Josué 4:1-24
-
Nundri̱ga̱ itsí dí mambáñún marmáʼáan a̱jkiu̱ún (1-24)
4 Índo̱ xúgíinʼ xa̱bu̱ xuajin niguámbu̱u̱n nikidiin náa mañu Jordán, Jeobá niʼthúu̱n Josué:
2 “Guraʼwi̱i̱n mbá 12 xa̱bu̱ xuajin, mámbáa xa̱bu̱ dí mámbá xuajin majkhaʼ,*
3 ga̱jma̱a̱ arathún muni̱ rígi̱: ‹Gurajxi̱ mbá 12 itsí dí tuaʼán náa ta̱pho̱o̱ mañu Jordán náa nijuáwánʼ rajkhúún ndxajkun. Guda̱ gúʼgua ga̱jma̱a̱ gundriga̱la náa gáguanála mu̱nuʼ›”.
4 Ikhú Josué nindxaʼwún mbá 12 xa̱bekha bi̱ niraʼwi̱i̱n náa israelitas, mámbáa xa̱bu̱ dí mámbá xuajin majkhaʼ,
5 ga̱jma̱a̱ Josué niʼthúún: “Gaʼguala náa ta̱pho̱o̱ mañu Jordán, anújngala náa inuu Arca* dí nimbánuu ndrígóo Jeobá Dios ndrígala, mámbáa gágrígu itsí náa xpajpoo mayéʼga xó má nguáthá mbaʼa xuajin majkhaʼ dí rígá náa xuajin Israel,
6 mu mani̱ndxu̱u̱ tsinaʼ, á mu e̱jña̱la gúrajxa̱la nda̱wa̱á. ‹Náá numuu tri̱ga̱ itsí rígi̱ rá.›
7 Ikháanʼ muthu̱u̱nla: ‹Numuu rí iyaʼ mañu Jordán niwi̱ji̱ índo̱ ninújngoo arca dí nimbánuu ndrígóo Jeobá. Índo̱ arca nikidaa náa mañu Jordán iyaʼ mañu niwi̱ji̱. Itsí rígi̱ maʼni dí xa̱bu̱ Israel marmáʼáan a̱jkiu̱ún má xúʼko̱ dí nirígá›”.
8 Ikha jngóo israelitas nini̱ xó má Josué niʼthún muni̱. Nirajxi̱ mbá 12 itsí dí tuaʼán náa ta̱pho̱o̱ mañu Jordán, xó má Jeobá niʼthúu̱n Josué, mámbá itsí dí mámbá xuajin majkhaʼ dí rígá náa Israel. Nigún kudúún náa munuʼ mbruʼun rúʼko̱ ga̱jma̱a̱ ikhí má nindri̱ga̱.
9 Josué ma̱ngaa nigua̱ʼa̱n mbá 12 itsí náa ta̱pho̱o̱ mañu Jordán, náa nijuáwánʼ ndxajkun bi̱ kuya̱ arca dí nimbánuu, itsí rúʼko̱ tuaʼán asndu mbiʼi xúgi̱.
10 Ndxajkun bi̱ kuya̱ Arca káaʼ má niguájun náa ta̱pho̱o̱ mañu Jordán asndu índo̱ niguámbá raguma xúgíʼ dí Jeobá niʼthúu̱n Josué dí maʼni gajmíi̱n xa̱bu̱ xuajin, ga̱jma̱a̱ xúgíʼ dí Moisés niʼthúu̱n Josué maʼni. Ikhú mbá xúgíinʼ xa̱bu̱ xuajin nacha̱ má nikidiin náa mañu.
11 Índo̱ xúgíinʼ israelitas niguámbu̱u̱n ninújngún, ikhú ndxajkun ninújngún kuñu̱u̱n Arca dí nimbánuu ndrígóo Jeobá náa inún xa̱bu̱ xuajin.
12 Ikhú rubenitas, gaditas ga̱jma̱a̱ mbá taphi̱i̱n bi̱ naguwáʼ náa Manasés bi̱ nikúwá xawii muxmijná, ninújngún nigún ginuu náa inún israelitas xó má Moisés nikuʼmiin dí muni̱.
13 Xóo mbá 40,000 soldado bi̱ nigumaratiin mu muxmijná, Jeobá nixtáa ga̱jma̱á nindxu̱ún índo̱ ninújngún náa ku̱ba̱ʼ mijxooʼ dí rígá náa Jericó.
14 Mbiʼi rúʼko̱, Jeobá niʼni mba̱a̱ Josué náa inún xúgíinʼ xa̱bu̱ Israel ga̱jma̱a̱ ikhiin ndiyamajkuíí* náa xúgíʼ mbiʼi rí nixtáa xó má ndiyamajkuíí Moisés.
15 Ikhú Jeobá niʼthúu̱n Josué:
16 “Aratáñajúúnʼ ndxajkun bi̱ nagún kuñu̱u̱n arca dí nimbánuu náa kajti itsí wajpa dí kiʼniraʼmáʼ xtángoo rí magajníín náa mañu Jordán”.
17 Ikha jngóo Josué niʼtáñajúúnʼ ndxajkun: “Gagajnáanʼla náa mañu Jordán”.
18 Índo̱ ndxajkun bi̱ nagún kuñu̱u̱n arca dí nimbánuu ndrígóo Jeobá nigájna̱án náa mañu Jordán ga̱jma̱a̱ índo̱ nijngupri̱ga̱ náa ku̱ba̱ʼ mijxooʼ, ikhú mañu ni̱ʼkha̱a̱ mbu̱júu̱ ga̱jma̱a̱ niʼni̱i̱ mba̱a̱ xó má nákhá ginii.
19 Xa̱bu̱ xuajin nikidiin náa Jordán índo̱ niʼni gu̱wa̱ʼ mbiʼi rí timbá gu̱nʼ ga̱jma̱a̱ niguanún náa Guilgal náa ndawaa ga̱jma̱a̱ Jericó, rí naguanúu xígií náa nagájnuu a̱jkha̱ʼ.*
20 Mú rí mbá 12 itsí dí nirawíi náa mañu Jordán, Josué nigrui̱ga̱ náa Guilgal.
21 Ikhú niʼthúún israelitas: “Á mu rí nda̱wa̱á e̱jña̱la nurajxala, ‹Ndíjkha rí tri̱ga̱ itsí rígi̱ rá.›
22 Ikháanʼla gíʼmaa mu̱thu̱u̱nla e̱jña̱la: ‹Xa̱bu̱ Israel nikidiin náa mañu Jordán índo̱ nijndooʼ,
23 numuu dí Jeobá Dios ndrígulú niʼni dí mujndooʼ mañu Jordán mu makidáanʼxu̱, xó má niʼni Jeobá Dios ndrígulú índo̱ niʼni dí mujndooʼ lamáa Maña̱ʼ* asndu índo̱ nikidáanʼxu̱.
24 Niʼni rúʼko̱ mu xúgíinʼ xa̱bu̱ numbaaʼ mbuyáá dí Jeobá gíʼdoo tsiaki̱i̱. Mu xúʼko̱ ikháanʼla mamiñála ku̱ya̱a̱ má xúʼko̱ Jeobá Dios ndrígala›”.
Mbaʼa nota
^ O “tribu”.
^ O “E̱jna̱”.
^ Náa ajngáa hebreo naʼthí, “nimíñún kuyáá”.
^ O “este”.
^ O “mar Rojo”.
