Rí na̱jkha̱ inún colosenses 2:1-23
2 Numuu rí nandoʼ mbu̱ya̱a̱la nguáthá mba̱a̱ tsiakii e̱ni̱ mu mambáyala ikháanʼ, bi̱ kuwáanʼ náa Laodicea ga̱jma̱a̱ xúgíinʼ bi̱ na̱nguá ndiyoʼ mínu̱u̱ʼ.*
2 Rí phú nandoʼ nindxu̱u̱ rí mani̱i̱ a̱jkia̱la ga̱jma̱a̱ dí xúgiáanʼ makuwáanʼ mbá kambájxala náa ngajua ma̱ngaa rí maguma tsájkuramáanʼla numuu dí nakrua̱ʼa̱la xúgíʼ, mu xúʼko̱ maguaʼdáá mbá ku̱ma̱ jmbu ndrígóo ajngáa ngu̱ʼwa̱ rí mitsúʼkháan ndrígóo Dios, ngu̱ʼwa̱ rí mitsúʼkháan rígi̱ nindxu̱u̱ Cristo.
3 Náa ikhaa rígá xúgíʼ dí gíʼdoo wéñuuʼ numuu dí rígá ngu̱ʼwa̱ rí nindxu̱u̱ ku̱ma̱ ga̱jma̱a̱ rí majmañala.
4 Na̱tala rígi̱ mu nimbáa xáʼni nduwáanʼla ga̱jma̱a̱ ajngáa dí nakujmaá rí nagui̱i̱.
5 Maski ajndu na̱nguá xtáá ga̱jma̱á nindxa̱la, mú nandxa̱ʼwa̱mínáʼ má xúʼko̱ ga̱jma̱a̱ numala, nadxuʼ índo̱ nda̱yo̱o̱ rí kuwáanʼ xó má kaʼyoo ga̱jma̱a̱ dí kuaʼdáála mbá fe gújkhúʼ má xúʼko̱ náa Cristo.
6 Xó má nindríguila Cristo Jesús bi̱ nindxu̱u̱ Tátá, gajngruigala má xúʼko̱ mbóó jnduʼ gajmiála,
7 fe ndrígála náa Cristo gíʼmaa maʼni gújkhúʼ ga̱jma̱a̱ gurajtumíjnála xa̱ʼ náa ikhaa xóo mbá ixi̱ rí na̱jkha̱ mi̱jnu̱ʼ ajmu̱u̱ náa ku̱ba̱ʼ, xó má nijuiʼsngála ga̱jma̱a̱ guxna̱a̱ má xúʼko̱ núma̱aʼ Dios.
8 Guñewumíjnala mu nimbáa xágrui̱ga̱ tsáʼkhá náa ikháanʼla ga̱jma̱a̱ ku̱ma̱ ndrígu̱ún xa̱bu̱,* ma̱ngaa ku̱ma̱ minduwaʼ dí ragíʼdoo numuu rí na̱ʼkha̱ náa rí nuni̱ xa̱bu̱ ga̱jma̱a̱ dí narígá náa numbaaʼ rígi̱, raʼkháa dí rígá náa Cristo.
9 Numuu rí ikhaa gíʼdoo xúgíʼ cualidad ndrígóo Dios.
10 Ikha jngóo ikháanʼ kuaʼdáá xúgíʼ ga̱jma̱a̱ numuu ikhaa, bi̱ kayá edxu̱u̱ náa xúgíinʼ xa̱bu̱ ñajunʼ ga̱jma̱a̱ bi̱ guáʼdáá mbá ñajunʼ.
11 Ga̱jma̱a̱ numuu rí nambájxala gajmiála ikhaa, ikháanʼ nithu xtóo xuyuuʼ tsáʼkánla mú raʼkháa ga̱jma̱a̱ ñawúúnʼ xa̱bu̱, nindxu̱u̱ xóo rí kaʼyoo Cristo, dí nandoo gáʼthúu̱n rí muriʼku̱u̱ xuyala.
12 Numuu rí mangáanʼ nijuiʼdiáanʼla gajmiála ikhaa índo̱ nijnguála iyááʼ xó má ikhaa, numuu rí kuwáanʼ mbóó jnduʼ gajmiála, ikha jngóo mangáanʼ nigabiáanʼ gajmiála ga̱jma̱a̱ numuu fe dí kuaʼdáála náa tsiakii ndrígóo Dios, bi̱ nikujxi̱i̱* náa majñún wajinʼ.
