Josué 2:1-24
2 Índo̱ kúwá náa Sitim, ikhú Josué a̱ʼdióo Nun nikuʼmiin ngu̱ʼwa̱á a̱jmi̱i̱n xa̱bu̱ mu magún gúyama. Niʼthún: “Aʼguala, guyejxi̱i̱ májánʼ ku̱ba̱ʼ, mú itháan Jericó”. Ikhú ikhiin nigún, niguánú náa goʼwóo mbáa a̱ʼgu̱ bi̱ nagujuamínáʼ bi̱ mbiʼyuu Rahab, ikhí niguanún.
2 Niʼdxawun rígi̱ rey ndrígóo Jericó: “Mbruʼun rígi̱ tikhuun israelitas niguwáʼ gúyama náa ku̱ba̱ʼ dí kuwáánʼlú”.
3 Índo̱ rey niʼdxawun rígi̱ nikuʼmiin tikhuun xa̱bu̱ mu magún gútháán Rahab: “Atrawíin xa̱bu̱ bi̱ niguwáʼ bi̱ niguanún náa guʼwáaʼ, numuu dí ikhiin niguwáʼ gúyama náa xúgíʼ ku̱bulú”.
4 Mú a̱ʼgu̱ nirkaʼwiin a̱jmi̱i̱n xa̱bu̱ bigi̱. Ikhaa niʼthún: “Gajkhun má niguwáʼ gúyoʼ xa̱bu̱, mú tséyóo náá guwáʼ.
5 Índo̱ na̱jkha̱ raʼni krína índo̱ nacho̱o̱ maguguáa xkrugoo xuajin nigúúnʼla xa̱bu̱. Na̱nguá e̱yo̱o̱ náá nigún. Mú á mu najkuala ruxkúún, mbáa maʼngala muxkamiin”.
6 (Mú ikhaa ni̱jkha̱ kagui̱i̱n náa tsu̱du̱u̱ goʼwóo, nirkaʼwiin náa agoo lino dí trámáʼ mbá ru̱tsu̱u̱).
7 Xa̱bu̱ nigún ruxkúún náa kamba̱a̱ dí na̱jkha̱ xígií náa mañu Jordán, nigún ruyáʼ náa makidiin. Índo̱ ikhiin nigájnún náa xuajin ikhú nigúguáa xkrugua.
8 Nákha xóó tsénuʼ bi̱ nigún gúyama, Rahab nitsimuu náa tsu̱du̱u̱ guʼwá náa jngútamiin.
9 Ikhaa niʼthún: “Nda̱yo̱o̱ má dí Jeobá maxnála ku̱ba̱ʼ rígi̱ ga̱jma̱a̱ ikháanʼla nu̱ni̱ dí mamiñunxu̱. Xúgíinʼ xa̱bu̱ bi̱ kúwá náa ku̱ba̱ʼ rígi̱ asndu naguíʼiin dí namíñúún kuyala.
10 Nidxáwíínʼxu̱ xú káʼnii Jeobá niʼni mujndooʼ lamáa Maña̱ʼ* mu manújngala índo̱ nigájnala náa Egipto, ga̱jma̱a̱ xóo niniu̱u̱n a̱jmi̱i̱n reyes amorreos, Sehón ga̱jma̱a̱ Og, bi̱ niradíin náa i̱mba̱ ridoo* mañu Jordán.
11 Índo̱ nidxáwíínʼxu̱, ra̱ʼkhá tháán nimíñunxu̱. Nimbáa tséʼngo̱o̱ a̱jkiu̱u̱n gáxmína̱ʼ ga̱jma̱á nindxa̱la, numuu dí Jeobá Dios ndrígala nindxu̱u̱ mbáa Dios bi̱ xtáa náa xúgíʼ mekhu ga̱jma̱a̱ náa xúgíʼ ku̱ba̱ʼ.
12 Dí xúgi̱ rá mbá péñu,* guthu̱nʼla ga̱jma̱a̱ mbiʼyuu Jeobá, numuu dí ikhúún ninia̱la dí májánʼ,* xúʼko̱ má ikháanʼla gíʼmaa muniu̱u̱n dí májánʼ bi̱ kúwá náa goʼwóo anu̱ʼ, ga̱jma̱a̱ gíʼmaa musngajmúʼ á mu gajkhun mu̱nila rígi̱.*
13 Gíʼmaa dí muni̱ mba̱a̱ a̱jkia̱la ku̱ya̱a̱ anu̱ʼ, ru̱dúʼ,* a̱ngui̱nʼ ga̱jma̱a̱ xúgíinʼ bi̱ kúwá gajmiún, gu̱ni̱ káwáanʼxu̱* mu xákáñunxu̱”.
