Josué 17:1-18
17 Índo̱ nigájnuu suerte* nikhánáá mbá chíʼgíiʼ ku̱ba̱ʼ xuajin chíʼgíiʼ* ndrígóo Manasés, bi̱ ninindxu̱u̱ a̱ʼdióo giʼnii José. Numuu dí Makir, a̱ʼdióo giʼnii Manasés anu̱u̱* Galaad, ninindxu̱u̱ mbáa xa̱bu̱ bi̱ najmañuu naxmínaʼ. Ikha jngóo nikhánáá mbaaʼ Galaad ga̱jma̱a̱ Basán.
2 Ga̱jma̱a̱ eʼwíinʼ bi̱ niguanún xóó, bi̱ naguwáʼ náa Manasés nikhánún ku̱ba̱ʼ, xó má nguáthi̱i̱n. E̱ji̱i̱n Abí-Ézer, e̱ji̱i̱n Hélec, e̱ji̱i̱n Asriel, e̱ji̱i̱n Siquem, e̱ji̱i̱n Héfer ga̱jma̱a̱ e̱ji̱i̱n Semidá. Bugi̱ ninindxu̱ún bi̱ naguwáʼ náa Manasés a̱ʼdióo José, xa̱bekha bi̱ nikúwá náa mámbá guʼwíin.
3 Mú Zelofehad a̱ʼdióo Héfer, a̱ʼdióo Galaad, a̱ʼdióo Makir, a̱ʼdióo Manasés na̱nguá nigiʼdiin jiámá, i̱ndó wa̱ʼxa̱ʼ.* Xígi̱ mbiʼñún waʼxiinʼ: Mahlá, Noá, Hoglá, Milcá ga̱jma̱a̱ Tirzá.
4 Wa̱ʼxa̱ʼ nigún gúyáá ndxajkun Eleazar, Josué a̱ʼdióo Nun ga̱jma̱a̱ bi̱ kuya̱ edxu̱u̱ náa xuajin, ga̱jma̱a̱ nithúún: “Jeobá niʼthúu̱n Moisés rí maxnúxu̱ mbaaʼ náa majñu̱únʼ a̱ngiu̱xu̱”. Ikha jngóo xó má Jeobá niʼthí nikhánún mbaaʼ dí nindrigúu a̱ngui̱i̱n anu̱ún.
5 Manasés nikhánáá i̱mbá gu̱wa̱ʼ ku̱ba̱ʼ, raʼkháa i̱ndó Galaad ga̱jma̱a̱ Basán dí rígá náa i̱mba̱ ridoo* Jordán,
6 waʼxiinʼ Manasés nida̱a̱ ku̱ba̱ʼ gajmiún a̱ngiu̱ún jiámá. Ga̱jma̱a̱ ku̱ba̱ʼ Galaad ni̱jkha̱nú ninindxu̱u̱ mbañúúnʼ bi̱ naguwáʼ náa Manasés.
7 Ga̱jma̱a̱ ndawaa ndrígóo Manasés nagi̱ʼdu̱u̱ náa Aser na̱jkha̱ asndu náa Micmetat, xígií náa Siquem. Ga̱jma̱a̱ ndawaa na̱jkha̱ xígií náa sur* náa ku̱ba̱ʼ rí kúwá xa̱bu̱ En-Tapúah.
8 Ku̱ba̱ʼ dí rígá náa Tapúah ni̱jkha̱nú niʼni mbayuuʼ Manasés, mú xuajin dí rígá náa Tapúah náa ndawaa ndrígóo Manasés nikánáán bi̱ naguwáʼ náa Efraín.
9 Ga̱jma̱a̱ ndawaa nagajtaa náa mata* Caná, xígií náa sur náa mata. Nirígá xuajin ndrígóo Efraín náa majñu̱u̱ʼ xuajin ndrígóo Manasés, ga̱jma̱a̱ ndawaa ndrígóo Manasés kri̱ga̱ xígií náa norte, náa mata ga̱jma̱a̱ nartumuu náa lamáa.
10 Mbaaʼ dí naguanúu xígií náa sur nigruigúu Efraín ga̱jma̱a̱ dí naguanúu xígií náa norte nigruigúu Manasés ga̱jma̱a̱ lamáa niʼni ndawaa. Xígií náa norte mbaaʼ ndrígóo Manasés nartumuu* asndu náa Aser, ga̱jma̱a̱ xígií náa nagájnuu a̱jkha̱ʼ* asndu náa Isacar.
