Daniel 1:1-21
1 Ajtsú tsiguʼ dí xtáa má raʼtáñajunʼ Jehoiaquim rey ndrígóo Judá, rey Nabucodonosor bi̱ xtáa náa Babilonia ni̱ʼkha̱nú náa Jerusalén ga̱jma̱a̱ niruguamaʼáan.
2 Nda̱wa̱á, Jeobá nixnájxi̱i̱ Jehoiaquim rey ndrígóo Judá náa ñawúunʼ rey Nabucodonosor, xúʼko̱ má tikhu dí najmaa náa goʼwóo Dios bi̱ gajkhun ikhaa ni̱jkha̱ kagu̱u̱ náa ku̱ba̱ʼ ndrígóo Sinar,* náa goʼwóo dios ndrígóo. Ga̱jma̱a̱ nigrua̱ʼa̱ náa kajti rí gíʼdoo numuu.
3 Ikhú rey niʼtáñajuunʼ Aspenaz, bi̱ kayá edxu̱u̱ náa xa̱bu̱ bi̱ guáʼdáá numún bi̱ kúwá náa guʼwá ñajunʼ, dí ma̱ʼkha̱ kagui̱i̱n tikhuun israelitas ga̱jma̱a̱ dí ma̱ʼkha̱ kagui̱i̱n e̱ji̱i̱n rey, ma̱ngaa e̱jñu̱ún xa̱bu̱ bi̱ guáʼdáá numún.
4 Jiámá* bugi̱, ragíʼmaa muguáʼdáá nandii ga̱jma̱a̱ gíʼmaa makujmiin itháan míjíinʼ, bi̱ nakru̱ʼu̱u̱n, bi̱ guáʼdáá ku̱ma̱ ga̱jma̱a̱ bi̱ nuraʼwi̱i̱ májánʼ rí nuni̱, bi̱ ma̱ndoo muñambáá náa guʼwá ñajunʼ ndrígóo rey. Ikhaa mbaʼyóoʼ maʼsngúún ajngún xa̱bu̱ caldeos ga̱jma̱a̱ xóo egumaraʼmáʼ.
5 Ma̱ngaa rey niʼtáñajunʼ dí mixnún xúgíʼ mbiʼi ganitsu májánʼ rí na̱ʼkhu̱ rey ga̱jma̱a̱ vino rí naʼga̱a̱n. Mbaʼyóoʼ majuiʼsngúún* mbá ajtsú tsiguʼ, índo̱ gárámuuʼ tsiguʼ rúʼko̱, magún gúni̱ ñajuunʼ rey.
6 Náa majñu̱únʼ ikhiin kúwá tikhuun bi̱ naguwáʼ náa xuajin chíʼgíiʼ* ndrígóo Judá: Daniel,* Hananías,* Misael* ga̱jma̱a̱ Azarías.*
7 Bi̱ kayá edxu̱u̱ náa xa̱bu̱ bi̱ guáʼdáá numún bi̱ kúwá náa guʼwá ñajunʼ nixnún i̱mba̱ mbiʼñún:* Daniel nixná mbiʼyuu Beltsasar, Hananías nixná mbiʼyuu Sadrac, Misael nixná mbiʼyuu Mesac ga̱jma̱a̱ Azarías nixná mbiʼyuu Abednego.
8 Mú Daniel niraʼwíí náa a̱jkiu̱u̱n rí xáʼni gachíminaʼ ga̱jma̱a̱ ganitsu májánʼ dí na̱ʼkhu̱ rey ni má vino rí naʼga̱a̱n. Ikha jngóo nindo̱ʼo̱o̱ bi̱ kayá edxu̱u̱ náa xa̱bu̱ bi̱ guáʼdáá numún bi̱ xtáa náa guʼwá ñajunʼ dí xákhu ganitsu rúʼko̱, mu xúʼko̱ xáʼni gachíminaʼ.
9 Ga̱jma̱a̱ Dios bi̱ gajkhun niʼni rí bi̱ kayá edxu̱u̱ náa xa̱bu̱ bi̱ guáʼdáá numún bi̱ kúwá náa guʼwá ñajunʼ masngájmuu ngajua rí tsétumuu Daniel ma̱ngaa magáwíinʼ a̱jkiu̱u̱n kaʼyoo.
10 Mú bi̱ kayá edxu̱u̱ náa xa̱bu̱ bi̱ guáʼdáá numún bi̱ kúwá náa guʼwá ñajunʼ, niʼthúu̱n Daniel: “Namíñúʼ ka̱yo̱o̱ tátioʼ rey, bi̱ niraʼwíí má dí mbaʼyóoʼ mu̱phu ga̱jma̱a̱ muwa̱a̱nla. Á mu ikhaa ndaʼyala rí tséjkumáanʼla májánʼ, xóo eʼwíinʼ jiámá* bi̱ ikháá má tsigúúnʼ xó má ikháanʼla rá. Ikháanʼla mu̱ni̱ rí ikhúún* magúʼdoo aʼkhúnʼ náa rey”.
