Josué 22:1-34
22 Ikhú Josué nigímbíin rubenitas, gaditas ga̱jma̱a̱ mbá ta̱pha̱ xuajin chíʼgíiʼ* ndrígóo Manasés,
2 ga̱jma̱a̱ niʼthún: “Ikháanʼla ni̱nimbala xúgíʼ rí Moisés xa̱bi̱i̱ Jeobá niʼtála mu̱ni̱ ga̱jma̱a̱ ni̱ni̱mbala xúgíʼ rí ni̱tala mangúún dí mu̱ni̱.
3 Túniʼñúúnʼ a̱ngia̱la náa xúgíʼ mbiʼi rí nikuwáanʼla, asndu mbiʼi xúgi̱, ga̱jma̱a̱ ninimbaníí dí Jeobá Dios ndrígala nindoo mu̱nila.
4 Xúgi̱ dí Jeobá Dios ndrígala niʼni rí makuwá tsímáá* a̱ngia̱la xó má nikudaminaʼ, ikha jngóo dí xúgi̱ rá, ma̱ndoo maʼgua̱a̱ʼla guʼwála,* náa ku̱ba̱ʼ rí Moisés xa̱bi̱i̱ Jeobá nixnála náa i̱mba̱ ridoo* mañu Jordán.
5 Mú gunimbánííla xúgíʼ kiʼtáñajunʼ ga̱jma̱a̱ Xtángoo dí nixnála Moisés xa̱bi̱i̱ Jeobá. Gaʼndala ku̱ya̱a̱ Jeobá Dios ndrígala, gajngruigala náa xúgíʼ kambo̱o̱, gu̱nimbala rí naʼtáñajunʼ, xátsínguala náa ikhaa. Gu̱ni̱ ñajuunʼ ga̱jma̱a̱ xúgíʼ a̱jkia̱la, ma̱ngaa xúgíʼ xóo nindxa̱la”.*
6 Ikhú Josué niʼni tsajkurámiinʼ ga̱jma̱a̱ niʼtángawún, ikhú niguáa̱n náa guʼwún.
7 Mbá taphi̱i̱n bi̱ naguwáʼ náa xuajin chíʼgíiʼ* ndrígóo Manasés, Moisés nixníín ku̱ba̱ʼ náa Basán, ga̱jma̱a̱ i̱mbá taphi̱i̱n, Josué nixnúún ku̱ba̱ʼ xígií náa narámaaʼ a̱jkha̱ʼ* náa ridoo mañu Jordán náa kúwá a̱ngiu̱ún. Índo̱ Josué nikuʼmiin magúun náa guʼwún niʼni tsajkurámiinʼ,
8 ga̱jma̱a̱ niʼthún: “Gu̱da gúʼgua̱a̱ʼ náa guʼwála mbaʼa rí gíʼdoo numuu, guʼgua̱a̱ʼ kudiin xedi̱, plata, oro, cobre, hierro, ga̱jma̱a̱ xtíin. Gu̱da gúʼgua̱a̱ʼla rí niguanáa náa xa̱bu̱ sia̱nʼ ndrígala ga̱jma̱a̱ guxuíʼtámijnáanʼla gajmiála a̱ngia̱la”.
9 Nda̱wa̱á rubenitas, gaditas ga̱jma̱a̱ mbá ta̱pha̱ xuajin chíʼgíiʼ ndrígóo Manasés, nini̱ wájímíjná náa eʼwíinʼ israelitas, nigájni̱ín náa Siló dí rígá náa ku̱ba̱ʼ Canaán ga̱jma̱a̱ nitangiín náa ku̱ba̱ʼ Galaad, náa ku̱ba̱ʼ rí nikhánún maʼni mbañúúnʼ. Ga̱jma̱a̱ náa nikúwá xó má Jeobá niʼthúu̱n Moisés.
