Josué 16:1-10
16 Ku̱ba̱ʼ dí nindrigúu e̱ji̱i̱n José xó má nigájnuu náa suerte,* nagi̱ʼdu̱u̱ náa mañu Jordán, náa Jericó, na̱jkha̱nú asndu náa iyaʼ Jericó dí naguanúu xígií náa nagájnuu a̱jkha̱ʼ,* nanújngoo náa ku̱ba̱ʼ mijxooʼ* natsimuu náa Jericó náa kúbá Betel.
2 Na̱jkha̱nú asndu náa Betel, náa kaʼyoo xuajin Luz, na̱jkha̱nú náa ndawaa ndrígu̱ún arkitas náa Atarot,
3 nda̱wa̱á nagajta̱a̱ xígií náa narámaaʼ a̱jkha̱ʼ,* náa ndawaa ndrígu̱ún jafletitas asndu náa ndawaa Bet-Horón Baja ga̱jma̱a̱ Guézer, naguámbá asndu náa lamáa.
4 Xúʼko̱ kaʼnii e̱ji̱i̱n José, Manasés ga̱jma̱a̱ Efraín nindrigúu ku̱ba̱ʼ dí kaʼñún.
5 Rígi̱ nindxu̱u̱ ndawaa náa nartumuu mbaaʼ dí nida̱a̱ bi̱ naguwáʼ náa Efraín xó má nguáthi̱i̱n kúwíin: Xígií náa nagájnuu a̱jkha̱ʼ, ndawaa nartumuu náa Atarot-Addar asndu náa Bet-Horón Alta,
6 ndawaa nartumuu asndu náa lamáa. Micmetat naguanúu náa norte, ndawaa naguta̱nga̱a̱ xígií náa nagájnuu a̱jkha̱ʼ náa Taanat-Siló, nanújngoo xígií náa nagájnuu a̱jkha̱ʼ náa Janóah.
7 Nagi̱ʼdu̱u̱ náa Janóah nanújngoo Atarot narkawoo náa Naará, na̱jkha̱nú asndu Jericó, nartumuu asndu náa mañu Jordán.
8 Nagi̱ʼdu̱u̱ náa Tapúah, ndawaa na̱jkha̱ má xúʼko̱ asndu náa narámaaʼ a̱jkha̱ʼ náa mata* Caná naguámbá asndu náa lamáa. Rígi̱ nindxu̱u̱ mbaaʼ dí nigruigúu xuajin chíʼgíiʼ* ndrígóo Efraín xó má nguáthi̱i̱n kúwíin,
9 náa awúu̱n xuajin dí nigruigúu xuajin chíʼgíiʼ* ndrígóo Manasés, ikhí tuáʼán xuajin mba̱ʼu̱ ga̱jma̱a̱ xuajin majkhaʼ dí nigruigúu xuajin chíʼgíiʼ ndrígóo Efraín.
10 Mú túxkawíin xa̱bu̱ cananeos bi̱ kúwá náa Guézer, ikha jngóo cananeos kúwá gajmiún Efraín asndu dí mbiʼi xúgi̱, ikhiin nixtumiin dí muñejunʼ gakhi̱i̱.
