Josué 18:1-28
18 Mbá xúgíinʼ xa̱bu̱ xuajin Israel nigimbíin náa Siló, ga̱jma̱a̱ nigíʼ ikhí guʼwá xtíin, numuu dí ku̱ba̱ʼ rúʼko̱ nindxu̱u̱ ku̱bu̱únʼ má ikhiin.
2 Mú náa majñu̱únʼ israelitas rígá mbá juwan xuajin majkhaʼ* dí xóó ndayóoʼ mudrigúu ku̱ba̱ʼ.
3 Josué niʼthún israelitas: “Nguáná gúʼgua gákuwáanʼla náa ku̱ba̱ʼ dí Jeobá Dios ndrígu̱ún wajin xiʼñála nixnála rá.
4 Guʼñíinʼla mbá ajtsíin xa̱bekha náa mámbá xuajin majkhaʼ. Mu makuʼmiin magún náa ku̱ba̱ʼ, mundriga̱ ndawaa náa dí kaʼyoo magruigúu mámbá xuajin chíʼgíiʼ.* Nda̱wa̱á matangi̱ín gúyoʼ.
5 Gíʼmaa dí murui̱ʼta̱a̱* ku̱ba̱ʼ mbá juwan xuíʼtóo. Judá maguanúu ga̱jma̱a̱ ku̱ba̱ʼ dí rígá náa sur, bi̱ kúwá náa goʼwóo José maguanún ga̱jma̱a̱ ku̱ba̱ʼ dí rígá náa norte.
6 Ikháanʼla gíʼmaa murui̱ʼta̱a̱ mbá juwan xuíʼtóo ku̱ba̱ʼ. Nda̱wa̱á maguwa̱a̱ʼ ku̱ya̱la náa niniraʼmáʼ, ga̱jma̱a̱ ikhúún maríya̱ʼ suerte* ndrígala náa inuu Jeobá Dios ndrígulú.
7 Mú levitas xúndrigúu nimbá ku̱ba̱ʼ náa ikháanʼla, dí mundrígúu ikhiin nindxu̱u̱ dí muni̱ ñajuunʼ Jeobá xóo ndxajkun. Gad, Rubén ga̱jma̱a̱ mbá ta̱pha̱ xuajin chíʼgíiʼ ndrígóo Manasés nindrigúu má ku̱ba̱ʼ náa Jordán xígií náa nagájnuu a̱jkha̱ʼ,* dí nixnúún Moisés xa̱bi̱i̱ Jeobá”.
8 Xa̱bekha nini̱ ratamíjná mu magún gúndriga ndawaa náa ku̱ba̱ʼ, ga̱jma̱a̱ Josué niʼthún: “Aʼguala náa xúgíʼ ku̱ba̱ʼ, gundriga̱ ndawaa ikhí, nda̱wa̱á gutangáanʼla gúyoʼ, ga̱jma̱a̱ ikhúún maríya̱ʼ suerte ndrígala náa inuu Jeobá gi̱i̱ náa Siló”.
9 Ikhú xa̱bekha nigún náa xúgíʼ ku̱ba̱ʼ, nindriga̱ ndawaa náa nigún rurui̱ʼta̱a̱ mbá juwan xuíʼtóo ku̱ba̱ʼ xó má nguáthá xuajin rígá, niniraʼmáʼ xúgíʼ rígi̱ náa mbá i̱yi̱i̱ʼ. Nda̱wa̱á nitangiín gúyáá Josué náa Siló.
10 Ikhú Josué niríya̱ʼ suerte ndrígu̱ún náa Siló náa inuu Jeobá. Josué niruiʼta̱a̱ ku̱ba̱ʼ mu muda̱a̱ israelitas xó má kaʼñún mudrigúu.
11 Ku̱ba̱ʼ dí nigájnuu náa suerte, ikhaa rúʼko̱ nigruigúu xuajin chíʼgíiʼ ndrígóo Benjamín xó má nguáthi̱i̱n kúwíin, ku̱ba̱ʼ dí ikhiin kaʼñún mudrigúu rígá náa ta̱pho̱o̱ mbañúúnʼ bi̱ naguwáʼ náa Judá ga̱jma̱a̱ bi̱ naguwáʼ náa José.