10 Índo̱ niguánúu náa mañu Jordán náa ku̱ba̱ʼ Canaán, rubenitas, gaditas ga̱jma̱a̱ mbá ta̱pha̱ xuajin chíʼgíiʼ ndrígóo Manasés, nini̱ mbá náa mikarámáʼ tsigijñaʼ náa mijngii mañu Jordán, tsídánʼ nini̱ ga̱jma̱a̱ mitsaanʼ.*
11 Nda̱wa̱á, eʼwíinʼ israelitas nidxawíín: “Rubenitas, gaditas ga̱jma̱a̱ mbá ta̱pha̱ xuajin chíʼgíiʼ ndrígóo Manasés nini̱ mbá náa mikarámáʼ tsigijñaʼ náa ndawaa ku̱ba̱ʼ Canaán, náa ku̱ba̱ʼ dí rígá náa Jordán náa mbañúúnʼ israelitas”.
12 Índo̱ israelitas nidxawíín, xúgíinʼ xa̱bu̱ xuajin nigimbúmíjná náa Siló mu magún gúxmijná gajmiún.
13 Ikhú israelitas nixuʼmaa maʼga Finehás a̱ʼdióo ndxajkun Eleazar náa kúwá rubenitas, gaditas ga̱jma̱a̱ mbá ta̱pha̱ xuajin chíʼgíiʼ ndrígóo Manasés náa ku̱ba̱ʼ Galaad.
14 Ni̱jkha̱ gajmíi̱n mbá gu̱wi̱i̱nʼ bi̱ kuya̱ edxu̱u̱, mámbáa bi̱ kayá edxu̱u̱ náa mámbá xuajin majkhaʼ dí rígá náa Israel. Mámbáa dí ikhiin kayá edxu̱u̱ náa mbaʼa guʼwá dí rígá náa xuajin majkhaʼ náa Israel.
15 Índo̱ niguánú náa kúwá rubenitas, gaditas ga̱jma̱a̱ mbá ta̱pha̱ xuajin chíʼgíiʼ ndrígóo Manasés náa ku̱ba̱ʼ Galaad, nithúún:
16 “Rígi̱ dí naʼthí mbá xúgíʼ xuajñuu Jeobá: ‹Náá numuu dí ni̱nila rígi̱, dí tséguájun jmbu náa Dios ndrígóo Israel rá. Xúgi̱ niniʼñáánʼla Jeobá índo̱ ni̱nila mbá náa mikarámáʼ tsigijñaʼ ga̱jma̱a̱ nixujxímíjnala náa Jeobá.
17 Lá tséya̱a̱la dí nikiéʼkulú* má náa Peor, ga̱jma̱a̱ nandala mu̱ni̱ xóó itháan ráʼ. Asndu mbiʼi xúgi̱ xóó tséʼngulú gúʼni kaʼwumijnááʼlú náa ikhaa. Maski ajndu mbá gamiéjunʼ ni̱ʼkha̱ náa xuajñuu Jeobá,
18 ga̱jma̱a̱ ikháanʼla nandala muniʼñááʼ rajkuala náa Jeobá ráʼ. Á mu dí xúgi̱ ikháanʼla nuxujxímíjnálá náa Jeobá, ikhaa gájtsíí makiʼnáa kaʼyoo mbá xúgíʼ xuajin Israel.
19 Mú, á mu dí ku̱ba̱ʼ náa kuwáanʼla na̱nguá kaʼwu, ganújngáaʼla makuwáanʼ náa ku̱ba̱ʼ rí kaʼyoo Jeobá, náa rígá guʼwá xtíin, rí nduyamajkuíí Jeobá. Ga̱jma̱a̱ aguanála makuwáanʼ ga̱jma̱á nindxu̱xu̱. Mú xúxujxímíjnálá náa Jeobá. Xúnila dí mbaʼyoo Dios dí mangáanʼ nuxujxímíjnáxu̱ índo̱ nu̱nila i̱mba̱ náa mikarámáʼ tsigijñaʼ, dí raʼkháa ndrígóo Jeobá Dios ndrígulú.
