Rí na̱jkha̱ inún colosenses 3:1-25
3 Á mu rí ikháanʼ nigabiáanʼla* gajmiála Cristo, guʼyáʼ má xúʼko̱ dí rígá rijma̱a̱, náa rí Cristo gíʼ náa níjñu mújúunʼ Dios.
2 Gundxaʼwamíjna̱ má xúʼko̱ ga̱jma̱a̱ numuu dí rígá rijma̱a̱, raʼkháa dí rígá náa tsu̱du̱u̱ ku̱ba̱ʼ.
3 Numuu rí ikháanʼ nikháñala ga̱jma̱a̱ rí kuwáanʼ kaʼyoo Cristo xó má nandoo Dios.
4 Índo̱ gákujmaa Cristo bi̱ naʼni rí makuwáanʼ,* ikhú mangáanʼ makujmáanʼla náa tsiakii ndrígóo.
5 Gunigámbaa xúgíʼ rí naguʼuun naʼni xuyala* dí rígá náa tsu̱du̱u̱ ku̱ba̱ʼ, dí kuajtuminaʼ ga̱jma̱a̱ rí xóo mubala xkawiʼ kayuuʼ gajmiála eʼwíinʼ,* dí mitsaga, dí nagua̱ʼa̱ wéñuuʼ mubala gajmiála mbáa, dí nagua̱ʼa̱ mu̱ni̱ dí ra̱májánʼ ga̱jma̱a̱ dí nandala maguaʼdáá wéñuuʼ, rí nindxu̱u̱ xóo mbuyamajkún xándú.
6 Xúgíʼ rígi̱ naʼni rí Dios makásngañu̱u̱ʼ.
7 Xúʼko̱ kaʼnii eni̱la nákha ginii.
8 Mú rí xúgi̱, guniʼñááʼ ru̱ni̱ xúgíʼ rígi̱: Rí xóo majmanguala, makiʼnáanʼ, mu̱nila dí ra̱májánʼ ga̱jma̱a̱ xájmala ajngáa dí maʼni magawúúnʼ eʼwíinʼ, ma̱ngaa xágajnuu náa rawanla ajngáa dí tséjmaa.
9 Xúni̱ nduwamijnála. Guriʼku̱u̱ xóo xa̱bu̱ nindxa̱la nákha ginii* ga̱jma̱a̱ rí nuni̱la,
10 ganindxa̱la xóo i̱mba̱a̱ nuxi̱i̱ʼ xa̱bu̱ xó má kaʼnii Dios, awan xóo ejkua runiʼníiʼ Dios xúʼko̱ gáʼga raxtiʼkhuu xóo nindxa̱la
11 ga̱jma̱a̱ náa nda̱wa̱a̱ griego ni má judío, ni má bi̱ nithu xtóo xuyuuʼ tsáʼkhún ni má bi̱ túthu, ni má xa̱bu̱ na̱ʼkha̱á, ni má escita,* náa nda̱wa̱a̱ ñumbáá ni má bi̱ na̱nguá nindxu̱u̱ ñumbáá, numuu rí Cristo kaʼyoo xúgíʼ ga̱jma̱a̱ xtáa náa xúgíʼ.
12 Ikháanʼ bi̱ Dios niraʼwáanla, bi̱ kaʼwáanʼ ga̱jma̱a̱ bi̱ nandoo kaʼyala, gusngajmá* dí nagáwíinʼ a̱jkia̱la kuyamíjna̱, gu̱nila rí májánʼ, ganindxa̱la xa̱bu̱ guabaaʼ, xákiʼnáanʼla ga̱jma̱a̱ gaʼngo̱o̱ a̱jkia̱la.
13 Gaʼngo̱o̱ a̱jkia̱la ga̱jma̱a̱ gu̱ni̱ mba̱a̱ a̱jkia̱la kuyamíjna̱ má xúʼko̱, maski ajndu mbáa gíʼdoo mbá numuu rí maxiéʼka ga̱jma̱a̱ numuu i̱mba̱a̱. Jeobá* niʼni mba̱a̱ a̱jkiu̱u̱n kaʼyala má xúʼko̱, ikha jngóo xúʼko̱ gíʼmáanʼla mu̱ni̱ mangáanʼ.
