Apocalipsis 7:1-17
7 Nda̱wa̱á dí rígi̱ ndi̱ñu̱u̱n a̱jkhui̱i̱n ángeles guájun náa a̱jkhu̱ níʼkhóo ku̱ba̱ʼ. Kúwá rurikháá giñánʼ dí na̱ʼkha̱ náa a̱jkhu̱ níʼkhóo ku̱ba̱ʼ, mu xáxnúu giñánʼ náa tsu̱du̱u̱ ku̱ba̱ʼ ni má náa lamáa ni má náa nimbá ixi̱.
2 Ma̱ngaa ndi̱yo̱o̱ i̱mba̱a̱ ángel bi̱ na̱ʼkha̱ ratsimuu náa nagájnuu a̱jkha̱ʼ,* kayá mbá sello ndrígóo Dios ndaʼya, niʼthún ga̱jma̱a̱ aʼwá gakhi̱i̱ a̱jkhui̱i̱n ángeles bi̱ nikhánún awan rí munigínáa ku̱ba̱ʼ ga̱jma̱a̱ lamáa.
3 Niʼthún: “¡Xúnigawíínʼ ku̱ba̱ʼ ni má lamáa ni má ixi̱, asndu índo̱ gúdramalú sello náa xkídúnʼ ñumbáá ndrígóo Dios ndrígúlú!”.
4 Nidxawuun rí bi̱ nindrigú sello: Ni̱ndxu̱ún mbá 144,000 bi̱ naguwáʼ náa xúgíʼ xuajen majkhaʼ ndrígu̱ún e̱ji̱i̱n Israel.
5 Náa xuajen chíʼgíiʼ ndrígóo Judá mbá 12,000 nindrigú sello;náa xuajen chíʼgíiʼ ndrígóo Rubén 12,000;náa xuajen chíʼgíiʼ ndrígóo Gad 12,000;
6 náa xuajen chíʼgíiʼ ndrígóo Aser 12,000;náa xuajen chíʼgíiʼ ndrígóo Neftalí 12,000;náa xuajen chíʼgíiʼ ndrígóo Manasés 12,000;
7 náa xuajen chíʼgíiʼ ndrígóo Simeón 12,000;náa xuajen chíʼgíiʼ ndrígóo Leví 12,000;náa xuajen chíʼgíiʼ ndrígóo Isacar 12,000;
8 náa xuajen chíʼgíiʼ ndrígóo Zabulón 12,000;náa xuajen chíʼgíiʼ ndrígóo José 12,000;ma̱ngaa náa xuajen chíʼgíiʼ ndrígóo Benjamín 12,000 nindrigú sello.
9 Nda̱wa̱á dí rígi̱ ndiñu̱u̱n mbaʼin xa̱bu̱ rí asndu nimbáa xáʼngo̱o̱ gáguxnii. Bi̱ naguwáʼ náa xuajen mba̱ʼu̱, xuajen majkhaʼ, xúgíinʼ enii xa̱bu̱, ga̱jma̱a̱ bi̱ nuthi mixtiʼkhu ajngáa bi̱ guájun náa inuu xílí ga̱jma̱a̱ náa inuu A̱ʼdá múgú. Kugíʼ xtíin miʼxá mbi̱jua̱, ma̱ngaa kuda ida náa ñawúúnʼ.
10 Nundxa̱ʼwa̱ ga̱jma̱a̱ aʼwá gakhi̱i̱: “¡Rí nikáwáánʼlú, gíʼmáánʼ náa Dios ndrígúlú bi̱ gíʼ náa xílí* ga̱jma̱a̱ náa A̱ʼdá múgú!”.
11 Xúgíinʼ ángeles bi̱ guájun náa mbájndi rawuunʼ xílí ga̱jma̱a̱ náa kúwá bi̱ kuya̱ edxu̱u̱ ma̱ngaa náa a̱jkhui̱i̱n querubines* nismbati̱gu̱u̱n náa inuu xílí ga̱jma̱a̱ ndiyamajkuíí Dios.
12 Nithi: “¡Xúʼko̱ gáʼni!* Dios ndrígúlú gíʼdoo ku̱ma̱ ga̱jma̱a̱ tsiakii, ikhaa kaʼyoo magruigú gamajkhu ga̱jma̱a̱ maguma mba̱a̱, xúgíinʼ gíʼmaa muni̱ mba̱a̱, muxna̱a̱ núma̱aʼ asndu kámuu mbiʼi. Xúʼko̱ gáʼni”.*
13 Ikhú mbáa bi̱ kayá edxu̱u̱ nirajxu̱ʼ: “Tsíin ni̱ndxu̱ún bi̱ nagún bi̱ kugíʼ xtíin miʼxá mbi̱jua̱ ga̱jma̱a̱ náá eguwáʼ xá.”
14 Ikha jngóo mbá nacha̱ niriʼña̱a̱: “Tátá, ikháán nindxa̱a̱ʼ bi̱ natayáá”. Ikhú ikhaa niʼthúnʼ: “Ikhiin ni̱ndxu̱ún bi̱ nagájnaán náa majphú mba̱a̱ ga̱ʼkhu̱ ma̱ngaa nijña̱a̱ xtíñún rí mbi̱jua̱, rí asndu niʼni̱i̱ miʼxá ga̱jma̱a̱ eʼdiuu A̱ʼdá múgú.
15 Ikha jngóo guájun náa inuu xílí ndrígóo Dios ga̱jma̱a̱ nuni̱ ñajuunʼ mitsúʼkháan mbiʼíí mbruʼun náa goʼwóo, ga̱jma̱a̱ bi̱ gíʼ náa xílí maxtri̱ga̱ guʼwá xtíin náa ikhiin.*
16 Ni xáxkidxu̱u̱n, ni xátangi̱i̱n makándawúnʼ, ni má a̱jkha̱ʼ xáʼni gíníin, ni má nimbá rí mijkha xáʼni gíníin.
17 Numuu rí A̱ʼdá múgú bi̱ wíji̱ náa inuu xílí mañewu̱u̱n ga̱jma̱a̱ maʼga kagui̱i̱n náa iduu iyaʼ rí ndaʼya. Ga̱jma̱a̱ Dios makúdíi mbá kayuuʼ iyooʼ idún”.
Mbaʼa nota
^ O “náa este”.
^ O “trono”.
^ O “bi̱ nduya”. Querubines ni̱ndxu̱ún ángeles bi̱ guáʼdáá mbá ñajunʼ mba̱a̱.
^ O “Amén”.
^ O “Amén”.
^ O “mañewu̱u̱n”.