20 Índo̱ Acán a̱ʼdióo Zérah táwi̱ji̱ jmbu ga̱jma̱a̱ kagu̱ ni̱jkha̱a̱ dí gíʼmaa maguma gámbáa. Lá tákiʼnáa Dios kaʼyoo mbá xúgíʼ xuajin Israel ráʼ. Raʼkháa mbáwíí xa̱bu̱ buʼko̱ nikháñúu ga̱jma̱a̱ numuu dí raʼkhí niʼni›”.
21 Ikhú rubenitas, gaditas ga̱jma̱a̱ mbá ta̱pha̱ xuajin chíʼgíiʼ ndrígóo Manasés niriʼñúún bi̱ kuya̱ edxu̱u̱ náa mámbá xuajin majkhaʼ dí rígá náa Israel:
22 “¡Jeobá Dios bi̱ nindxu̱u̱ itháan mba̱a̱ náa xúgíinʼ dioses! ¡Jeobá Dios bi̱ nindxu̱u̱ itháan mba̱a̱ náa xúgíinʼ dioses! Ikhaa ndaʼyoo ga̱jma̱a̱ Israel mbaʼyoo má ma̱ngaa. Á mu dí ikháanʼxu̱ nixujximíjna̱ ga̱jma̱a̱ táguajúnxu jmbu náa Jeobá, xátani̱ káwáanʼxu̱ má xúgi̱.
23 Á mu ni̱ni̱xu mbá náa mikarámáʼ tsigijñaʼ mu dí muniʼñáánʼxu Jeobá, ga̱jma̱a̱ mu ikhí muxnajxíxu̱ tsigijñaʼ dí nakarámáʼ, tsigijñaʼ náa najuixnájxi̱ tsígáʼ ga̱jma̱a̱ tsigijñaʼ dí tsímáá,* Jeobá manda̱ʼa̱a̱ cuenta.
24 Mú na̱nguá, ikháanʼ ni̱nixu rígi̱ numuu dí rígá mbá dí niʼni maxmiéjunxu, ni̱taxu̱: ‹Á mu nda̱wa̱á e̱jña̱la ikháanʼ nuthúún e̱jñu̱xu̱: “Tsáá ñajuanla ikháanʼ mu mbuyamajkuíí Jeobá Dios ndrígóo Israel ga̱jma̱á nindxu̱xu̱ rá.
25 Jeobá nitíga̱ mañu Jordán xóo ndawaa náa ikháanʼxu̱ ga̱jma̱a̱ náa ikháanʼla rubenitas ga̱jma̱a̱ gaditas, ikháanʼ rakáʼyala mbuyamajkuíí Jeobá”. Ga̱jma̱a̱ e̱jña̱la murikúún e̱jñu̱xu̱ rí mbuyamajkuíí* Jeobá›.
26 Ikha jngóo ni̱taxu: ‹Guʼyáʼ mbá rí mu̱ʼni̱lú ga̱jma̱a̱ gu̱ʼni̱ mbá náa mikarámáʼ tsigijñaʼ. Mú xájuixnájxi̱ tsigijñaʼ dí nakarámáʼ ni má i̱ʼwáʼ tsigijñaʼ.
27 Ni̱ni̱xu mu mani̱ndxu̱u̱ testigo náa ikháánʼlú ga̱jma̱a̱ náa bi̱ gáguwáʼ náa ikháánʼlú, dí mangáanʼxu muni̱ ñajuunʼ Jeobá náa ikhaa ga̱jma̱a̱ dí muxnajxíxu tsigijñaʼ dí nakarámáʼ, ma̱ngaa i̱ʼwáʼ tsigijñaʼ, mu xúʼko̱ e̱jña̱la xúthún e̱jñu̱xu̱ nda̱wa̱á: “Ikháanʼ rakáʼyala mbuyamajkuíí Jeobá”›.
