Rí na̱jkha̱ inún colosenses 1:1-29
1 I̱yi̱i̱ʼ rígi̱ niʼnirámáʼ Pablo apóstol ndrígóo Cristo Jesús ga̱jma̱a̱ ndxájulú Timoteo, xó má nindoo Dios,
2 mu maʼga inún bi̱ Dios niraʼwíin* ga̱jma̱a̱ a̱ngiu̱lú bi̱ guájun jmbu bi̱ kúwá mbóó gajmiún Cristo náa Colosas:
Garigá rí tsímáá ga̱jma̱a̱ rí májánʼ wéñuuʼ a̱jkiu̱u̱n Anu̱lú Dios náa ikháanʼla.
3 Índo̱ nutajkháanxu̱* ga̱jma̱a̱ numala, nuxna̱a̱xu̱ má xúʼko̱ núma̱a̱ Dios, Anu̱u̱ Jesucristo, bi̱ nindxu̱u̱ Tátá ndrígúlú,
4 nidxáwíínxu̱ ga̱jma̱a̱ numuu fe rí kuaʼdáála náa Cristo Jesús ma̱ngaa rí nandala kuñu̱u̱n xúgíinʼ xa̱bi̱i̱ ikhaa,
5 numuu rí náa mekhuíí rígá rí kuaʼti̱i̱nla, ikháanʼ má nidxawíín ga̱jma̱a̱ numuu rígi̱, índo̱ nindrígú rí gajkhun, rí nindxu̱u̱ ajngáa dí májánʼ,
6 rí ni̱jkha̱nú náa ikháanʼ. Xó má ajngáa rí májánʼ, ni̱jkha̱ ra̱ja̱a̱ ga̱jma̱a̱ niwán ri̱go̱o̱ náa numbaaʼ, xúʼko̱ má ejkha̱ raja̱a̱ náa ikháanʼla, asndu nákha mbiʼi rí nidxa̱wíín ma̱ngaa asndu nákha ndi̱ya̱a̱ xóo phú nindxu̱u̱ rí májánʼ wéñuuʼ a̱jkiu̱u̱n Dios.
7 Rúʼko̱ nindxu̱u̱ rí niʼsngála Epafras, ndxájuxu̱ bi̱ nanduxu̱ ku̱ya̱a̱, bi̱ nañajunʼ mbóó gajmiújxu̱ xóo ñumbáá ga̱jma̱a̱ bi̱ wíji̱ jmbu raʼni ñajuunʼ Cristo, bi̱ ni̱jkha̱ gámbáyala ga̱jma̱a̱ numuu xtiʼkhuxu̱.
8 Ikhaa ma̱ngaa niʼthúxu̱ ga̱jma̱a̱ numuu ngajua rí kuaʼdáála rí naxná espíritu.*
9 Ikhaa numuu rígi̱ rí asndu mbiʼi rí nidxáwíínxu̱, tséniʼñánxu̱ rutajkáan ga̱jma̱a̱ numala, rí muguaʼdáála mbá ku̱ma̱ jmbu rí nandoo Dios, ma̱ngaa rí majmañala ga̱jma̱a̱ rí makrua̱ʼala xúgíʼ rí naxná espíritu,
10 mu majngrui̱gala xó má nanigu̱u̱ʼ Jeobá,* gu̱ni̱ gadxíí ma̱ngaa gu̱ni̱ má xúʼko̱ ñajunʼ rí májánʼ ga̱jma̱a̱ gaʼga rajoo má xúʼko̱ ku̱ma̱ rí jmbu ndrígóo Dios náa ikháanʼla.
11 Ma̱ngaa nutajkáanxu̱ rí tsiakii ndrígóo Dios mambáyala maʼni gújkiáanʼ, mu ma̱ʼngo̱o̱ a̱jkia̱la muraʼníí xúgíʼ ga̱jma̱a̱ gagi,
12 ma̱ngaa gu̱xna̱a̱la núma̱aʼ Ana̱la, bi̱ niʼniratáanʼ makhánala rí mundri̱gúu̱ bi̱ ikhaa niraʼwíin, bi̱ kúwá náa nambiʼi aguʼ.
13 Ikhaa niʼnikáwáánʼ náa rí naʼtáñajunʼ rí mikrína ga̱jma̱a̱ ni̱jkha̱a̱ kaguáánʼ náa naʼtáñajunʼ A̱ʼdióo bi̱ nandoo kaʼyoo,
14 ga̱jma̱a̱ numuu ikhaa nindoo nikáwáánʼlú, numuu rí ikhaa nitsiwáanʼlú ga̱jma̱a̱ xúʼko̱ ikhaa nandoo naʼni mba̱a̱ a̱jkiu̱u̱n kaʼyoo aʼkhúlú.
15 Ikhaa, kayííʼ xóo Dios bi̱ tsékujmaa, bi̱ nigumaa ginii kayuuʼ náa xúgíʼ dí nigumawíi,
16 ga̱jma̱a̱ numuu ikhaa nigumawíi xúgíʼ dí rígá mekhuíí ga̱jma̱a̱ náa tsu̱du̱u̱ ku̱ba̱ʼ, xúgíʼ rí nandoo nduʼyáá, ma̱ngaa xúgíʼ rí tsékujmaa, tséʼniuu á mu nindxu̱u̱ xílí* náa nutañajunʼ, tsiakii, xa̱bu̱ ñajunʼ o bi̱ guáʼdáá ñajunʼ. Xúgíʼ nigumawíi ga̱jma̱a̱ numuu ikhaa mu mani̱ndxu̱u̱ ndrígóo ikhaa.