13 Maski má nikháñala ga̱jma̱a̱ numuu dí raʼkhí ni̱nila ga̱jma̱a̱ numuu rí na̱nguá nithu xtóo xuyuuʼ tsáʼkánla, mú Dios niʼni rí makuwáanʼ ga̱jma̱a̱ numuu ikhaa. Niʼni mba̱a̱ a̱jkiu̱u̱n kaʼyoo aʼkhúlú numuu rí májánʼ wéñuuʼ a̱jkiu̱u̱n
14 ga̱jma̱a̱ ikhaa niʼni jngudi̱i̱ xtángoo rí nigumarámáʼ dí naʼthúlú má xúʼko̱ náa rí najngawánʼ. Dios niʼni jngudi̱i̱ xtángoo índo̱ nikháñuu Cristo náa ixi̱.*
15 Ga̱jma̱a̱ numuu rígi̱, niguwíi xtiñúún xa̱bu̱ ñajunʼ ga̱jma̱a̱ bi̱ guáʼdáá mbá ñajunʼ, nigruigi̱i̱n náa inún mbaʼin xa̱bu̱ mu magajnúu gamajkhún, nixnúún magún náa inún xa̱bu̱ mu makujmaa rí niʼngo̱o̱.
16 Nimbáa xáʼthí dí kuaʼdáá aʼkhála ga̱jma̱a̱ numuu rí naphu, rí nawan o ga̱jma̱a̱ numuu rí nuniriya̱a̱ʼ mbá ndxa̱a̱, ndxa̱a̱ ndrígóo gu̱nʼ rudiiʼ o ndrígóo mbá sábado.*
17 Xúgíʼ rígi̱ nindxu̱u̱ mbá ndájkua̱ rí wíji̱ ma̱ʼkha̱, mú rígi̱ nambánuu náa Cristo.
18 Xúniʼñááʼ rí xa̱bu̱ bi̱ nuníí rí ni̱ndxu̱ún xa̱bu̱ wabiiʼ ga̱jma̱a̱ nanigu̱u̱nʼ mbuyamajkún ángeles. Xa̱bu̱ buʼko̱ i̱ndó nunimbaʼumíjna̱* ga̱jma̱a̱ numuu rí ndiyáá. Numuu rí nundxa̱ʼwa̱míjna̱ xóo xa̱bu̱ aʼkhá, ikha jngóo mbaʼ enimbaʼumijna̱á
19 ga̱jma̱a̱ na̱nguá kúwá jnduʼ gajmiún bi̱ kayá edxu̱u̱, xóo muʼthá, bi̱ naxnúu xúgíʼ rí ndayóoʼ xúgíʼ xuwiʼ ga̱jma̱a̱ bi̱ naʼni rí xúgíʼ mbu̱wa̱a̱, ga̱jma̱a̱ numuu ikhaa Dios naʼni rí xúgíʼ xuwiʼ mbaja̱a̱.
20 Á mu ikháanʼ nikháñala mbóó jnduʼ gajmiála Cristo ga̱jma̱a̱ numuu rí kaʼyoo náa numbaaʼ, náá numuu rí kuwáanʼ rí asndu xóó kaʼyala náa numbaaʼ rá. Náá numuu rí xóó nunimbala kiʼtáñajunʼ
21 “dí xátrugua̱, xátaya̱a̱ xóo nindxu̱u̱, xátaxkajma rá.”
22 Xúgíʼ rígi̱ na̱jkha̱nú naguámbáa índo̱ najmaa. Nindxu̱u̱ kiʼtáñajunʼ ga̱jma̱a̱ kiʼsngáa ndrígu̱ún xa̱bu̱ú.
23 Xtángoo ndrígu̱ún xa̱bu̱ rígi̱, nakujmaa rí nindxu̱u̱ májánʼ ga̱jma̱a̱ rí xóo nduyamajkuíí Dios ga̱jma̱a̱ nusngajma dí ni̱ndxu̱ún xa̱bu̱ guabiinʼ índo̱ nuni̱ gínáa xuñúnʼ, mú tséjmaa mbá kayuuʼ mu mambáñún munigaʼduunʼ rí nagua̱ʼa̱ maʼni xuñúúnʼ.
Mbaʼa nota
^ Náa ajngáa griego naʼthí, “na̱nguá ndiyáá inuʼ”.
^ O “filosofías”.
^ O “niʼnigabi̱i̱”, “niʼni mbaʼya̱a̱”.
^ Gi̱i̱ najuiʼthá ga̱jma̱a̱ numún xa̱bu̱ bi̱ nuni̱ xawan.
