Daniel 9:1-27
9 Náa awúu̱n rí mbá tsiguʼ dí nixtáa raʼtáñajunʼ Darío a̱ʼdióo Asuero, mbáa bi̱ na̱ʼkha̱ náa xa̱bu̱ medos bi̱ nigíiʼ mu mani̱ndxu̱u̱ rey náa nitañajunʼ xa̱bu̱ caldeos,
2 náa timbá tsiguʼ rí niʼtáñajunʼ, ikhúún, Daniel, nijkhánú nikro̱ʼo̱ʼ dí naʼthí náa libro* náa na̱ʼkha̱ ajngóo Jeobá dí niʼthúu̱n profeta* Jeremías, rí Jerusalén maguanáa mbá 70 tsiguʼ.
3 Ikhú ndiʼyáa’ Jeobá, Dios bi̱ gajkhun, nitakáñuu ga̱jma̱a̱ nirkuéyiminaʼ, niʼgíʼ xtíin mi̱du̱* ga̱jma̱a̱ nixtrámaminaʼ idiʼ.
4 Nitakáñuu Jeobá Dios ndrígóʼ ga̱jma̱a̱ ni̱thu̱u̱n dí nirígá. Nitha̱:
“Tátá Jeobá, Dios bi̱ gajkhun, bi̱ mba̱a̱ ga̱jma̱a̱ gamíi, bi̱ naʼnimbánuu rí nakudaminaʼ maʼni ga̱jma̱a̱ nasngájmúún ngajua rí tsétumuu* bi̱ nandún kuyáá ma̱ngaa bi̱ nunimbu̱u̱n kiʼtáñajunʼ ndrígóo,
5 nixuʼdámíjnáxu̱ aʼkhá, ninixu̱ dí ra̱májánʼ, ninixu̱ dí xkawiʼ ga̱jma̱a̱ ninújngurámuxu̱ inaaʼ, nigájnuri̱yu̱xu̱ náa kiʼtáñajunʼ ndrígáaʼ ga̱jma̱a̱ náa xtángoo dí ikháán niraxnúxu̱ʼ.
6 Na̱nguá ni̱nimbuxu̱ kuñu̱u̱n xa̱bia̱a̱ʼ bi̱ nindxu̱ún profetas, ikhiin nithi ga̱jma̱a̱ numuu mbiʼyaaʼ náa inún reyes ndrígúxu̱, náa inún príncipes ndrígúxu̱, náa wajin xiʼñúxu ma̱ngaa náa inún xúgíinʼ xa̱bu̱ xuajin.*
7 Tátá Jeobá, rí jmbu kaʼyaaʼ ikháán, mú xó má nandoo nakujmaa xúgi̱, dí ikháanʼxu̱ nigájnuu gamajkuxu̱,* xa̱bu̱ Judá, xa̱bu̱ xuajin Jerusalén ga̱jma̱a̱ xúgíinʼ xa̱bu̱ Israel, bi̱ kúwá mijngii xúʼko̱ má bi̱ kúwá mitsínguánʼ, náa xúgíʼ ku̱ba̱ʼ rí ikháán nitaxídiriʼiin ga̱jma̱a̱ numuu rí táguájun jmbu náa ikháán.
8 Tátá Jeobá, ga̱jma̱a̱ numuu dí nixuʼdámijnáxu̱ aʼkhá náa ikháán niʼni dí magajnúu gamajkuxu̱*, xúʼko̱ má reyes ndrígúxu̱, príncipes ndrígúxu̱ ga̱jma̱a̱ wajin xiʼñúxu.
9 Tátá Jeobá Dios ndrígúxu̱, agáwíinʼ a̱jkia̱a̱nʼ ga̱jma̱a̱ atani̱ mba̱a̱ a̱jkia̱a̱nʼ xtayuxu, numuu rí nixuxímijnáxu̱ náa inaaʼ.
10 Na̱nguá ninimbuxu̱ aʼwóo Jeobá Dios ndrígúxu̱, tunimbánííxu̱ xtángoo rí nixnúxu̱ náa majñu̱únʼ xa̱bi̱i̱ bi̱ nindxu̱ún profetas.
11 Xúgíinʼ xa̱bu̱ Israel ninújngurámúúnʼ Xtángoo ndrígáaʼ ga̱jma̱a̱ nigájnuriñu̱u̱nʼ náa nirathúún magún índo̱ túnimbáníí aʼwáaʼ, ikhaa rúʼko̱ numuu rí nitatsíñáánʼ dí majuiʼta tsríguáanʼxu̱ xó má naʼthí náa Xtángoo ndrígóo Moisés, xa̱bi̱i̱ Dios bi̱ gajkhun, numuu rí ikháanʼxu̱ nixuʼdámíjnáxu̱ aʼkhá náa ikháán.
