Josué 19:1-51
19 Índo̱ niri̱ya̱ʼ dí maʼni a̱jma̱ nuthu suerte,* nigájnuu dí makánún bi̱ kúwá náa xuajin chíʼgíiʼ* ndrígóo Simeón, xó má nguáthi̱i̱n kúwá. Ku̱ba̱ʼ rí nindrigúu rígá náa ta̱pho̱o̱ ku̱ba̱ʼ rí nigruigúu Judá.
2 Mbaaʼ dí nikánáa ninindxu̱u̱ Beer-Seba ga̱jma̱a̱ Seba, Moladá,
3 Hazar-Sual, Balá, Ézem,
4 Eltolad, Betul, Hormá,
5 Ziclag, Bet-Marcabot, Hazar-Susá,
6 Bet-Lebaot ga̱jma̱a̱ Saruhén: Mbá 13 xuajin mba̱ʼu̱ ga̱jma̱a̱ xuajin majkhaʼ.
7 Ain, Rimón, Éter ga̱jma̱a̱ Asán: A̱jkhu̱ xuajin mba̱ʼu̱ ga̱jma̱a̱ xuajin majkhaʼ.
8 Xúʼko̱ má xúgíʼ xuajin majkhaʼ dí rígá mijngii náa xuajin asndu náa Baalat-Beer, Ramá dí naguanúu náa sur. Rúʼko̱ ninindxu̱u̱ mbaaʼ dí nigruigúu xuajin chíʼgíiʼ* ndrígóo Simeón, xó má nguáthi̱i̱n kúwá.
9 Ku̱ba̱ʼ dí nindrigúu bi̱ naguwáʼ náa Simeón nigájnúu náa mbaaʼ dí nikhánáá Judá. Numuu rí ku̱ba̱ʼ dí nikhánáá Judá ra̱ʼkhá tháán mba̱a̱. Ikha jngóo bi̱ naguwáʼ náa Simeón nindrigúu ku̱ba̱ʼ rúʼko̱ náa mbañúúnʼ ikhiin.
10 Índo̱ niri̱ya̱ʼ dí maʼni ragajtsú suerte, nigájnuu dí makánún bi̱ naguwáʼ náa Zabulón, xó má nguáthi̱i̱n kúwá. Ga̱jma̱a̱ ndawaa mbañúúnʼ nartumuu asndu náa Sarid.
11 Ndawaa ndrígu̱ún natsimuu xígií náa narámaaʼ a̱jkha̱ʼ* náa Mareal ga̱jma̱a̱ nartumuu asndu náa Dabéset ga̱jma̱a̱ nda̱wa̱á náa ridoo mata* Jocneam.
12 Nagi̱ʼdu̱u̱ náa Sarid xígií náa nagájnuu a̱jkha̱ʼ,* nartumuu asndu náa ndawaa Kislot-Tabor, ikhí nagájnuu na̱jkha̱ náa Daberat ga̱jma̱a̱ nda̱wa̱á natsima̱a̱ xígií náa Jafía.
13 Ga̱jma̱a̱ ikhí nagájnuu na̱jkha̱ xígií náa nagájnuu a̱jkha̱ʼ, nartumuu asndu náa Gat-Héfer, na̱jkha̱ náa Et-Cazín, ga̱jma̱a̱ ikhí nagájnuu na̱jkha̱ náa Rimón, nartumuu asndu náa Neá.
14 Ndawaa naguta̱nga̱a̱ xígií náa norte, na̱jkha̱ náa Hanatón ga̱jma̱a̱ naguámbáa náa mata Iftá-El,
15 ma̱ngaa ikhí rígá xuajin Catat, Nahalal, Simrón, Idalá ga̱jma̱a̱ Belén: Mbá 12 xuajin mba̱ʼu̱ ga̱jma̱a̱ xuajin majkhaʼ.
16 Rúʼko̱ ninindxu̱u̱ mbaaʼ dí nindrigúu bi̱ naguwáʼ náa Zabulón, xó má nguáthi̱i̱n kúwá. Rúʼko̱ ninindxu̱u̱ xuajin mba̱ʼu̱ ga̱jma̱a̱ xuajin majkhaʼ.
