Daniel 3:1-30
-
Rey Nabucodonosor naʼni mbá náa rí mbuyamajkuíí dí nindxu̱u̱ oro (1-7)
-
Rey naʼtáñajunʼ dí mbuyamajkuíí rí nitsiji (4-6)
-
-
Nuxrui̱gi̱i̱n ajtsíin hebreo numuu rí tsénimbu̱u̱n (8-18)
-
“Xúnixu ñajúúnʼ dioses ndrígáaʼ” (18)
-
-
Nudami̱ʼi̱i̱n náa horno rí nakha (19-23)
-
Niguma mbá milagro mu makáwíin náa aguʼ (24-27)
-
Rey naxnúu gamajkhu Dios ndrígu̱ún hebreo (28-30)
3 Rey Nabucodonosor niʼni mbá náa rí mbuyamajkuíí* dí nindxu̱u̱ mbawíí oro, 60 gúʼxúʼ* rí mitsídánʼ ga̱jma̱a̱ majun gúʼxúʼ* rí ma̱ja̱nʼ. Nitsiji náa xkua̱ ndrígóo Dura, náa majñuuʼ mbayuuʼ Babilonia.
2 Ikhú rey Nabucodonosor niʼtáñajunʼ rí magimbíin sátrapas, bi̱ nduyáá dí rígá, xa̱bu̱ ñajunʼ, bi̱ nuxna consejo, tesoreros,* bi̱ nunimbáníí xkujndu, xúgíinʼ bi̱ nuñewu̱u̱n xa̱bu̱ ga̱jma̱a̱ xúgíinʼ bi̱ gajkuáa ñawúúnʼ mbuyáá rí ndayóoʼ náa xuajin ma̱ngaa dí muni̱ ndxo̱o̱ dí rey Nabucodonosor nitsiji.
3 Ikhú bi̱ sátrapas, bi̱ nduyáá dí rígá, xa̱bu̱ ñajunʼ, bi̱ nuxna consejo, tesoreros, bi̱ nunimbáníí xkujndu, bi̱ nuñewu̱u̱n xa̱bu̱ ga̱jma̱a̱ xúgíinʼ bi̱ gajkuáa ñawúúnʼ mbuyáá rí ndayóoʼ náa xuajin, nigimbíin muni̱ ndxo̱o̱ dí rey Nabucodonosor nitsiji. Ma̱ngaa niguájun náa inuu dí rey Nabucodonosor nitsiji.
4 Bi̱ na̱jkha̱ kayóo ajngóo rey* niʼthí ga̱jma̱a̱ mbá aʼwá gakhi̱i̱: “Xúgiáanʼ ikháanʼla xa̱bu̱ bi̱ kúwá náa mixtiʼkhu xuajin ga̱jma̱a̱ bi̱ nuthi mixtiʼkhu ajngáa, gudxawíín kiʼtáñajunʼ rígi̱,
5 índo̱ gúdxawíín chi̱ji̱ʼ, flauta, arpa, ajua̱nʼ rí gíʼdoo cuérdóo, flauta rí mba̱a̱, ga̱jma̱a̱ i̱ʼwáʼ ajua̱nʼ rí nawáán, mbaʼyóoʼ musmbatíga̱la mu mbuyamajkuíí dí rey Nabucodonosor nitsiji dí mbawíí oro.
6 Bi̱ xásmbati̱go̱o̱ mu mbaʼyamajkuu, mbá nacha̱ miʼdama̱ʼa̱a̱n náa horno rí nakha”.
7 Ikha jngóo índo̱ niwáán chi̱ji̱ʼ, flauta, arpa, ajua̱nʼ rí gíʼdoo cuérdóo ga̱jma̱a̱ i̱ʼwáʼ ajua̱nʼ rí nawáán, xa̱bu̱ bi̱ naguwáʼ náa xúgíʼ xuajin ga̱jma̱a̱ bi̱ nuthi i̱ʼwáʼ ajngáa nismbati̱gu̱u̱n ga̱jma̱a̱ ndiyamajkuíí dí rey Nabucodonosor nitsiji dí mbawíí oro.
8 Nákha mbiʼi rúʼko̱, tikhuun xa̱bu̱ caldeos nigún kanuu ga̱jma̱a̱ nixrui̱gi̱i̱n xa̱bu̱ judíos.
9 Nitháán rey Nabucodonosor: “¡Asndu kámuu gáraxtaa tátá rey!
10 Tátá rey, ikháán má niratáñajunʼ dí xúgíinʼ xa̱bu̱ bi̱ gúdxawíín chi̱ji̱ʼ, flauta, arpa, ajua̱nʼ rí gíʼdoo cuérdóo, flauta rí mba̱a̱, ga̱jma̱a̱ i̱ʼwáʼ ajua̱nʼ rí nawáán, mbaʼyóoʼ rí musmbati̱gu̱u̱n ga̱jma̱a̱ mbuyamajkuíí dí ikháán nitatsiji dí mbawíí oro,
11 ga̱jma̱a̱ bi̱ xásmbati̱go̱o̱ mu mbaʼyamajkuu mbaʼyóoʼ miʼdama̱ʼa̱a̱n náa horno rí nakha.
