Josué 14:1-15
14 Rígi̱ nindxu̱u̱ ku̱ba̱ʼ dí israelitas nindrigúu náa Canaán, dí nixnúún ndxajkun Eleazar, Josué a̱ʼdióo Nun ga̱jma̱a̱ bi̱ kuya̱ edxu̱u̱ náa guʼwún anu̱ún náa xuajin majkhaʼ* dí rígá náa Israel.
2 Niri̱ya̱ʼ suerte* mu mbuyáá xóo makánún mbaaʼ, xó má Jeobá nikuʼmaa maʼni Moisés gajmíi̱n mbá mijna gu̱wa̱ʼ xuajin majkhaʼ ga̱jma̱a̱ i̱mbá ta̱pha̱.
3 Moisés nixnúún mbaaʼ náa makuwá i̱mbá gi̱jma̱ tikhu xuajin majkhaʼ náa i̱mba̱ ridoo* mañu Jordán, mú bi̱ levitas na̱nguá nindrigúu nimbá mbaaʼ náa majñu̱únʼ ikhiin.
4 Bi̱ a̱jmi̱i̱n e̱ji̱i̱n José nigixnuun xóo a̱jma̱ xuajin majkhaʼ: Manasés ga̱jma̱a̱ Efraín, bi̱ levitas na̱nguá nindrigúu nimbá mbaaʼ, i̱ndó xuajin náa makuwá ga̱jma̱a̱ náa muphiʼtsu xediu̱ún ga̱jma̱a̱ eʼwíinʼ xujkiún.
5 Xúʼko̱ kaʼnii israelitas niruiʼta̱a̱* ku̱ba̱ʼ xó má Jeobá niʼthúu̱n Moisés.
6 Ikhú Caleb a̱ʼdióo Jefuné bi̱ nindxu̱u̱ quenizita ni̱jkha̱ gajmíi̱n xa̱bu̱ Judá nigún gúyáá Josué náa Guilgal, ga̱jma̱a̱ niʼthúu̱n: “Ikháán má natayáá dí Jeobá niʼthúu̱n Moisés, xa̱bi̱i̱ Dios bi̱ gajkhun, ga̱jma̱a̱ numaaʼ ikháán xó má ga̱jma̱a̱ numuʼ ikhúún náa Cadés-Barnea.
7 Ikhúún gúʼdoo 40 tsiguʼ índo̱ Moisés, xa̱bi̱i̱ Jeobá nikuʼmún maʼgá gáyama náa ku̱ba̱ʼ índo̱ kuwáánʼlú náa Cadés-Barnea, ga̱jma̱a̱ índo̱ nitangu̱ún nitha̱ mbájmbu ga̱jma̱a̱ táni nduwaʼ.*
8 Maski ajndu a̱ngui̱nʼ bi̱ nitsimuʼ gajmíʼ nini̱ dí mamiñún* xa̱bu̱ xuajin, mú ikhúún nini̱mbo̱ʼ ka̱yo̱o̱ Jeobá Dios ndrígóʼ ga̱jma̱a̱ xúgíʼ a̱jkiu̱nʼ.
9 Mbiʼi rúʼko̱ Moisés niʼthúnʼ: ‹Náa ku̱ba̱ʼ dí ikháán nidxu̱ʼ rajnguaʼáanʼ mani̱ndxu̱u̱ ku̱ba̱a̱ʼ asndu kámuu ga̱jma̱a̱ mudrigúu e̱jña̱a̱ʼ, numuu dí nitatsimba̱a̱ʼ xtayáá Jeobá Dios ndrígóʼ ga̱jma̱a̱ xúgíʼ a̱jkia̱a̱nʼ›.
10 Jeobá niʼnimbánuu ajngóo, numuu dí niniñuʼ maxtáá i̱mbá 45 tsiguʼ asndu mbiʼi dí Jeobá nikudaminaʼ rígi̱ náa Moisés índo̱ israelitas jnguʼwún náa ku̱ba̱ʼ mijxooʼ,* ga̱jma̱a̱ kaʼníí xóó xtáá dí gúʼdoo má 85 tsiguʼ.
11 Kaʼníí gúʼdoo tsiaki̱i̱ xó má nákha mbiʼi dí Moisés nikuʼmún maʼgá. Gúʼdoo tsiaki̱i̱ xó má nákha ikhú mu maxmína̱ʼ ga̱jma̱a̱ ma̱ni̱ i̱ʼwáʼ.
12 Ikha jngóo araxnúʼ kúbá rígi̱ náa dí Jeobá nikudaminaʼ maxnúʼ mbiʼi rúʼko̱. Maski ajndu mbiʼi rúʼko̱ nitadxawíín dí ikhí kúwá anaquim náa xuajin mba̱ʼu̱ dí kúgumaʼá, nda̱yo̱o̱ gajkhun dí Jeobá maxtáa ga̱jma̱á nindxu̱ʼ, ikhúún maxkawíin xúgíinʼ xa̱bu̱ bi̱ kúwá ikhí xó má Jeobá nikudaminaʼ”.
13 Ikha jngóo Josué niʼni tsajkurámaaʼ Caleb a̱ʼdióo Jefuné ga̱jma̱a̱ nixnúu ku̱ba̱ʼ Hebrón.
14 Ikha jngóo Hebrón nindxu̱u̱ mbayuuʼ Caleb a̱ʼdióo Jefuné xa̱bu̱ quenizita asndu dí mbiʼi xúgi̱, numuu dí ikhaa niʼnimbo̱o̱ kaʼyoo Jeobá Dios ndrígóo Israel ga̱jma̱a̱ xúgíʼ a̱jkiu̱u̱n.
15 Nákha ginii xuajin Hebrón mbiʼyuu Quiryat-Arbá (Arbá ninindxu̱u̱ mbáa xa̱bu̱ bi̱ nigiʼdoo wéñuuʼ numuu náa anaquim). Ikhú niniña̱a̱nʼ ruxmijná.
Mbaʼa nota
^ O “tribu”.
^ Xóo muʼthá, xígií náa nagájnuu a̱jkha̱ʼ.
^ O “nixpiʼta̱a̱”.
^ Náa ajngáa hebreo naʼthí, “mbá ajngáa dí nindxu̱u̱ xóo a̱jkiu̱nʼ”.
^ Náa ajngáa hebreo naʼthí, “nini̱ dí xa̱bu̱ xuajin ní xáʼni gakhi̱i̱ a̱jkiu̱ún”.
^ O “desierto”.
