Josué 6:1-27
6 Xuajin Jericó kúgoo numuu rí nimíñúún eni̱ israelitas, nimbáa tségájnuu ní má nimbáa tséto̱ʼo̱o̱.
2 Ikhú Jeobá niʼthúu̱n Josué: “Naxnajxí xuajin Jericó náa ikháán ga̱jma̱a̱ rey ndrígóo, mangiin xa̱bu̱ bi̱ tsémiñún.
3 Xúgiáanʼ ikháanʼla bi̱ nuxmijná ndayóoʼ rí muʼguala mbá miʼtsú náa mbájndi xuajin, ga̱jma̱a̱ gíʼmaa muni̱ rígi̱ mbá majun mbiʼi.
4 Gíʼmaa magún ginuu náa inuu Arca* mbá juwiin ndxajkun bi̱ kuda chi̱jiu̱ún mugu̱, mú índo̱ gáʼni juwan mbiʼi, ikháanʼla muʼguala mbájndi rawuunʼ xuajin mbá juwan nuthu ga̱jma̱a̱ ndxajkun mundiyííʼ chi̱ji̱ʼ.
5 Índo̱ gúdxawíínla rí nawáán ndiyííʼ chi̱jiu̱ún mugu̱, ikhú mbá nacha̱ mbá xúgíinʼ xa̱bu̱ xuajin, gíʼmaa mundxa̱ʼwa̱ xóo rí nagún gúxmijná. Ikhú xtájtsí ndrígóo xuajin majngudiri̱ga̱a̱ ga̱jma̱a̱ mámbáa xa̱bu̱ xuajin gíʼmaa matsimuu”.
6 Josué a̱ʼdióo Nun nigímbíin ndxajkun ga̱jma̱a̱ niʼthúún: “Guxujxila arca dí nimbánuu ga̱jma̱a̱ mbá juwiin ndxajkun magún ginuu náa Arca dí nimbánuu ndrígóo Jeobá kuda chi̱jiu̱ún mugu̱”.
7 Ikhú niʼthúún xa̱bu̱ xuajin: “Gaʼguala náa mbájndi rawuunʼ xuajin, soldado bi̱ nigumaratiin mu muxmijná gagún ginuu náa Arca dí nimbánuu ndrígóo Jeobá”.
8 Xó má Josué niʼthúún xa̱bu̱ xuajin, mbá juwiin ndxajkun bi̱ kuda chi̱jiu̱ún mugu̱ bi̱ nigún ginuu náa inuu Jeobá, nindiyííʼ chi̱ji̱ʼ ga̱jma̱a̱ arca dí nimbánuu ndrígóo Jeobá na̱ʼkha̱ kidxúúnʼ.
9 Soldado bi̱ nigumaratiin mu muxmijná nagún ginún ndxajkun bi̱ nundiyííʼ chi̱ji̱ʼ ga̱jma̱a̱ soldado bi̱ naguwáʼ kidxuuʼ Arca ga̱jma̱a̱ chi̱ji̱ʼ nawáán má xúʼko̱.
10 Josué niʼtáñajúúnʼ xa̱bu̱ xuajin: “Xúndxa̱ʼwa̱, wíí gúʼguala. Xútala nimbá ajngáa asndu índo̱ ikhúún gáthalá ‹¡Gundxaʼwa̱!›, ga̱jma̱a̱ ikhú gúndxaʼwa̱”.
11 Josué ni̱ʼni̱ rí Arca dí nimbánuu ndrígóo Jeobá maʼga tuaʼán náa mbájndi xuajin mbá miʼtsu. Nda̱wa̱á nitangiín náa niguanún ga̱jma̱a̱ ikhí má ninuʼ.
12 I̱mba̱ néjtsuu, miʼcha̱ Josué ga̱jma̱a̱ ndxajkun nixujxi̱ Arca dí nimbánuu ndrígóo Jeobá,
13 mbá juwiin ndxajkun nigún náa inuu Arca dí nimbánuu ndrígóo Jeobá kuda rundiyííʼ chi̱jiu̱ún mugu̱. Soldado bi̱ nigumaratiin mu muxmijná nagún náa inún ndxajkun ga̱jma̱a̱ eʼwíinʼ soldado naguwaʼ náa kidxuuʼ Arca dí nimbánuu ndrígóo Jeobá índo̱ xtáa rawáán chi̱ji̱ʼ.
14 Dí maʼni raga̱jma̱ mbiʼi nigún mbu̱júu̱ náa mbájndi rawuunʼ xuajin káaʼ mbá miʼtsu, ga̱jma̱a̱ nitangiín má náa niguanún, xúʼko̱ nini̱ mbá majun mbiʼi.
15 Índo̱ niʼni juwan mbiʼi miʼcha̱ nitujxu̱u̱n xóo ejtsi. Nigún náa mbájndi rawuunʼ xuajin mbá juwan nuthu. Káaʼ mbá mbiʼi rúʼko̱ rí nigún náa mbájndi rawuunʼ xuajin mbá juwan nuthu.
16 Índo̱ nigún tuaʼán rí maʼni juwan nuthu, ndxajkun nindiyííʼ chi̱ji̱ʼ, ikhú Josué niʼthúún xa̱bu̱ xuajin: “¡Gundxa̱ʼwa̱ numuu rí Jeobá nixnála xuajin rígi̱!
