Rí na̱jkha̱ inún colosenses 4:1-18
4 Ikháanʼ bi̱ nindxa̱la patrón, gu̱niu̱u̱ rí májánʼ xúgíinʼ ñumbáá ndrígála, xúraʼwíin, gu̱ya̱a̱ rí mangáanʼ kuaʼdaa mbáa bi̱ kaʼyala mekhuíí.
2 Xúniʼñáánʼ rutájkháan,* índo̱ gúnila rígi̱ gakuwáanʼla xawii ga̱jma̱a̱ guxna̱a̱ má xúʼko̱ núma̱aʼ.
3 Ikhú má gútajkáan ga̱jma̱á numuxu, gunda̱ʼa̱a̱ Dios rí mambáʼtoo xkrugua mu ma̱ndoo mutaráʼaxu, mu xúʼko̱ ma̱ndoo mutaxu ga̱jma̱a̱ numuu ajngáa ngu̱ʼwa̱ rí mitsúʼkháan numuu Cristo, ikhaa rígi̱ numuu rí xtáá náa guʼwá e̱jua̱nʼ kaxtoʼóʼ ga̱jma̱a̱ cadena.
4 Ma̱ngaa gunda̱ʼa̱ mu ikhúúnʼ majmúú mataraʼa májánʼ xóo phú gíʼmaa.
5 Gakuwáanʼ* májánʼ gajmiála bi̱ kúwá rexa̱a̱,* ma̱ngaa gajmala májánʼ mbiʼi rí naguanúu.*
6 Gajmala ajngáa mitsaanʼ índo̱ gútha̱, gagiʼdoo idúu, mu xúʼko̱ mbu̱ya̱a̱ xú káʼnii gúriʼñáá mámbáa xa̱bu̱.
7 Tíquico, ndxájuʼ bi̱ nandoʼ ka̱yo̱o̱, bi̱ nindxu̱u̱ jmbii, bi̱ xtáá rañejunʼ mbóó ga̱jmu̱ʼ xóo ñumbáá náa Tátá, maʼtála xú káʼnii xtáá.
8 Nakuʼmáan náa ikháanʼla mu mbu̱ya̱a̱ xú káʼnii kúwáanʼxu ma̱ngaa mu maʼni̱i̱ a̱jkia̱la.
9 Maʼga ga̱jma̱a̱ Onésimo bi̱ nindxu̱u̱ jmbii, ndxájuʼ bi̱ nandoʼ ka̱yo̱o̱ bi̱ nákhá ginii nixtáa má ikhí, ikhiin mutala ndiéjunʼ xtáa rarígá gi̱i̱.
10 Aristarco bi̱ xtáá ga̱jmu̱ʼ náa guʼwá e̱jua̱nʼ narajxáanʼla, ma̱ngaa Marcos prímiu̱u̱ Bernabé (bi̱ ikháanʼ ndayóoʼ mudríguíi ga̱jma̱a̱ májánʼ á mu na̱jkha̱ gáʼyala xó má ikha dí nindrígúla),
11 ma̱ngaa Jesús bi̱ nutháán Justo bi̱ nindxu̱u̱ mbáa bi̱ nithu xtóo xuyuuʼ tsáʼkhúun, i̱ndó ikhiin ni̱ndxu̱ún bi̱ numbayúʼ mu miʼtá ga̱jma̱a̱ numuu Xa̱bu̱ Ñajunʼ ndrígóo Dios* ga̱jma̱a̱ ikhiin ni̱ndxu̱ún bi̱ nuni̱ maʼni̱i̱ a̱jkiu̱nʼ.
12 Epafras bi̱ nixtáa ga̱jma̱á nindxa̱la nákha ginii ma̱ngaa nindxu̱u̱ ñumbáá ndrígóo Cristo Jesús, narajxáanʼla, ikhaa naʼtájkháan má xúʼko̱ ga̱jma̱á numala, mu maguajúnʼ má xúʼko̱ jmbu ma̱ngaa mu maʼni gújkiáanʼla mu ma̱ndoo mbu̱ya̱a̱ xúgíʼ ndiéjunʼ rí phú nandoo Dios.
13 Ikhúúnʼ nda̱yo̱o̱ rí ikhaa nañejunʼ gakhi̱i̱ wéñuuʼ ga̱jma̱a̱ numala ikháanʼ ga̱jma̱a̱ bi̱ kúwá náa Laodicea ma̱ngaa bi̱ kúwá náa Hierápolis.
14 Narajxáanʼla Lucas bi̱ nindxu̱u̱ médico bi̱ nandún kuyáá ma̱ngaa Demas.
15 Guthu̱u̱n rí narajxi̱ín a̱ngiu̱lú bi̱ kúwá náa Laodicea, ma̱ngaa Ninfa ga̱jma̱a̱ bi̱ nagimbíi̱n náa goʼwóo.
16 Nda̱wa̱á dí niraxnula i̱yi̱i̱ʼ rígi̱ guxuʼmá maʼga mu muraxnuu bi̱ nagimbíi̱n náa Laodicea, ga̱jma̱a̱ ikháanʼ guraxnuu rí ni̱jkha̱ inún bi̱ Laodicea.
17 Ma̱ngaa guta̱a̱nla Arquipo: “Atanimináʼ má xúʼko̱ mu matani̱ gájxi̱i̱ ñajunʼ rí nitadrígú náa Tátá”.
18 Ikhúúnʼ Pablo nanirámáʼ i̱yi̱i̱ʼ rígi̱ ga̱jma̱a̱ ñawúnʼ mu marajxáanʼla. Garmáʼáan a̱jkia̱la e̱ni̱ rí kaxtoʼóʼ ga̱jma̱a̱ cadena. Rí májánʼ wéñuuʼ a̱jkiu̱u̱n Dios garigá ma xúʼko̱ náa ikháanʼla.
Mbaʼa nota
^ O “ru̱ni̱ tsajkuun”.
^ Náa ajngáa griego naʼthí, “gajngruigala”.
^ O “bi̱ na̱nguá nindxu̱ún xa̱bi̱i̱ Jesús”.
^ Náa ajngáa griego naʼthí, “gutsila tiempo rí naguanúu”.
^ O “Reino ndrígóo Dios”.