12 Ikhaa* niʼnimbánuu ajngóo rí niʼthí maguáʼnííxu̱ ikháanʼ xúʼko̱ má xa̱bu̱ bi̱ nitañajunxu̱* índo̱ niʼni ma̱ʼkha̱ mbá ga̱ʼkhu̱ mba̱a̱ náa ikháanʼxu̱. Nimbá miʼtsu tárígá náa agoo mekhu xóo rí nirígá náa Jerusalén.
13 Xúgíʼ gamiéjunʼ rígi̱ ni̱ʼkha̱ náa ikháanʼxu̱, xó má kiʼnirámáʼ náa Xtángoo ndrígóo Moisés. Mú ikháanʼxu̱ na̱nguá ninda̱ʼa̱a̱ Jeobá Dios ndrígúxu̱ rí maʼni mba̱a̱ a̱jkiu̱u̱n kaʼyuxu̱ ni má tuniʼñáánʼxu̱ ru̱ni̱ dí raʼkhí, ni má na̱nguá niʼgíʼ edxu̱xu̱ʼ náa rí gajkhun.
14 Ikha jngóo Jeobá nixtáa xawii ga̱jma̱a̱ nikuʼma gamiéjunʼ rígi̱ náa ikháanʼxu̱, numuu rí Jeobá Dios ndrígúxu̱ nindxu̱u̱ jmbii náa xúgíʼ rí niʼni, mú ikháanʼxu̱ na̱nguá ni̱nimbuxu̱ aʼwóo.
15 Tátá Jeobá Dios ndrígúxu̱, ikháán nindxa̱a̱ʼ bi̱ niríya̱a̱ʼ xuajñuu náa ku̱ba̱ʼ ndrígóo Egipto ga̱jma̱a̱ ñawáanʼ dí gíʼdoo tsiaki̱i̱, ma̱ngaa nitani̱ rí mbiʼyaaʼ marigá asndu mbiʼi xúgi̱, nixuʼdámíjnáxu̱ aʼkhá ga̱jma̱a̱ ninixu̱ dí ra̱májánʼ.
16 Mbá péñu* Jeobá, garmáʼáan a̱jkia̱a̱nʼ náa xúgíʼ dí nitani̱ dí nindxu̱u̱ jmbu, atatsíñááʼ rakásnga̱ña̱a̱ʼ xtayáá xuajñaanʼ Jerusalén, kúbá mikaʼwu ndrígáaʼ, numuu rí ga̱jma̱a̱ numuu aʼkhúxu̱ ma̱ngaa rí nikiéʼkhúún wajin xiʼñúxu, Jerusalén ga̱jma̱a̱ xuajñaanʼ nindxu̱u̱ rí nutsijmaa xúgíinʼ xa̱bu̱ bi̱ kúwá náa mbájndi kúwáanʼxu.
17 Rí xúgi̱ Dios ndrígúxu̱ atadxawíín rí naʼtájkháan xa̱bia̱a̱ʼ ga̱jma̱a̱ rí xtáa randa̱ʼa̱a̱ʼ. Ga̱jma̱a̱ numaaʼ má ikháán Tátá Jeobá, atani̱ rí mambiʼi inaaʼ náa guʼwá rí mikaʼwu dí niguanáa.
18 ¡Dios ndrígúxu̱, atagíʼ cháʼwáanʼ ga̱jma̱a̱ atadxawíín! Atarbáʼtáá idaaʼ ga̱jma̱a̱ atayáá xóo niguma gámbáanʼxu̱ ikháanʼ xúʼko̱ má xuajin rí kayá mbiʼyaaʼ, tsétakáñáanʼxu̱ numuu rí májánʼ nindxu̱u̱ dí ninixu̱, nutakáñáanʼxu̱ numuu rí ikháán nindxa̱a̱ʼ mbáa Dios bi̱ nagáwíinʼ a̱jkiu̱u̱n.
19 Tátá Jeobá, atadxawíín. Atani̱ mba̱a̱ a̱jkia̱a̱nʼ Tátá Jeobá. ¡Tátá Jeobá, atagíʼ edxa̱a̱ʼ matadxawíín ga̱jma̱a̱ atayáʼ rí matani̱! Xájyáaʼlá Dios ndrígóʼ, mani̱ndxu̱u̱ ga̱jma̱a̱ numaaʼ má ikháán, numuu rí xuajñaanʼ ga̱jma̱a̱ xa̱bu̱ bi̱ kúwá ikhí kuya̱ mbiʼyaaʼ”.
20 Índo̱ ikhúún kaʼníí xtáá ratájkháan, nákhá kaʼníí xtáá ra̱ta̱ pa̱jnu rí nikiéʼkunʼ ga̱jma̱a̱ aʼkhá rí nikudaminaʼ xuajñunʼ Israel, nákhá kaʼníí xtáá ra̱ndo̱ʼo̱o̱ ga̱jma̱a̱ natakáñuu Jeobá Dios ndrígóʼ ga̱jma̱a̱ numuu kúbá mikaʼwu ndrígóo,
21 índo̱ kaʼníí xtáá ratájkháan, ni̱ʼkha̱ náa ikhúún Gabriel, xa̱bu̱ bi̱ ndi̱yo̱o̱ náa rí niwasngájmuʼ* nákhá ginii, ni̱ʼkha̱ náa hora rí najuixnájxi̱ tsigijñaʼ rí wakíʼ, índo̱ ikhúún néʼngo̱ʼ má wéñuuʼ.
