Josué 3:1-17
-
Xa̱bu̱ Israel nakidiin náa mañu Jordán (1-17)
3 Josué gajmíi̱n xúgíinʼ israelitas miʼcha̱ nitujxu̱u̱n mbiʼi rúʼko̱ nigájnún náa Sitim ga̱jma̱a̱ niguáʼnu náa mañu Jordán. Ikhí má niguanún ninu̱ʼ nákha xóó tsíkidiin.
2 Nda̱wa̱á rí nijngoo dí maʼni ajtsú mbiʼi, xabuanii bi̱ kuya̱ edxu̱u̱ náa xuajin ninújngún náa kúwá xa̱bu̱
3 ga̱jma̱a̱ nithúún xúgíinʼ xa̱bu̱ xuajin: “Índo̱ gúya̱a̱la arca* dí nimbánuu ndrígóo Jeobá Dios ndrígala rí nagún kuñu̱u̱n ndxajkun levitas, gaʼguala náa egún.
4 Xóo mbá 900 metro* mitsínguánʼ gaguwaʼ gártu̱mala, mú xáguwaʼ kanuu itháán, mu xúʼko̱ mbu̱ya̱a̱ náa kamba̱a̱ gíʼmaa muʼgua, numuu rí nimbá miʼtsu tuʼguala náa kamba̱a̱ rúʼko̱”.
5 Josué niʼthúún xa̱bu̱ xuajin: “Guniratamíjnala,* numuu rí gájtsíí Jeobá maʼni mbá milagro rí mitsaanʼ* wéñuuʼ náa ikháanʼla”.
6 Nda̱wa̱á Josué niʼthúún ndxajkun: “Guxujxíla arca dí nimbánuu ga̱jma̱a̱ ganújngala muʼguala gináanʼ náa inún xa̱bu̱ xuajin”. Ikhú ikhiin nixujxi̱ arca dí nimbánuu ga̱jma̱a̱ nigún ginuu.
7 Ikhú Jeobá niʼthúu̱n Josué: “Mbiʼi rígi̱ magíʼdu̱u̱ ma̱ni̱ mba̱a̱n náa inún xúgíinʼ xa̱bu̱ Israel, mu xúʼko̱ mbuyáá rí maxtáá ga̱jma̱á nindxa̱a̱ʼ xó má nixtáá gajmuʼ Moisés.
8 Gíʼmaa maratañájúún rígi̱ ndxajkun bi̱ nagún kuñu̱u̱n arca dí nimbánuu: ‹Índo̱ guguáʼnula náa rawuunʼ mañu Jordán, guguajunla ikhí›”.
9 Josué niʼthúún israelitas: “Gaguwaʼ ga̱jma̱a̱ gudxawíínla rí gíʼdoo maʼthanla Jeobá Dios ndrígala”.
10 Josué niʼthúún: “Xúʼko̱ kaʼnii gúya̱a̱la rí náa ikháanʼ xtáa mbáa Dios bi̱ ndaʼya, ikhaa maxkawíin náa ikháanʼla xa̱bu̱ cananeos, hititas, heveos, perizitas, guirgaseos, amorreos ga̱jma̱a̱ jebuseos.
11 ¡Gu̱ya̱la! Arca dí nimbánuu ndrígóo Tátá bi̱ xtáa náa xúgíʼ tsu̱du̱u̱ ku̱ba̱ʼ manújngoo náa inala mu manújngoo náa mañu Jordán.
12 Guraʼwi̱i̱nla mbá 12 xa̱bekha náa xuajin majkhaʼ* ndrígóo Israel, mámbáa xa̱bu̱ náa mámbá xuajin,
13 índo̱ ndxajkun bi̱ nagún kuñu̱u̱n arca dí nimbánuu ndrígóo Jeobá, Tátá bi̱ xtáa náa xúgíʼ tsu̱du̱u̱ ku̱ba̱ʼ, gúxuma̱ʼ* rajkhúún náa mañu Jordán, ikhú iyaʼ dí na̱ʼkha̱ rijma̱a̱ mawiji̱ xóo mbá xtájtsí”.
14 Ikha jngóo índo̱ xa̱bu̱ xuajin nitujxu̱u̱n nigún náa nikúwi̱i̱n, índo̱ inu makidiin náa mañu Jordán, ndxajkun bi̱ nagún kuñu̱u̱n arca dí nimbánuu ninújngún nigún ginii.
15 (Mbiʼi índo̱ nurajxi̱i̱ rí nudu, naʼni mba̱a̱ mañu Jordán), índo̱ niguáʼnú bi̱ nagún kuñu̱u̱n Arca náa mañu Jordán ga̱jma̱a̱ ndxajkun bi̱ nagún kuñu̱u̱n Arca nixuma̱ʼ rajkhúún náa rawuunʼ mañu,
16 ikhú niwi̱ji̱ iyaʼ dí na̱ʼkha̱ rijma̱a̱, niwi̱ji̱ xóo mbá xtájtsí mitsínguánʼ, náa xuajin Adán rí gíʼ mijngii náa Zaretán, ga̱jma̱a̱ iyaʼ rí na̱jkha̱ náa lamáa Arabá* ga̱jma̱a̱ náa lamáa Miríná* nijndooʼ. Iyaʼ niwi̱ji̱ ga̱jma̱a̱ xúʼko̱ xa̱bu̱ xuajin nikidiin náa i̱mba̱ ridoo Jericó.
17 Índo̱ ndxajkun bi̱ nagún kuñu̱u̱n arca dí nimbánuu ndrígóo Jeobá juáwánʼ náa mañu Jordán rí nijndooʼ, xúgíinʼ israelitas nikidiin náa ku̱ba̱ʼ mijxooʼ, niguájun má xúʼko̱ asndu índo̱ niguámbu̱u̱n ninújngún xúgíinʼ xa̱bu̱ xuajin.
Mbaʼa nota
^ O “e̱jna̱”.
^ Náa ajngáa hebreo naʼthí, “gu̱ni̱ kaʼwumíjnala”.
^ O “nagui̱i̱”.
^ O “tribu”.
^ O “gújngama”.
^ O “mar Arabá”.
^ O “mar Salado”. Xóo muʼthá, mar Muerto.
