Daniel 10:1-21
10 Náa awúu̱n rí mbá ajtsú tsiguʼ dí niʼtáñajunʼ Ciro rey ndrígóo Persia, Daniel, bi̱ mbiʼyuu Beltsasar, nigruigú ajngóo Dios. Ajngáa rígi̱ nindxu̱u̱ gajkhun náa naʼthí ga̱jma̱a̱ numuu mbá xkujndu mba̱a̱. Ikhaa nikro̱ʼo̱o̱ ajngáa rígi̱, ga̱jma̱a̱ nigruigú ku̱ma̱ mu mikro̱ʼo̱o̱ rí ndiʼyoo.
2 Mbiʼi rúʼko̱, ikhúún, Daniel, nixtáá ngíná mbá ajtsú xmáná kañiiʼ.
3 Tíʼkhu ganitsu miʼtsí, ni má tíʼkhu xuwiʼ ni má táganʼ vino, ni má táxtajmáminaʼ aceite náa mbá ajtsú xmáná kañiiʼ.
4 Mbiʼi 24 rí timbá igu̱nʼ, índo̱ ikhúún xtáá náa rawuunʼ mañu rí mba̱a̱, Tigris,*
5 nikujxí edxu̱ʼ ndi̱yo̱o̱ mbáa xa̱biya̱ bi̱ kagíʼ xtíin dí lino ga̱jma̱a̱ náa smídúu kua̱ʼa̱n, mbá cinturón dí oro dí na̱ʼkha̱ náa Ufaz.
6 Xuyuuʼ nindxu̱u̱ xóo itsí crisólito, inuu nambiʼi xóo índo̱ naxpíbiʼ, iduu nindxu̱u̱ xóo riʼyu̱u̱ aguʼ,* ñawúunʼ ga̱jma̱a̱ rajkhúu nindxu̱u̱ xóo cobre rí xngiyaʼ ga̱jma̱a̱ xóo nawáán aʼwóo nindxu̱u̱ xóo índo̱ nuthi mbaʼin xa̱bu̱.
7 Ikhúún, Daniel, i̱ndó ikhúún ndi̱yo̱o̱ rí niwasngájmuʼ.* Xa̱bu̱ bi̱ xtáá gajmíʼ na̱nguá ndiyáá. Mú nigíʼdi̱i̱ niwíʼiin wéñuuʼ ga̱jma̱a̱ nigáñún mu murkaʼwumijná.
8 Niguanúʼ mbáwún índo̱ ndi̱yo̱o̱ rí niwasngájmuʼ rígi̱, niʼni néʼngo̱ʼ, niʼni miʼxátiúúnʼ ga̱jma̱a̱ niguámbá tsiaki̱i̱ ndrígóʼ.
9 Nda̱wa̱á rí nidxawuun rí niʼthí xa̱biya̱. Mú, índo̱ niʼthí nimbumuʼ ni̱gú dí asndu mbayííʼ gíʼ inuʼ.
10 Ikhú ñawúunʼ mbáa xa̱bu̱ nixkajmúún ga̱jma̱a̱ niʼbangañu̱u̱ mu ma̱ndoo matujxi̱i̱ʼ ga̱jma̱a̱ ñawúnʼ ma̱ngaa ragómiuʼ.
11 Nda̱wa̱á niʼthúnʼ:
“Daniel, nindxa̱a̱ʼ mbáa xa̱bu̱ bi̱ gíʼdoo wéñuuʼ numuu.* Atagíʼ edxa̱a̱ʼ matadxawíín rí ma̱tha̱a̱nʼ. Rí xúgi̱ atujxa̱a̱ʼ ga̱jma̱a̱ ariejún náa xtaa numuu rí nixuʼmún maʼkháaʼ náa ikháán”.
Índo̱ ikhaa niʼthúnʼ rígi̱, asndu nigúʼwún nitu̱jxu̱ nigúju̱n.
