Josué 23:1-16
23 Mba̱yu̱u̱ʼ mbiʼi nda̱wa̱á dí Jeobá niʼni káwíin xa̱bu̱ Israel náa xa̱bu̱ sia̱nʼ bi̱ kúwá náa mbájndi dí ikhiin, índo̱ Josué nikhi̱i̱ má ga̱jma̱a̱ inu makhañúu.
2 Josué nigímbíin xúgíinʼ israelitas, xabuanii, bi̱ kuya̱ edxu̱u̱ náa mámbá guʼwíin, bi̱ nunimbaníí xkujndu ga̱jma̱a̱ eʼwíinʼ bi̱ guáʼdáá mbá ñajunʼ, niʼthúún: “Nikiu̱u̱n má, inu makhañúʼ.
3 Ikháanʼla má mina̱a̱ʼ ndi̱ya̱a̱ xú káʼnii Jeobá Dios ndrígala niʼni ga̱jma̱a̱ xuajin rúʼko̱, numuu dí Jeobá Dios ndrígala nixtáa raxmína̱ʼ ga̱jma̱a̱ numala.
4 Ikhúún nixkawíin xa̱bu̱ bi̱ kúwá náa xuajin dí rígá xígií náa narámaaʼ a̱jkha̱ʼ* náa Jordán asndu náa lamáa Mba̱a̱.* Ni̱xna̱la ku̱ba̱ʼ rúʼko̱ xó má nigájnuu náa suerte,* mú naguanúu xóó xuajin dí rígá náa ku̱ba̱ʼ rúʼko̱, xúgíʼ rúʼko̱ mani̱ndxu̱u̱ má ndrígala ikháanʼ.
5 Jeobá Dios ndrígala nindxu̱u̱ bi̱ niʼni gámbíin náa ikháanʼla, ikhaa nixkawíin mu xúʼko̱ ma̱ndoo makuwáanʼla náa ku̱ba̱ʼ xó má Jeobá Dios ndrígala nikudaminaʼ.
6 Dí xúgi̱ ikháanʼla xámíñálá dí munimbala ku̱ya̱a̱ ga̱jma̱a̱ dí munimbaníí xúgíʼ dí kiʼnirámáʼ* náa Xtángoo ndrígóo Moisés, xágájnutiyala náa ñawún májánʼla ni má náa ñawún xti̱ya̱la,
7 xúndawamíjna̱ gajmiála xa̱bu̱ xuajin bi̱ xóó naguanún náa ikháanʼla. Nditháan xútala ga̱jma̱a̱ numuu mbiʼñún dioses, ni má xúxna ajngála ga̱jma̱a̱ numún ikhiin, xúyamajkún ni má xúsmbatígala náa inún.
8 Dí gíʼmaa mu̱ni̱, gakuwáanʼla mbá jnduʼ náa Jeobá Dios ndrígala, xó má kuwáanʼla ru̱ni̱ asndu dí mbiʼi xúgi̱.
9 Jeobá maxkawíin xa̱bu̱ bi̱ kúwá náa xuajin mba̱ʼu̱, ga̱jma̱a̱ bi̱ guáʼdáá tsiaki̱i̱ náa ikháanʼla. Asndu dí mbiʼi xúgi̱ nimbáa xa̱bu̱ tséʼngo̱o̱ gáxmína̱ʼ ga̱jma̱á nindxa̱la.
10 Mbáwíí mbáa dí ikháanʼ maʼngo̱o̱ maʼni gajmíi̱n mbá mil, numuu dí Jeobá Dios ndrígala xtáa raxmína̱ʼ ga̱jma̱a̱ numala xó má ikhaa nikudaminaʼ.
11 Ikha jngóo gakuwáanʼla má xúʼko̱ xawii, gaʼndala ku̱ya̱a̱ Jeobá Dios ndrígala.
12 Mú, á mu ikháanʼ nagájnutiyala ga̱jma̱a̱ nuruwamíjna̱ gajmiála xuajin dí xóó naguanúu ga̱jma̱a̱ nuniʼñáánʼ dí e̱jña̱la mudiin e̱jñu̱ún, ma̱ngaa dí mambajxála gajmiála,
13 gu̱ya̱a̱ gajkhun dí Jeobá Dios ndrígala, ni xáxkawíin xa̱bu̱ bugi̱ náa ikháanʼla. Ikhiin mani̱ndxu̱ún mbá tsáʼkhá náa ikháanʼla, ga̱jma̱a̱ xóo índo̱ mbáa xa̱bu̱ naxpájtiáanʼla ga̱jma̱a̱ ñuñuu náa nijñála, maʼtsuraʼa xóo tsuwanʼ náa idala asndu índo̱ gámbáanʼ* náa ku̱ba̱ʼ májánʼ dí Jeobá Dios ndrígala nixnála.
14 Dí xúgi̱ inu makhañúʼ, ikháanʼla má ndu̱ya̱a̱ májánʼ ga̱jma̱a̱ xúgíʼ a̱jkia̱la, ma̱ngaa xúgíʼ xóo nindxa̱la,* dí xúgíʼ ajngáa dí májánʼ dí Jeobá Dios ndrígala nikudaminaʼ maʼni, nimbánuu. Xúgíʼ nimbánuu náa ikháanʼla. Nimbá ajngáa rígi̱ tánindxu̱u̱ ndíí.
15 Xó má nimbánuu náa ikháanʼla xúgíʼ dí májánʼ dí Jeobá Dios ndrígala nikudaminaʼ maʼni, xúʼko̱ má Jeobá makuʼma xúgíʼ dí ra̱májánʼ náa ikháanʼla xó má nikudaminaʼ ga̱jma̱a̱ maʼni gámbáanʼla náa ku̱ba̱ʼ májánʼ dí Jeobá Dios ndrígala nixnála.
16 Á mu ikháanʼla tsénimbáníí dí nimbánala gajmiála Jeobá Dios ndrígala dí ikhaa ninda̱ʼa̱la munimbaníí, á mu najkua ga̱jma̱a̱ nduyamajkhún eʼwíinʼ dioses, ma̱ngaa nusmbatíga̱la náa inún, ikhú Jeobá makásngañu̱u̱ʼ kaʼyala ga̱jma̱a̱ mbá nacha̱ mandáti̱ga̱a̱nʼla náa ku̱ba̱ʼ májánʼ dí ikhaa nixnála”.
Mbaʼa nota
^ O “oeste”.
^ O “mar Grande”. Xóo muʼthá, mar Mediterráneo.
^ O “niguaʼtárámáʼ”.
^ O “gándatigáanʼ”.