22 Ikhaa nimbáyuʼ mikro̱ʼo̱ʼ, niʼthúnʼ:
“Daniel, ni̱ʼkhá gámbáyáaʼ mikrua̱ʼa̱a̱ʼ ga̱jma̱a̱ ma̱ta̱ya̱a̱ ndiéjunʼ gárígá.
23 Índo̱ nitagíʼdi̱i̱ niratájkáan, nigruígú mbá ajngáa ikha jngóo na̱ʼkhá gátháanʼ ajngáa rígi̱, numuu rí ikháán nindxa̱a̱ʼ mbáa xa̱bu̱ bi̱ gíʼdoo wéñuuʼ numuu.* Ikha jngóo atayáá májánʼ rígi̱ ga̱jma̱a̱ gikrua̱ʼa̱a̱ʼ dí niwasgájmaaʼ.
24 Dios niraʼwíí dí náa xa̱bu̱ xuajñaanʼ xúʼko̱ má náa xuajñaanʼ dí mikaʼwu manújngoo mbá 70 xmáná* mu maguma gámbáa dí raʼkhí, mu mambáa aʼkhá, mu majngudi̱i̱ rí nikiéʼkhúún xa̱bu̱, mu marigá dí jmbu asndu kámuu, mu mixnáá sello* rí niwasgájma ga̱jma̱a̱ dí nijuiʼtáriyaʼ* ma̱ngaa rí majuixtaʼwíí náa rí phú Mikaʼwu.
25 Gíʼmaa ma̱ta̱ya̱a̱ ga̱jma̱a̱ mikrua̱ʼa̱a̱ʼ, rí mbiʼi dí magajnúu kiʼtáñajunʼ dí maguma̱a̱ ga̱jma̱a̱ maguma májáanʼ Jerusalén asndu índo̱ gákujmaa Mesías,* bi̱ Kayá edxu̱u̱,* mbaʼyóoʼ manújngoo mbá 7 xmáná ma̱ngaa mbá 62 xmáná. Maguma̱a̱ ga̱jma̱a̱ maguma májáanʼ xúʼko̱ má mbá xuáá ga̱jma̱a̱ mbá iñáʼ, mú rígi̱ marigá mbiʼi dí marigá ga̱ʼkhu̱.
26 Nda̱wa̱á rí gájngoo 62 xmáná, muxiyáa* Mesías, ikhaa xágiʼdoo nimbá.
Xuajñuu mbáa bi̱ kayá edxu̱u̱ bi̱ na̱ʼkha̱, maʼni gámbóo xuajin ga̱jma̱a̱ mbaaʼ rí mikaʼwu. Magu̱ʼwu̱ xuajin rí mikaʼwu. Marigá guerra asndu índo̱ gártumuu mbiʼi, rí niwaxtaʼwíí marigá nindxu̱u̱ dí maguma gámbáa.
27 Ikhaa maʼni rí magiʼdoo numuu má xúʼko̱ rí nimbánuu mu xúʼko̱ ma̱ndoo mambáñún mbaʼin, maʼni dí tsigijñaʼ ga̱jma̱a̱ rí najuixnájxi̱ mambá náa tu̱mba̱a̱ xmáná.
Náa xpíjpiúu rí xkawiʼ magrigu bi̱ maʼni gámbáa, Dios niraʼwíí dí magadírámúunʼ má xúʼko̱ náa bi̱ xtáa ramínúuʼ asndu índo̱ gaguma gámbáa”.
Mbaʼa nota
^ Xóo muʼthá, libro rí mitsuʼkháan.
^ O “gaʼyee, bi̱ naʼthí dí marigá”.
^ Náa ajngáa hebreo naʼthí, “xúgíinʼ xa̱bu̱ bi̱ kúwá náa tsu̱du̱u̱ ku̱ba̱ʼ”.
^ Náa ajngáa hebreo naʼthí, “nigájnuu gamajkhuu inuxu̱”.
^ Náa ajngáa hebreo naʼthí, “nigájnuu gamajkhuu inuxu̱”.
^ Náa ajngáa hebreo naʼthí, “bi̱ ninimbáníí numuxu̱”.
^ Xóo muʼthá, Dios.
^ O “ataniu̱ʼ mbá rí májánʼ”.
^ O “visión”.
^ O “bi̱ nandún kuyáá wéñuuʼ”.
^ Xóo muʼthá, xmáná dí nandoo gáʼthúun tsiguʼ.
^ Xóo muʼthá, majuiʼthá rí mambanúu.
^ Náa ajngáa hebreo naʼthí, “profeta”.
^ O “bi̱ Kixtiyáaʼ”.
^ O “bi̱ Maʼni káwíin”.
^ Náa ajngáa hebreo naʼthí, “muturíguíi”.
