Josué 8:1-35
8 Jeobá niʼthúu̱n Josué: “Xámíñáaʼ ni má xáguáʼáánʼ. Atatsimaaʼ gajmiáanʼ xúgíinʼ soldado mu mataxmína̱ʼ gajmiáanʼ xa̱bu̱ Hai. Numuu dí maxnajxiáaʼ rey ndrígóo Hai, xa̱bi̱i̱, xuajñuu ga̱jma̱a̱ mbayuuʼ.
2 Atani̱ ga̱jma̱a̱ʼ xuajin Hai ma̱ngaa rey ndrígóo xó má nitani̱ ga̱jma̱a̱ʼ Jericó. Mú dí xúgi̱ ma̱ndoo muda gúʼgua̱a̱ʼ dí niguanáa ga̱jma̱a̱ xujkiún. Ma̱ngaa ataniratiin mbaʼin xa̱bu̱ bi̱ murkaʼwumijná náa kidxuuʼ xuajin mu xúʼko̱ nda̱a̱ tsu̱ma̱ gátu̱ʼu̱u̱n muni̱ gámbáa xuajin”.
3 Ikha jngóo Josué gajmíi̱n soldado ndrígóo nitsimún gúxmijná gajmiún xa̱bu̱ Hai. Josué niraʼwíin mbá 30,000 soldado bi̱ guáʼdáá tsiaki̱i̱ ga̱jma̱a̱ nikuʼmiin magún mbruʼun.
4 Niʼtáñajúúnʼ muni̱ rígi̱: “Gakuwáanʼla xawii mu muʼguala gúrkaʼwumijná náa kidxuuʼ xuajin. Xátsíngua̱la wéñuuʼ náa xuajin, gakuwáanʼla xawii.
5 Ikhúún gajmíʼ xúgíinʼ bi̱ maguanúʼ muxuʼmamíjnáxu̱ náa xuajin. Índo̱ gágajnún mu muxmijná gajmiúxu̱ xó má nini̱ nákha ginii, ikhú magayúxu̱.
6 Índo̱ gágajnún ruxkuxu̱, munixu̱ʼ dí matsíngu̱únʼ náa xuajin, ikhiin muthi: ‹Nagáñún mbu̱júu̱ xó má nákha ginii›. Ga̱jma̱a̱ ikhú magayúxu̱.
7 Ikhú ikháanʼ gíʼmaa magajnála náa nirkaʼwumijná ga̱jma̱a̱ muni̱ gámbáa xuajin, numuu dí Jeobá Dios ndrígala nixnájxala xuajin.
8 Índo̱ gáta̱ʼa̱la náa xuajin gugída̱a̱ʼ aguʼ mi̱kha. Gíʼmaa mu̱ni̱ xó má eʼthí Jeobá. Rígi̱ nindxu̱u̱ dí natañájuanla mu̱ni̱”.
9 Josué nikuʼmiin ga̱jma̱a̱ ikhiin nigún náa dí murkaʼwumijná, niguanún náa ta̱pho̱o̱ Betel ga̱jma̱a̱ Hai, dí naguanúu xígií náa narámaaʼ a̱jkha̱ʼ* náa Hai. Ga̱jma̱a̱ Josué niguanúu gajmíi̱n eʼwíinʼ soldado mbruʼun rúʼko̱.
10 I̱mba̱ néjtsuu índo̱ Josué nigijxi̱i̱ miʼcha̱, nigímbíin xúgíinʼ soldado ga̱jma̱a̱ bi̱ kuya̱ edxu̱u̱ náa Israel mu maʼga gajmíi̱n náa xuajin Hai.
11 Xúgíinʼ soldado bi̱ niguanúu gajmíi̱n nitsimún ga̱jma̱a̱ niguájun náa ridoo xuajin. Nitri̱gi̱i̱n xígií náa ridoo xuajin Hai náa ridoo mata dí kua̱ʼa̱n náa Hai.
12 Josué nikuʼmiin mbá 5,000 xa̱bu̱ mu murkaʼwumijná náa ta̱pho̱o̱ Betel ga̱jma̱a̱ Hai, xígií náa narámaaʼ a̱jkha̱ʼ náa xuajin.