14 Ikhú xa̱bu̱ bi̱ nuyama nitháán: “¡Muxnajxímíjna̱xu̱ mu makañunxu̱ ga̱jma̱a̱ numala! Á mu tsétala dí nigúwaʼxu̱, munialaxu̱ dí májánʼ ga̱jma̱a̱ munimbáníí ajngúxu̱ʼ índo̱ Jeobá gáxnúxu̱ʼ ku̱ba̱ʼ rígi̱”.
15 Nda̱wa̱á dí niʼtámíjná gajmíi̱n niniñúúnʼ maguajtáán ga̱jma̱a̱ ñuñuu náa ventana, numuu dí goʼwóo grígu náa xtájtsí. Ikhaa xtáa dí náa tsudií kayuuʼ.
16 Nda̱wa̱á niʼthún: “Aʼguala náa kúbá gurkaʼwumijnála ajtsú mbiʼi ikhí mu xúʼko̱ bi̱ nduñáanʼla xúxkamáanʼ. Índo̱ ikhiin gátangi̱i̱n ikhú ikháanʼla ma̱ndoo muʼgua̱a̱la”.
17 Ikhú xa̱bu̱ nitháán: “Munimbaníí dí nixuʼdamíjna̱xu̱
18 índo̱ gátu̱ʼu̱xu̱ náa ku̱ba̱ʼ rígi̱ á mu natrájka ñuñuu dí maña̱ʼ xngeʼdi rígi̱ náa ventanáaʼ dí natani̱ muguájta̱xu̱ ga̱jma̱a̱. Gíʼmaa dí mi̱dxa̱ʼ jchaa ana̱a̱ʼ, ru̱dáaʼ, a̱ngia̱a̱nʼ ga̱jma̱a̱ xúgíinʼ bi̱ kúwá náa goʼwóo ana̱a̱ʼ.
19 Á mu mbáa nagájnuu náa guʼwáaʼ magiʼdoo má ikhaa aʼkhúun á mu nakháñuu, ikháanʼxu̱ xúguáʼdáá aʼkhúxu̱. Mú á mu xúʼko̱ gágíʼnuu mbá dí ra̱májánʼ bi̱ kraʼaa náa guʼwáaʼ, ikháanʼxu̱ gáguáʼdáá aʼkhúxu̱ á mu nakháñuu.
20 Mú á mu naratá dí nigúwaʼxu̱ xáguáʼdáá aʼkhúxu̱ náa dí nitaniuxu̱ dí muxna̱ ajngúxu”.
21 Ikhaa niriʼñúún: “Garigá xó má e̱thala”.
Ikhú niʼtángawún ga̱jma̱a̱ ikhiin nigúun. Nda̱wa̱á Rahab nirájkha ñuñuu dí maña̱ʼ xngeʼdi náa ventanúu.
22 Ikhiin nigún náa kúbá, niguanún ikhí mbá ajtsú mbiʼi asndu índo̱ nitangiín bi̱ nduñíinʼ. Maski ajndu ndiñíinʼ náa mbá xúgíʼ kamba̱a̱, mú túxkamiin.
23 Nda̱wa̱á a̱jmi̱i̱n xa̱bu̱ bugi̱ bi̱ nuyama niguájtha̱a̱n náa kúbá, nikidiin náa mañu, nigúun gúyáá Josué a̱ʼdióo Nun nitháán xúgíʼ dí nigíʼníí.
24 Ikhú nitháán Josué: “Jeobá nixnúlú xúgíʼ ku̱ba̱ʼ rígi̱. Xúgíinʼ xa̱bu̱ bi̱ kúwá ikhí asndu naguíʼiin dí namíñúún kuyulú”.
Mbaʼa nota
^ O “mar Rojo”.
^ Xóo muʼthá, náa nagájnuu a̱jkha̱ʼ.
^ O “gu̱niu̱ʼ mbá rí májánʼ”.
^ O “mbá tsinaʼ náa masngájmuʼ mba̱yo̱o̱ á mu gajkhun”.
^ O “táteʼ, náneʼ”.
