Números 23:1-30
23 Ikhú Balaam niʼthúu̱n Balac: “Atani̱ májáánʼ gi̱i̱ mbá juwan náa mikarámáʼ tsigijñaʼ ga̱jma̱a̱ atani̱ míjíinʼ mbá juwiin xedi̱ ga̱jma̱a̱ mbá juwiin mugu̱ e̱jmba̱a̱”.
2 Balac mbá nacha̱ má niʼni xóo niʼthúu̱n Balaam. Balac ga̱jma̱a̱ Balaam nixnajxi̱i̱ mbáa xedi̱ ga̱jma̱a̱ mbáa mugu̱ e̱jmba̱a̱ náa mámbá dí nakarámáʼ tsigijñaʼ.
3 Nda̱wa̱á, Balaam niʼthúu̱n Balac: “Aguanáaʼ gi̱i̱ náa niraxnáxi̱ tsigijñaʼ ndrígáaʼ ga̱jma̱a̱ ikhúún maʼgáaʼ. Mbáa Jeobá maʼtámíjná ga̱jma̱á nindxu̱ʼ. Asndu ndiéjunʼ má dí gáʼthúnʼ, matha̱a̱nʼ má”. Ikhaa ni̱jkha̱ náa mbá bíjní tsaʼtsaʼ.
4 Ikhú Dios niʼtámíjná ga̱jma̱a̱ Balaam, ga̱jma̱a̱ Balaam niʼthúu̱n: “Nigruíga̱ eniʼ mbá juwan náa mikarámáʼ tsigijñaʼ ga̱jma̱a̱ mbáa xedi̱ ma̱ngaa mbáa mugu̱ e̱jmba̱a̱ nixnajxíi náa mámbá dí ikhaa”.
5 Jeobá nigídáʼ ajngáa rí maʼthí náa rawuunʼ Balaam, niʼthúu̱n: “Atanga̱án náa xtáa Balac, rígi̱ gíʼmaa maratha̱a̱n”.
6 Ikhaa nitanga̱a̱ ga̱jma̱a̱ ndiʼyoo rí Balac gajmíi̱n xúgíinʼ príncipes bi̱ kúwá náa Moab ndri̱gi̱i̱n náa nijuixnájxi̱ tsigijñaʼ dí nakarámáʼ.
7 Ikhú niʼthúu̱n ajngóo Dios rígi̱:
“Balac, rey ndrígóo Moab, ni̱ʼkha̱ kañún asndu náa Aram,asndu náa kúbá dí rígá xígií náa nagájnuu a̱jkha̱ʼ:*
‹Ayi̱ ga̱jma̱a̱ aratátsríguíi Jacob ga̱jma̱a̱ numuʼ.
Xúʼko̱, ayi̱ gáratha̱a̱n dí gágíʼnuu Israel›.
8 Xú kaʼnii gátatsríguíi ikhúún bi̱ Dios na̱nguá niʼtátsríguíi rá.
Xú kaʼnii gándoo gáthu̱u̱n dí maguáʼníí ikhúún bi̱ Jeobá na̱nguá niʼthúún dí maguáʼníí rá.
9 Asndu náa tsu̱du̱u̱ itsí naʼngo̱ʼ nda̱ñu̱u̱n,asndu náa tsu̱du̱u̱ bíjní nakujmaa gíi̱nʼ.
Nindxu̱u̱ mbá xuajin bi̱ xtáa mbáwíí,Tségixnii náa majñu̱únʼ i̱ʼwáʼ xuajin.
10 Tsáá gáʼngo̱o̱ gáguxnuu yujndaʼ ndrígóo Jacob rá.Tsáá gáʼngo̱o̱ gáguxnii mbá nguéjmi̱i̱n* xa̱bu̱ Israel rá.
Atatsíñúnʼ makhañúʼ xó má nakháñún xa̱bu̱ sia̱nʼ,gambu̱ún xó má gámbíin ikhiin”.
11 Ikhú Balac niʼthúu̱n Balaam: “Dí nitani̱ rá. Ni̱ʼkhá ka̱ña̱a̱n mu marata tsríguíin xa̱bu̱ sia̱nʼ ndrígóʼ, i̱ndó rí natani̱ nindxu̱u̱ dí natani̱ tsajkurámíinʼ”.
12 Ikhaa niriʼñuu: “Lá raʼkháa i̱ndó ma̱ta̱ ajngáa dí Jeobá nigídáʼ náa rawunʼ ráʼ.”
13 Balac niʼthúu̱n: “Mbá péñu, ayi̱ ga̱jma̱á nindxu̱ʼ náa i̱mba̱ mbaaʼ náa ma̱ndoo matañu̱u̱n. Xáʼngo̱o̱ gátañu̱u̱n xúgíinʼ, káaʼ mbá nguáthi̱i̱n gátañu̱u̱n. Asndu ikhí gárata tsríguíin ga̱jma̱a̱ numuʼ”.
14 Ikha jngóo ni̱jkha̱ kayáa náa mbayuuʼ Zofim, náa tsu̱du̱u̱ Pisgá, ikhí niʼni mújúunʼ mbá juwan náa mikarámáʼ tsigijñaʼ náa mámbá nixnájxi̱i̱ mbáa xedi̱ ga̱jma̱a̱ mbáa mugu̱ e̱jmba̱a̱.