14 Mú, raʼkháa i̱ndó rígi̱, ma̱ngaa gaʼndala kuyamíjna̱,* numuu dí rígi̱ naruwi̱i̱n xa̱bu̱.
15 Ga̱jma̱a̱ tsímáá ndrígóo Cristo garigá náa a̱jkia̱la, numuu rí ikháanʼ niwatsaʼwala náa tsímáá rúʼko̱ mu mani̱ndxa̱la mbóó xuwiʼ. Ga̱jma̱a̱ guxna̱a̱ má xúʼko̱ numa̱a̱.
16 Garigá má xúʼko̱ náa ikháanʼ kiʼsngáa ndrígóo Cristo ga̱jma̱a̱ xúgíʼ ku̱ma̱. Gusngámíjná ga̱jma̱a̱ guxnamijnalá tsiakii* ga̱jma̱a̱ salmos, gu̱ni̱ mba̱a̱ Dios ga̱jma̱a̱ ajmúú rí naxnúu gamajkhu. Gu̱ni̱ ajmúú náa Jeobá* ga̱jma̱a̱ xúgíʼ a̱jkia̱la.
17 Tséʼniuu má rí gúni, rí gútha̱ o ñajúnʼ rí nu̱ni̱, gu̱ni̱ xúgíʼ ga̱jma̱a̱ náa mbiʼyuu Tátá Jesús ga̱jma̱a̱ numuu ikhaa guxna̱a̱la núma̱aʼ Anu̱lú Dios.
18 Gu̱ʼu̱ bi̱ ninuju̱nʼ gunimbala kuñu̱u̱n a̱jmbia̱la xó má nanigu̱u̱ʼ Tátá.
19 Xa̱bu̱ bi̱ niniʼgúnʼ gaʼndala kuñu̱u̱n má xúʼko̱ guʼya̱la ga̱jma̱a̱ xákiʼnáanʼla kuñu̱u̱n.*
20 E̱ji̱n gunimbala má xúʼko̱ kuñu̱u̱n ana̱la náa mbá xúgíʼ, numuu dí rúʼko̱ nanigu̱u̱ʼ Tátá.
21 Xabuanii,* xúni̱ rí makásnga̱ñu̱únʼ e̱jña̱la, mu xúʼko̱ ikhiin xájmáa a̱jkiu̱ún.
22 Ñumbáá, gunimbala kuñu̱u̱n xa̱bu̱ numbaaʼ bi̱ ni̱ndxu̱ún patriáanla, raʼkháa i̱ndó, índo̱ kúwá ruyala mu manigu̱u̱nʼ xa̱bu̱, gu̱ni̱la ga̱jma̱a̱ xúgíʼ a̱jkia̱la numuu rí nduyamajkuííla Jeobá.*
23 Xúgíʼ rí gúni̱, gu̱ni̱ ga̱jma̱a̱ xúgíʼ a̱jkia̱la* xóo rí nu̱ni̱ ñajuunʼ Jeobá,* raʼkháa náa xa̱bu̱ú,
24 numuu rí ikháanʼ ndu̱ya̱a̱ rí náa Jeobá* gáʼkha̱ rí mundrígúula. Ganindxa̱la ñumbáá ndrígóo bi̱ kaʼyala, Cristo.
25 Bi̱ gáʼni mbá dí ra̱májánʼ, mada̱a̱ʼ má ga̱jma̱a̱ dí gáʼni, tséʼniuu má tsáá nindxu̱u̱.
Mbaʼa nota
^ Náa ajngáa griego naʼthí, “nitujxi̱i̱ʼla”.
^ Náa ajngáa griego naʼthí, “Cristo bi̱ nindxu̱u̱ vida ndrígúlú”.
^ O “dí rígá náa xuyala”.
^ Náa ajngáa griego naʼthí, “xa̱bu̱ wayuu”.
^ Nákha wajyúuʼ ajngáa rígi̱ nuthúún xa̱bu̱ bi̱ tséyamajkún ga̱jma̱a̱ rí xóo nu̱ni̱.
^ O “gaguʼwánla cualidades”.
^ Náa ajngáa griego naʼthí, “gaguʼwánla ngajua”.
^ O “consejos”.
^ O “xáʼni gújkhúʼ a̱jkia̱la”.
^ Gi̱i̱ i̱ndó naʼthí ga̱jma̱a̱ numuu xa̱biya̱.