13 Ikhú israelitas nigi̱ʼi̱i̱n xígií náa tsu̱du̱u̱ xuajin ga̱jma̱a̱ eʼwíinʼ nigi̱ʼi̱i̱n xígií náa narámaaʼ a̱jkha̱ʼ náa xuajin. Mbruʼun rúʼko̱ Josué ni̱jkha̱nú asndu náa ta̱pha̱ mata.*
14 Índo̱ rey ndrígóo Hai ndiʼñún, mbá nacha̱ ikhaa gajmíi̱n xa̱bu̱ xuajin nákhíí miʼcha̱ nigájnún gúxmijná gajmiún xa̱bu̱ Israel náa mijngii mata dí rígá náa ku̱ba̱ʼ mijxooʼ.* Mú ikhaa na̱nguá eʼyoo á mu náa kidxuuʼ xuajin kúwá bi̱ nirkaʼwumijná.
15 Índo̱ xa̱bu̱ Hai nigájnún, ikhú Josué gajmíi̱n xúgíinʼ xa̱bu̱ Israel nigáñún náa kamba̱a̱ dí na̱jkha̱ xígií náa ku̱ba̱ʼ mijxooʼ.
16 Ikhú nijuiʼthúún mbá xúgíinʼ bi̱ kúwá náa xuajin mu magún ruxkúún, índo̱ nigún ruxkáá Josué nitsíngu̱u̱nʼ itháan náa xuajin.
17 Xúgíinʼ xa̱bu̱ bi̱ kúwá náa Hai ga̱jma̱a̱ náa Betel nigájnún ruxkúún israelitas. Káaʼ má paʼta xúʼko̱ xkrugua niniña̱a̱nʼ ga̱jma̱a̱ nigún ruxkúún.
18 Jeobá niʼthúu̱n Josué: “Ataxruíya̱ʼ náa xuajin Hai kudú* dí jchá, numuu dí naxnajxí náa ñawáanʼ”. Ikhú Josué nikrui̱ya̱ʼ náa xuajin kudú dí kayá.
19 Índo̱ nikrui̱ya̱ʼ kudú, ikhú bi̱ nirkaʼwumijná nigájnaán ikhí, nigún ragáñúún náa xuajin ga̱jma̱a̱ nini̱ gámbáa. Mbá nacha̱ nigida̱a̱ʼ aguʼ nikha̱a̱.
20 Índo̱ xa̱bu̱ Hai nitangiín niyejxi̱ tsu̱di̱i̱ ndiyáá dí nagájnuu gúní náa xuajin dí asndu nakráʼáan náa mekhu, ikhú niguámbá tsiaki̱i̱ ndrígu̱ún ga̱jma̱a̱ nánguá ndiyáá náa magún. Ikhú bi̱ nigún ragáñúún xígií náa ku̱ba̱ʼ mijxooʼ nitangiín kudiin bi̱ nagún ruxkúún.
21 Índo̱ Josué ga̱jma̱a̱ xúgíinʼ xa̱bu̱ Israel ndiyáá dí bi̱ nirkaʼwumijná niʼngu̱u̱n nini̱ gámbáa xuajin, ga̱jma̱a̱ índo̱ ndiyáá dí nagájnuu gúní náa xuajin, ikhú nitangiín ga̱jma̱a̱ niradíin xúgíinʼ xa̱bu̱ Hai.
22 Ga̱jma̱a̱ eʼwíinʼ nigájnún náa xuajin nigún gútsijnún, xúʼko̱ niʼni dí xa̱bu̱ Hai niguanún ta̱pha̱, numuu dí náa mámbá níjniúu kúwá mbawíí israelitas, niradíin mbá xúgíinʼ túniña̱a̱ʼ dí nimbáa makríyáaʼ.
23 Mú rey ndrígóo Hai nirugua̱a̱ ndaʼya ga̱jma̱a̱ nigún kuya̱a̱ náa Josué.
24 Índo̱ israelitas niguámbu̱u̱n niradíin mbá xúgíinʼ xa̱bu̱ Hai náa xanáá, bi̱ nigún ruxkúún náa ku̱ba̱ʼ mijxooʼ, índo̱ niguámbu̱u̱n niradíin xúgíinʼ bugi̱. Nitangiín náa xuajin Hai niradíin mbá xúgíinʼ bi̱ kúwá ikhí ga̱jma̱a̱ espada.
