Números 9:1-23
9 Timbá igu̱nʼ rí ma’ni a̱jma̱ tsiguʼ rí ikhiin nigájnún náa ku̱ba̱ʼ ndrígóo Egipto, Jeobá niʼtámíjná ga̱jma̱a̱ Moisés náa ku̱ba̱ʼ mijxooʼ* ndrígóo Sinaí, niʼthúu̱n:
2 “Israelitas gíʼmaa muni̱ májáánʼ tsigijñaʼ rí majuixnájxi̱ náa Pascua náa mbiʼi rí kaʼyoo.
3 Gíʼmaa muni̱ májáánʼ náa mbiʼi rí kaʼyoo, índo̱ gáʼni 14 ñajuunʼ gu̱nʼ rígi̱, índo̱ gáʼni wakíʼ.* Gíʼmaa muni̱ májáánʼ xó má eʼthí náa xúgíʼ kiʼtáñajunʼ, maguma ikháá má xóo kaʼyoo maguma”.
4 Ikha jngóo Moisés niʼthún israelitas rí muni̱ májáánʼ tsigijñaʼ rí majuixnájxi̱ náa Pascua.
5 Ikhú ikhiin nini̱ májáánʼ tsigijñaʼ rí majuixnájxi̱ náa Pascua náa timbá igu̱nʼ náa mbiʼi 14 ñajuunʼ gu̱nʼ, índo̱ gáʼni wakíʼ,* náa ku̱ba̱ʼ mijxooʼ ndrígóo Sinaí. Xó má Jeobá niʼtáñajuunʼ Moisés xúʼko̱ nini̱ israelitas.
6 Mú mbaʼin xa̱bekha nigumaa tsagiin ga̱jma̱a̱ numuu rí nirugua̱a̱ mbáa bi̱ nikháñuu, ikha jngóo na̱nguá xóo muni̱ májáánʼ tsigijñaʼ rí majuixnájxi̱ náa Pascua mbiʼi rúʼko̱. Ikhú nigún náa inuu Moisés ga̱jma̱a̱ Aarón mbiʼi má rúʼko̱.
7 Ikhiin nithi: “Niguma tsagáanʼxu ga̱jma̱a̱ numuu rí nirugua̱a̱xu̱ mbáa bi̱ nikháñuu. Ndiéjunʼ gándoo munixu̱ʼ rá. Nanduxuʼ rí muxnajxí tsigijñaʼ gamajkhu náa inuu Jeobá náa mbiʼi rí kaʼyoo gajmiúxu eʼwíinʼ israelitas”.
8 Moisés niriʼñúún: “Guguaʼthi̱i̱n má a̱ʼkhu̱ niʼchala, guniʼñúʼ madxawun ndiéjunʼ gáʼthí Jeobá ga̱jma̱a̱ numala”.
9 Ikhú Jeobá niʼthúu̱n Moisés:
10 “Arathún israelitas: ‹Á mu mbáa rí ikháanʼla o bi̱ gáguwáʼ nda̱wa̱á naguma tsagaa ga̱jma̱a̱ numuu rí naguguaa mbáa bi̱ nikháñuu o nigájnuu nijkha mitsínguánʼ, gíʼmaa maʼni mújúunʼ tsigijñaʼ gamajkhu dí majuixnájxi̱ náa Pascua ndrígóo Jeobá.
11 Ikhiin gíʼmaa muni̱ májáánʼ índo̱ gáʼni a̱jma̱ igu̱nʼ, mbiʼi 14, índo̱ gáʼni wakíʼ.* Mbiʼi má rúʼko̱ gíʼmaa mu̱phu̱ xuyuuʼ mugu̱ ga̱jma̱a̱ pan dí ragíʼdoo levadura ga̱jma̱a̱ ya̱ʼu̱ dí miʼkhu̱u̱n.
12 Ragíʼmaa muniña̱a̱ʼ asndu imbo̱o̱ néjtsuu, ni má xáʼyóoʼ majmigaʼ itsu̱u̱ mugu̱. Gíʼmaa muni̱ májáánʼ xó má eʼthí náa xúgíʼ kiʼtáñajunʼ ga̱jma̱a̱ numuu Pascua.
13 Á mu mbáa bi̱ mikaʼwii o na̱nguá ni̱jkha̱ mitsínguánʼ ga̱jma̱a̱ na̱nguá niʼni mújúunʼ tsigijñaʼ gamajkhu rí majuixnájxi̱ náa Pascua, mbaʼyóoʼ makhañúu náa xuajñuu, numuu rí na̱nguá nixnájxi̱ tsigijñaʼ gamajkhu náa Jeobá mbiʼi rí kaʼyoo. Xa̱bu̱ buʼko̱ maʼni numa̱a̱ aʼkhúun.
