Daniel 7:1-28
-
Náa niwasngájmáá ndiʼñún a̱jkhui̱i̱n xujkhú xkawi̱i̱nʼ (1-8)
-
Nagájnuu mbá chi̱ji̱ʼ chíʼgíiʼ ga̱jma̱a̱ naʼnimbamínáʼ (8)
-
-
Xa̱bu̱ Nikhi̱i̱ bi̱ mba̱yu̱u̱ʼ má tsiguʼ xtáa nigi̱ʼi̱ maʼthí (9-14)
-
Nagruigú maʼtáñajunʼ xóo rey mbáa a̱ʼdióo xa̱biya̱ (13, 14)
-
-
Najuiʼthá ndiéjuunʼ eyoo gáʼthúu̱n rí niwasngájmáá Daniel (15-28)
7 Náa awúu̱n rí mbá tsiguʼ dí niʼtáñajunʼ Belsasar rey ndrígóo Babilonia, Daniel nigiʼdoo mbá xnuʼndaa náa rígá rí niwasngájmáá* índo̱ kabóoʼ náa xia̱wuu. Nda̱wa̱á niʼnirámáʼ rí nigundaa, kuduun niʼnirámáʼ xúgíʼ rígi̱.
2 Daniel niʼthí:
“Dí niwasngájmuʼ mbruʼun, ndi̱yo̱o̱ giñánʼ dí naxnúu náa a̱jkhu̱ níʼkhóo mekhu ga̱jma̱a̱ naʼni dí mambajxu̱u̱ lamáa* dí mba̱a̱.
3 A̱jkhui̱i̱n xujkhú xkawi̱i̱nʼ bi̱ mbaʼwi̱i̱n nigájnún náa lamáa, mámbáa rí ikhaa nindxu̱u̱ mixtiʼkuii.
4 Bi̱ timbáa nindxu̱u̱ xóo mbáa león, ga̱jma̱a̱ gíʼdoo xpíjpiúu xóo bi̱yú. Niguanúʼ ndi̱yo̱o̱ asndu índo̱ nixmajuíi xpíjpiúu, nixmatajxi̱i̱ náa ku̱ba̱ʼ nini̱ rí mawi̱ji̱ ga̱jma̱a̱ a̱jma̱ rajkúu xóo mbáa xa̱bu̱ ga̱jma̱a̱ nixnáá a̱jkiu̱u̱n xóo mbáa xa̱bu̱.
5 Ndi̱yo̱o̱ bi̱ maʼni raga̱jmi̱i̱n xujkhú xkawi̱i̱nʼ nindxu̱u̱ xóo mbáa oso. Nikujxi̱ mbá ñawúunʼ ga̱jma̱a̱ ajtsú itsu̱ tsuxta̱ kuajtuun ga̱jma̱a̱ iñuuʼ. Ga̱jma̱a̱ rígi̱ nijuiʼtháán: ‹Atujxa̱a̱ʼ, mba̱a̱ xuwiʼ gíʼtsu›.
6 Nda̱wa̱á dí ndi̱yo̱o̱ rígi̱, niyejxi̱ má xúʼko̱ ga̱jma̱a̱ ndi̱yo̱o̱ imba̱a̱ xujkhú xkawi̱i̱ʼ, nindxu̱u̱ xóo mbáa indiiʼ mixtíi,* mú náa tsu̱du̱u̱ gíʼdoo a̱jkhu̱ xpíjpiúu xóo mbáa xujkhúʼ bi̱ na̱jkha̱ rijma̱a̱. Xujkhú xkawi̱i̱ʼ buʼko̱, gíʼdoo a̱jkhu̱ edxu̱u̱, ga̱jma̱a̱ nigruigú rí maʼtáñajunʼ.