11 Náa mbayuuʼ Isacar ga̱jma̱a̱ Aser, Manasés nikhánáá Bet-Seán ga̱jma̱a̱ xuajin dí rígá mijngii. Ibleam ga̱jma̱a̱ xuajin dí rígá mijngii, xa̱bu̱ bi̱ nikúwá náa Dor ga̱jma̱a̱ xuajin dí rígá mijngii, xa̱bu̱ bi̱ nikúwá náa En-Dor ga̱jma̱a̱ xuajin dí rígá mijngii, xa̱bu̱ bi̱ nikúwá náa Taanac ga̱jma̱a̱ xuajin dí rígá mijngii, xa̱bu̱ bi̱ nikúwá náa Meguidó ga̱jma̱a̱ xuajin dí rígá mijngii, ajtsú mbaaʼ dí trámáʼ náa kúbá tsídánʼ.
12 Mú bi̱ naguwáʼ náa Manasés táʼngu̱u̱n gúndrigúu xuajin rúʼko̱. Ikha jngóo cananeos kúwá má xúʼko̱ náa ku̱ba̱ʼ rúʼko̱.
13 Índo̱ israelitas niguáʼdáá tsiaki̱i̱, nixtumiin cananeos dí muñajunʼ gakhi̱i̱, mú túxkawíin mbá kayuuʼ.
14 Bi̱ naguwáʼ náa José nitháán Josué: “Náá numuu rí káaʼ mbá ta̱pha̱ mbaaʼ dí nigájnuu náa suerte niraxnúxu̱ʼ, ga̱jma̱a̱ káaʼ mbá chíʼgíiʼ ku̱ba̱ʼ náa niraxnúxu̱ʼ makuwáanʼ rá. Ikháanʼ nindxu̱xu̱ mbá xuajin mba̱a̱, numuu dí Jeobá naʼni tsakurámáaʼxu̱ má xúʼko̱”.
15 Josué niʼthún: “Á mu nindxa̱la mbá xuajin mba̱a̱, gatsimala náa xaxi̱ ga̱jma̱a̱ gu̱ni̱ gáʼchíí mbaaʼ mu makuwáanʼla náa ku̱ba̱ʼ dí kúwá perizitas ga̱jma̱a̱ refaím, numuu dí náa kúbá Efraín na̱nguá mba̱a̱ makuwáanʼla”.
16 Ikhú bi̱ naguwáʼ náa José nitháán: “Xáʼngo̱o̱ má i̱ndó náa kúbá makuwáanʼxu̱. Numuu dí xúgíinʼ cananeos bi̱ kúwá náa mata guáʼdáá carro dí nuxmijná ga̱jma̱a̱ dí juáʼwíi ajua̱nʼ xíníʼ,* xúʼko̱ má bi̱ kúwá náa Bet-Seán ga̱jma̱a̱ xuajin dí rígá mijngii xóo náa mata Jezreel”.
17 Ikha jngóo Josué niʼthún bi̱ naguwáʼ náa goʼwóo José, Efraín ga̱jma̱a̱ Manasés: “Numuu dí nindxa̱la mbá xuajin mba̱a̱ ga̱jma̱a̱ kuaʼdáála tsiaki̱i̱. Xákánala káaʼ chíʼgíiʼ ku̱ba̱ʼ,
18 ma̱ngaa kúbá maʼni mbayala. Maski ajndu xaxi̱ mú ikháanʼla mu̱ni̱ gáʼchííla, ga̱jma̱a̱ ikhí gártumuu mbayala. Muxkawíin cananeos maski ajndu ikhiin guáʼdáá tsiaki̱i̱ ga̱jma̱a̱ guáʼdáá carro dí nuxmijná ga̱jma̱a̱ dí juáʼwíi ajua̱nʼ xíníʼ”.*
Mbaʼa nota
^ O “tribu”.
^ O “tátée”.
^ O “i̱jín go̱ʼo̱”.
^ Xóo muʼthá, xígií náa nagájnuu a̱jkha̱ʼ.
^ Náa ajngáa hebreo naʼthí, “náa ñawún májáanʼ”.
^ O “bóo”.
^ Náa ajngáa hebreo naʼthí, “ikhiin nartumún”.
^ O “este”.
^ Náa ajngáa hebreo naʼthí, “carros dí hierros”.
^ Náa ajngáa hebreo naʼthí, “carros dí hierros”.