12 Ikhú niʼthúnʼ: “Xámiñanʼ, Daniel. Asndu nákha timbá mbiʼi niwáán ajngáaʼ rí nitraʼwíí náa a̱jkia̱a̱nʼ mikrua̱ʼa̱a̱ʼ ga̱jma̱a̱ rí nitani̱ wabaminaʼ náa inuu Dios ndrígáaʼ, ikhúún niʼkháaʼ ga̱jma̱a̱ numuu ajngáaʼ.
13 Mú príncipe bi̱ naʼtáñajunʼ náa Persia nirikho̱ʼ mbá 21 mbiʼi. Ikhú ni̱ʼkha̱ Miguel* gámbáyúʼ, mbáa príncipe bi̱ gíʼdoo itháán numuu, niguanúʼ náa níjniún reyes ndrígóo Persia.
14 Ni̱ʼkhá gámbáyáaʼ mu mikrua̱ʼa̱a̱ʼ dí gágíʼnuu xuajñaanʼ índo̱ gáʼni iwáá mbiʼi, numuu rí niwasngájmaaʼ marigá asndu nda̱wa̱á”.
15 Índo̱ niʼthúnʼ xúgíʼ rúʼko̱, nikruíguʼ edxu̱ʼ mbayííʼ ga̱jma̱a̱ ni̱jkha̱ ajngóʼ.
16 Ikhú bi̱ kaʼnii xóo xa̱biya̱ nixkajma rawunʼ, ikhúún nirmbáʼtoo rawunʼ mu ma̱thu̱u̱n bi̱ wíji̱ náa inuʼ: “Tátá, nagúʼwún ga̱jma̱a̱ numuu rí niwasngájmuʼ ga̱jma̱a̱ na̱nguá gúʼdoʼ tsiaki̱i̱.
17 Rí xúgi̱ nánguá gúʼdoʼ tsiaki̱i̱ ga̱jma̱a̱ nánguá eʼngo̱ʼ gáyá jxu̱ʼ, ikhúún bi̱ nindxu̱ʼ xa̱bia̱a̱ʼ tátá. Xú káʼnii xóó gándoo guʼtámíjná rá.”
18 Bi̱ kaʼnii xóo xa̱biya̱ nitanga̱a̱ nixkajmúún mbu̱júu̱ ga̱jma̱a̱ nixnúʼ tsiaki̱i̱.
19 Ikhú niʼthúnʼ: “Xámiñanʼ, xa̱biya̱ bi̱ gíʼdoo wéñuuʼ numuu. Xáxmiéjuaanʼ, gakhi̱i̱ a̱jkia̱a̱nʼ gátani̱, xúʼko̱, gakhi̱i̱ a̱jkia̱a̱nʼ gátani̱”. Mú índo̱ xtáa raʼthúnʼ niku̱mu̱ʼ rí ndi̱ya̱a̱ tsiaki̱i̱ ga̱jma̱a̱ ni̱thu̱u̱n: “Aratá tátá numuu rí nitani̱ rí mba̱ya̱a̱ tsiaki̱i̱”.
20 Nda̱wa̱á niʼthúnʼ: “Lá natayáá náá numuu rí niʼkháaʼ náa ikháán ráʼ. Rí xúgi̱ matangáan gaxmínaʼ gajmuʼ príncipe ndrígóo Persia. Índo̱ gáʼgáaʼ príncipe ndrígóo Grecia ma̱ʼkha̱.
21 Mú rí xúgi̱, matha̱a̱nʼ rí kiʼnirámáʼ náa libro rí naʼthí rí gajkhun. I̱ndó Miguel xtáa mambáyuʼ ga̱jma̱a̱ numuu rígi̱, bi̱ nindxu̱u̱ príncipe ndrígiála, ndáwa̱a̱ i̱mba̱a̱.
Mbaʼa nota
^ Náa ajngáa hebreo naʼthí, “Hidequel”.
^ O “antorchas”.
^ O “visión”.
^ O “bi̱ nandún kuyáá wéñuuʼ”.
^ Rí nandoo gáʼthúu̱n ‹tsáa nindxu̱u̱ xóo Dios rá.›