17 Xuajin ga̱jma̱a̱ xúgíʼ dí rígá ikhí gíʼmaa rí mambáa, numuu dí xúgíʼ rúʼko̱ kaʼyoo Jeobá. I̱ndó Rahab a̱ʼgu̱ bi̱ nagujuamínáʼ ma̱ndoo makríya̱a̱ʼ gajmíi̱n xúgíinʼ bi̱ tri̱ʼi̱i̱n náa goʼwóo, numuu rí ikhaa nirkaʼwiin bi̱ niguwáʼ gúyama.
18 Gu̱ni̱ tsíngumi̱jna̱la náa rígá dí maguma gámbáa, mu xúʼko̱ xániguala maguaʼdáá rí maguma gámbáa, numuu rí á mu nuda gúʼgua̱a̱ʼ náa kuwáanʼla, rúʼko̱ gáʼni rí maguma gámbáa xuajin Israel ga̱jma̱a̱ mu̱ni̱ rí ma̱ʼkha̱ gamiéjunʼ.
19 Mú xúgíʼ plata, oro, rí niguma ga̱jma̱a̱ cobre, ma̱ngaa rí niguma ga̱jma̱a̱ hierro, nindxu̱u̱ kaʼwu náa Jeobá. Gíʼmaa rí magijxi̱i̱ náa kajti rí gíʼdoo numuu ndrígóo Jeobá”.
20 Índo̱ nindiyííʼ chi̱ji̱ʼ xa̱bu̱ xuajin nindxa̱ʼwa̱. Índo̱ xa̱bu̱ xuajin nidxawíín aʼwóo chi̱ji̱ʼ ikhú nindxa̱ʼwa̱ rí nagún muxmijná, xtájtsí ndrígóo xuajin nijngudiriga̱a̱. Nda̱wa̱á, israelitas nitu̱ʼu̱u̱n náa Jericó ga̱jma̱a̱ nini̱ gámbáa xuajin.
21 Nini̱ gámbáa xúgíʼ dí rígá náa xuajin ga̱jma̱a̱ espadu̱ún, niradíin: Xa̱bekha, gu̱ʼu̱, jiámá ga̱jma̱a̱ wa̱ʼxa̱ʼ* ma̱ngaa xabuanii, xedi̱, mugu̱ ga̱jma̱a̱ búrru.
22 Josué niʼthúún a̱jmi̱i̱n xa̱bekha bi̱ nigún gúyama: “Gata̱ʼa̱la náa goʼwóo a̱ʼgu̱ bi̱ nagujuamínáʼ ga̱jma̱a̱ guríya̱a̱ʼla ikhaa mangiin xúgíinʼ bi̱ kúwá ikhí, xó má nitha̱a̱nla”.
23 Ikha jngóo bi̱ nuyama nitu̱ʼu̱u̱n ga̱jma̱a̱ niriya̱a̱ʼ Rahab ga̱jma̱a̱ anu̱u̱, ru̱dúu̱,* a̱ngui̱i̱n ga̱jma̱a̱ xúgíinʼ bi̱ kraʼaa gajmíi̱n, xúʼko̱ nirawíin xúgíinʼ bi̱ kaʼñúún ga̱jma̱a̱ nigún kudiin náa mijngii rawuunʼ náa gíi̱nʼ israelitas.
24 Nda̱wa̱á nitsikha̱a̱ xuajin ga̱jma̱a̱ xúgíʼ dí rígá ikhí. Mú plata, oro, rí niguma ga̱jma̱a̱ cobre, ma̱ngaa rí niguma ga̱jma̱a̱ hierro nixnajxi̱ mu magijxi̱i̱ náa kajti dí gíʼdoo numuu dí rígá náa goʼwóo Jeobá.
25 I̱ndó bi̱ niʼni mba̱a̱ a̱jkiu̱u̱n kaʼñún Josué ninindxu̱u̱ Rahab a̱ʼgu̱ bi̱ nagujuamínáʼ ma̱ngaa bi̱ kúwíin náa goʼwóo anu̱u̱ ga̱jma̱a̱ xúgíinʼ bi̱ kaʼñúún, ikhaa xtáa náa Israel asndu rí mbiʼi xúgi̱, numuu rí nirkaʼwiin bi̱ Josué nikuʼmiin mu magún gúyama náa xuajin Jericó.
26 Nákha mbiʼi rúʼko̱, Josué nixná ajngóo* índo̱ niʼthí: “Jeobá gáʼtátsríguíi xa̱bu̱ bi̱ gágimina̱ʼ maʼni̱i̱ mbu̱júu̱ xuajin Jericó. Bi̱ gátsiji̱i̱ rajkhúu xuajin gíʼmaa rí makhañúu a̱ʼdióo bi̱ giʼnii ga̱jma̱a̱ bi̱ gátsuaʼa̱a̱n xkrugoo gíʼmaa rí makhañúu a̱ʼdióo bi̱ giʼtháá”.
27 Jeobá nixtáa ga̱jma̱a̱ Josué, rúʼko̱ niʼni dí ga̱jma̱a̱ numuu mawánrígo̱o̱ náa xúgíʼ numbaaʼ.
Mbaʼa nota
^ O “E̱jna̱”.
^ O “i̱jín go̱ʼo̱”.
^ O “tátée, nánée”.
^ O mbáa “niʼni rí xa̱bu̱ xuajin muthi rígi̱”.
