Josué 7:1-26
7 Israelitas túnimbu̱u̱n dí nijuiʼthúún dí marigá tikhuu rí maguma gámbáa. Mbáa xa̱bu̱ bi̱ mbiʼyuu Acán bi̱ na̱ʼkha̱ náa xuajin chíʼgíiʼ* ndrígóo Judá niʼni kúwáʼ tikhuu rí maguma gámbáa. Acán ninindxu̱u̱ a̱ʼdióo Carmí, a̱ʼdióo Zabdí, a̱ʼdióo Zérah, ikha jngóo Jeobá nikiʼnáa kaʼñún israelitas.
2 Índo̱ kúwá náa Jericó, Josué nikuʼmiin nguáthi̱i̱n xa̱bekha mu magún náa Hai náa mijngii Bet-Aven dí naguanúu xígií náa nagájnuu a̱jkha̱ʼ,* náa xuajin Betel, niʼthún: “Gatsimala ga̱jma̱a̱ guyejxi̱i̱la ku̱ba̱ʼ”, ikha jngóo nitsimún ga̱jma̱a̱ niyejxi̱i̱ xuajin Hai.
3 Índo̱ nitangiín, nitháán Josué: “Tséyóoʼ má matsimún xúgíinʼ xa̱bu̱ xuajin, maʼngo̱o̱ má dí káaʼ 2,000 o 3,000 xa̱bekha muni̱ gámbáa Hai. Káaʼ nguéjmi̱i̱n má xa̱bu̱ kúwá, ikha jngóo xáʼyóoʼ má magún xúgíinʼ, káaʼ maʼni néʼngu̱u̱n á mu nagún”.
4 Ikha jngóo nitsimún mbá 3,000 xa̱bekha, mú nitangiín ragáñúún eni̱ xa̱bu̱ Hai.
5 Xa̱bu̱ Hai niradíin mbá 36 israelitas, asndu náa xkrugoo xuajin niguáʼdi̱i̱ nixkúún xa̱bu̱ Israel asndu náa Sebarim,* mbrájkáá niguájtaan ruradíin, rúʼko̱ niʼni dí xúgíinʼ xa̱bu̱ xuajin makáguabaaʼ a̱jkiu̱ún ga̱jma̱a̱ nimíñúún.
6 Índo̱ Josué ndiʼyoo dí xígi̱ nirígá, nixkuʼtu xtíñuu ga̱jma̱a̱ nismbáti̱go̱o̱ mbayííʼ náa inuu arca* dí nimbánuu ndrígóo Jeobá, nismbáti̱go̱o̱ má xúʼko̱ asndu wakhííʼ, ikhaa gajmíi̱n bi̱ kuya̱ edxu̱u̱ náa xuajin Israel nugri̱gu má xúʼko̱ yujndaʼ náa edxu̱ún.
7 Josué niʼthí: “Tátá Jeobá bi̱ itháán mba̱a̱, náá numuu rí ni̱dxa̱ʼ xtáanʼxu xígií kamba̱a̱ rí nanújngoo Jordán rá. Mu maraxnajxáanʼxu̱ náa ñawúnʼ xa̱bu̱ amorreos ga̱jma̱a̱ muni̱ gámbáanʼxu̱ ráʼ. ¡Itháan má májánʼ gáʼni á mu dí káaʼ niguanúxu̱ náa i̱mba̱ ridoo* mañu Jordán jnu rá!
8 Atani̱ mba̱a̱ a̱jkia̱a̱nʼ Jeobá, dí lá gátha̱ xúgi̱ rá. Dí Israel táʼngo̱o̱ gáxmína̱ʼ gajmíi̱n xa̱bu̱ sia̱nʼ.
9 Índo̱ xa̱bu̱ cananeos ga̱jma̱a̱ xúgíinʼ xa̱bu̱ bi̱ kúwíin náa ku̱ba̱ʼ rígi̱ gúdxawíín, maguwáʼ gúni gámbáanʼxu̱, ga̱jma̱a̱ munimbatíga̱a̱ mbiʼyuxu náa tsu̱du̱u̱ ku̱ba̱ʼ. Ndiéjunʼ gátani̱ ikháán ga̱jma̱a̱ numuu mbiʼyaaʼ dí gíʼdoo wéñuuʼ numuu rá.”
