̱ngaa nixtáa náa bi̱ israelitas niradíin ga̱jma̱a̱ espada.
23 Ndawaa ndrígu̱ún rubenitas ninindxu̱u̱ náa mañu Jordán, mbaaʼ rúʼko̱ xó má xuajin mba̱ʼu̱ ga̱jma̱a̱ xuajin majkhaʼ dí rígá ikhí ninindxu̱u̱ rí nindrigúu rubenitas, xó má nguáthiin kúwá.
24 Ma̱ngaa Moisés nixnúu ku̱ba̱ʼ xuajin chíʼgíiʼ ndrígóo Gat, gaditas, xó má nguáthiin kúwá.
25 Mbaaʼ rí nindrigúu ma̱ngaa nindxu̱u̱ Jazer, mbá xúgíʼ xuajin dí rígá náa Galaad ga̱jma̱a̱ mbá ta̱pha̱ ku̱bu̱únʼ ammonitas, asndu náa Aroer dí gíʼ náa ridoo Rabá,
26 nagi̱ʼdu̱u̱ náa Hesbón, asndu náa Ramat-Mizpé ga̱jma̱a̱ Betonim, ma̱ngaa nagi̱ʼdu̱u̱ náa Mahanaim asndu náa ndawaa ku̱ba̱ʼ Debir,
27 ga̱jma̱a̱ náa mata Bet-Haram, Bet-Nimrá, Sucot ga̱jma̱a̱ Zafón ga̱jma̱a̱ i̱ʼwáʼ xuajin náa niʼtáñajunʼ Sehón, rey bi̱ nixtáa náa Hesbón. Ndawaa ninindxu̱u̱ Jordán, nagi̱ʼdu̱u̱ náa sur, xígií náa lamáa Kinéret* asndu náa mañu Jordán xígií náa nagájnuu a̱jkha̱ʼ.
28 Rúʼko̱ ninindxu̱u̱ ku̱ba̱ʼ rí nindrigúu gaditas, xó má nguáthiin kúwá, xuajin mba̱ʼu̱ ga̱jma̱a̱ xuajin majkhaʼ dí rígá ikhí.
29 Moisés nixnúu ku̱ba̱ʼ mbá ta̱pha̱ xuajin chíʼgíiʼ ndrígóo Manasés, xó má nguáthiin kúwá.
30 Mbañúúnʼ nagi̱ʼdu̱u̱ náa Mahanaim na̱jkha̱nú asndu náa xúgíʼ Basán. Náa xúgíʼ xuajin majkhaʼ rí niʼtáñajunʼ rey Og bi̱ nixtáa náa Basán, ga̱jma̱a̱ náa xúgíʼ xuajin dí rígá* náa Jaír, náa Basán, rí mbá xúgíʼ ninindxu̱u̱ mbá 60 xuajin.
31 Mbá ta̱pha̱ mbaaʼ Galaad, xó má Astarot ga̱jma̱a̱ Edréi, náa xuajin rí niʼtáñajunʼ rey Og bi̱ nixtáa náa Basán, nindrigúu e̱ji̱i̱n Makir, bi̱ nindxu̱u̱ a̱ʼdióo Manasés, mu muda̱a̱ mbá taphi̱i̱n e̱ji̱i̱n Makir, xó má nguáthiin kúwá.
32 Rígi̱ ninindxu̱u̱ ku̱ba̱ʼ rí Moisés nixnúún náa mata Moab, náa i̱mba̱ ridoo Jordán, náa Jericó, xígií náa nagájnuu a̱jkha̱ʼ.
33 Mú Moisés na̱nguá nixnáa mbaaʼ xuajin chíʼgíiʼ ndrígóo Leví numuu rí ikhiin muni̱ ñajunʼ rí itháan gíʼdoo numuu náa inuu Jeobá Dios ndrígóo Israel, xó má ikhaa niʼthí.
Mbaʼa nota
^ O “asndu náa Sihor”.
^ O “este”.
^ O “índo̱ nadxu̱ʼ mata̱ʼa̱a̱ʼ náa Hamat”.
^ O “mataxpiʼtáa”.
^ O “tribu”.
^ O “lajuíin”.
^ O “bóo”.
^ Xóo muʼthá, iyaʼ mba̱a̱ dí rígá náa Genesaret o mar ndrígóo Galilea.
^ O “náa nikúwá xa̱bu̱ ga̱jma̱a̱ guʼwá xtíin”.
