Josué 9:1-27
9 Índo̱ niguánú nidxawíín xúgíinʼ reyes bi̱ kúwá xígií náa narámaaʼ a̱jkha̱ʼ* náa mañu Jordán, bi̱ kúwi̱i̱n náa kúbá, náa Sefelá, náa mbá xúgíʼ rawuunʼ lamáa Mba̱a̱* náa ridoo Líbano, hititas, amorreos, cananeos, perizitas, heveos gajmiún jebuseos,
2 nigimbúmíjná mu muxmijná gajmiún Josué mangiin israelitas.
3 Xa̱bu̱ Gabaón nidxawíín rí Josué niʼniún xa̱bu̱ bi̱ kúwá náa xuajin Jericó ga̱jma̱a̱ náa xuajin Hai.
4 Ikhiin nindxaʼwamíjna̱ májánʼ rí muni̱, nijieʼdúún búrriu̱ún gúxtáa rí wayuu náa kajti rí muda gágún, ma̱ngaa xtá kulámbra* dí wayuu rí kiʼxmíi̱ náa kajni̱ʼ vino.
5 Kajngruʼún nigún raxtá* rí niguma̱á, nitu̱u̱ xtíñún, pan rí kuda niʼni gujkhuʼ ga̱jma̱a̱ nijmi̱gu̱u̱.
6 Nigún gúyáá Josué náa Guilgal, nitháán ikhaa ga̱jma̱a̱ xa̱bu̱ Israel: “Tsínguáʼ xuajin náa nigúwaʼxu gambanála ga̱jma̱á nindxu̱xu̱”.
7 Mú xa̱bu̱ Israel nithúún xa̱bu̱ heveos:* “Mbáa mijngii má gi̱i̱ kuwáanʼla, káʼnii lá gambánulú rá.”
8 Ikhiin niriʼñáán Josué: “Nindxu̱xu̱ xa̱bia̱a̱ʼ”.*
Mú Josué nirajxu̱u̱n: “Tsíín ñajuanla ga̱jma̱a̱ náá eguwaʼla rá.”
9 Ikhiin nitháán: “Tsínguáʼ náa xuajin eguwáʼ xa̱bia̱a̱ʼ ga̱jma̱a̱ numuu mbiʼyuu Jeobá Dios ndrígáaʼ, numuu rí nidxawíínʼxu ga̱jma̱a̱ numuu, ga̱jma̱a̱ xúgíʼ rí niʼni náa Egipto,
10 ga̱jma̱a̱ xúgíʼ rí niʼni ga̱jma̱a̱ numún a̱jmi̱i̱n reyes amorreos bi̱ kúwi̱i̱n xígií náa ridoo* mañu Jordán, rey Sehón bi̱ niʼtáñajunʼ náa Hesbón ga̱jma̱a̱ rey Og bi̱ nixtáa náa Basán bi̱ niʼtáñajunʼ náa Astarot.
11 Ikha jngóo xa̱bu̱ bi̱ kuya̱ edxu̱u̱ ga̱jma̱a̱ xúgíinʼ xa̱bu̱ xuajñunʼxu nituxu̱, ‹Guda gúʼguala rí mbaʼyála náa kamba̱a̱ ga̱jma̱a̱ gaʼguala gúñu̱u̱n. Guthu̱u̱nla “Mani̱ndxu̱xuʼ ñumbáá ndrígala, gambanála ga̱jma̱á nindxu̱xu̱”›.
12 Mijkha pan rígi̱ nákha nigájnuxu náa guʼwuxu mu maguwáʼxu gúyala. Mú rí xúgi̱, gu̱ya̱a̱la niʼni gujkhuʼ ga̱jma̱a̱ nijmigu.
13 Ga̱jma̱a̱ xtá kulámbra náa kajni̱ʼ vino rígi̱ nuxi̱ʼ nákha nixíñánʼxu, mú rí xúgi̱ nitu̱u̱. Ga̱jma̱a̱ xtíñunxu ma̱ngaa raxtuxu niguuʼ numuu rí tsínguáʼ náa niguwáʼxu”.
14 Ikhú israelitas nirugua̱* rí kuda niguwáʼ xa̱bu̱ Gabaón, mú na̱nguá nirajxi̱i̱ Jeobá.
15 Josué nimbánuminaʼ gajmíi̱n rí makuwá tsímáá ga̱jma̱a̱ nixná ajngóo rí maniñúúnʼ má makuwá, rúʼko̱ nindxu̱u̱ rí nini̱ xa̱bu̱ bi̱ kuya̱ edxu̱u̱ náa xuajin rí gajkhun munimbáníí rí nithi.