25 Mbá xúgíinʼ bi̱ nikháñún mbiʼi rúʼko̱, xó má xa̱bekha ga̱jma̱a̱ gu̱ʼu̱ ninindxu̱ún mbá 12,000 xa̱bu̱ bi̱ kúwá náa Hai.
26 Josué tárígúuʼ ñawúunʼ índo̱ nikrui̱ya̱ʼ kudú náa xuajin asndu índo̱ niguámbu̱u̱n nini̱ gámbíin mbá xúgíinʼ xa̱bu̱ bi̱ kúwá náa Hai.
27 Xa̱bu̱ Israel niguanún gajmiún xujkiún ga̱jma̱a̱ xúgíʼ dí niguanáa náa xuajin, xó má Jeobá niʼthúu̱n maʼni Josué.
28 Josué nitsíkáa Hai ga̱jma̱a̱ niʼni gámbáa, i̱ndó itsí tri̱ga̱ niguanúu asndu dí mbiʼi xúgi̱.
29 Ikhú nixíyáa rey ndrígóo Hai ga̱jma̱a̱ nirájkhaa* náa mbá ixi̱ asndu wakíʼ. Índo̱ inu marámáaʼ a̱jkha̱ʼ Josué niʼthún dí muriguíi náa ixi̱. Nda̱wa̱á nigún gúda̱a̱ʼ náa rexo̱o̱ xuajin ga̱jma̱a̱ nirngujxi̱ itsí náa tsu̱du̱u̱, xúʼko̱ niguanúu asndu dí mbiʼi xúgi̱.
30 Ikhú Josué niʼni mbá náa mikarámáʼ tsigijñaʼ náa kúbá Ebal mu mixnájxi̱ náa inuu Jeobá Dios ndrígóo Israel,
31 xó má Moisés xa̱bi̱i̱ Jeobá nikuʼmiin muni̱ israelitas, ga̱jma̱a̱ xó má naʼthí náa Xtángoo ndrígóo Moisés: “Náa nakarámáʼ tsigijñaʼ rígi̱, nini̱ ga̱jma̱a̱ itsí kañiiʼ dí táwiʼtá ga̱jma̱a̱ nimbá ajua̱nʼ”. Ikhí nixnajxi̱ tsigijñaʼ gamajkhu dí nakarámáʼ náa inuu Jeobá ga̱jma̱a̱ tsigijñaʼ dí tsímáá.*
32 Náa itsí rúʼko̱ niniri̱ya̱a̱ʼ Xtángoo dí Moisés niʼnirámáʼ náa inún israelitas.
33 Xúgíinʼ israelitas, bi̱ kuya̱ edxu̱u̱, xa̱bu̱ bi̱ guáʼdáá mbá ñajunʼ ga̱jma̱a̱ bi̱ nunimbaníí xkujndu guájun náa mámbá níjniúu Arca,* náa inún ndxajkun levitas bi̱ nagún kuñu̱u̱n arca dí nimbánuu ndrígóo Jeobá. Ikhí kuájun xa̱bu̱ bi̱ naguwaáʼ ga̱jma̱a̱ bi̱ kúwá má ikhí. Mbá taphi̱i̱n dí ikhiin kúwá náa kúbá Guerizim ga̱jma̱a̱ i̱mbá taphi̱i̱n kúwá náa kúbá Ebal (xó má nikuʼmiin muni̱ Moisés, xa̱bi̱i̱ Jeobá), mu xúʼko̱ maguma tsajkurámíinʼ xa̱bu̱ Israel.
34 Nda̱wa̱á dí rúʼko̱ Josué niguxnuu gakhi̱i̱ ajngáa dí na̱ʼkha̱ náa Xtángoo, xóo dí maguma tsajkurámíinʼ ga̱jma̱a̱ dí majuiʼthá tsríguíin, xó má na̱ʼkha̱ raʼthí náa nigumarámáʼ Xtángoo.
35 Josué niguxnuu gakhi̱i̱ náa xúgíinʼ israelitas dí Moisés nikuʼma maguma, rígi̱ nidxawíín xúgíinʼ gu̱ʼu̱, e̱ji̱n ga̱jma̱a̱ náa xa̱bu̱ bi̱ naguwaáʼ bi̱ kúwá gajmiún.
