Josué 5:1-15
5 Xúgíinʼ reyes amorreos bi̱ kúwá náa ridoo mañu Jordán dí naguanúu náa nagájnuu a̱jkha̱ʼ* ga̱jma̱a̱ xúgíinʼ reyes cananeos bi̱ kúwá náa mijngii lamáa* nidxawíín dí Jeobá niʼni mujndooʼ mañu Jordán mu manújngún israelitas. Nimíñúún ga̱jma̱a̱ nánguá gakhi̱i̱ a̱jkiu̱ún mu muxmíjná gajmiún.
2 Mbiʼi rúʼko̱ Jeobá niʼthúu̱n Josué: “Gajmaaʼ itsí mu matani̱ mbá chílú dí matrujtu ga̱jma̱a̱ xtóo xuyuuʼ tsáʼkhún xúgíinʼ xa̱bekha israelitas”.
3 Ikha jngóo Josué niʼni mbá chílú ga̱jma̱a̱ itsí, ikhú nirujtu xtóo xuyuuʼ tsáʼkhún xa̱bekha israelitas náa Guibeat-Haaralot.*
4 Josué nirujtu xtóo xuyuuʼ tsáʼkhún ga̱jma̱a̱ numuu dí xúgíinʼ xa̱bekha* bi̱ nigájnún náa Egipto, xúgíinʼ bi̱ najmiin nuxmijná nikháñún náa ku̱ba̱ʼ mijxooʼ* índo̱ kúwá ragún nda̱wa̱á dí nigájnún náa Egipto.
5 Xúgíinʼ bi̱ nigájnún náa Egipto nithu má xtóo xuyuuʼ tsáʼkhún. Mú bi̱ nigumiin náa ku̱ba̱ʼ mijxooʼ índo̱ kúwá ragún nda̱wa̱á dí nigájnún náa Egipto, nimbáa dí ikhiin na̱nguá nithu xtóo xuyuuʼ tsáʼkhúun.
6 Israelitas nijnguʼwún mbá 40 tsiguʼ náa ku̱ba̱ʼ mijxooʼ asndu índo̱ niguámbíin xúgíinʼ xa̱bu̱ xuajin, xóo muʼthá xa̱bekha bi̱ nuxmijná bi̱ nigájnún náa Egipto bi̱ túnimbu̱ún kuyáá Jeobá. Jeobá niʼthún dí ikhiin xátuʼu̱u̱n náa ku̱ba̱ʼ dí Jeobá niʼthún wajin xiʼñúlú dí maxnúlú ikháánʼ, náa mbá ku̱ba̱ʼ dí rígá wéñuuʼ yáʼdú ga̱jma̱a̱ jyááʼ.
7 Ikhiin niriʼkuwíin e̱jñu̱ún bi̱ Josué nirujtu xtóo xuyuuʼ tsáʼkhún, numuu dí ikhiin na̱nguá nithiin índo̱ kúwá ragún kamba̱a̱.
8 Índo̱ niguámbá nithu xtóo xuyuuʼ tsáʼkhún xúgíinʼ xa̱bu̱ xuajin, ikhí má niguanún náa nigi̱ʼi̱i̱n asndu índo̱ niʼni̱i̱ a̱jkiu̱ún xúgíinʼ xa̱bekha.
9 Ikhú Jeobá niʼthúu̱n Josué: “Xúgi̱ narígúu majti̱ʼ náa ikháanʼla* dí nigíʼníí náa Egipto”. Ikha jngóo mbaaʼ rúʼko̱ nigumbiʼyuu Guilgal* asndu dí mbiʼi xúgi̱.
10 Israelitas niguanún náa Guilgal, ga̱jma̱a̱ ikhí niniri̱ya̱a̱ʼ Pascua wakíʼ 14 ñajuunʼ gu̱nʼ náa ku̱ba̱ʼ mijxooʼ dí rígá náa Jericó.
11 I̱mba̱ néjtsuu dí nijngoo Pascua, mbiʼi má rúʼko̱ nigíʼdi̱i̱ ni̱ʼphu̱ dí najma̱a̱ náa ku̱ba̱ʼ: Pan dí ragíʼdoo levadura ga̱jma̱a̱ trigo dí nigu̱ʼ.
12 I̱mba̱ néjtsuu mbiʼi dí ni̱ʼphu̱ dí najma̱a̱ náa ku̱ba̱ʼ nánguá nirígá maná, maski ajndu nánguá nirígá maná mú tsiguʼ rúʼko̱ nigíʼdi̱i̱ ni̱ʼphu̱ dí najma̱a̱ náa ku̱ba̱ʼ Canaán.
13 Índo̱ Josué xtáa náa mijngii Jericó, nikujxi̱i̱ edxu̱u̱ ga̱jma̱a̱ ndiʼyoo mbáa xa̱bu̱ wíji̱ náa inuu kayá mbá espada náa ñawúunʼ. Josué nikuʼmaminaʼ náa ikhaa ga̱jma̱a̱ nirajxu̱u̱: “Lá xtaa ga̱jma̱á nindxu̱xu̱ o xtaa gajmiáanʼ xa̱bu̱ sia̱nʼ ndrígúxu̱ ráʼ.”
14 Ikhaa niriʼñuu: “Na̱nguá, ikhúún na̱ʼkhá xóo bi̱ kayá edxu̱u̱ náa soldado* ndrígióo Jeobá”. Índo̱ Josué niʼdxuun rígi̱, nigiʼnduti̱ga̱* ga̱jma̱a̱ nismbáti̱go̱o̱ mbayííʼ, ikhú nirajxu̱u̱: “Ndiéjunʼ lá xtaʼdáá marathu̱nʼ rá tátá”.
15 Bi̱ kayá edxu̱u̱ náa soldado ndrígióo Jeobá niʼthúu̱n Josué: “Arawíi raxtáaʼ,* numuu dí náa xtiajún nindxu̱u̱ kaʼwu”. Ikhú Josué mbá nacha̱ niguwíi raxtóo.
Mbaʼa nota
^ Náa ajngáa hebreo naʼthí, “dí naguanúu náa níjniúu lamáa”.
^ O “mar”.
^ Rí nandoo gáʼthúu̱n ‹bíjní xtóo xuyuuʼ tsáʼkhún›.
^ O “xúgíinʼ xa̱bekha bi̱ guáʼdáá tsigún muxmijná”.
^ O “desierto”.
^ Náa ajngáa hebreo naʼthí, “nini̱ mambíjxi̱ náa ikháanʼla”.
^ Rí nandoo gáʼthúu̱n ‹ni̱mbíjxi̱›.
^ O “ángeles”.
^ O “nixngutigamínáʼ”.
^ O “chádaaʼ”.