17 Ikhaa xtáa má nákha xóó tsérígá nimbá, ga̱jma̱a̱ numuu ikhaa nigumawíi xúgíʼ dí rígá,
18 ikhaa nindxu̱u̱ bi̱ kayá edxu̱u̱ náa nagimbíi̱n,* rí nindxu̱u̱ xóo xuyuuʼ. Ikhaa nixtáa ginii kayuuʼ, nitujxi̱i̱* ginii náa majñúnʼ bi̱ nikáñún, mu mani̱ndxu̱u̱ ginii náa xúgíʼ,
19 numuu rí Dios ndiʼyoo má rí májánʼ marigá xúgíʼ náa ikhaa,
20 ga̱jma̱a̱ numuu ikhaa nindoo nimbájxi̱i̱ Dios ga̱jma̱a̱ xúgíʼ dí rígá, xó má dí rígá náa tsu̱du̱u̱ ku̱ba̱ʼ ga̱jma̱a̱ dí rígá mekhuíí ga̱jma̱a̱ numuu eʼdiuu dí nixídíí náa ixi̱* nindoo nirígá rí tsímáá.
21 Nákha ginii ikháanʼ kuwáanʼ mitsínguánʼ náa Dios ga̱jma̱a̱ nindxa̱la xa̱bu̱ sia̱nʼ ndrígio̱o̱, numuu rí i̱ndó nundxa̱ʼwa̱míjna̱ mu̱ni̱ dí ra̱májánʼ,
22 mú rí xúgi̱, ikhaa niʼni dí mambájxi̱i̱ʼ gajmiála ga̱jma̱a̱ numuu xuyuuʼ bi̱ nikháñúu, mu xúʼko̱ maxnájxiáanʼla kaʼwáanʼ, rí xáguáʼdáá aʼkhála, ma̱ngaa mu nimbá xáguma tsuda̱la náa inuu ikhaa.
23 Ma̱ndoo marigá rígi̱ á mu ikháanʼ naguaʼdáá má xúʼko̱ fe, naguajúnla má xúʼko̱ gújkhúʼ náa phú nigi̱ʼdu̱u̱, tséni tsíngumíjná náa rí kua̱ʼthi̱i̱n mundrígúu, rí ikháanʼ má nidxawíín náa ajngáa májánʼ rí nijuiʼtáraʼa náa xúgíʼ tsu̱du̱u̱ ku̱ba̱ʼ.* Ikhúúnʼ, Pablo, ni̱jkhá ka̱yo̱ʼ ajngáa rí májánʼ rígi̱.
24 Nadxuʼ rí namínuuʼ ga̱jma̱a̱ numala ga̱jma̱a̱ xtáá ramínuuʼ xó má Cristo, mú ndayóoʼ xóó mamínuuʼ itháan mu mambáñún bi̱ nagimbíi̱n* rí nindxu̱u̱ xuyuuʼ Cristo.
25 Nayambáá náa xuajñuu Dios, numuu rí ikhaa nigiúnʼ mu ma̱ni̱ ñajunʼ rígi̱ ga̱jma̱a̱ rígi̱ mambáyala ikháanʼ, ikha jngóo nataráʼa ajngá rawuunʼ Dios asndu xó má eʼngoʼ,
26 ajngáa ngu̱ʼwa̱ rí mitsúʼkháan rígi̱, nirígá ngu̱ʼwa̱ náa mbiʼi rí ninújngoo* ga̱jma̱a̱ náa xa̱bu̱ bi̱ niguwáʼ rakúwá. Mú rí xúgi̱ ni̱jkha̱nú nikujmaa náa bi̱ Dios niraʼwíin,
27 bi̱ na̱nguá ni̱ndxu̱ún judíos, Dios nindoo rí masngájmún rí maguma tsajkuramiinʼ ga̱jma̱a̱ numuu ajngáa ngu̱ʼwa̱ rí mitsúʼkháan. Ajngáa ngu̱ʼwa̱ rí mitsúʼkháan rígi̱ nindxu̱u̱ Cristo bi̱ xtáa mbóó ga̱jma̱á nindxa̱la, rígi̱ nandoo gáʼthúu̱n rí mbiʼyala maguma mba̱a̱ gajmiála ikhaa.
28 Ikhaa nindxu̱u̱ bi̱ kuwáánʼlú ruʼthá ga̱jma̱a̱ numuu náa xúgíʼ numbaaʼ ga̱jma̱a̱ nuʼsngáa náa xúgíʼ numbaaʼ ga̱jma̱a̱ xúgíʼ enii ku̱ma̱, mu xúʼko̱ majuixnájxáanʼ xúgiáanʼ xóo xabuanii mu makuwáanʼ mbóó kambájxala gajmiála Cristo.
29 Ga̱jma̱a̱ numuu rígi̱ xtáá rañajunʼ gakhi̱i̱ wéñuuʼ, na̱ni̱ tsiakimínáʼ má xúʼko̱ ga̱jma̱a̱ tsiakii ndrígóo dí rígá náa ikhúúnʼ.
Mbaʼa nota
^ Náa ajngáa griego nathí, “bi̱ kaʼwiin”.
^ O “nunixu̱ tsajkuun”.
^ O “xi̱ʼ”.
^ O “trono”.
^ O “nigabi̱i̱”, “ndiʼya̱a̱”.
^ Náa ajngáa griego naʼthí, “dí rígá náa agoo mekhu”.
^ O “congregación”.