12 Tikhuun judíos bi̱ ikháán nitandri̱gi̱i̱n mbuyáá rí ndayóoʼ náa xuajin Babilonia na̱nguá ndiyamajkuaaʼ tátá rey. Nindxu̱u̱ Sadrac, Mesac ga̱jma̱a̱ Abednego. Ikhiin tsíñún gúni̱ ñajúúnʼ dioses ndrígáaʼ ga̱jma̱a̱ tsíñún gúyamajkuíí dí ikháán nitatsiji dí mbawíí oro”.
13 Ikhú Nabucodonosor ra̱ʼkhá tháán nikásngañu̱u̱ʼ, niʼtáñajunʼ rí maguwáʼ kuya̱a̱ Sadrac, Mesac ga̱jma̱a̱ Abednego. Ikha jngóo nigún kudiin xa̱bu̱ bugi̱ náa inuu rey.
14 Nabucodonosor niʼthúu̱n: “Sadrac, Mesac, Abednego, lá gajkhun rí ikháanʼla tséni̱ ñajúúnʼ dioses ndrígióʼ ga̱jma̱a̱ tsíyala gúyamajkuíí rí ikhúún nitsiji dí mbawíí oro ráʼ.
15 Á mu rí xúgi̱ índo̱ gúdxawíín chi̱ji̱ʼ, flauta, arpa, ajua̱nʼ rí gíʼdoo cuérdóo, flauta rí mba̱a̱, ga̱jma̱a̱ i̱ʼwáʼ ajua̱nʼ rí nawáán, kuwáanʼla xawii musmbatíga̱la ga̱jma̱a̱ mbuyamajkuíí rí ikhúún nitsiji, májánʼ má. Mú, á mu nu̱ni̱ gaʼduunʼ dí mbuyamajkuííla miʼdama̱ʼa̱a̱nʼla mbá nacha̱ náa horno rí nakha. Tsáá lá dios gaʼngo̱o̱ gáʼni̱ káwáanʼla náa ñawúnʼ rá.”
16 Sadrac, Mesac ga̱jma̱a̱ Abednego niriʼñáán rey: “Tátá Nabucodonosor, xáʼyóoʼ má mutha̱a̱nʼxu ndiéjunʼ rí mu̱nixu̱ ga̱jma̱a̱ numuu rígi̱.
17 Á mu rí xúʼko̱ kaʼnii tátá rey, Dios bi̱ nu̱nixu ñajuunʼ maʼngo̱o̱ maʼni káwáanʼxu̱ náa horno rí nakha ga̱jma̱a̱ náa ñawáanʼ ikháán.
18 Tátá rey, maski má ajndu xáʼni káwáanʼxu, gíʼmaa ma̱ta̱ya̱a̱ rí xúnixu ñajúúnʼ dioses ndrígáaʼ ni má xúyamajkuííxu rí ikháán nitatsiji dí mbawíí oro”.
19 Ikhú Nabucodonosor ra̱ʼkhá tháán nikásngañu̱u̱ʼ kaʼyoo Sadrac, Mesac ga̱jma̱a̱ Abednego rí asndu nakujmaa xóo niriʼkhuu inuu.* Ikha jngóo niʼtáñajunʼ rí mutsigáá horno mbá juwan nuthu itháan ki xóo rí naguʼwún mutsigáá.
20 Ma̱ngaa niʼtáñajúúnʼ tikhuun xa̱bekha bi̱ xkujiinʼ bi̱ kúwá náa soldado ndrígóo mu muruʼwa̱a̱ Sadrac, Mesac ga̱jma̱a̱ Abednego ma̱ngaa rí mudami̱ʼi̱i̱n náa horno rí nakha.
21 Ikha jngóo niruʼwu̱u̱n ga̱jma̱a̱ nidami̱ʼi̱i̱n náa horno rí nakha asndu xóó kagúwúnʼ xtíñún rí mbi̱jua̱, xó má xtíin rí grígu edxu̱ún ga̱jma̱a̱ i̱ʼwáʼ xtiñúún.
22 Xó má kiʼtáñajunʼ rí niʼthí rey gakhii wéñuuʼ nindxu̱u̱ ga̱jma̱a̱ horno mbaʼ nujngoó mijkha ki xóo rí naguʼwún nutsigáá, riʼyu̱u̱ aguʼ nitsikíin xa̱bu̱ bi̱ nigún kuya̱a̱ Sadrac, Mesac ga̱jma̱a̱ Abednego.