7 Nda̱wa̱á niyejxi̱ má xúʼko̱ náa rí niwasngájmuʼ dí mbruʼun, ndi̱yo̱o̱ bi̱ maʼni ragajkui̱i̱n xujkhú xkawi̱i̱nʼ, nindxu̱u̱ gamíi, xkawi̱i̱ʼ ga̱jma̱a̱ ra̱ʼkhá tháán mixkujiiʼ ga̱jma̱a̱ gíʼdoo iñuuʼ mba̱ʼu̱ dí hierro. Na̱ʼkhu̱jku ga̱jma̱a̱ naʼkungaa, xúgíʼ rí naguanúu najngúpri̱ga̱ ga̱jma̱a̱ rajkhúu. Nindxu̱u̱ mixtiʼkuii náa xúgíinʼ xujkhú xkawi̱i̱nʼ bi̱ ndi̱ñu̱u̱n ginii ga̱jma̱a̱ gíʼdoo gu̱wa̱ʼ chi̱jyu̱u̱ʼ.
8 Índo̱ xtáá ra̱yo̱o̱ chi̱jyu̱u̱ʼ, ndi̱yo̱o̱ rí náa tapo̱o̱ i̱ʼwáʼ chi̱jyu̱u̱ʼ, nigájnuu i̱mba̱ chi̱ji̱ʼ dí chíʼgíiʼ,* náa inuu ikhaa nixmajuíi ajtsú chi̱ji̱ʼ rí ginii. Ga̱jma̱a̱ ndi̱yo̱o̱ rí chi̱ji̱ʼ rúʼko̱ gíʼdoo iduu xóo iduu mbáa xa̱bu̱ ga̱jma̱a̱ mbá rawuunʼ rí naʼthí ajngáa rí naʼnimbamínáʼ.
9 Ndi̱yo̱o̱ má xúʼko̱ asndu índo̱ nitri̱ga̱ xílí* rí mutañajunʼ, ikhú Xa̱bu̱ Nikhi̱i̱ bi̱ mba̱yu̱u̱ʼ má tsiguʼ xtáa nigi̱ʼi̱. Xtíñuu nindxu̱u̱ miʼxídiʼ, ga̱jma̱a̱ xtátsúun edxu̱u̱ nindxu̱u̱ xóo mugu̱ rí mikaʼwu. Xíliu̱u̱ nindxu̱u̱ xóo riʼyu̱u̱ aguʼ, llántóo nindxu̱u̱ aguʼ rí nakha.
10 Náa ikhaa nagájnuu mbá mañu rí nindxu̱u̱ aguʼ. Ga̱jma̱a̱ kúwá mil millares ángeles bi̱ nuni̱ ñajuunʼ, ga̱jma̱a̱ diez mil nuthu rí diez mil bi̱ wájun náa inuu ikhaa. Bi̱ naʼnimbánuu xkujndu* nigi̱ʼi̱ ga̱jma̱a̱ nimbaʼtoo mbaʼa libro.
11 Ikhú niguanúʼ niyejxi̱ ga̱jma̱a̱ numuu ajngáa rí naʼthí chi̱ji̱ʼ rí naʼnimbamínáʼ. Ndi̱yo̱o̱ asndu índo̱ nixiyáa xujkhú xkawi̱i̱ʼ ga̱jma̱a̱ nini̱ gámbáa xuyuuʼ ga̱jma̱a̱ nirajkua̱a̱ náa aguʼ.
12 Mú eʼwíinʼ xujkhú xkawi̱i̱nʼ nigajta káñúnʼ rí mutañajunʼ ga̱jma̱a̱ niniñu̱u̱nʼ makuwá nguáthá tiempo.
13 Niyejxi̱ má xúʼko̱ náa rí niwasngájmuʼ dí mbruʼun, ndi̱yo̱o̱ ni̱ʼkha̱ náa du̱u̱n dí rígá mekhuíí mbáa bi̱ nindxu̱u̱ xóo a̱ʼdióo xa̱biya̱, ga̱jma̱a̱ nixnáá mato̱ʼo̱o̱ náa xtáa Xa̱bu̱ Nikhi̱i̱ bi̱ mba̱yu̱u̱ʼ má tsiguʼ xtáa ga̱jma̱a̱ nigún kuya̱a̱ náa inuu.