12 Náa norte, ndawaa nagi̱ʼdu̱u̱ náa mañu Jordán, natsimuu náa juímuu Jericó náa norte. Na̱jkha̱ má xúʼko̱ asndu náa kúbá náa narámaaʼ a̱jkha̱ʼ,* nartumuu asndu náa ku̱ba̱ʼ mijxooʼ* náa Bet-Aven.
13 Ndawaa na̱jkha̱ asndu náa xuajin Luz, náa sur náa juímuu xuajin Luz, xóo muʼthá náa Betel, ndawaa nagajtaa náa Atarot-Addar na̱jkha̱ náa kúbá sur náa Bet-Horón Baja.
14 Ga̱jma̱a̱ ndawaa nanújngoo xígií náa narámaaʼ a̱jkha̱ʼ, natanga̱a̱ xígií náa sur asndu náa kúbá dí na̱jkha̱ náa Bet-Horón náa sur, naguámbá náa Quiryat-Baal, xóo muʼthá Quiryat-Jearim, mbá xuajin dí rígá náa Judá. Ndawaa rígi̱ naguanúu xígií náa narámaaʼ a̱jkha̱ʼ.
15 Xígií náa sur nagi̱ʼdu̱u̱ náa rawuunʼ Quiryat-Jearim, ndawaa na̱jkha̱ xígií náa narámaaʼ a̱jkha̱ʼ, na̱jkha̱ má xúʼko̱ asndu náa iduu iyaʼ Neftóah.
16 Ndawaa nagajtaa náa agoo kúbá dí gíʼ náa ridoo mata* Hinón, dí naguanúu náa norte náa mata Refaím, nagajta̱a̱ náa mata Hinón, náa sur náa juímuu kúwá jebuseos, narkawoo náa En-Roguel.
17 Ndawaa na̱jkha̱ xígií náa norte nartumuu náa En-Semes, nda̱wa̱á na̱jkha̱ asndu náa Guelilot, dí naguanúu náa ridoo natsimuu Adumim, ga̱jma̱a̱ nagajta̱a̱ náa itsí dí nigíʼ Bohán a̱ʼdióo Rubén.
18 Ndawaa na̱jkha̱ náa juímuu norte náa ridoo Arabá ga̱jma̱a̱ nagajta̱a̱ náa Arabá.
19 Ndawaa na̱jkha̱ má xúʼko̱ náa juímuu norte náa Bet-Hoglá, naguámbá náa lamáa Miríná* xígií náa norte, nartumuu náa Jordán xígií náa sur. Rígi̱ nindxu̱u̱ ndawaa dí naguanúu náa sur.
20 Mañu Jordán nindxu̱u̱ ndawaa dí naguanúu xígií náa nagájnuu a̱jkha̱ʼ. Rúʼko̱ nindxu̱u̱ ku̱ba̱ʼ dí nindrigúu bi̱ naguwáʼ náa Benjamín xó má nguáthi̱i̱n kúwíin, rígi̱ nindxu̱u̱ ndawaa náa mbájndi mbañúúnʼ.
21 Xuajin dí nigruigúu xuajin chíʼgíiʼ ndrígóo Benjamín xó má nguáthi̱i̱n kúwíin nindxu̱u̱: Jericó, Bet-Hoglá, Émec-Queziz,
22 Bet-Arabá, Zemaraim, Betel,
23 Avim, Pará, Ofrá,
24 Kefar-Amoní, Ofní ga̱jma̱a̱ Gueba: Mbá 12 xuajin mba̱ʼu̱ ga̱jma̱a̱ xuajin majkhaʼ.
25 Gabaón, Ramá, Beerot,
26 Mizpé, Kefirá, Mozá,
27 Réquem, Irpeel, Taralá,
28 Zelá, Ha-Élef, Jebusí, xóo muʼthá Jerusalén, Guibeá ga̱jma̱a̱ Quiryat: Mbá 14 xuajin mba̱ʼu̱ ga̱jma̱a̱ xuajin majkhaʼ.
Rígi̱ nindxu̱u̱ ku̱ba̱ʼ dí nindrigúu bi̱ naguwáʼ náa Benjamín xó má nguáthi̱i̱n kúwíin.
Mbaʼa nota
^ O “tribu”.
^ O “lajuíin”.
^ O “muxpíʼtháa”.
^ O “este”.
^ O “oeste”.
^ O “desierto”.
^ O “bóo”.
^ O “mar Salado”. Xóo muʼthá, mar Muerto.