28 Ikha jngóo ni̱taxu: ‹Á mu ikhiin nutuxu ga̱jma̱a̱ nuthúún e̱jñu̱xu̱ bi̱ gáguwáʼ nda̱wa̱á. Ikháanʼ muthu̱nxu: “Gu̱ya̱a̱la náa mixnájxi̱ tsigijñaʼ náa inuu Jeobá dí ikháá kayuuʼ, dí nini̱ wajin xiʼñúnxu raʼkháa mu mixnájxi̱ tsigijñaʼ dí nakarámáʼ, ni má i̱ʼwáʼ tsigijñaʼ, ninixu mu mani̱ndxu̱u̱ testigo náa ikháanʼxu̱ ga̱jma̱a̱ náa ikháanʼla”›.
29 ¡Ikháanʼxu̱, nditháan xúxujxímíjnaxu náa Jeobá ni má xúniʼñáánxu Jeobá, dí muníxu i̱mba̱ náa mixnájxi̱ tsigijñaʼ dí nakarámáʼ, tsigijñaʼ náa najuixnájxi̱ tsígáʼ ga̱jma̱a̱ i̱ʼwáʼ tsigijñaʼ, dí raʼkháa náa mixnájxi̱ tsigijñaʼ náa inuu Jeobá Dios ndrígulú dí rígá náa inuu guʼwá xtíin!”.
30 Índo̱ ndxajkun Finehás gajmíi̱n xa̱bu̱ bi̱ kuya̱ edxu̱u̱ náa xuajin ma̱ngaa bi̱ kuya̱ edxu̱u̱ náa mámbá xuajin majkhaʼ dí rígá náa Israel. Nidxawíín dí nithi bi̱ naguwáʼ náa Rubén, Gad ga̱jma̱a̱ Manasés. Ikhú nándáa má dí nithi.
31 Ikha jngóo Finehás a̱ʼdióo ndxajkun Eleazar niʼthúún bi̱ naguwáʼ náa Rubén, Gad ga̱jma̱a̱ Manasés: “Dí xúgi̱ ndu̱ya̱a̱xu dí Jeobá xtáa ga̱jma̱á nindxu̱lú numuu dí ikháanʼla túni̱ dí xáguajún jmbu náa inuu Jeobá. Ikháanʼla nini̱ káwíin israelitas náa ñawúunʼ Jeobá”.
32 Ikhú Finehás a̱ʼdióo ndxajkun Eleazar ga̱jma̱a̱ bi̱ kuya̱ edxu̱u̱ niniñu̱u̱nʼ rubenitas ga̱jma̱a̱ gaditas náa ku̱ba̱ʼ Galaad, nitangiín náa ku̱ba̱ʼ Canaán, ga̱jma̱a̱ nithún rígi̱ eʼwíinʼ israelitas.
33 Nidxún israelitas índo̱ nidxawíín rígi̱, ikhú nigi̱ʼdi̱i̱ nini̱ mba̱a̱ Dios ga̱jma̱a̱ nánguá nitangiín muthi dí magún gúxmijná gajmiún rubenitas ga̱jma̱a̱ gaditas mu muni̱ gámbáa ku̱ba̱ʼ náa kúwá.
34 Ikhú rubenitas ga̱jma̱a̱ gaditas nixna mbiʼíí náa nakarámáʼ tsigijñaʼ,* “nindxu̱u̱ testigo náa ikháánʼlú, dí Jeobá nindxu̱u̱ Dios bi̱ gajkhun”.
Mbaʼa nota
^ O “tribu”.
^ Náa ajngáa hebreo naʼthí, “mbuya̱a̱ jxu̱únʼ”.
^ O “guʼwá xtíin”.
^ Xóo muʼthá, xígií náa nagájnuu a̱jkha̱ʼ.
^ O “lajuíin”.
^ O “oeste”.
^ O “nagui̱i̱”.
^ O “nijngraʼánlo”.
^ Náa ajngáa hebreo naʼthí, “mamiñún kuyáá”.
^ Ga̱jma̱a̱ dí naʼthí naʼni mbuʼyáá dí náa najuixnájxi̱ tsigijñaʼ nixnambiʼíí Testigo.