16 Índo̱ niʼni ajtsú mbiʼi nda̱wa̱á rí nimbánúún má gajmiún, ndiʼkhu̱ún nidxawíín rí mijngii má kúwá.
17 Ikhú israelitas nigíʼdi̱i̱ nigún, índo̱ niʼni ajtsú mbiʼi niguáʼnu náa xuajñún, xuajñún nindxu̱u̱ Gabaón, Kefirá, Beerot ga̱jma̱a̱ Quiryat-Jearim.
18 Mú israelitas nda̱a̱ rí niniu̱u̱n, numuu rí xa̱bu̱ bi̱ kuya̱ edxu̱u̱ náa xuajin ni̱xna̱ ajngún ga̱jma̱a̱ numuu mbiʼyuu Jeobá Dios ndrígóo Israel, ikha jngóo xa̱bu̱ xuajin nigi̱ʼdi̱i̱ nixieʼkhá ga̱jma̱a̱ numún xa̱bu̱ bi̱ kuya̱ edxu̱u̱.
19 Xúgíinʼ xa̱bu̱ bi̱ kuya̱ edxu̱u̱ nithúún xa̱bu̱ xuajin: “Ni̱xna̱ ajngúxu ga̱jma̱a̱ numuu mbiʼyuu Jeobá Dios ndrígóo Israel, ikha jngóo xándoo muʼniulú dí ra̱májánʼ.
20 Rígi̱ nindxu̱u̱ rí muʼniu̱u̱lú: Muniʼñúún má makuwá mu xáʼni rí mumíniiʼ Dios ga̱jma̱a̱ numuu rí nixná ajngúlú”.
21 Ga̱jma̱a̱ nithúún xóó: “Gákuwá má, mú ikhiin gánindxu̱ún bi̱ murangoo ixi̱ ga̱jma̱a̱ iyaʼ mu majmúún xúgíinʼ xa̱bu̱ xuajin”. Rúʼko̱ nindxu̱u̱ rí nithi bi̱ kuya̱ edxu̱u̱.
22 Josué nindxaʼwúún ga̱jma̱a̱ niʼthúún: “Ndíjkha rí ni̱ni̱ nduwáanʼxu̱ nithala̱ ‹Tsínguáʼ eguwaʼxu›, á mu dí mijngii má gi̱i̱ kuwáanʼla rá.
23 Ikha jngóo dí xúgi̱ majuiʼthá tsríguáanʼla ga̱jma̱a̱ manindxa̱la̱ má xúʼko̱ ñumbáá bi̱ murangoo ixi̱ ga̱jma̱a̱ mbuyáʼ iyaʼ majmaa náa goʼwóo Dios ndrígóʼ”.
24 Ikhiin niriʼñáán Josué: “Numuu dí xa̱bia̱a̱ʼ bugi̱, nijuiʼthúún kaʼwu rí Jeobá Dios ndrígáaʼ niʼthúu̱n xa̱bi̱i̱ Moisés dí maxnála ikháanʼ xúgíʼ ku̱ba̱ʼ rígi̱ ga̱jma̱a̱ dí maʼni gámbíin xúgíinʼ xa̱bu̱ bi̱ kúwá. Nimíñunxu rí muradiáanʼxu, ikha jngóo xígi̱ kaʼnii ninixu̱.
25 Dí xúgi̱ kuwáanʼxu̱ náa ñawáanʼ mu̱nixu̱ dí gatanduʼuxu̱ ga̱jma̱a̱ ataniuxu̱ rí májánʼ má gáta̱ya̱a̱ ikháán”.
26 Rúʼko̱ dí niʼni gajmíi̱n, niʼni káwíin náa israelitas ga̱jma̱a̱ túradíin.
27 Mú mbiʼi rúʼko̱, Josué nixnúún ñajunʼ dí murangoo ixi̱ ga̱jma̱a̱ dí mbuyáʼ iyaʼ dí majmúún xa̱bu̱ xuajin ga̱jma̱a̱ dí majmaa náa najuixnájxi̱ tsigijñaʼ náa inuu Jeobá náa má gaʼthí ikhaa* ga̱jma̱a̱ rúʼko̱ má rí eni̱ asndu rí mbiʼi xúgi̱.
Mbaʼa nota
^ O “oeste”.
^ O “mar Grande”. Xóo muʼthá, mar Mediterráneo.
^ O “odres”.
^ O “chadún”.
^ Xa̱bu̱ heveos kúwá tikhuun mangiin náa xuajin Gabaón.
^ O “ñumbáá”.
^ Xóo muʼthá, xígií náa nagájnuu a̱jkha̱ʼ.
^ O “ndiyáá”.
^ Xóo muʼthá, Jeobá.