15 Balaam niʼthúu̱n Balac: “Aguanáaʼ gi̱i̱ náa niraxnáxi̱ tsigijñaʼ ndrígáaʼ, ikhúún maʼgá ñuʼún gátamíjná ga̱jmu̱ʼ”.
16 Jeobá niʼtámíjná ga̱jma̱a̱ Balaam, nigídáʼ ajngáa rígi̱ náa rawuunʼ, niʼthúu̱n: “Atanga̱án náa xtáa Balac ga̱jma̱a̱ aratháán rígi̱”.
17 Ikhaa ni̱jkha̱a̱ náa xtáa Balac ndiʼyoo rí wíji̱ náa nixnájxi̱ tsigijñaʼ ga̱jma̱a̱ ikhí má xtáa gajmíi̱n príncipes bi̱ kúwá náa Moab. Balac nirajxu̱u̱: “Ndiéjunʼ niʼtháanʼ Jeobá rá.”
18 Ikhú niʼthúu̱n ajngóo Dios rígi̱:
“Atujxa̱a̱ʼ Balac ga̱jma̱a̱ atadxawíín.
Atadxawunʼ a̱ʼdióo Zipor.
19 Dios na̱nguá nindxu̱u̱ mbáa xa̱bu̱ numbaaʼ bi̱ naʼthí rí minduwaʼ,ni má mbáa a̱ʼdióo xa̱bu̱ numbaaʼ mu mariʼkhu̱u̱ dí naʼthí.
Índo̱ rígá mbá dí naʼthí maʼni, lá tséʼnimbánuu xáʼ.
Índo̱ ikhaa nakudaminaʼ mbá dí maʼni, lá tséʼnimbánuu xáʼ.
20 ¡Ndu̱ya̱a̱la ráʼ.! Niguwa̱ʼ ku̱ñu̱u̱n mu ma̱ni̱ tsajkurámiinʼ,ikhaa niʼni tsajkurámiinʼ ga̱jma̱a̱ ikhúún ndaa xóo mariʼkhu̱u̱.
21 Dios xániñuuʼ magumaa brujo Jacob,ikhaa xániñuuʼ ma̱ʼkha̱nú mbá gamiéjunʼ náa inuu Israel.
Jeobá Dios ndrígu̱ún xtáa ga̱jma̱a̱ ni̱ndxu̱ún,ikhiin nutháán rí nindxu̱u̱ rey ndrígu̱ún.
22 Dios xtáa raguwíin náa Egipto.
Ikhiin nduyáá rí ikhaa nindxu̱u̱ xóo chi̱jyu̱u̱ʼ xedi̱ xáná.
23 Xawan ndaa rí ejmaa náa Jacob,ni má magia nda̱a̱ rí ejmaa náa Israel.
Dí xúgi̱ ma̱ndoo majuiʼthá ga̱jma̱a̱ numuu Jacob ma̱ngaa Israel:
‹¡Gu̱ya̱a̱ dí Dios niʼni!›.
24 Xuajin rígi̱ matujxu̱u̱ xóo mbáa león,xó má mbáa león índo̱ nawi̱ji̱.
Xábóoʼ asndu índo̱ gíkhúu xujkhúʼ bi̱ niguguaaga̱jma̱a̱ asndu índo̱ gágáan eʼdiún bi̱ nigudíin”.
25 Ikhú Balac niʼthúu̱n Balaam: “A mu tséjmáán gárata tsríguíin, xátani̱ tsajkurámiinʼ má ma̱ngaa”.
26 Balaam niriʼñuu Balac: “Lá na̱nguá ni̱tha̱a̱nʼ rí ma̱ni̱ xúgíʼ dí Jeobá gáʼthúnʼ ráʼ.”
27 Balac niʼthúu̱n Balaam: “Mbá péñu, atatsíñúnʼ maʼgá ka̱ña̱a̱n i̱mba̱ níʼkhá, mbáa májánʼ má gáʼyoo Dios bi̱ gajkhun dí marata̱ tsríguíin asndu ikhí ga̱jma̱a̱ numuʼ”.
28 Ikha jngóo Balac ni̱jkha̱ kayáa Balaam náa inuu Peor, náa naʼni inuu xígií náa Jesimón.*
29 Ikhú Balaam niʼthúu̱n Balac: “Atani̱ májáánʼ mbá juwan náa mikarámáʼ tsigijñaʼ ga̱jma̱a̱ atani̱ míjíinʼ mbá juwiin xedi̱ ga̱jma̱a̱ mbá juwiin mugu̱ e̱jmba̱a̱”.
30 Ikha jngóo Balac niʼni xó má Balaam niʼthúu̱n, ikha nixnájxi̱i̱ mbáa xedi̱ ga̱jma̱a̱ mbáa mugu̱ e̱jmba̱a̱ náa mámbá rí nakarámáʼ tsigijñaʼ.
Mbaʼa nota
^ O “este”.
^ Náa ajngáa hebreo naʼthí, “mbóó rí náa a̱jkhu̱”.
^ O mbáa “náa ku̱ba̱ʼ mijxooʼ”.