10 Jeobá niriʼñuu Josué: “¡Atujxa̱a̱ʼ! Náá numuu rí kri̱ga̱a̱n ratasmbatíga̱a̱ʼ mbayííʼ rá.
11 Israel nikudaminaʼ aʼkhá, túnimbaníí dí nimbánuʼ gajmíʼ, túnimbu̱u̱n dí nikuʼmiin muni̱. Nida gágu̱u̱n dí gíʼmaa maguma gámbáa, nini̱ kuʼwáʼ ga̱jma̱a̱ nirkaʼwu náa kajti rí guáʼdáá.
12 Ikha jngóo israelitas xáʼngu̱u̱n gúni̱ gajmiún xa̱bu̱ sia̱nʼ, matangi̱ín ragáñúún gúni̱ xa̱bu̱ sia̱nʼ, numuu dí niguánú ninindxu̱ún dí maguma gámbáa. Ní xáxtáá ga̱jma̱á nindxa̱la á mu dí tséxííyáa xa̱bu̱ bi̱ ikhúún nikuʼmá dí makhañúu.
13 ¡Atujxa̱a̱ʼ ga̱jma̱a̱ ataniratiin xa̱bu̱ xuajin mu makuwá xawii! Arathún: ‹Guniratamijnála gájtsíí, xígi̱ eʼthí Jeobá Dios ndrígóo Israel: “Xa̱bu̱ Israel, náa majñala xtáa mbáa xa̱bu̱ bi̱ ndayóoʼ rí makhañúu, xáʼngala gúni̱ gajmiála xa̱bu̱ sia̱nʼ á mu dí na̱nguá exííyáala xa̱bu̱ buʼko̱, bi̱ ndayóoʼ rí makhañúu.
14 Miʼcha̱ gájtsíí gíʼmaa dí muxnajxímijna̱la, mámbá xuajin majkhaʼ, xuajin chíʼgíiʼ* dí Jeobá gáraʼwíí, muxuʼmamijná mámbá guʼwíin. Mbá guʼwíin bi̱ Jeobá gáraʼwíin muxuʼmamijná mbá xúgíinʼ. Mbá guʼwíin bi̱ Jeobá gáraʼwíin makuʼmaminaʼ mámbáa xa̱bu̱.
15 Xa̱bu̱ bi̱ gákujmaa rí gíʼdoo mbá dí gíʼmaa maguma gámbáa, xa̱bu̱ buʼko̱ gíʼmaa rí mikhaa, ikhaa ga̱jma̱a̱ xúgíʼ rí gíʼdoo, numuu rí táʼnimbánuu dí Jeobá niʼthí maguma, ga̱jma̱a̱ niʼni mbá rí ma̱jti̱ʼ náa Israel”›”.
16 Miʼcha̱ rí i̱mba̱ néjtsuu Josué nigijxi̱i̱ ga̱jma̱a̱ niʼni rí xa̱bu̱ Israel muxnajxi̱mi̱jna̱ mámbá xuajin majkhaʼ, ga̱jma̱a̱ nixtaʼwíí xuajin chíʼgíiʼ dí na̱ʼkha̱ náa Judá.
17 Niʼni rí maguwáʼ mámbá guʼwíin bi̱ kúwá náa Judá, ga̱jma̱a̱ nixtaʼwíin bi̱ naguwáʼ náa zerahítas. Nda̱wa̱á niʼni dí mámbáa xa̱bu̱ maxnájxi̱minaʼ bi̱ na̱ʼkha̱ náa bi̱ naguwáʼ náa zerahítas. Ikhú nixtaʼwíin bi̱ kúwá náa goʼwóo Zabdí.
18 Nda̱wa̱á kayuuʼ niʼni dí makuʼmaminaʼ mámbáa xa̱bu̱ bi̱ xtáa náa goʼwóo Zabdí, ga̱jma̱a̱ bi̱ nixtiʼyáaʼ ninindxu̱u̱ Acán a̱ʼdióo Carmí, a̱ʼdióo Zabdí, a̱ʼdióo Zérah, bi̱ na̱ʼkha̱ náa xuajin chíʼgíiʼ ndrígóo Judá.