17 Índo̱ niri̱ya̱ʼ dí maʼni raga̱jkhu̱ suerte, nigájnuu dí makhánáá Isacar, bi̱ naguwáʼ náa Isacar, xó má nguáthi̱i̱n kúwá.
18 Ga̱jma̱a̱ ndawaa ndrígu̱ún nartumuu asndu náa Jezreel, Kesulot, Sunem,
19 Hafaraim, Shion, Anaharat,
20 Rabit, Quisión, Ébez,
21 Rémet, En-Ganim, En-Hadá ga̱jma̱a̱ Bet-Pazez.
22 Ga̱jma̱a̱ ndawaa na̱jkha̱nú asndu náa Tabor ga̱jma̱a̱ náa Sahazuma ma̱ngaa náa Bet-Semes, ga̱jma̱a̱ naguámbáa asndu náa mañu Jordán: Mbá 16 xuajin mba̱ʼu̱ ga̱jma̱a̱ xuajin majkhaʼ.
23 Rúʼko̱ nindxu̱u̱ ku̱ba̱ʼ dí nigruigúu xuajin chíʼgíiʼ ndrígóo Isacar, xó má nguáthi̱i̱n kúwá. Xuajin mba̱ʼu̱ rúʼko̱ ga̱jma̱a̱ xuajin majkhaʼ.
24 Índo̱ niri̱ya̱ʼ dí maʼni witsu suerte, nigájnuu dí makánún bi̱ kúwá náa xuajin chíʼgíiʼ ndrígóo Aser, xó má nguáthi̱i̱n kúwá.
25 Ga̱jma̱a̱ ndawaa nindxu̱u̱ xuajin Helcat, Halí, Beten, Acsaf,
26 Alamélec, Amad ga̱jma̱a̱ Misal. Xígií náa narámaaʼ a̱jkha̱ʼ ndawaa nartumuu asndu náa Carmelo ga̱jma̱a̱ náa Sihor-Libnat,
27 ga̱jma̱a̱ natanga̱a̱ xígií náa nagájnuu a̱jkha̱ʼ náa Bet-Dagón ga̱jma̱a̱ nartumuu náa Zabulón, xígií náa norte náa mata Iftá-El, ga̱jma̱a̱ náa Bet-Émec ga̱jma̱a̱ náa Neiel, ga̱jma̱a̱ na̱jkha̱ xígií náa Cabul náa ñawún xti̱ʼ.
28 Náa Ebrón, Rehob, Hamón ga̱jma̱a̱ Caná asndu náa Sidón dí Mba̱a̱.
29 Ga̱jma̱a̱ ndawaa natanga̱a̱ náa Ramá, nartumuu asndu náa xuajin rí kúgumáʼan Tiro. Nda̱wa̱á natanga̱a̱ Hosá ga̱jma̱a̱ naguámbáa náa lamáa, náa mbaaʼ Aczib,
30 Umá, Afec ga̱jma̱a̱ Rehob: Mbá 22 xuajin mba̱ʼu̱ ga̱jma̱a̱ xuajin majkhaʼ.
31 Rúʼko̱ ninindxu̱u̱ mbaaʼ rí nikhánáá xuajin chíʼgíiʼ ndrígóo Aser, xó má nguáthi̱i̱n kúwá. Rúʼko̱ ninindxu̱u̱ xuajin mba̱ʼu̱ ga̱jma̱a̱ xuajin majkhaʼ.
32 Índo̱ niri̱ya̱ʼ dí maʼni majun suerte, nigájnuu dí makánún bi̱ naguwáʼ náa Neftalí, xó má nguáthi̱i̱n kúwá.
33 Ndawaa ndrígu̱ún nagi̱ʼdu̱u̱ náa Hélef, náa ixi̱ mba̱a̱ Zaananim, nanújngoo náa Adamí-Néqueb ga̱jma̱a̱ náa Jabneel na̱jkha̱nú asndu náa Lacum, ga̱jma̱a̱ naguámbáa asndu náa mañu Jordán.