23 Mú ajtsíin xa̱bu̱ bugi̱, Sadrac, Mesac ga̱jma̱a̱ Abednego, asndu kaxtuʼún nindriñinʼ náa awúu̱n horno.
24 Ikhú rey Nabucodonosor nimíñuu, mbá nacha̱ nitu̱jxu̱u̱ ga̱jma̱a̱ nirajxu̱u̱n xa̱bu̱ bi̱ guáʼdáá numún: “Lá raʼkháa ajtsíin xa̱bu̱ niruʼwúún ga̱jma̱a̱ niʼdami̱ʼi̱i̱n náa awúu̱n aguʼ ráʼ.” Ikhiin niriʼñáán rey: “Xúʼko̱ tátá rey”.
25 Ikhaa niʼthí: “¡Gu̱ya̱a̱! Nda̱ñu̱u̱n a̱jkhui̱i̱n xa̱bu̱ bi̱ jnguʼwún náa awúu̱n aguʼ asndu nda̱a̱ rí egíʼníí nditháan ga̱jma̱a̱ bi̱ maʼni a̱jkhui̱i̱n nindxu̱u̱ xóo mbáa a̱ʼdióo dios”.
26 Nabucodonosor ni̱jkha̱ kanuu náa riejun horno rí nakha ga̱jma̱a̱ niʼthí: “¡Sadrac, Mesac, Abednego! ¡Xa̱bi̱i̱ Dios bi̱ phú mba̱a̱! ¡Agajnáaʼ ga̱jma̱a̱ gaguwaʼ gi̱i̱!”. Ikhú Sadrac, Mesac ga̱jma̱a̱ Abednego nigájníin náa tapo̱o̱ aguʼ.
27 Bi̱ nindxu̱ún sátrapas, bi̱ nduyáá dí rígá, xa̱bu̱ ñajunʼ ga̱jma̱a̱ xa̱bu̱ bi̱ guáʼdáá numún náa rey bi̱ nigimbíin ikhí ndiyáá rí xa̱bu̱ bugi̱ nda̱a̱ rí niʼniún aguʼ. Nimbá xtátsúun edxu̱ún na̱nguá nikha ni má xtíñún rí mbi̱jua̱, nindxu̱u̱ xó má nákha ginii, ni má na̱nguá ndajtsíinʼ gúní.
28 Ikhú Nabucodonosor niʼthí: “Gaguma mba̱a̱ Dios ndrígóo Sadrac, Mesac ga̱jma̱a̱ Abednego bi̱ nikuʼmaa ángel ndrígióo ga̱jma̱a̱ niʼni káwíin xa̱bi̱i̱. Ikhiin nikumu̱ún kuyáá ikhaa, na̱nguá ninimbu̱ún kiʼtáñajunʼ ndrígóo rey ga̱jma̱a̱ asndu támiñún rí makhañún ki xóo rí muni̱ ñajuunʼ ga̱jma̱a̱ rí mbuyamajkuíí i̱mba̱a̱ dios bi̱ raʼkháa Dios ndrígu̱ún.
29 Ikha jngóo na̱xna̱ kiʼtáñajunʼ rígi̱: Asndu tsáá xa̱bu̱, tséʼniuu má náa xuajñuu o ajngáa dí naʼthí, á mu naʼthí mbá dí raʼkhí ga̱jma̱a̱ numuu Dios ndrígóo Sadrac, Mesac ga̱jma̱a̱ Abednego xa̱bu̱ bugi̱ murujkuii ga̱jma̱a̱ goʼwóo maʼga̱nú mani̱ndxu̱u̱ mbá letrina* náa magún xúgíinʼ xa̱bu̱, numuu rí ndawa̱a̱ i̱mba̱a̱ dios xóo bugi̱ bi̱ ma̱ndoo maʼni kríña̱a̱nʼ”.
30 Nda̱wa̱á rey, nixnúu mbá ñajunʼ rí gíʼdoo numuu* Sadrac, Mesac ga̱jma̱a̱ Abednego náa mbayuuʼ Babilonia.
Mbaʼa nota
^ Náa ajngáa arameo naʼthí, “mbá xtiʼkhuu”. Mbáa rígi̱ nindxu̱u̱ mbá columna.
^ Itháán maʼni 27 metro. Atayáá apén. B14.
^ Mbá 2,7 metro. Atayáá apén. B14.
^ O “bi̱ nudaduun mbújkha̱a̱”.
^ Náa ajngáa arameo naʼthí, “heraldo”. Nindxu̱u̱ mbáa xa̱bu̱ bi̱ nañejunʼ náa guʼwá ñajunʼ mu maʼthí pa̱jnu mbá kiʼtáñajunʼ o xtángoo ndrígóo rey.
^ O “niriʼkhuu mbá kayuuʼ xóo eʼniún”.
^ O mbáa “náa nagadíi náskha, náa nagadíi ambá”.
^ Náa ajngáa arameo naʼthí, “niʼni rí magiʼdoo numuu”.