14 Nigruigú rí maʼtáñajunʼ, gamajkhu ga̱jma̱a̱ mbá xuajin rí maʼtáñajunʼ, mu xúʼko̱ xúgíinʼ xa̱bu̱ bi̱ naguwáʼ náa mixtiʼkhu enii xuajin bi̱ nuthi i̱ʼwáʼ ajngáa muni̱ ñajuunʼ. Rí maʼtáñajunʼ mbajyúuʼ asndu kámuu, xáʼga̱nú mambáa ga̱jma̱a̱ náa naʼtáñajunʼ xáguma gámbáa.
15 Ikhúún, Daniel, ra̱ʼkhá tháán nixmiéjunʼ* ga̱jma̱a̱ nimíñúʼ niʼni rí niwasngájmuʼ.
16 Ni̱jkhá kanuu náa mbáa bi̱ wíji̱ ikhí ga̱jma̱a̱ nirajxu̱u̱ ndiéjunʼ phú eyoo gáʼthúu̱n xúgíʼ rígi̱. Ikhaa niriʼñuʼ ga̱jma̱a̱ niʼni mba̱yo̱o̱ ndiéjunʼ eyoo gáʼthúu̱n xúgíʼ rúʼko̱:
17 ‹A̱jkhui̱i̱n xujkhú xkawi̱i̱nʼ mbaʼwi̱i̱n bugi̱, nindxu̱ún a̱jkhui̱i̱n reyes bi̱ mutañajunʼ náa tsu̱du̱u̱ ku̱ba̱ʼ.
18 Bi̱ kaxtaʼwíin bi̱ nuni̱ ñajuunʼ bi̱ phú Mba̱a̱ mudrigú rí mutañajunʼ ga̱jma̱a̱ makuwá rutañajunʼ asndu kámuu, xúʼko̱, asndu kámuu›.
19 Ikhú nindoʼ mba̱yo̱o̱ itháan ga̱jma̱a̱ numuu bi̱ maʼni ragajkui̱i̱n xujkhú xkawi̱i̱nʼ, bi̱ nindxu̱u̱ mixtiʼkuii ki xóo eʼwíinʼ, nindxu̱u̱ gamíi, gíʼdoo iñuuʼ dí hierro ga̱jma̱a̱ xngáñuuʼ dí cobre, na̱ʼkhu̱jku, naʼkujngaa ma̱ngaa najngápriga̱ ga̱jma̱a̱ rajkhúu rí xóó naguanúu.
20 Ma̱ngaa nindoʼ mba̱yo̱o̱ itháán ga̱jma̱a̱ numuu gu̱wa̱ʼ chi̱ji̱ʼ dí frúwan náa edxu̱u̱ ma̱ngaa numuu imbo̱o̱ chi̱jyu̱u̱ʼ dí nikráʼáan dí náa inuu nixmajuíi ajtsú, chi̱ji̱ʼ rí gíʼdoo iduu ga̱jma̱a̱ rawuunʼ rí naʼthí ajngáa rí naʼnimbamínáʼ ga̱jma̱a̱ nakujmaa rí nindxu̱u̱ itháán mba̱a̱ ki xóo i̱ʼwáʼ.
21 Niyejxi̱ má xúʼko̱, xú káʼnii chi̱ji̱ʼ xtáa raxmína̱ʼ gajmíi̱nʼ bi̱ kaxtaʼwíin ga̱jma̱a̱ naʼngo̱o̱ naʼni gajmíi̱nʼ,
22 asndu índo̱ ni̱ʼkha̱nú Xa̱bu̱ Nikhi̱i̱ bi̱ mba̱yu̱u̱ʼ má tsiguʼ xtáa niʼnimbánuu numún bi̱ kaxtaʼwíin bi̱ nuni̱ ñajuunʼ bi̱ phú Mba̱a̱, ga̱jma̱a̱ ni̱jkha̱nú má mbiʼi rí nijuaxtaʼwíí mu bi̱ kaxtaʼwíin mudrigú rí mutañajunʼ.