34 Ndawaa natanga̱a̱ xígií náa narámaaʼ a̱jkha̱ʼ náa Aznot-Tabor ga̱jma̱a̱ ikhí na̱jkha̱ asndu náa Hucoc. Ga̱jma̱a̱ nartumuu náa Zabulón xígií náa sur, ma̱ngaa náa Aser náa xígií narámaaʼ a̱jkha̱ʼ ga̱jma̱a̱ náa Judá, náa mañu Jordán náa xígií nagájnuu a̱jkha̱ʼ.
35 Ga̱jma̱a̱ xuajin dí kúgumáʼan ninindxu̱u̱ Zidim, Zer, Hammat, Racat, Kinéret,
36 Adamá, Ramá, Hazor,
37 Quedes, Edréi, En-Hazor,
38 Yirón, Migdal-El, Horem, Bet-Anat ga̱jma̱a̱ Bet-Semes: Mbá 19 xuajin mba̱ʼu̱ ga̱jma̱a̱ xuajin majkhaʼ.
39 Rúʼko̱ ninindxu̱u̱ mbaaʼ rí nikhánáá xuajin chíʼgíiʼ ndrígóo Neftalí, xó má nguáthi̱i̱n kúwá. Xuajin mba̱ʼu̱ rúʼko̱ ga̱jma̱a̱ xuajin majkhaʼ.
40 Índo̱ niri̱ya̱ʼ dí maʼni juwan suerte, nigájnuu dí makánún bi̱ kúwá náa xuajin chíʼgíiʼ ndrígóo Dan, xó má nguáthi̱i̱n kúwá.
41 Ga̱jma̱a̱ ndawaa mbaaʼ rí nikhánáá ninindxu̱u̱ Zorá, Estaol, Ir-Semes,
42 Saalabín, Ayalón, Itlá,
43 Elón, Timná, Ecrón,
44 Eltequé, Guibetón, Baalat,
45 Jehúd, Bene-Berac, Gat-Rimón,
46 Me-Jarcón ga̱jma̱a̱ Racón, ndawaa kri̱ga̱ náa ridoo Jope.
47 Mú mbaaʼ dí nikhánáá Dan chíʼgíiʼ ga̱jma̱a̱ tséʼngo̱o̱ makuwá. Ikha jngóo nitsimún gúxmijná gajmiún Lésem, nitu̱ʼu̱u̱n ga̱jma̱a̱ nini̱ gámbíin xa̱bu̱ bi̱ kúwá ikhí ga̱jma̱a̱ espada. Ikhú niguanún ikhí mu makuwá, nda̱wa̱á niriʼkhu̱u̱ mbiʼyuu Lésem nixna mbiʼíí Dan, numuu dí xúʼko̱ mbiʼyuu wajin xiʼñúúnʼ.
48 Rúʼko̱ ninindxu̱u̱ mbaaʼ dí nigruigúu xuajin chíʼgíiʼ ndrígóo Dan, xó má nguáthi̱i̱n kúwá. Rúʼko̱ ninindxu̱u̱ xuajin mba̱ʼu̱ ga̱jma̱a̱ xuajin majkhaʼ.
49 Xígi̱ kaʼnii niguámbu̱u̱n niruiʼta̱a̱ ku̱ba̱ʼ rí muda̱a̱. Ikhú israelitas nixnáá mbayáa ku̱ba̱ʼ Josué a̱ʼdióo Nun náa ta̱pho̱o̱ ku̱ba̱ʼ dí nikhánún ikhiin.
50 Xó má niʼthí Jeobá, nixnáá xuajin dí ikhaa má ninda̱ʼa̱, Timnat-Sérah, náa kúbá Efraín, ikhaa niʼni̱i̱ xuajin ga̱jma̱a̱ ikhí má niguanúu maxtáa.
51 Rúʼko̱ nindxu̱u̱ ku̱ba̱ʼ dí ndxajkun Eleazar, Josué a̱ʼdióo Nun ga̱jma̱a̱ bi̱ kuya̱ edxu̱u̱ náa mámbá xuajin majkhaʼ dí rígá náa Israel niruiʼta̱a̱* índo̱ nirawíi suerte náa Siló náa inuu Jeobá, náa riejuun guʼwá xtíin dí nagimbíi̱n. Xúʼko̱ niguámbá niwiʼtáa ku̱ba̱ʼ.