11 Ikhú Daniel niʼthúu̱n xa̱bu̱ bi̱ nañewu̱u̱n, bi̱ kayá edxu̱u̱ náa xa̱bu̱ bi̱ guáʼdáá numún bi̱ kúwá náa guʼwá ñajunʼ nigíiʼ mu mañewu̱u̱n Daniel, Hananías, Misael ga̱jma̱a̱ Azarías:
12 “Mbá péñu,* ataniu̱u̱n rí májánʼ xa̱bia̱a̱ʼ, araxnúxu̱ mbá gu̱wa̱ʼ mbiʼi i̱ndó yaʼwu* muphúxu ga̱jma̱a̱ iyaʼ rí muwa̱a̱nxu.
13 Nda̱wa̱á atani̱ mbríguáanʼ gajmiúxu eʼwíinʼ jiámá bi̱ naʼphu̱ ganitsu májánʼ ndrígóo rey. Xó má dí gáta̱ya̱a̱, ikhú gátraʼwíí dí gátani̱ gajmiáanʼ xa̱bia̱a̱ʼ”.
14 Ikha jngóo, ikhaa niʼnimbo̱o̱ rí niʼthúu̱n náa mbá gu̱wa̱ʼ mbiʼi.
15 Índo̱ nirámuuʼ gu̱wa̱ʼ mbiʼi, nikujmiin itháan míjíinʼ ga̱jma̱a̱ nikujmaa rí nipiʼtsu itháan májánʼ* ki xóo xúgíinʼ jiámá* bi̱ naʼphu̱ ganitsu májánʼ ndrígóo rey.
16 Bi̱ nañewu̱u̱n na̱jkha̱ kagu̱u̱ ganitsu rí májánʼ ga̱jma̱a̱ vino, mú naxnún yaʼwu.
17 Ga̱jma̱a̱ Dios bi̱ gajkhun nixnúún a̱jkhui̱i̱n jiámá* buʼko̱ ku̱ma̱ ga̱jma̱a̱ xúgíʼ ñajunʼ dí nagumaraʼmáʼ, ma̱ngaa dí makru̱ʼu̱u̱n, Daniel nixnúu dí ma̱ndoo makro̱ʼo̱o̱ xúgíʼ dí nawasngájmáá* ga̱jma̱a̱ xnuʼndaaʼ.
18 Índo̱ nirámuuʼ mbiʼi rí magún kudiin náa inuu rey, bi̱ kayá edxu̱u̱ náa xa̱bu̱ bi̱ guáʼdáá numún bi̱ kúwá náa guʼwá ñajunʼ ni̱jkha̱ kagui̱i̱n náa inuu Nabucodonosor.
19 Índo̱ rey niʼtámíjná gajmíi̱n ikhiin, ikhú nijuiʼyáá dí náa xúgíinʼ rí ikhiin ndawa̱a̱ nimbáa xóo Daniel, Hananías, Misael ga̱jma̱a̱ Azarías, ikhiin niguanún muni̱ ñajuunʼ rey.
20 Mámbá índo̱ rey narajxu̱u̱n ga̱jma̱a̱ numuu asndu káʼnii má xkujndu, náa ndayóoʼ ku̱ma̱ ga̱jma̱a̱ makro̱ʼo̱o̱, ikhaa ndaʼyoo rí gu̱wa̱ʼ nuthu itháán ejmañúúnʼ ki xóo xúgíinʼ ndxajkun bi̱ nuni̱ magia ga̱jma̱a̱ bi̱ nuni̱ xawan bi̱ kúwá náa xúgíʼ rí naʼtáñajunʼ.
21 Daniel nixtáa ikhí asndu índo̱ niʼni mbá tsiguʼ rí xtáa raʼtáñajunʼ rey Ciro.
Mbaʼa nota
^ Xóo muʼthá, Babilonia.
^ Náa ajngáa hebreo naʼthí, “e̱ji̱n”.
^ O mbáa “muxniʼtsún májánʼ”.
^ Náa ajngáa hebreo naʼthí, “e̱ji̱i̱n”.
^ Rí nandoo gáʼthúu̱n ‹Dios nindxu̱u̱ bi̱ naʼnimbánuu xkujndu ndrígóʼ›.
^ Rí nandoo gáʼthúu̱n ‹Jeobá nasngájma rí nagawíin a̱jkiu̱u̱n›.
^ Mbáa nandoo gáʼthúu̱n ‹tsáa nindxu̱u̱ xóo Dios ráʼ.›
^ Rí nandoo gáʼthúu̱n ‹Jeobá nañambáá›.
^ Xóo muʼthá, nixnáa mbiʼñún xóo xa̱bu̱ babilonios.
^ Náa ajngáa hebreo naʼthí, “e̱ji̱n”.
^ Náa ajngáa hebreo naʼthí, “edxu̱ʼ”.
^ O “atani̱ mbá rí májánʼ”.
^ Náa ajngáa hebreo nandoo gáʼthúu̱n mbaʼa enii tsígáʼ ga̱jma̱a̱ rí najma̱a̱ náa tsígáʼ.
^ Náa ajngáa hebreo naʼthí, “guaʼdáá xuñúnʼ”.
^ Náa ajngáa hebreo naʼthí, “e̱ji̱n”.
^ Náa ajngáa hebreo naʼthí, “e̱ji̱n”.
^ O “visión”.