19 Ikhú Josué niʼthúu̱n Acán: “A̱ʼdióʼ, mbá péñu, atani̱ mba̱a̱ Jeobá Dios ndrígóo Israel, aratháán dí nitani̱. Mbá péñu, arathúnʼ dí nitani̱. Xátarkaʼumáʼáanʼ”.
20 Acán niriʼñuu Josué: “Gajkhun má, ikhúún nikuʼdáminaʼ aʼkhá náa inuu Jeobá Dios ndrígóo Israel, rígi̱ dí nini̱.
21 Índo̱ ndi̱yo̱o̱ náa dí niguanáa, mbá xtíin mitsaanʼ* dí na̱ʼkha̱ náa Sinar, ga̱jma̱a̱ 200 siclos* plata, ma̱ngaa 50 siclos oro, ninigu̱ʼ, ikha jngóo nijkháaʼ ka̱gu̱ʼ. Nirkaʼwu náa agoo guʼwá xtiin rí xtáá ga̱jma̱a̱ náa agoo kajti mbújkha̱a̱”.
22 Mbá nacha̱ Josué nikuʼmiin nguéjmi̱i̱n xa̱bu̱ magún, ikhiin nigún ragáñúún náa goʼwóo Acán. Nixkamaa xtíin ga̱jma̱a̱ mbújkha̱a̱ náa agoo goʼwóo.
23 Ikha jngóo nirawíi dí nirkaʼwu náa goʼwóo, niguáa̱n kudúún náa Josué ga̱jma̱a̱ náa inún xúgíinʼ xa̱bu̱ Israel ga̱jma̱a̱ niniña̱a̱nʼ náa inuu Jeobá.
24 Ikhú Josué gajmíi̱n xa̱bu̱ xuajin Israel nigún kuya̱a̱ Acán a̱ʼdióo Zérah, ga̱jma̱a̱ nigún kudúún plata, xtíin dí mitsaanʼ, mbá xíʼtoo oro, e̱ji̱i̱n, waʼxiinʼ, xediu̱u̱, búrriu̱u̱, mugiu̱u̱, goʼwóo, ga̱jma̱a̱ xúgíʼ rí gíʼdoo, nitsimún kudiin náa mata* mbaaʼ Acor.
25 Josué niʼthúu̱n: “Náá numuu dí ni̱dxa̱ʼ jcháaʼ gamiéjunʼ rígi̱ rá. Dí xúgi̱ Jeobá ma̱ʼkha̱ kayóo gamiéjunʼ náa ikháán”. Ikhú mbá xúgíinʼ xa̱bu̱ Israel nixiyáa ga̱jma̱a̱ itsí, nda̱wa̱á nitsikha̱a̱, mbá xúgíinʼ nixnúún ga̱jma̱a̱ itsí.
26 Ga̱jma̱a̱ ikhú nisngutama̱a̱ʼ mbá rutsúu̱ itsí náa tsu̱du̱u̱, ga̱jma̱a̱ xúʼko̱ eʼgíʼ asndu mbiʼi xúgi̱. Ikhú niwi̱ji̱i̱ dí nakásngañu̱u̱ʼ Jeobá. Ikha jngóo mbaaʼ rúʼko̱ mbiʼyuu ku̱ʼu̱u̱n Acor* asndu rí mbiʼi xúgi̱.
Mbaʼa nota
^ O “tribu”.
^ O “este”.
^ Rí nandoo gáʼthúu̱n, ‹náa nurawíi itsí›.
^ O “e̱jna̱”.
^ Xóo muʼthá, xígií náa nagájnuu a̱jkha̱ʼ.
^ O “lajuíin”.
^ O “nagui̱i̱”.
^ O “bóo”.
^ Rí nandoo gáʼthúu̱n ‹gamiéjunʼ› o ‹xkujndu (ga̱ʼkhu̱)›.