23 Rígi̱ rí niʼthí ikhaa: ‹Bi̱ maʼni a̱jkhui̱i̱n xujkhú xkawi̱i̱ʼ nindxu̱u̱ bi̱ maʼni a̱jkhui̱i̱n xa̱bu̱ ñajunʼ bi̱ makujmaa náa tsu̱du̱u̱ ku̱ba̱ʼ. Nindxu̱u̱ mixtiʼkuii ki xóo eʼwíinʼ xa̱bu̱ ñajunʼ, maʼni gámbóo xúgíʼ ku̱ba̱ʼ, makujmbiri̱ga̱ ga̱jma̱a̱ mikujngaa.
24 Gu̱wa̱ʼ chi̱ji̱ʼ nindxu̱ún gu̱wi̱i̱nʼ reyes bi̱ magajnún náa xa̱bu̱ ñajunʼ buʼko̱. Ga̱jma̱a̱ nda̱wa̱á rí ikhiin magajnúu i̱mba̱a̱ rey, bi̱ mani̱ndxu̱u̱ mixtiʼkuii ki xóo bi̱ ginii ga̱jma̱a̱ maríya̱ʼ gamajkhún bi̱ ajtsíin reyes.
25 Ikhaa maʼtá wéñuuʼ bi̱ phú Mba̱a̱ ga̱jma̱a̱ maʼni ngíníi má xúʼko̱ bi̱ kaxtaʼwíin bi̱ nuni̱ ñajuunʼ Dios bi̱ xtáa mitsidanʼ. Maʼniminaʼ mariʼkhu̱u̱ tiempo ga̱jma̱a̱ xtángoo ga̱jma̱a̱ ikhiin majuixnájxi̱i̱n náa ñawúunʼ mbá tiempo, ajtsú tsiguʼ tikhu.*
26 Mú bi̱ naʼnimbánuu xkujndu nigi̱ʼi̱ ga̱jma̱a̱ ikhú nirígú káyúuʼ rí naʼtáñajunʼ, mu maʼni gámbáa mbá kayuuʼ.
27 Ku̱ba̱ʼ rí nutañajuíínʼ reyes, tsiaki̱i̱ ga̱jma̱a̱ rí mitsaanʼ* dí guáʼdáá xúgíinʼ xa̱bu̱ ñajunʼ bi̱ kúwá náa xúgíʼ agoo mekhu, nijuixnájxu̱u̱n bi̱ kaxtaʼwíin bi̱ nuni̱ ñajuunʼ bi̱ phú Mba̱a̱. Rí mutañajunʼ mbajyúuʼ asndu kámuu ga̱jma̱a̱ xúgíinʼ xa̱bu̱ ñajunʼ muni̱ ñajúúnʼ ga̱jma̱a̱ munimbu̱u̱n kuñúún›.
28 Gi̱i̱ guambari̱go̱o̱ rí nigúndaa. Ikhúún, Daniel, rí nindxa̱ʼwa̱mínáʼ niʼni dí maxmiéjunʼ wéñuuʼ, dí asndu niʼni miʼxájtiúúnʼ, mú niyejxíi xúgíʼ rígi̱ náa a̱jkiu̱nʼ”.
Mbaʼa nota
^ O “visión”.
^ O “mar”.
^ O “leopardo”.
^ O “lajuíin”.
^ O “trono”.
^ Náa ajngáa arameo naʼthí, “guʼwá ñajunʼ”.
^ Náa ajngáa arameo naʼthí, “tsiaki̱i̱ ndrígóʼ xtáa”.
^ O “ajtsú tiempo tikhu”.
^ O “nagui̱i̱”.