14 Á mu mbáa xa̱bu̱ na̱ʼkha̱á bi̱ xtáa náa ikháanʼla, ikhaa gíʼmaa maʼni mújúunʼ tsigijñaʼ gamajkuu dí majuixnájxi̱ náa Pascua ndrígóo Jeobá. Gíʼmaa maʼni mújúunʼ xó má eʼthí náa kiʼtáñajunʼ ga̱jma̱a̱ numuu Pascua, maguma ikháá xó má kaʼyoo maguma. Gíʼmaa marigá mbóo kiʼtáñajunʼ náa ikháanʼla, xó má náa xa̱bu̱ na̱ʼkha̱á ga̱jma̱a̱ bi̱ xtáa náa xuajin›”.
15 Mbiʼi rí nigi̱ʼi̱ guʼwá xtíin, du̱u̱n nigíʼdu̱u̱ nirugoo guʼwá xtíin, xóo muʼtá guʼwá xtíin dí nimbánuu rí mbruʼun nawi̱ji̱ mbá aguʼ náa tsu̱du̱u̱ guʼwá xtíin rí nimbánuu asndu i̱mba̱ néjtsuu.
16 Narígá má xúʼko̱ rígi̱: Du̱u̱n narugoo náa tsu̱du̱u̱ guʼwá xtíin rí mbiʼi, mú dí mbruʼun nawi̱ji̱ mbá aguʼ.
17 Índo̱ du̱u̱n natu̱xu̱u̱ náa tsu̱du̱u̱ guʼwá xtíin, ikhú mbá nacha̱ natuxu̱u̱n mu magún, índo̱ du̱u̱n na̱jkha̱nú nawi̱ji̱, ikhí má giʼi̱i̱n israelitas.
18 Xó má Jeobá eʼtáñajúúnʼ israelitas rí magún xúʼko̱ má Jeobá eʼtáñajúúnʼ dí magi̱ʼi̱i̱n. Índo̱ du̱u̱n nawanúu̱ náa tsu̱du̱u̱ guʼwá xtíin, ikhiin nagi̱ʼi̱i̱n má ikhí.
19 Índo̱ du̱u̱n naguanúu mba̱yu̱u̱ʼ mbiʼi náa tsu̱du̱u̱ guʼwá xtíin, israelitas nunimbu̱u̱n kuyáá Jeobá ga̱jma̱a̱ tsétujxu̱u̱n magún.
20 Nguáná du̱u̱n naguanúu mba̱yu̱u̱ʼ mbiʼi náa tsu̱du̱u̱ guʼwá xtíin. Xó má Jeobá eʼtáñajúúnʼ dí maguanún náa gíi̱nʼ, xúʼko̱ má Jeobá eʼthúún rí magún.
21 Nguáná du̱u̱n naguanúu i̱ndó dí mbruʼun asndu imbo̱o̱ néjtsuu, índo̱ du̱u̱n natu̱xu̱u̱ rí miʼcha̱, ikhiin natuxu̱u̱n nagún. Tséʼniuu má mbiʼi o mbruʼun, índo̱ du̱u̱n natu̱xu̱u̱, ikhiin natuxu̱u̱n nagún.
22 Índo̱ du̱u̱n naguanúu náa tsu̱du̱u̱ guʼwá xtíin, a̱jma̱ mbiʼi, mbá gu̱nʼ o itháan, bi̱ israelita naguanún náa gíi̱nʼ ga̱jma̱a̱ tsétujxu̱u̱n magún. Mú, á mu du̱u̱n natu̱xu̱u̱, ikhiin natuxu̱u̱n magún.
23 Xó má Jeobá eʼtáñajúúnʼ rí maguanún náa gíi̱nʼ, xúʼko̱ má Jeobá eʼtáñajúúnʼ dí matujxu̱u̱n magún. Nunimbu̱ún kiʼtáñajunʼ ndrígóo Jeobá xó má Jeobá niʼtáñajuunʼ maʼni Moisés.
Mbaʼa nota
^ O “desierto”.
^ Náa ajngáa hebreo naʼthí, “náa a̱jma̱ wakíʼ”. Nakujmaa dí rígi̱ nindxu̱u̱ índo̱ narámaaʼ a̱jkha̱ʼ índo̱ na̱jkha̱ raʼni mikína.
^ Náa ajngáa hebreo naʼthí, “náa a̱jma̱ wakíʼ”. Nakujmaa dí rígi̱ nindxu̱u̱ índo̱ narámaaʼ a̱jkha̱ʼ índo̱ na̱jkha̱ raʼni mikína.
^ Náa ajngáa hebreo naʼthí, “náa a̱jma̱ wakíʼ”. Nakujmaa dí rígi̱ nindxu̱u̱ índo̱ narámaaʼ a̱jkha̱ʼ índo̱ na̱jkha̱ raʼni mikína.
